សម្តេចហ៊ុន សែនរំលឹកមន្ត្រីសាធារណៈគារនិងប្រាប់ថាប្រជាជនខ្មែរប្រមាណ៥០ម៉ឺននាក់នឹងទទួលចាក់វ៉ាក់សាំងចិនមុនចូលឆ្នាំខ្មែរ
16-September-2024 / ផ្សេងៗ
ភ្នំពេញ៖នៅថ្ងៃសុក្រទី២២មករានេះក្នុងពិធីសម្ពោធសមិទ្ធផលថ្មីរបស់ក្រសួងដឹកជញ្ជូនសម្តេចហ៊ុន សែនបានប្រកាសថាប្រជាជនខ្មែរប្រមាណ៥០ម៉ឺននាក់នឹងទទួលចាក់វ៉ាក់សាំងរបស់ចិនមានឈ្មោះថា«Sinopharm»ដែលត្រូវបានចិនអះអាងថាមានប្រសិទ្ធភាព៧៨%នៅមុនចូលឆ្នាំខ្មែរខាងមុខនេះ។
សម្តេចហ៊ុន សែន លើកឡើងថាបើទោះបីជាវ៉ាក់សាំងចិននេះនៅមិនទាន់អនុញ្ញាតឲ្យប្រើប្រាស់ដោយអង្គការសុខភាពពិភពលោកក៏ពិតមែន ។ក៏ប៉ុន្តែកាលៈទេសៈនេះកម្ពុជានឹងមិនបន្តរង់ចាំទៀតនោះទេដោយសារបណ្តាប្រទេសមួយចំនួនបានចាក់ជូនប្រជាពលរដ្ឋគេរួចទៅហើយ។យន្តការនេះគឺជាផ្នែកមួយនៃការទាក់ទាញអ្នកវិនិយោគមកកាន់កម្ពុជាបន្ថែមទៀតដោយគេមិនចាត់ទុកថាកម្ពុជាជាតំបន់មានហានិភ័យខ្ពស់។
សម្តេចហ៊ុន សែន អះអាងថាសម្តេចនឹងជាបុគ្គលដំបូងគេបង្អស់ដែលនឹងចាក់វ៉ាក់សាំងរបស់ចិននិងមានការចូលរួមដោយមន្ត្រីឥស្សរជនជាន់ខ្ពស់នៅក្នុងរដ្ឋាភិបាលផងដែរ។ តាមរយៈយន្តការCOVAC វ៉ាក់សាំងកូវីដ១៩ ចំនួន ៣,២លានដូសនឹងត្រូវផ្តល់ជូនកម្ពុជា ២០%នៃប្រជាជនសរុបក្នុងអំឡុងខែកុម្ភៈនេះ។ កម្ពុជាគ្រោងបញ្ជាទិញវ៉ាក់សាំងចំនួន ១លានដូសបន្ថែមទៀតដែលជាវ៉ាក់សាំងចម្រុះពីអាមេរិក អង់គ្លេស ចិន ឥណ្ឌា និងរុស្ស៊ី។សម្តេចហ៊ុន សែនលើកថា រដ្ឋាភិបាលកំពុងស្ទាបស្ទង់ និងសិក្សា អំពីលទ្ធភាពបញ្ជាទិញវ៉ាក់សាំងកូវីដពីអង់គ្លេស ក្នុងទំហំទឹកប្រាក់៩៥លានដុល្លារដែលជាកញ្ចប់ឥណទានរបស់ធនាគារអភិវឌ្ឍអាស៊ីផងដែរ។កាលពីថ្ងៃទី១៥មករាសម្តេចហ៊ុនសែន បានប្រកាសបញ្ឈប់ការទទួលថវិការបស់សប្បុរសជន ក្នុងការទិញវ៉ាក់សាំងប្រឆាំងជំងឺកូវីដ១៩ដោយមានទឹកប្រាក់សរុបប្រមាណជាង ៥៧លានដុល្លារ។
សូមបញ្ជាក់ថាសមិទ្ធផលថ្មីរបស់ក្រសួងសាធារណការ និងដឹកជញ្ជូន រួមមានអគារទីស្តីការថ្មី និងវិទ្យាស្ថាន «តេជោសែន សាធារណការ និងដឹកជញ្ជូន»ស្ថិតនៅតាមបណ្តោយវិថី៥៩៨ ដែលគេនិយមហៅវិថី «ជា សុផារ៉ា» ស្ថិតក្នុងសង្កាត់ច្រាំងចម្រេះ២ ខណ្ឌឬស្សីកែវ។ អគារថ្មីរបស់ក្រសួងសាធារណការ សាងសង់ឡើងលើផ្ទៃដីជិត ៤ហិកតា។ អគារទីស្តីការនេះ រួមមាន៖ អគាររដ្ឋបាលកម្ពស់ ៩ជាន់ ទំហំ ៥៩.៥០ម៉ែត្រ គុណ ២៣,២០ម៉ែត្រ, អគាររដ្ឋបាល ២ខ្នង (អគារស្លាបសងខាង) កម្ពស់ ៨ជាន់, អគារសាលប្រជុំ និងបណ្ណាល័យ ១ខ្នង កម្ពស់ ៣ជាន់, ព្រមទាំងបំពាក់សម្ភារការិយាល័យ សម្ភារសង្ហារឹម និងជណ្តើរយន្ត, សាងសង់អគារដាក់គ្រឿងចក្រ ៥ខ្នង, ជួសជុលអគារចាស់ៗ ដែលមានស្រាប់ចំនួន ៦ខ្នង, សាងសង់របងព័ទ្ធជុំវិញ និងរៀបចំបណ្តាញផ្លូវ បណ្តាញអគ្គិសនី បណ្តាញទឹកស្អាត ប្រព័ន្ធលូបង្ហូរទឹកកខ្វក់ និងសួនច្បារក្នុងបរិវេណក្រសួង ព្រមទាំងបានទិញគ្រឿងចក្រចំនួន ២២២គ្រឿង សម្រាប់ផ្តល់ជូនមន្ទីរសាធារណការនិងដឹកជញ្ជូនរាជធានី-ខេត្ត និងអគ្គនាយកដ្ឋានប្រព័ន្ធចម្រោះទឹកកខ្វក់ ដែល បានចំណាយថវិកាសរុបជាង ២៦លានដុល្លារអាមេរិក។
អគារថ្មីនេះ បានរៀបចំបំពាក់ប្រព័ន្ធសូឡា ទាញយកថាមពលប្រើប្រាស់ពីពន្លឺព្រះអាទិត្យនៅលើដំបូលអគារផ្ទាល់ទាំងអស់ ដើម្បីចូលរួមក្នុងការកាត់បន្ថយចំណាយលើការប្រើប្រាស់ថាមពលអគ្គិសនីប្រចាំថ្ងៃ ។ អគារវិទ្យាស្ថាន «តេជោសែន សាធារណការ និងដឹកជញ្ជូន» មានចំនួន ១ខ្នង កម្ពស់ ៤ជាន់ មានបន្ទប់សិក្សាចំនួន២៤បន្ទប់ ការិយាល័យរដ្ឋបាលចំនួន៣បន្ទប់ មន្ទីរពិសោធន៍ចំនួន ១បន្ទប់ បណ្ណាល័យចំនួន១បន្ទប់ និងបានបំពាក់ទៅដោយសម្ភារសិក្សា និងឧបករណ៍បច្ចេកទេសពិសោធន៍ទំនើបៗ ដោយបានចំណាយថវិកា ២.៥លានដុល្លារអាមេរិក សម្រាប់បណ្តុះបណ្តាលបុគ្គលិក-មន្ត្រីរាជការ សិក្ខាកាម និងសិស្ស-និស្សិត ដើម្បីលើកកម្ពស់សមត្ថភាពកូនខ្មែរ លើជំនាញបច្ចេកទេសសាងសង់ហេដ្ឋារចនាសម្ព័ន្ធផ្លូវ-ស្ពាន »។
សម្តេចតេជោ ហ៊ុន សែន ក៏បានថ្លែងបញ្ជាក់ថា សម្តេចជឿជាក់ទៅលើក្រសួងសាធារណការ និងដឹកជញ្ជូន ទាក់និនជាមួយនឹងបញ្ហាកំណែទម្រង់នៅក្នុងវិស័យរបស់សាធារណការ ការងារផ្លូវថ្នល់ ស្លាកលេខថយន្ត និងមានកំណែទម្រង់ ច្រើនទៀត ហើយយើងគប្បីបន្តលើកទឹកចិត្តឱ្យមន្ត្រីរាជការផ្នែកនេះធ្វើកិច្ចការតាមខេត្តដូចគ្នា ព្រោះមានមន្ទីនៅតាមខេត្ត ដែលត្រូវជាសេនាធិការរបស់គណៈអភិបាលខេត្ត ព្រោះយើងកំពុងតែផ្ទេរអំណាចទៅឱ្យថ្នាក់ក្រោមជាតិ
«សូមរំលឹក សូមលោកប្រធានមន្ទីរទាំងឡាយប្រយ័ត្ន ប្រយ័ត្នត្រង់អញ្ចេះ អ្នកខ្លះធ្លាប់មានពិសោធន៍ហើយរឿងនឹង ដោយសារប្រធានមន្ទីរ គឺត្រូវចាត់តាំងប្រកាសដោយរដ្ឋមន្ត្រី ក្រោយមានសំណើពីគណៈអភិបាលខេត្ត អញ្ចឹងទេបែរជាមិនស្តាប់អភិបាលខេត្ត ស្តាប់តែរដ្ឋមន្ត្រី ឯពេលខ្លះទៀតដោយសារខ្លួននៅថ្នាក់ក្រោមជាតិ មិនស្តាប់រដ្ឋមន្ត្រី បែរជាទៅតាមតែគណអភិបាល ប៉ុន្តែអានឹងរឿងនឹងជារឿងម្យ៉ាង តែរឿងដែលសំខាន់ជាងនេះទៀត ប្រាប់ចៅហ្វាយខេត្តថាស្តាប់រដ្ឋមន្ត្រី ដល់មករដ្ឋមន្ត្រី រដ្ឋមន្ត្រីក៏អត់ដឹង ចឹងទីចុងបំផុតមនុស្សនេះអត់ដឹងនៅណាពិតប្រាកដ»។
