លោកដូណាល់ត្រាំរិះគន់ប្រធានាធិបតីអ៊ុយក្រែនបន្ទាប់ពីមានកិច្ចព្រមព្រៀងទិញប្រេងពីរុស្ស៊ី
21-September-2026 / ព័ត៌មានអន្តរជាតិ
អ៊ុយក្រែន៖ប្រធានាធិបតីសហរដ្ឋអាមេរិកលោក ដូណាល់ ត្រាំ នៅរាត្រីថ្ងៃសៅរ៍ ទី១០តុលាបាន ជះកំហឹងលើលោក វ៉ូឡូឌីមៀរ ហ្សេឡេនស្គីប្រធានាធិបតីអ៊ុយក្រែន នៅចំពោះមុខអ្នកសារព័ត៌មាន ក្នុងបរិវេណសេតវិមាន បានប្រកាសឲ្យប្រជាជនអ៊ុយក្រែនប្តូរមេដឹកនាំថ្មី និងត្រូវជ្រើសរើសនរណាដែលអាចងាយស្រួលចុះកិច្ចព្រមព្រៀងជាមួយគ្នា។ការរិះគន់ប្រធានាធិបតីអ៊ុយក្រែនកាបកើតឡើងបន្ទាប់ពីលោកដូណាល់ត្រាំបានកិច្ចព្រមព្រៀងទិញប្រេងពីរុស្ស៊ី។
រដ្ឋាភិបាលអាមេរិក បានចុះកិច្ចព្រមព្រៀងទិញប្រេងម៉ាស៊ូតពីរុស្ស៊ី ក្នុងទំហំច្រើនលានតោន ដើម្បីទាញតម្លៃប្រេងឥន្ធនៈឲ្យចុះថោក។ លោក ដូណាល់ ត្រាំ បានប្រកាសតាមបណ្តាញសង្គម Truth Social ថ្ងៃសុក្រទី៩តុលា ថា តាមរយៈកិច្ចសន្យាទិញលក់ថ្មីនេះ រុស្ស៊ីនឹងផ្គត់ផ្គង់ប្រេងម៉ាស៊ូត ចំនួន ៣សែនតោន ភ្លាមៗ ហើយបន្តបង្កើនចំនួនថែមទៀតដល់១លានតោន នៅខែធ្នូ សម្រាប់ផ្គត់ផ្គង់ទីផ្សារសហរដ្ឋអាមេរិក និងពិភពលោក។
ប្រធានាធិបតីអាមេរិករូបនេះ បានទម្លាក់កំហុសលើមេដឹកនាំអ៊ុយក្រែន ដែលបន្តវាយប្រហាររោងចក្រចម្រាញ់ប្រេងរុស្ស៊ី និងជាចំណែកធ្វើឲ្យប្រេងឡើងថ្លៃកាន់តែខ្លាំង។ លោក ត្រាំ ថា លោក ហ្សេឡេនស្គី មិនអាចនៅរឹងទទឹង ហើយបន្តជំរុញឲ្យតម្លៃប្រេង ឡើងថ្លៃតទៅទៀតទេ។តែលោកប្រធានាធិបតីអាមេរិកមិនបាននិយាយាពីសង្គ្រាមជាមួយអ៊ីរ៉ង់ដែលបង្កឲ្យប្រេងឡើងថ្លៃនោះទេ។
ក្រៅពីទម្លាក់កំហុសលោក ដូណាល់ ត្រាំ លោក ត្រាំ ក៏បន្ទោសប្រមុខរដ្ឋអ៊ុយក្រែន ដែលមិនព្រមទទួលយកកិច្ចព្រមព្រៀង ដោយលើកឡើងថា កិច្ចព្រមព្រៀងពន្លត់ភ្លើងសង្គ្រាមនៅអ៊ុយក្រែន ប៊ិះនឹងសម្រេចជាច្រើនលើក តែលោក ហ្សេឡេនស្គី មិនព្រមដោយសំអាងហេតុផលផ្សេងៗ។ លោកប្រធានាធិបតីអាមេរិក បែរជាសរសើរ មេដឹកនាំរុស្ស៊ីថា លោក វ្ល៉ាឌីមៀរ ពូទីន ចង់ចុះកិច្ចព្រមព្រៀងបញ្ចប់សង្គ្រាម ជាយូរហើយ។
ប្រធានាធិបតីអ៊ុយក្រែន លោក វ៉ូឡូឌីមៀរ ហ្សេឡេនស្គី បានរិះគន់ កិច្ចសន្យាទិញប្រេងរុស្ស៊ីពីសំណាក់អាមេរិក ថាជាការសម្រេចចិត្តដ៏ទន់ខ្សោយ និងដ៏កំសាកបំផុត។ មិនតែប៉ុណ្ណោះ កងទ័ពអ៊ុយក្រែនក៏ថែមទាំងសម្រុកវាយប្រហារលើកន្លែងចម្រាញ់ប្រេងរុស្ស៊ី ទៀតផង។
ជាការឆ្លើយតបនៅថ្ងៃអាទិត្យ ទី១១តុលា លោក វ៉ូឡូឌីមៀរ ហ្សេឡេនស្គី បានប្រកាសសំណើតាមប្រព័ន្ធតេឡេក្រាម ថា ទ័ពអ៊ុយក្រែននឹងឈប់វាយប្រហារលើហេដ្ឋារចនាសម្ព័ន្ធចម្រាញ់ប្រេងរុស្ស៊ី ពេលណា ទ័ពរុស្ស៊ី ឈប់វាយប្រហារលើហេដ្ឋារចនាសម្ព័ន្ធថាមពលអ៊ុយក្រែន វិញដែរ។
ប្រធានាធិបតីអ៊ុយក្រែន ក៏ឆ្លៀតរិះគន់ការវាយប្រហាររបស់ទ័ពរុស្ស៊ី ដែលទម្លាក់គ្រាប់បែក ៥ គ្រាប់ សម្លាប់ពលរដ្ឋអ៊ុយក្រែន យ៉ាងតិច ២៣នាក់ នាថ្ងៃសៅរ៍ ទី១០តុលា នៅ Zaporijjia ភាគខាងកើតអ៊ុយក្រែន។ ចំណែក ក្រុមហ៊ុនបច្ចេកវិទ្យារុស្ស៊ី Yandex ប្រកាសនៅថ្ងៃអាទិត្យទី១១តុលា ថា ប្រព័ន្ធដំណើរការនិងហេដ្ឋារចនាសម្ព័ន្ធរបស់ខ្លួននៅម៉ូស្គូ កំពុងតែខូច បន្ទាប់ពីរងការវាយប្រហាររបស់អ៊ុយក្រែន។
ថ្លែងក្នុងបទសម្ភាសន៍ជាមួយកម្មវិធី "This Week" របស់ទូរទស្សន៍ ABC ទាក់ទងបញ្ហបោះឆ្នោតលោក ហ្សេលេនស្គី បញ្ជាក់ថា៖ «សូមជួយប្រាប់លោក ពូទីន ផង ឱ្យពេលយើង ២ ខែ ឬ ៦០ ថ្ងៃនៃបទឈប់បាញ់ទាំងស្រុង នោះយើងនឹងរៀបចំការបោះឆ្នោត»។ ការលើកឡើងនេះ ធ្វើឡើងបន្ទាប់ពីលោក ត្រាំ កាលពីថ្ងៃសៅរ៍ បានរិះគន់លោក ហ្សេលេនស្គី ជុំវិញការវាយប្រហារលើរោងចក្រចម្រាញ់ប្រេងរុស្ស៊ី និងបានលើកឡើងនៅសេតវិមានថា «ដល់ពេលដែលអ៊ុយក្រែនត្រូវមានប្រធានាធិបតីថ្មីហើយ»។
ឆ្លើយតបនឹងការចង់ឱ្យប្តូរមេដឹកនាំ លោក ហ្សេលេនស្គី បានគូសបញ្ជាក់ថា ការជ្រើសរើសមេដឹកនាំគឺជា «សិទ្ធិសម្រេចរបស់ប្រជាជនអ៊ុយក្រែន» ហើយលោកបានកត់សម្គាល់ថា សូម្បីតែលោក ពូទីន ក៏ចង់ប្តូរមេដឹកនាំអ៊ុយក្រែនដូចគ្នាដែរ។ លើសពីនេះ លោកបានបន្ថែមថា ការទម្លាក់កំហុសមកលើអ៊ុយក្រែនជុំវិញរឿងប្រេងឡើងថ្លៃ គឺជារឿងងាយស្រួលនិយាយពេកហើយ ខណៈមនុស្សគ្រប់គ្នាក្នុងពិភពលោកដឹងយ៉ាងច្បាស់ថា ថ្លៃប្រេងឡើងដោយសារតែសង្គ្រាមនៅមជ្ឈិមបូព៌ា។
ប្រទេសសម្ព័ន្ធមិត្តផ្សេងទៀត នៅលើបស្ចិមលោក មានជាអាទិ៍ អាល្លឺម៉ង់និងអង់គ្លេស បានសម្តែងសាមគ្គីភាពជាមួយអ៊ុយក្រែន។ លោក Andy Burham នាយករដ្ឋមន្ត្រីអង់គ្លេស បានហៅទូរស័ព្ទផ្ទាល់ទៅលោក ហ្សេឡេស្គី ហើយបញ្ជាក់អំពីការគាំទ្រអ៊ុយក្រែនយ៉ាងពេញទំហឹង។
ថ្លែងក្នុងកិច្ចប្រជុំថ្នាក់ដឹកនាំគណបក្សកាន់អំណាច CDU របស់អធិការបតី លោក Friedrich Merz លោក Wadephul បានបញ្ជាក់ថា អាល្លឺម៉ង់នៅតែបន្តឈរនៅក្បែរអ៊ុយក្រែន និងរដ្ឋាភិបាលក្រុងកៀវ «ព្រមទាំងគាំទ្រលោកប្រធានាធិបតីយ៉ាងពេញទំហឹង ក្នុងការបំពេញភារកិច្ចដ៏លំបាកនេះ»។ ជំហរនេះ បានបង្ហាញពីភាពប្រេះឆាកាន់តែខ្លាំងឡើងរវាងក្រុងប៊ែរឡាំង និងវ៉ាស៊ីនតោន បន្ទាប់ពីលោក ត្រាំ បានទាមទារឱ្យអ៊ុយក្រែនរកមេដឹកនាំថ្មីជំនួសលោក ហ្សេលេនស្គី និងបានរិះគន់ការវាយប្រហាររបស់អ៊ុយក្រែនលើរោងចក្រប្រេងរុស្ស៊ី។
អាល្លឺម៉ង់ ដែលជាប្រទេសផ្ដល់ជំនួយធំបំផុតនៅអឺរ៉ុបដល់អ៊ុយក្រែន បានបញ្ជាក់កាលពីថ្ងៃសៅរ៍ថា ខ្លួននឹងបន្តអនុវត្តទណ្ឌកម្មលើរុស្ស៊ីដដែល បើទោះបីជារដ្ឋបាលលោក ត្រាំ បានប្រកាសផ្អាកទណ្ឌកម្មលើប្រេងឥន្ធនៈរុស្ស៊ីជាបណ្តោះអាសន្នក៏ដោយ។ លោក Wadephul បានសង្កត់ធ្ងន់ថា៖ «យើងមិនត្រូវបន្ថយសម្ពាធទេ ផ្ទុយទៅវិញ គឺត្រូវបង្កើនសម្ពាធលើលោក ពូទីន បន្ថែមទៀត ដើម្បីបង្ខំឱ្យលោកព្រមចូលតុចរចា»។
.png&h=97&w=146)