គិមជុងអ៊ុនបញ្ជាឲ្យ ផលិតមីស៊ីល និងគ្រាប់កាំភ្លើងថែម ពេលកូរ៉េខាងត្បូងតម្លើងការធ្វើសមយុទ្ធ!
10-August-2023 / ព័ត៌មានអន្តរជាតិ
ឧបទ្វីបកូរ៉េ៖ប្រព័ន្ធផ្សព្វផ្សាយរដ្ឋកូរ៉េខាងជើង KCNA បានចុះផ្សាយនៅថ្ងៃចន្ទទី១៤សីហាថាមេដឹកនាំកូរ៉េខាងជើង លោក គីម ជុងអ៊ុន បានទៅទស្សនារោងចក្រយោធាសំខាន់ៗ រួមទាំងរោងចក្រផលិតកាំជ្រួចមីស៊ីលយុទ្ធសាស្ត្រផងដែរ។ លោកគីម បានអំពាវនាវឱ្យផលិតមីស៊ីល និងគ្រាប់កាំភ្លើងធំ ដើម្បីឱ្យប្រទេសនេះទទួលបានអំណាចយោធាដ៏លើសលប់ និងត្រៀមខ្លួនសម្រាប់សង្គ្រាម។.png)
តាមការកតសម្គាល់ការក្អេងក្អាងរបស់មេដឹកនាំកូរ៉េខាងជើងនេះគឺដោយសារមានបង្អែកប្រទេសធំពីរគឺចិននិងរុស្ស៊ី។ជាក់ស្តែងប្រព័ន្ធផ្សព្វផ្សាយរដ្ឋកូរ៉េខាងជើង ដែលដកស្រង់ចេញផ្សាយដោយទីភ្នាក់ងារសារព័ត៌មាន AFP បានផ្សាយថា មេដឹកនាំកូរ៉េខាងជើង លោក គីម ជុងអ៊ុន និងប្រធានាធិបតីរុស្ស៉ី លោក វ្ល៉ាឌីមៀរ ពូទីន បានឆ្លើយឆ្លងគ្នាតាមសំបុត្រនៅថ្ងៃអង្គារទី១៥ ខែសីហានេះ អមជាមួយការសន្យាថានឹងអភិវឌ្ឍទំនាក់ទំនងរវាងប្រទេសទាំង២ ឆ្ពោះទៅរកអ្វីដែលលោក គីម ហៅថា «ភាពជាដៃគូយុទ្ធសាស្ត្រយូរអង្វែង»។
ប្រព័ន្ធផ្សព្វផ្សាយរដ្ឋកូរ៉េខាងជើង KCNA បានឱ្យដឹងទៀតថាការឆ្លើយឆ្លងសំបុត្រខាងលើធ្វើឡើងនាឱកាសនៃការប្រារព្ធខួបលើកទី៧៨ នៃការរំដោះកូរ៉េចេញពី អាណានិគមជប៉ុន (ឆ្នាំ១៩១០-១៩៤៥) ដែលនៅកូរ៉េខាងត្បូងក៏ត្រូវបានចាត់ទុកជាថ្ងៃបុណ្យជាតិមួយផងដែរ។ នៅក្នុងសំបុត្រផ្ញើទៅកាន់លោក ពូទីន លោក គីម បាននិយាយថាទំនាក់ទំនងមិត្តភាពរវាងកូរ៉េខាងជើងនឹងរុស្ស៉ីត្រូវបានបង្កើតឡើងនៅក្នុងសង្គ្រាមលោកលើកទី២ ជាមួយជ័យជម្នះលើជប៉ុន។លោក គីម បានគូសបញ្ជាក់ដូច្នេះថា «ខ្ញុំពិតជាមានជំនឿចិត្តយ៉ាងរឹងមាំថា ទំនាក់ទំនងមិត្តភាពនិងសាមគ្គីភាព…នឹងត្រូវបានអភិវឌ្ឍបន្ថែមឆ្ពោះទៅកាន់ភាពជាដៃគូយុទ្ធសាស្ត្រយូរអង្វែង ស្របទៅតាមតម្រូវការនៃយុគសម័យថ្មី។ ប្រទេសទាំង២នឹងទទួលបានជ័យជម្នះជារៀងរហូត ក៏ដូចជាគាំទ្រពេញទំហឹង និងធ្វើកិច្ចសហប្រតិបត្តិការជាមួយគ្នាទៅវិញទៅមកនៅក្នុងទិសដៅសម្រេចឱ្យបាននូវគោលដៅ និងបុព្វហេតុរួម»។
ជាការឆ្លើយតបនឹងលោកគីម លោក ពូទីន ក៏បានសន្យាដែរថានឹងពង្រឹងទំនាក់ទំនងទ្វេភាគីរវាងប្រទេសទាំង២ ព្រមទាំងធ្វើកិច្ចសហប្រតិបត្តិការលើគ្រប់វិស័យ សម្រាប់សុខុមាលភាពនៃប្រជាជនប្រទេសទាំង២ និងស្ថិរភាព ព្រមទាំងសន្តិសុខនៅលើតំបន់ឧបទ្វីបកូរ៉េនិងតំបន់អាស៊ីឦសានទាំងមូល។ គួររំលឹកថា កាលពីពេលថ្មីៗលោក គីម ជុងអ៊ុន បានដកហូតតំណែងឧត្តមសេនីយ៍យោធាកំពូល ហើយបានអំពាវនាវឱ្យបង្កើនការត្រៀមខ្លួនបន្ថែមទៀតក្នុងករណីផ្ទុះសង្គ្រាម ជំរុញការផលិតអាវុធ និងការពង្រីកសមយុទ្ធយោធា។
ដោយឡែកប្រទេស កូរ៉េខាងត្បូង និងសហរដ្ឋអាម៉េរិក កាលពីដើមសប្តាហ៍នេះវិញ បានប្រកាសថា ប្រជាជាតិទាំងពីរនឹងធ្វើសមយុទ្ធរដូវក្តៅមួយឈ្មោះថា អ្នកការពារសេរីភាពអ៊ុលឈី (Ulchi Freedom Guardian) នៅចន្លោះថ្ងៃទី២១ រហូតដល់ថ្ងៃទី៣១ ខែសីហា ដើម្បីបង្កើនសមត្ថភាពរបស់សម្ព័ន្ធមិត្តក្នុងការឆ្លើយតបទៅនឹងការវិវត្តន៍នៃការគំរាមកំហែងអាវុធនុយក្លេអ៊ែរ និងមីស៊ីលពីសំណាក់ប្រទេសកូរ៉េខាងជើង ។សមយុទ្ធនៅឆ្នាំនេះនឹងធ្វើឡើងទ្រង់ទ្រាយធំបំផុតមិនធ្លាប់មាន ដោយប្រមូលផ្តុំកងទ័ពមកពីភាគីទាំងពីរ រហូតដល់រាប់ម៉ឺននាក់ បន្ថែមពីនេះ ក៏រួមមានវត្តមានចូលរួមពីតាមរដ្ឋសមាជិកមួយចំនួននៃបញ្ជាការអង្គការសហប្រជាជាតិ សម្រាប់កម្មវិធីហ្វឹកហ្វឺនប្រមាណ ៣០ កន្លែង នេះបើយោងតាមសេចក្តីប្រកាសព័ត៌មានរបស់អគ្គសេនាធិការចម្រុះកូរ៉េខាងត្បូង (JCS ) ។
ប្រទេសកូរ៉េខាងជើង បានបរិហារសមយុទ្ធយោធារបស់កូរ៉េខាងត្បូង-សហរដ្ឋអាម៉េរិក (និងសម្ព័ន្ធមិត្តរបស់ពួកគេ) ថាជាការហាត់សមសម្រាប់បង្កសង្គ្រាមនុយក្លេអ៊ែរ ។ការប្រកាសនេះបានធ្វើឡើង បន្ទាប់ពីមេដឹកនាំកូរ៉េខាងជើងលោកគីមជុងអ៊ុន បានទៅទស្សនកិច្ចនៅរោងចក្រយោធាសំខាន់ៗកាលពីថ្ងៃសុក្រ និងថ្ងៃសៅរ៍សប្តាហ៍មុន (11 ខែសីហា) ដោយកាលនោះ លោកបានអំពាវនាវឱ្យបន្ថែមការផលិតមីស៊ីលជាបន្តទៀត ដើម្បីជួយធានាដល់ "អំណាចយោធាដ៏លើសលប់របស់កូរ៉េខាងជើង" និងត្រៀមខ្លួនសម្រាប់សង្គ្រាមជាដើម ៕
