វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 849 នាក់
ម្សិលមិញ 10264 នាក់
សរុប 14140031 នាក់
ប្រទេសថៃ៖តុលាការធម្មនុញ្ញថៃបានចេញសេចក្តីសម្រេចមួយកាលពីថ្ងៃពុធទី៩វិច្ឆិកាបកស្រាយលើ ការទាមទារឲ្យធ្វើកំណែទម្រង់ស្ថាប័នព្រះមហាក្សត្រធ្វើឡើងដោយមេដឹកនាំបាតុករចំនួន ៣រូប កាលពីខែសីហាឆ្នាំ២០២០ គឺស្មើនឹងការប៉ុនប៉ងផ្តួលរំលំរបបរាជានិយម។
សេចក្តីសម្រេចរបស់តុលាការធម្មនុញ្ញថៃនេះត្រូវបានធ្វើឡើងទៅតាមបណ្តឹងរបស់មេធាវីជាអ្នកគាំទ្ររាជានិយមម្នាក់ បានកំណត់ថា ការទាមទារកំណែទម្រង់ ធ្វើឡើងដោយមេដឹកនាំបាតុកម្មប្រឆាំងរដ្ឋាភិបាលទាំង ៣រូប គឺជាការប្រើប្រាស់រូបភាពសិទ្ធិសេរីភាពបញ្ចេញមតិ ក៏ប៉ុន្តែ បង្កប់ដោយចេតនាចង់ផ្តួលរំលំរបបរាជានិយមអាស្រ័យធម្មនុញ្ញ ហើយថា នេះគឺជាទង្វើផ្ទុយនឹងរដ្ឋធម្មនុញ្ញ និងធ្វើឲ្យប៉ះពាល់ទៅដល់សន្តិសុខជាតិ។
សូមរំលឹកថា នៅក្នុងអំឡុងបាតុកម្មនៅឯសកលវិទ្យាល័យធម្មសាត កាលពីខែសីហាឆ្នាំទៅ២០២០ មេដឹកនាំបាតុករនិស្សិតបានថ្លែងសារទាមទារឲ្យមានកំណែទម្រង់១០ចំណុច ដោយនៅក្នុងចំណោមនោះក៏មានដែរ ការទាមទារឲ្យធ្វើកំណែទម្រង់ស្ថាប័នព្រះមហាក្សត្រ ជាពិសេស ទាមទារឲ្យមានតម្លាភាពផ្នែកហិរញ្ញវត្ថុព្រះបរមរាជវាំង និងទាមទារលុបចោលច្បាប់ដាក់ទោសបទប្រមាថព្រះមហាក្សត្រ។
ការពិតតុលាការធម្មនុញ្ញថៃ មានសមត្ថកិច្ចជំនុំជម្រះតែទៅលើធម្មនុញ្ញភាពនោះ មិនបានកាត់សេចក្តី អំពីទោសទណ្ឌទៅលើមេដឹកនាំបាតុករទាំង ៣រូបនេះទេ។ ក៏ប៉ុន្តែ មានការបារម្ភថា សេចក្តីសម្រេចរបស់តុលាការធម្មនុញ្ញនេះអាចនឹងត្រូវតុលាការព្រហ្មទណ្ឌថៃយកទៅប្រើជាមូលដ្ឋានច្បាប់ ចោទប្រកាន់មេដឹកនាំបាតុករពីបទក្បត់ជាតិ។
បច្ចុប្បន្ននេះ ក្នុងចំណោមមេដឹកនាំបាតុករទាំង ៣រូប មានពីររូបកំពុងជាប់ក្នុងមន្ទីរឃុំឃាំងរួចទៅហើយ ដោយជាប់ចោទពីបទប្រមាថព្រះមហាក្សត្រ។ បទប្រមាថព្រះមហាក្សត្រ ដែលតាមច្បាប់ព្រហ្មទណ្ឌថៃ អាចត្រូវជាប់ទោសពន្ធនាគាររយៈពេល ១៥ឆ្នាំ ចំណែកបទល្មើសប៉ុនប៉ងផ្តួលរំលំរបបរាជានិយមវិញ ដែលជាទោសក្បត់ជាតិ អាចនឹងត្រូវជាប់ទោសពន្ធនាគារមួយជីវិត ឬអាចរហូតដល់ត្រូវប្រហារជីវិត៕