សម្តេចម៉ែនសំអនលើកគុណសម្បត្តិ២នៃគាំពារសង្គម របស់រាជរដ្ឋាភិបាល

ស្វាយរៀង៖សម្តេចកិត្តិសង្គហបណ្ឌិត ម៉ែន សំអន ឧត្តមប្រឹក្សាផ្ទាល់ព្រះមហាក្សត្រ បានអញ្ជើញជួបសំណេះសំណាលជាមួយក្រុមការងារគ្រូពេទ្យស្ម័គ្រចិត្ត ឯកឧត្តម ហ៊ុន ម៉ានី ដែលបានចុះពិនិត្យ ព្យាបាលជំងឺជូនប្រជាពលរដ្ឋដោយឥតគិតថ្លៃ និងផ្តល់ការអប់រំសុខភាព ជូនប្រជាពលរដ្ឋចំនួន ៨ពាន់នាក់ ស្ថិតនៅក្នុងសាលាបឋមសិក្សា ហ៊ុន សែន ស្វាយផ្អែម ឃុំស្វាយអង្គ ស្រុកស្វាយជ្រំ ខេត្តស្វាយរៀង នាថ្ងៃអាទិត្យ ២រោច ខែភទ្របទ ឆ្នាំមមី អដ្ឋស័ក ព.ស.២៥៧០ ត្រូវនឹងថ្ងៃទី២៧ ខែកញ្ញា ឆ្នាំ២០២៦។ 

ថ្លែងក្នុងឱកាសនោះ សម្តេចកិត្តិសង្គហបណ្ឌិត ម៉ែនសំអនដែលជាប្រធានក្រុមប្រឹក្សាអង្គភាពប្រឆាំងអំពើពុករលួយនិងជាប្រធានរណសិរ្សកសាងអភិវឌ្ឈន៍មាតុភូមិកម្ពុជាបាននាំយកនូវការផ្តាំផ្ញើសួរសុខទុក្ខពីសំណាក់ សម្តេចតេជោ ហ៊ុន សែន ប្រធានព្រឹទ្ធសភា និងជាប្រធានគណបក្សប្រជាជនកម្ពុជា សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី និងលោកជំទាវបណ្ឌិត ពេជ ចន្ទមុនី ជូនចំពោះអង្គពិធីទាំងមូលផងដែរដោយក្តីនឹករលឹក និងការគិតគូរសុខទុក្ខប្រជាពលលរដ្ឋទូទាំងប្រទេស។

សម្តេចកិត្តិសង្គហបណ្ឌិត បានគូសបញ្ជាក់ថា នៅក្នុងក្របខណ្ឌនៃការអភិវឌ្ឍប្រទេស សុខភាពប្រជាពលរដ្ឋគឺជាផ្នែកមួយដ៏សំខាន់នៃការអភិវឌ្ឍមូលធនមនុស្ស។ រាជរដ្ឋាភិបាលនីតិកាលទី៧ ក្រោមការដឹកនាំដ៏ប៉ិនប្រសប់របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានដាក់ចេញនូវក្របខណ្ឌគោលនយោបាយជាតិគាំពារសង្គម ដោយផ្អែកលើប្រព័ន្ធសសរស្ដម្ភធំៗចំនួន២ គឺ៖

១.ប្រព័ន្ធជំនួយសង្គម : ផ្ដល់ការឧបត្ថម្ភសាច់ប្រាក់ និងការគាំទ្រផ្ទាល់ដល់គ្រួសារក្រីក្រ ស្រ្តីមានផ្ទៃពោះ កុមារតូច និងជនរងគ្រោះដោយវិបត្តិផ្សេងៗ។

២. របបសន្តិសុខសង្គម : គ្រប់គ្រងដោយ ប.ស.ក. (បេឡាជាតិសន្តិសុខសង្គម) រួមមាន របបហានិភ័យការងារ របបថែទាំសុខភាព និងរបបប្រាក់សោធននិវត្តន៍ សម្រាប់កម្មករ-និយោជិត និងមន្ត្រីសាធារណៈ។

សម្តេចកិត្តិសង្គហបណ្ឌិត បានសម្តែងនូវការកោតសរសើរ និងថ្លែងអំណរគុណយ៉ាងជ្រាលជ្រៅចំពោះគំនិតផ្តួចផ្តើមរបស់ ឯកឧត្តម ហ៊ុន ម៉ានី ព្រមទាំងការដឹកនាំយ៉ាងសកម្មរបស់ ឯកឧត្តម លេង ផាលី និងក្រុមការងារគ្រូពេទ្យស្ម័គ្រចិត្តទាំងអស់ ដែលបានលះបង់ពេលវេលា កម្លាំងកាយចិត្ត និងជំនាញវិជ្ជាជីវៈ ចុះបម្រើប្រជាពលរដ្ឋដោយស្មារតីមនុស្សធម៌ និងបណ្តុះស្មារតី "រួមគ្នាថែរក្សាសុខភាពប្រជាពលរដ្ឋ"។