សម្ដេចធិបតី ហ៊ុន ម៉ាណែតថាការបញ្ចេញមតិរបស់ពលរដ្ឋខ្មែរនៅអូស្ដ្រាលី និងណូវែលហ្សេឡង់ មានការយល់ដឹងផ្នែកប្រជាធិបតេយ្យ និងសិទ្ធិបញ្ចេញមតិ
អូស្ដ្រាលី៖នារសៀលថ្ងៃទី០៣ខែមីនាឆ្នាំ២០២៤ក្នុងពិធីជួបសំណេះសំណាលជាមួយប្រជាពលរដ្ឋខ្មែររស់នៅ ប្រទេសអូស្ត្រាលី និងណូវែលហ្សេឡង់ប្រមាណជាង១,០០០នាក់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា បានចាត់ទុកការបញ្ចេញមតិរបស់ប្រជាពលរដ្ឋរស់ទាំងពីរនេះ គឺជាការបង្ហាញឲ្យឃើញច្បាស់នូវកត្តាយល់ដឹងផ្នែកប្រជាធិបតេយ្យ និងសិទ្ធិបញ្ចេញមតិ ហើយចេះគោរពគ្នាទៅវិញទៅមក។
មូលហេតុព្រោះសម្ដេចធិបតី ហ៊ុន ម៉ាណែត ហ៊ាន មើលឃើញថា ថ្វីបើអ្នកមកគាំទ្រ និងអ្នកមិនគាំទ្រមាននិន្នាការផ្ទុយគ្នាប៉ុន្ដែបានបញ្ចេញមតិដោយការគោរពគ្នាទៅវិញទៅមក។
សម្ដេចធិបតី ហ៊ុន ម៉ាណែត បានមានប្រសាសន៍យ៉ាងដូច្នេះថា «សិទ្ធិនៅក្នុងការបញ្ចេញមតិអត់មានអ្នកណាហាមទេ ចង់បញ្ចេញមតិគាំទ្រ មិនគាំទ្រ គឺជារឿងធម្មតា យើងអនុវត្តសិទ្ធិសេរីភាពរបស់យើង បញ្ចេញសិទ្ធិរបស់យើងគោរពគ្នាទៅវិញទៅមក [...] ទស្សនៈខុសគ្នាគោរពគ្នាទៅវិញទៅមកក្នុងនាមជាខ្មែរដូចគ្នា រស់នៅក្នុងប្រទេសប្រជាធិបតេយ្យ។ ការបញ្ចេញមតិ និងការគោរពគ្នាថ្ងៃមិញ ដែលបងប្អូនបានបញ្ចេញនេះ គឺខ្ញុំសូមអបអរសាទរ ហើយអរគុណណាស់ចំពោះកិច្ចការនេះ នេះបង្ហាញអំពីភាពចាស់ទុំ នៃការយល់ដឹងអំពីសិទ្ធិសេរីភាពរបស់យើង ហើយខាងរាជរដ្ឋាភិបាលមិនមានបំណងទៅឲ្យមនុស្សឈ្លោះគ្នាទេ គ្មានផលប្រយោជន៍អី»។
ដោយឡែក ចំពោះការមកបាតុកម្មដើម្បីប្រឆាំងដំណើររបស់សម្ដេចនៅប្រទេសអូស្ដ្រាលី និងមានប្រើប្រាស់ពាក្យជេរប្រមាថវិញ សម្ដេចធិបតី ហ៊ុន ម៉ាណែត មិនមានគោលការណ៍តបតជាមួយក្រុមប្រឆាំងនៅអូស្ត្រាលីនោះទេ ទោះបីពួកគាត់ប្រើពាក្យអសុរោះក៏ដោយ ព្រោះអត់មានប្រយោជន៍អ្វីដល់ជាតិនោះទេ។សម្ដេចធិបតីនាយករដ្ឋមន្ដ្រីនៃកម្ពុជា បានរំលឹកថា ស្ថានភាពក្នុងដំណើរទស្សនកិច្ចរបស់សម្ដេចនៅពេលនេះ មិនក្ដៅដូចកាលពីឆ្នាំ២០១៦នោះទេ ពោលប្រើប្រាស់ពាក្យជេរប្រមាថធ្ងន់ៗ ដូចជា «ខ្មោចស៉ីពែរ» ជាដើមទៅលើអ្នកដែលមកគាំទ្រទស្សនកិច្ចរបស់សម្ដេច។ សម្ដេចគូសបញ្ជាក់ថា សិទ្ធិនៃការបញ្ចេញមតិធ្វើយ៉ាងណាក៏ធ្វើចុះ ប៉ុន្ដែកុំឈានដល់ការប្រើប្រាស់អំពើហិង្សា ឬវាយបំផ្លាញទ្រព្យសម្បត្តិរបស់អ្នកដទៃ។
សម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា បានប្រកាសជំហរមិនតបតជាមួយក្រុមប្រឆាំងមួយក្ដាប់តូច ប្រមាណ១០០-២០០នាក់ នៅប្រទេសអូស្ដ្រាលី ដែលចេញមកប្រឆាំងដំណើរទស្សនកិច្ចរបស់សម្ដេចនោះទេ បើទោះបីពួកគេប្រើប្រាស់នូវពាក្យអសុរោះជេរប្រមាថយ៉ាងណាក៏ដោយ។សម្ដេចធិបតី ហ៊ុន ម៉ាណែត បានមានប្រសាសន៍យ៉ាងដូច្នេះថា «មានគេសួរខ្ញុំថា ម្សិលមិញមានគេប្រមូលគ្នា១០០-២០០នាក់ ទៅធ្វើបាតុកម្មជេរព្យុះ មួយមាត់ណាក៏ជេរដែរ ផ្ដាច់ការ អ្នកដែលចូលរួមថ្ងៃនេះគេលាបពណ៌ថា អ្នកបម្រើជនផ្ដាច់ការ។ គេសួរថា ចុះមិចមិនតបអ្នកគាំទ្រយើងរាប់ពាន់នាក់ មិចក៏មិនចេញសារដាក់វិញទៅខ្លាំងជាងគេផង មួយគុណ១០, វាអត់ចំណេញ។ បើប្រាប់ថាក្ដៅ ខ្ញុំធ្លាប់ក្ដៅជាងនេះ កាលខ្ញុំមកអូស្ដ្រាលីឆ្នាំ២០១៦ បាយក្ដៅ។ កាលនោះមិនមែនគាត់នៅចម្ងាយ២គីឡូដីពីយើងអញ្ចឹងទេ គាត់នៅមុខតែម្ដង ស្រែកសុទ្ធតែថា ខ្មោចស៉ីពែរគ្មានផលប្រយោជន៍អីទេ»។សួមបញ្ជាក់ថាកាលពីថ្ងៃសៅរ៍ទី២មិនាមានប្រជាពលរដ្ឋជាច្រើននាក់ពីពីទីតាំងផ្សេងៗគ្នាបានមកប្រមូលផ្តុះគ្នានៅមុខអគាររដ្ឋសភាអូស្ត្រាលីទាមទារឲ្យរាជរដ្ឋាភិបាលសម្តេចធិបតីហ៊ុនម៉ាណែតស្តាឡើងវិញនូវសិទ្ធសេរីភាពប្រជាធិបតេយ្យនិងដោះលែងអ្នកទោសនយោបាយ។
ករណីយ៍នេះសម្ដេចធិបតីនាយករដ្ឋមន្ដ្រី បានអះអាងទៀតថា ក្នុងនាមជាខ្មែរដូចគ្នាទោះទៅដល់ទីណាត្រូវប្រកាន់ស្មារតីសាមគ្គី ប្រកាន់ស្មារតីត្រជាក់។ សម្ដេចបានគូសបញ្ជាក់ថា សិទ្ធិនៃការបញ្ចេញមតិធ្វើយ៉ាងណាក៏ធ្វើចុះ ប៉ុន្ដែកុំឈានដល់ការប្រើប្រាស់អំពើហិង្សា ឬវាយបំផ្លាញទ្រព្យសម្បត្តិរបស់អ្នកដទៃ ដែលនេះជាការគោរពគ្នាទៅវិញទៅមក។សម្ដេចធិបតី ហ៊ុន ម៉ាណែត បានថ្លែងអំណរគុណដល់ប្រជាពលរដ្ឋខ្មែររស់នៅប្រទេសអូស្ដ្រាលី និងណូវែលហ្សេឡង់ ដែលចំណាយពេលមកចូលរួមពិធីសំណេះសំណាលនៅពេលនេះជាមយយសម្តេច ហើយសម្ដេចបានចាត់ទុកថា ការជួបជុំសំណេះសំណាលនេះ បានបង្ហាញឲ្យឃើញពីសាមគ្គីភាពរវាងខ្មែរនៅគ្រប់ទីកន្លែង ដែលជាកិច្ចការដ៏សំខាន់សម្រាប់ដំណើរកសាងជាតិ។
