បន្ទាប់ពីវត្តមាននាវាយោធារដ្ឋមន្ត្រីចក្រភពអង់គ្លេសទទួលបន្ទុកតំបន់ឥណ្ឌូប៉ាស៊ីហ្វិកមកដល់កម្ពុជា
ភ្នំពេញ៖លោកស្រី Rosie Winterton រដ្ឋមន្ត្រីអង់គ្លេសទទួលបន្ទុកតំបន់ឥណ្ឌូប៉ាស៊ីហ្វិកដែលមកដល់កម្ពុជានាថ្ងៃទី២៥សីហានឹង ត្រូវធ្វើដំណើរទស្សនកិច្ចទៅកាន់ខេត្តសៀមរាប និងខេត្តឧត្តរមានជ័យ។ ខេត្តឧត្តរមានជ័យជាទីដែលជនភៀសសឹកខ្មែរ កំពុងស្នាក់នៅជំរំបណ្តោះអាសន្ន បន្ទាប់ពីមានការប្រយុទ្ធគ្នាក្នុងជម្លោះព្រំដែនកម្ពុជា-ថៃ កាលពីពេលកន្លងទៅ។
ក្នុងពេលទស្សនកិច្ចទៅកាន់ជំរំជនភៀសសឹកខ្មែរ លោកស្រី Rosie Winterton នឹងពិនិត្យមើលកម្មវិធីអប់រំ ដែលទទួលបានការឧបត្ថម្ភពីព្រីតថេន។ បន្ទាប់មកលោកស្រី នឹងវិលមកកាន់ទីក្រុងភ្នំពេញ ដោយគ្រោងជួបលោកនាយករដ្ឋមន្ត្រីហ៊ុន ម៉ាណែត និងមន្ត្រីរដ្ឋាភិបាលកម្ពុជា ដើម្បីពិភាក្សាពីការធ្វើពាណិជ្ជកម្ម ការវិនិយោគ ការអភិវឌ្ឍន៍ និងបញ្ហាសិទ្ធិមនុស្ស។
បើតាមសេចក្តីប្រកាសព័ត៌មានរបស់ស្ថានទូតព្រីតថេន ទស្សនកិច្ចរបស់លោកស្រី Rosie Winterton នៅកម្ពុជាពេលនេះ ក៏ជាការគូសបញ្ជាក់ពីការគាំទ្ររបស់អង់គ្លេសក្នុងការរក្សាសន្តិភាព ដោយចីរភាព និងការអនុវត្តឲ្យបានពេញលេញនូវបទឈប់បាញ់ដែលកម្ពុជា និងថៃ បានព្រមព្រៀងគ្នា កាលពីចុងខែធ្នូឆ្នាំ២០២៥។
សម្រាប់កម្ពុជាលោកស្រី Rosie Winterton រដ្ឋមន្ត្រីទទួលបន្ទុកតំបន់ឥណ្ឌូ-ប៉ាស៊ីហ្វិកបាននិយាយ៖ «កម្ពុជាស្ថិតនៅចំកណ្តាលតំបន់ដែលមានសារៈសំខាន់ចំពោះសន្តិសុខ និងវិបុលភាពរបស់ព្រឹតថេន។ ក្នុងដំណើរទស្សនកិច្ចក្រៅប្រទេសលើកដំបូងរបស់ខ្ញុំ ក្នុងនាមជារដ្ឋមន្ត្រីទទួលបន្ទុកតំបន់ឥណ្ឌូ-ប៉ាស៊ីហ្វិក ខ្ញុំបានឃើញពីរបៀបដែលការគាំទ្ររបស់ព្រឹតថេនកំពុងជួយសហគមន៍នានាឱ្យងើបឡើងវិញពីជម្លោះ និងជួយដោះមីនដែលបង្កការគំរាមកំហែងដល់អាយុជីវិត និងជីវភាពរស់នៅរបស់ប្រជាពលរដ្ឋ។ ព្រឹតថេនប្តេជ្ញាគាំទ្រស្ថិរភាព និងការអភិវឌ្ឍរយៈពេលវែងរបស់កម្ពុជា ហើយបន្តធ្វើការរួមគ្នាដើម្បីកសាងតំបន់ដែលមានសន្តិភាព និងវិបុលភាពសម្រាប់ទាំងអស់គ្នា»។
សូមបញ្ជាក់ថា ដំណើរទស្សនកិច្ចរបស់រដ្ឋមន្ត្រីអង់គ្លេសទទួលបន្ទុកតំបន់ឥណ្ឌូប៉ាស៊ីហ្វិក ធ្វើឡើងតែប៉ុន្មានថ្ងៃប៉ុណ្ណោះ បន្ទាប់ពីនាវា HMS Tamar របស់កងទ័ពជើងទឹកអង់គ្លេស បានចូលសំចតនៅមូលដ្ឋានកងទ័ពជើងទឹករាម កាលពីថ្ងៃទី២០ ខែសីហា ឆ្នាំ២០២៦ដែលជាទស្សកិច្ចលើកទី៣ចាប់ពីឆ្នាំ២០២៣មក។ស្ថានទូតអង់គ្លេសប្រចាំកម្ពុជាឲ្យដឹងថា៖ ដំណើរទស្សនកិច្ចរបស់នាវាល្បាតសមុទ្ររបស់កងទ័ពជើងទឹកអង់គ្លេសនាពេលនេះគឺជាជំហានថ្មីមួយក្នុងការពង្រឹងកិច្ចសហប្រតិបត្តិការផ្នែកការពារជាតិរវាងអង់គ្លេស និងកម្ពុជា។ តាមគម្រោង កងទ័ពជើងទឹកអង់គ្លេស និងកងយោធពលខេមរភូមិន្ទ នឹងហ្វឹកហ្វឺនលើការឆ្លើយតបផ្នែកវេជ្ជសាស្ត្រ ការថែទាំអ្នករងរបួស ការគ្រប់គ្រងការខូចខាត និងជំនាញនាវាចរណ៍ផ្សេងៗ។
សូមជម្រាបជូនថា HMS Tamar គឺជានាវាល្បាតសមុទ្រប្រភេទ River-Class របស់កងទ័ពជើងទឹកអង់គ្លេសដែលកំពុងបំពេញបេសកកម្មនៅតំបន់ឥណ្ឌូប៉ាស៊ីហ្វិក។ នាវាល្បាតសមុទ្រនេះអនុវត្តភារកិច្ចពាក់ព័ន្ធនឹងសន្តិសុខសមុទ្រ ការការពារធនធានជលផល ជំនួយមនុស្សធម៌ និងការពង្រឹងទំនាក់ទំនងជាមួយប្រទេសក្នុងតំបន់។ ឯកអគ្គរាជទូតអង់គ្លេសប្រចាំកម្ពុជា លោក Dominic Williams បានសម្តែងការស្វាគមន៍ចំពោះការមកដល់របស់នាវា HMS Tamar និងក្រុមនាវិកអង់គ្លេស ដោយបានចាត់ទុកការចូលសំចតនៅមូលដ្ឋានទ័ពជើងទឹករាមជាលើកដំបូងនេះជាការបង្ហាញឱ្យឃើញពីការរីកចម្រើននៃទំនាក់ទំនងកងទ័ពជើងទឹករវាងប្រទេសទាំងពីរ។ស្ថានទូតឱ្យដឹងតាមទំព័រហ្វេសប៊ុក (Facebook) ថា ក្នុងអំឡុងទស្សនកិច្ចនាវា HMS Tamar និងក្រុមនាវិកអង់គ្លេស នឹងមានការធ្វើសមយុទ្ធហ្វឹកហ្វឺនរួមជាមួយកងទ័ពជើងទឹកកម្ពុជាសម្រាប់ពង្រឹងកិច្ចសហប្រតិបត្តិការផ្នែកការពារជាតិ និងការផ្លាស់ប្ដូរជំនាញរវាងកម្ពុជា និងចក្រភពអង់គ្លេស រួមទាំងគាំទ្រកិច្ចសហប្រតិបត្តិការសន្តិសុខដែនសមុទ្រក្នុងតំបន់ឥណ្ឌូ-ប៉ាស៊ីហ្វិក។
មេបញ្ជាការកងទ័ពជើងទឹក លោក ទៀ សុខា បានប្រាប់ក្រុមអ្នកសារព័ត៌មានថា កងទ័ពជើងទឹកនៃប្រទេសទាំងពីរនឹងធ្វើការហ្វឹកហ្វឺនរួមគ្នាផ្ដោតលើការងារសង្គ្រោះអ្នករងរបួសលើនាវា ផ្នែកវេជ្ជសាស្ត្រ ជំនាញនាវាចរណ៍ និងសកម្មភាពកីឡាជាដើម។
នាវាចម្បាំងរបស់ចក្រភពអង់គ្លេស អេចអឹមអេស តាម៉ារ (HMS Tamar )មានប្រវែងប្រមាណ ៩០ម៉ែត្រ ទទឹងជាង ១៣ម៉ែត្រ និងមានក្រុមនាវិកប្រមាណ ៦០នាក់។
មេបញ្ជាការនាវា HMS Tamar លោក Tom Lindsey បានលើកឡើងថា ដំណើរទស្សនកិច្ចរបស់កងទ័ពជើងទឹកអង់គ្លេសមកកាន់កម្ពុជាពេលនេះបង្ហាញពីការរីកចម្រើននៃភាពជាដៃគូរវាងប្រទេសទាំងពីរ និងជាឱកាសសម្រាប់កងទ័ពជើងទឹកអង់គ្លេស និងកម្ពុជាធ្វើការជាមួយគ្នា ជាពិសេសលើជំនាញវេជ្ជសាស្ត្រ និងជំនាញនាវាចរណ៍។
គួរឲ្យដឹងថា ក្រោយពីកំពង់ផែសមុទ្ររាមត្រូវបានសម្ពោធដាក់ឲ្យប្រើប្រាស់ជាផ្លូវការកាលពីខែមេសា ឆ្នាំ២០២៥ កម្ពុជាបានអនុញ្ញាតឲ្យនាវាបរទេសចូលសំចតជាហូរហែរួមមាន នាវាកងទ័ពជប៉ុន នាវាកងទ័ពវៀតណាម ចិន រុស្ស៊ី និងឥណ្ឌាជាដើម។
ចក្រភពអង់គ្លេសបានដាក់នាវាចម្បាំង អេចអឹមអេស តាម៉ារ ឱ្យមានវត្តមានជាអចិន្ត្រៃយ៍នៅតំបន់ឥណ្ឌូ-ប៉ាស៊ីហ្វិក ចាប់តាំងពីចុងឆ្នាំ២០២១ ដើម្បីបំពេញបេសកកម្មល្បាតដែនសមុទ្រ ប្រយុទ្ធប្រឆាំងការរត់ពន្ធ និងសកម្មភាពខុសច្បាប់តាមសមុទ្រ ការពារធនធានជលផល និងចូលរួមក្នុងប្រតិបត្តិការប្រឆាំងភេរវកម្ម។ លើសពីនេះ នាវានេះក៏មានតួនាទីក្នុងបេសកកម្មស្វែងរក និងជួយសង្គ្រោះ ព្រមទាំងការធ្វើសមយុទ្ធ និងហ្វឹកហាត់រួមគ្នាជាមួយកងទ័ពជើងទឹកនៃប្រទេសសម្ព័ន្ធមិត្ត និងដៃគូក្នុងតំបន់។
