កម្ពុជា នឹងផ្ដល់ទឹកប្រាក់ ១០ម៉ឺនដុល្លារអាមេរិក ជាជំនួយបន្ទាន់និងបញ្ជូនមន្ត្រី២រូបជួយមីយ៉ាន់ម៉ា ដែលរងការរញ្ជួយដី
ភ្នំពេញ៖ ឯកឧត្តម ឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិ ថ្លែងបញ្ហានេះនៅក្នុងកិច្ចប្រជុំពិសេសបន្ទាន់មួយតាមព្រពន្ធ័អនឡាញជាមួយរដ្ឋមន្ត្រីការបរទេសអាស៊ាន នៅរសៀលថ្ងៃទី៣០ ខែមីនា ឆ្នាំ២០២៥នេះ ។
គ្រៅពីនេះដោយមានការឯកភាពដ៏ខ្ពង់ខ្ពស់ពីសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា គណៈកម្មាធិការជាតិគ្រប់គ្រងគ្រោះមហន្តរាយក៏ បានចាត់បញ្ជូនមន្ត្រីចំនួន ០២រូប ដែលសមាជិកក្រុមប៉ាន់ប្រមាណ និងឆ្លើយតបបន្ទាន់របស់អាស៊ាន ដើម្បីចូលរួមជាមួយបណ្តាប្រទេស ជាសមាជិកអាស៊ានផ្សេងទៀត ក្នុងបេសកកម្មអន្តរាគមន៍សង្គ្រោះគ្រោះរញ្ជួយដី ដែលបានកើតឡើងក្នុងប្រទេស មីយ៉ាន់ម៉ា កាលពីថ្ងៃទី២៨ ខែមីនា ឆ្នាំ២០២៥ តាមការស្នើសុំរបស់រដ្ឋាភិបាលមីយ៉ាន់ម៉ា និងមជ្ឈមណ្ឌល សម្របសម្រួលជំនួយមនុស្សធម៌អាស៊ាន សម្រាប់ការគ្រប់គ្រងគ្រោះមហន្តរាយ (AHA Centre)ផងដែរ។
នៅក្នុងសេចក្តីជូនដំណឹងរបស់គណៈកម្មាធិការជាតិគ្រប់គ្រងគ្រោះមហន្តរាយ ដែលបណ្តាញព័ត៌មាន ទទួលបាននៅថ្ងៃទី៣០ ខែមីនា ឆ្នាំ២០២៥នេះបានឱ្យដឹងទៀតថា មន្ត្រីដែលត្រូវបានបញ្ជូនទៅចូលរួមក្នុងបេសកកម្មខាងលើ នឹងផ្តល់ការគាំទ្រដល់កិច្ចខិតខំប្រឹងប្រែង ក្នុងការជួយសង្គ្រោះគ្រោះមហន្តរាយនេះ។ ការចូលរួមរបស់ពួកគេក្នុងបេសកកម្មនេះបង្ហាញពីការប្តេជ្ញាចិត្ត របស់កម្ពុជាដោយឈរលើស្មារតីសាមគ្គីភាពជាមួយប្រជាជនមីយ៉ាន់ម៉ាក្នុងពេលវេលាដ៏លំបាកនេះ។
រដ្ឋាភិបាលយោធាមីយ៉ាន់ម៉ា បានឱ្យដឹងថាមនុស្សយ៉ាងហោច ១៦៤៤នាក់បានស្លាប់ និង៣៤០០នាក់បានរងរបួស ក្រោយគ្រោះរញ្ជួយដីកម្រិតធ្ងន់ ៧.៧រ៉ិចទ័រ វាយប្រហារលើភាគពាយព្យនៃទីក្រុង Sagaing នៅភាគកណ្ដាលនៃប្រទេសមីយ៉ាន់ម៉ា កាលពីថ្ងៃសុក្រ ទី២៨ ខែមីនា ហើយក៏បង្កផលប៉ះពាល់ដល់ប្រទេសក្បែរខាងដូចជាថៃផងដែរ។ «គ្រប់មន្ទីរពេទ្យយោធា និងស៊ីវិលទាំងអស់ រួមទាំងបុគ្គលិកសុខាភិបាល ត្រូវតែធ្វើការងាររួមគ្នាក្រោមការសម្របសម្រួលមួយប្រកបដោយប្រសិទ្ធភាព ដើម្បីធានាឱ្យបាននូវការឆ្លើយតបខាងវេជ្ជសាស្ត្រឱ្យមានប្រសិទ្ធភាព»។ នេះជាការគូសបញ្ជាក់របស់ប្រមុខរដ្ឋាភិបាលយោធា លោក Min Aung Hlaing ត្រូវបានដកស្រង់សម្ដីដោយប្រព័ន្ធផ្សព្វផ្សាយរដ្ឋមីយ៉ាន់ម៉ា។
ប្រទេសឥណ្ឌា ចិន និងថៃ ស្ថិតនៅក្នុងចំណោមប្រទេសដែលបានបញ្ជូនជំនួយជាសម្ភារៈ និងក្រុមអ្នកជួយសង្គ្រោះទៅកាន់មីយ៉ាន់ម៉ា រួមជាមួយជំនួយ និងក្រុមអ្នកជួយសង្គ្រោះមកពីប្រទេសផ្សេងទៀតដូចជា ម៉ាឡេស៊ី សិង្ហបុរី និងរុស្ស៉ី ខណៈប្រធានាធិបតីអាមេរិក ដូណាល់ ត្រាំ ក៏បានសន្យាផ្ដល់ជំនួយសម្រាប់មីយ៉ាន់ម៉ាផងដែរ។ការឆ្លើយតបបន្ទាន់របស់កម្ពុជាក្នុងការបញ្ជូនមន្ត្រីទៅចូលរួមក្នុងប្រតិបត្តិការមនុស បានបង្ហាញពីស្មារតីសហប្រតិបត្តិការ និងឯកភាពក្នុងតំបន់អាស៊ានក្នុងពេលមានគ្រោះមហន្តរាយ។រាជរដ្ឋាភិបាលកម្ពុជា នៅតែប្តេជ្ញាចិត្តក្នុងការគាំទ្រសហគមន៍ដែលរងផលប៉ះពាល់ និងចូលរួមចំណែកក្នុងកិច្ចខិតខំប្រឹងប្រែងសង្គ្រោះ នៅប្រទេសមីយ៉ាន់ម៉ា៕
