អតីតនាយករដ្ឋមន្ត្រីថៃ លោក ថាក់ស៊ីន ត្រូវបានដោះលែងពីពន្ធនាគារក្រោយឃុំខ្លួន ប្រហែល៨ខែ តែស្ថិតក្រោមការតាមដាន៤ខែ

អតីតនាយករដ្ឋមន្ត្រីរួបរឹតដោយរឿងក្ដីរបស់ប្រទេសថៃ លោក ថាក់ស៊ីន ស៊ីណាវ៉ាត់ (Thaksin Shinawatra)ត្រូវបានដោះលែងពីពន្ធនាគារនៅថ្ងៃចន្ទ១១ឧសភាសប្ដាហ៍នេះ បន្ទាប់ពីជាប់ពន្ធនាគារប្រហែលប្រាំបីខែ ក្រោយតុលាការបានសម្រេចថា លោកបានស្នាក់នៅមន្ទីរពេទ្យដោយខុសច្បាប់ ដើម្បីគេចពីការជាប់ពន្ធនាគារ។ 

មហាសេដ្ឋីវ័យ ៧៦ ឆ្នាំរូបនេះ បានប្រឡូកឆាកនយោបាយជាថ្មី និងគ្របដណ្ដប់លើនយោបាយថៃអស់រយៈពេល២៥ឆ្នាំមកហើយ ប៉ុន្តែឥទ្ធិពលរបស់លោកបានរសាត់ឆ្ងាយនាពេលថ្មីៗនេះ បន្ទាប់ពីការជាប់ពន្ធនាគារចុងក្រោយ និងការបរាជ័យយ៉ាងធ្ងន់ធ្ងររបស់គណបក្សភឿថៃ (Pheu Thai Party) ក្នុងការបោះឆ្នោតកាលពីដើមឆ្នាំនេះ។

ដោយកាត់សក់ខ្លី និងស្លៀកសម្លៀកបំពាក់ពណ៌សធម្មតា លោក ថាក់ស៊ីន បានដើរចេញពីពន្ធនាគារនៅម៉ោងប្រហែល ៧:៤០ ព្រឹក ម៉ោងក្នុងស្រុក និងភ្លាមៗនោះត្រូវបានចោមរោមដោយសមាជិកគ្រួសារ រួមទាំងកូនស្រី និងជាអ្នកបន្តវេន គឺលោកស្រី ផែថងថាន ស៊ីណាវ៉ាត់ (Paetongtarn Shinawatra)ដែលត្រូវបានបណ្តេញចេញពីតំណែងជានាយករដ្ឋមន្ត្រីដោយសាលក្រមរបស់តុលាការកាលពីខែសីហា ឆ្នាំ២០២៥ ប៉ុន្មានសប្តាហ៍មុនពេលលោកជាប់ពន្ធនាគារ។

បន្ទាប់ពីរស់នៅនិរទេសខ្លួនអស់រយៈពេល ១៥ ឆ្នាំ លោកថាក់ស៊ីន បានវិលត្រឡប់មកប្រទេសថៃវិញនៅឆ្នាំ ២០២៣ ដើម្បីប្រឈមនឹងការកាត់ទោសឱ្យជាប់ពន្ធនាគាររយៈពេល ៨ ឆ្នាំពីបទជម្លោះផលប្រយោជន៍ ពុករលួយ និងការរំលោភអំណាច ពេលរូបលោកធ្វើជានាយករដ្ឋមន្ត្រីពីឆ្នាំ ២០០១ ដល់ ២០០៦ ដែលត្រូវបានព្រះមហាក្សត្រសម្រាលទោសមកត្រឹមមួយឆ្នាំវិញ។ប៉ុន្តែលោកបានជាប់ពន្ធនាគារត្រឹមតែប៉ុន្មានម៉ោងប៉ុណ្ណោះ បន្ទាប់ពីលោកវិលត្រឡប់មកប្រទសវិញ ដោយត្អូញត្អែរពីបញ្ហាបេះដូង និងឈឺទ្រូង បន្ទាប់មកបានចំណាយពេលប្រាំមួយខែនៅក្នុងបន្ទប់ VIP នៃមន្ទីរពេទ្យមួយ រហូតដល់លោកត្រូវបានដោះលែងនៅពេល តែតុលាការតម្រូវឲ្យលោកពាក់ឧបករណ៍អេឡិចត្រូនិកតាមដានសកម្មភាពរយៈពេល៤ខែ.។

 ជោគជ័យ និងឥទ្ធិពលរបស់ត្រកូលស៊ីណាវ៉ាត់ ហាក់ជួបនឹងភាពរកាំរកូសខ្លះៗ ក្រោយពីកូនស្រីរបស់លោក គឺលោកស្រី ផែថងថាន ត្រូវបានដកហូតតំណែងជានាយករដ្ឋមន្ត្រី ហើយបក្សភឿថៃទទួលបានលទ្ធផលបោះឆ្នោតទាបបំផុតក្នុងប្រវត្តិសាស្ត្រ ដែលនាំឱ្យមានមន្ទិលសង្ស័យអំពីអនាគតនយោបាយនៃគ្រួសារដ៏មានឥទ្ធិពលមួយនេះ ។
 
អ្នកវិភាគនយោបាយ យល់ឃើញថា ការវិលត្រឡប់របស់លោក ថាក់ស៊ីន នឹងក្លាយជាកម្លាំងរុញច្រានថ្មីសម្រាប់បក្សភឿថៃនៅក្នុងរដ្ឋាភិបាលចម្រុះបច្ចុប្បន្ន ប៉ុន្តែវាក៏អាចនឹងដុតកម្ដៅភាពតានតឹងជាមួយក្រុមអភិរក្សនិយមផងដែរ ៕