វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 2867 នាក់
ម្សិលមិញ 10264 នាក់
សរុប 14142049 នាក់
ចិន៖ ប្រទេសចិន និងប្រទេសវៀតណាម គឺជាប្រទេសជិតខាងគ្នា ប៉ុន្តែចំណងទំនាក់ទំនង កាលពីអតីតកាលរវាងប្រទេសទាំងពីរ បាននាំឱ្យមានការប៉ះទង្គិចគ្នាទៅវិញទៅមកដោយសារការទាមទាធ្វើជាម្ចាស់កម្មសិទ្ធតំបន់មួយចំនួននៅសមុទ្រចិនខាងត្បូង ។តែទោះជាមានបញ្ហាផ្នែកទឹកដីក៏ដោយ ក៏ប៉ុន្តែចំណងសេដ្ឋកិច្ចរវាងប្រទេសទាំងពីរ នៅតែរីកចម្រើនតាមធម្មតា។
ក្រុមហ៊ុនចិនខ្លះ បានបើកសាខារបស់ពួកគេ នៅក្នុងតំបន់សេដ្ឋកិច្ចពិសេសមួយ ដែលមានជំនួយគាំទ្រពីចិនទៀតផង ដែលមានទីតាំងនៅទីក្រុង ហាយ ផុង (Hai Phong) ដែលជាទីក្រុងធំបំផុតលំដាប់ទី៣ក្នុងប្រទេសវៀតណាម។លោក សុង វឹនចៀន គឺជាអនុប្រធានគ្រប់គ្រងទូទៅក្រុមហ៊ុន សឹនយៀក ជាញ់ អ៊ីនវេសមឹន ខូអិលធីឌី (Shenyue Joint Investment Co., Ltd) ដែលបង្កើតនិងគ្រប់គ្រងតំបន់សហប្រតិបត្តិការសេដ្ឋកិច្ចនិងពាណិជ្ជកម្ម ចិន-វៀតណាមបានឲ្យដឹងថា «យើងបង្កើតតំបន់នេះ ឡើងដើម្បីជួយក្រុមហ៊ុនចិនទាំងឡាយ ដែលចង់ពង្រីកអាជីវកម្មរបស់ពួកគេ ទៅបរទេស ជាពិសេសគឺជួយសហគ្រាសខ្នាតតូច និងមធ្យមដែលចង់បើកអាជីវកម្មនៅក្នុងប្រទេសផ្សេង ដែលពួកគេទើបតែចូលមករកស៊ីជាលើកដំបូងតែម្តង។
ក្រុមហ៊ុនចិនទាំងនោះ មានទំនុកចិត្តជាង នៅពេលដែលគេបើកអាជីវកម្មនៅក្នុងតំបន់មួយ ដែលបង្កើតឡើងដោយក្រុមហ៊ុនរដ្ឋរបស់ចិន ដូចជាក្រុមហ៊ុនរបស់ពួកយើងជាដើមនេះ»។
ដោយសារតែតម្លៃពលកម្មទាប សំបូរកម្មករ និងបរិយាកាសអាជីវកម្មដ៏កក់ក្តៅ ការវិនិយោគដោយផ្ទាល់របស់ចិន ទៅកាន់ប្រទេសវៀតណាម និងការធ្វើពាណិជ្ជកម្មបានឈានដល់កម្រិតខ្ពស់បំផុតមិនធ្លាប់មាន កាលពីឆ្នាំ២០១៧ ដោយបានកើនឡើង២៩ភាគរយ ហើយមានតម្លៃជាង១ម៉ឺនលានដុល្លារអាមេរិក ក្នុងមួយខែ។
ប្រទេសវៀតណាម បានវ៉ាដាច់ប្រទេសម៉ាឡេស៊ី ដោយគ្រងដំណែងជាដៃគូពាណិជ្ជកម្មដ៏ធំបំផុត របស់ប្រទេសចិន នៅក្នុងសហគមន៍អាស៊ាន។
ប្រធានក្រុមសេដ្ឋកិច្ចវិទូនៅក្រុមហ៊ុន សេដ្ឋកិច្ចមេគង្គ (Mekong Economics) លោក អាដាម មីកខាធី (Adam McCarty) និយាយថា ប្រទេសវៀតណាមនៅតែប្រុងប្រយ័ត្នចំពោះប្រាក់កម្ចីនិងឱកាសដែលប្រទេសចិនផ្តល់ឱ្យ។
លោក អាដាម មីកខាធី ប្រធានក្រុមសេដ្ឋកិច្ចវិទូនៅក្រុមហ៊ុន សេដ្ឋកិច្ចមេគង្គ និយាយថា «វៀតណាមដឹងថា គេចាំបាច់ត្រូវតែបន្តភ្ជាប់ទំនាក់ទំនងផ្នែកសេដ្ឋកិច្ចឱ្យរឹងមាំជាមួយប្រទេសចិនដដែល។ វាគឺជាវិធីដែលជួយឱ្យប្រទេសវៀតណាម អាចដើរឱ្យទាន់ពិភពលោក និងក្លាយជាប្រទេសជឿនលឿនបាន។ ប៉ុន្តែវៀតណាម មិនចង់ពឹងផ្អែកទៅលើប្រទេសចិនទេ។ អញ្ជឹងហើយបានជាវៀតណាម មិនទទួលយកប្រាក់កម្ចី និងឱកាសដែលចិនផ្តល់ឱ្យ ដូចជាប្រទេសដទៃនោះ។ វៀតណាម ប្រុងប្រយ័ត្ននឹងរឿងនេះជាង»។
អ្នកជំនួញនៅប្រទេសវៀតណាម ចង់ឃើញប្រទេសទាំងពីរពង្រឹងចំណងសេដ្ឋកិច្ចឱ្យកាន់តែរឹងមាំបន្ថែមទៀត។លោក វ៊ូ ទាន ឡុក ប្រធានសភាពាណិជ្ជកម្មវៀតណាម និយាយថា «ខ្ញុំសង្ឃឹមថា រាល់ភាពតានតឹងផ្នែកនយោបាយទាំងអស់រវាងប្រទេសវៀតណាមនិងប្រទេសចិន អាចដោះស្រាយបានតាមរយៈមធ្យោបាយសន្តិភាព តុចរចា តុពិភាក្សា ដោយផ្អែកលើការយល់ស្របរវាងបក្សកាន់អំណាចទាំងពីររដ្ឋាភិបាលនៃប្រទេសទាំងពីរ ដើម្បីការពារដល់ផលប្រយោជន៍របស់ប្រទេសជាតិយើងទាំងសងខាង»៕ (សារព័ត៌មាន CCTV របស់ចិន)