ថៃ រុះរើ​គណៈរដ្ឋមន្ត្រី​ជា​ផ្លូវការ​បន្ទាប់ពី​ដំណើការ​បាន​ជិត​១​ឆ្នាំ​

​ប្រទេស​ថៃ​៖​នាយករដ្ឋមន្ត្រី​ថៃ​លោក សេដ្ឋា ថា​វី​ស៊ីន នៅ​ថ្ងៃអាទិត្យ​នេះ​បានប្រកាស​រុះរើ​គណៈរដ្ឋមន្ត្រី​ថ្មី​បន្ទាប់ពី​រដ្ឋាភិបាល​បង្កើត​បាន​មិន​ដល់​១​ឆ្នាំ​ផង​។ ក្នុងការ​រុះរើ​នោះ​មានការ​តែងតាំង​អ្នកថ្មី​ចំនួន ៦ រូប ខណៈ​រដ្ឋមន្ត្រី ៤ រូ​បន​នឹង​ចាក​ចេញពី​តំណែង ហើយ​រូបលោក សេដ្ឋា ខ្លួនឯង​ផ្ទាល់​ក៏​បាត់​មុខតំណែង​មួយ​ផងដែរ ។

កាសែត Bangkok Post នៅ​ថ្ងៃទី​២៨ ខែមេសា​បាន​ឲ្យ​ដឹងថា​៖ ក្នុងការ​រុះរើ​គណៈរដ្ឋមន្ត្រី​នេះដែរ លោក សេដ្ឋា របូត​តំណែង​ជា​រដ្ឋមន្ត្រីក្រសួង​ហិរញ្ញវត្ថុ ហើយ​បានប្រកាស​តែងតាំង​អតីត​នាយក​ប្រតិបត្តិ​ថាមពល លោក Pichai Chunhavajira ឲ្យ​ឡើង​អង្គុយ​កៅអី​មួយ​នេះ​ជំនួស ស្រប​ពេលដែល​សេដ្ឋកិច្ច​ប្រទេស​ថៃ​កំពុងស្ថិត​ក្នុង​វិបត្តិ ដោយសារតែ​លោក​មមាញឹក​នឹង​ការងារ​ជា​នាយករដ្ឋមន្ត្រី​ខ្លាំងពេក ។​
​ក្រៅពី​ក្លាយខ្លួនជា​រដ្ឋមន្ត្រីក្រសួង​ហិរញ្ញវត្ថុ​ហើយ លោក Pichai វ័យ ៧៥ ឆ្នាំ​ក៏​នឹង​អង្គុយ​កៅអី​ជា​ឧបនាយករដ្ឋមន្ត្រី​ផងដែរ ។

លោក Pichai ដែលជា​ប្រធាន​ក្រុមប្រឹក្សាភិបាល​នៃ​ផ្សារ​ហ៊ុន​ថៃ​របស់​ក្រុមហ៊ុន Bangchak Corp រូបនេះ​ក៏​នឹង​រ៉ាប់រង ក៏ដូចជា​ទទួលខុសត្រូវ​លើ​គោលនយោបាយ​មួយចំនួន រួមទាំង​គម្រោង​ចែកចាយ​កញ្ចប់​ថវិកា ៥០០ ពាន់​លាន​បាត​របស់លោក សេដ្ឋា ដែល​នឹង​ផ្ទេរប្រាក់​ទៅ​ឲ្យ​ពលរដ្ឋ​ថៃ​ក្នុង​ម្នាក់ៗ ១០,០០០ បាត ក្នុងចំណោម ៥០ លាន​នាក់​ដើម្បី​ជួយ​បង្កើន​សេដ្ឋកិច្ច​ក្នុង​សហគមន៍ ។​​ចំណែក​លោក Somsak Thepsuthin ដែល​បច្ចុប្បន្ន​ជា​ឧបនាយករដ្ឋមន្ត្រី នឹង​ទៅកាន់​ការ​ជា​រដ្ឋមន្ត្រីក្រសួង​សុខភាព​សាធារណៈ​ជំនួស​លោក​វេជ្ជបណ្ឌិត Chonnan Srikaew ខណៈ​លោក Suriya Juangroongruangkit រដ្ឋមន្ត្រីក្រសួង​ដឹកជញ្ជូន នឹង​ក្លាយជា​ឧបនាយករដ្ឋមន្ត្រី ។ រីឯ​លោក Panpree Phittanukorn ឧបនាយករដ្ឋមន្ត្រី និង​ជា​រដ្ឋមន្ត្រី​ក្រសួងការបរទេស នឹង​នៅសល់តែ​តំណែង​ជា​រដ្ឋមន្ត្រី​ក្រសួងការបរទេស​មួយ​មុខ​ប៉ុណ្ណោះ ។​
​គួរ​បញ្ជាក់ថា ការរុះរើ​គណៈរដ្ឋមន្ត្រី​នេះ​មាន​ហេតុផល​ជាច្រើន ហើយ​នេះ​ក៏​អាចជា​ស្ទីល​របស់​គណបក្ស​ភឿ​ថៃ​ផងដែរ ខណៈ​ការផ្លាស់ប្ដូរ​នេះ​អនុវត្ត​តាំងតែ​ពី​សម័យ​បក្ស​ថៃ​ស្រលាញ់​ថៃ​ក្រោម​ការដឹកនាំ​របស់លោក ថាក់ស៊ីន ដូចគ្នា ដើម្បី​ឆ្លើយតប​ចំពោះ​ក្រុម​នយោបាយ ក៏ដូចជា​ការចរចា​ផលប្រយោជន៍​ជាមួយ​ក្រុម​មូលធន ហើយ​ស្ទីល​នេះ​ជា​មធ្យម​នឹងមាន​ការរុះរើ​គណៈរដ្ឋមន្ត្រី​នៅ​រៀងរាល់ ៦ ខែ ឬ ១ ឆ្នាំ​ម្តង ។​ 

​