ចិនប្រតិកម្មបន្ទាប់ពីអាមេរិកបាញ់ទម្លាក់បាល់ឡុងហោះ
26-February-2023 / ព័ត៌មានអន្តរជាតិ
ប្រទេសចិន៖ទីក្រុងប៉េកាំងបានបង្ហាញការខឹងសម្បាយ៉ាងខ្លាំងក្រោយពេលអាមេរិកបានប្រើប្រាស់មីស៊ីលបាញ់ទម្លាក់បាល់ឡុងរបស់ចិននៅលើតំបន់សមុទ្ររដ្ឋកាលីហ្វ័រនីញ៉ា ។ក្រសួងការបរទេសចិននៅថ្ងៃទី៥ ខែកុម្ភៈបានថ្កោលទោសយ៉ាងខ្លាំងដល់សកម្មភាពប្រើមីស៊ីលបាញ់កម្ទេចបាល់ឡុងហោះរបស់ចិនដែលប្រើប្រាស់ក្នុងគោលដៅ ស្រាវជ្រាវអាកាសធាតុ និង វិទ្យាសាស្ត្រ។
សារព័ត៌មាន AFP នៅថ្ងៃអាទិត្យ ទី៥ ខែកុម្ភៈ ឆ្នាំ២០២៣ បានផ្សាយថា ទីក្រុងប៉េកាំងចាត់ទុកថាវាជាការបញ្ចេញប្រតិកម្មជ្រុសហួសហេតុ និងបំពានច្បាប់អន្តរជាតិ។នៅក្នុងសេចក្ដីថ្លែងការណ៍មួយ ក្រសួងការបរទេសចិនបានគូសបញ្ជាក់ដូច្នេះថា «ចិនបង្ហាញការខឹងសម្បាជាខ្លាំង និងតវ៉ាប្រឆាំងទៅនឹងការប្រើប្រាស់កម្លាំងបាយរបស់សហរដ្ឋអាមេរិកដើម្បីវាយប្រហារលើបាល់ឡុងស៊ីវិល»។ សេចក្ដីថ្លែងការណ៍នេះដដែលក៏បានសង្កត់ធ្ងន់ដែរថា ទីក្រុងប៉េកាំងរក្សាសិទ្ធិស្របច្បាប់ នៅក្នុងការចាត់វិធានការចាំបាច់ក្នុងការឆ្លើយតបចនានា។
គួរបញ្ជាក់ថា យោធាអាមេរិក កាលពីថ្ងៃសៅរ៍ចុងសប្ដាហ៍នេះ (ម៉ោងនៅអាមេរិក) បានបាញ់ទម្លាក់បាល់ឡុងមួយដែលទីក្រុងវ៉ាស៊ីនតោនសង្ស័យថាជាបាល់ឡុងចារកម្មរបស់ចិនហើយក្រោយស្ទាក់ស្ទើរអស់រយៈពេលប៉ុន្មានថ្ងៃកន្លងមកនេះ ព្រោះខ្លាចកម្ទេចកម្ទីរបស់វាបង្កគ្រោះថ្នាក់ដល់មនុស្សនៅខាងក្រោម។ បាល់ឡុងចិនត្រូវបានបាញ់ទម្លាក់ដោយមីស៊ីលមួយគ្រាប់ដែលបាញ់ចេញពីយន្ដហោះចម្បាំង F-22 ។បើតាមប្រព័ន្ធផ្សព្វផ្សាយរបស់អាមេរិកបានបញ្ជាក់ថា បាល់ឡុងនេះហោះនៅរយៈកម្ពស់ ១៨,៣០០ម៉ែត្រ ខណៈដែលប្រតិបត្តិការមួយបានធ្វើឡើងនៅក្នុងដែនទឹកនៃមហាសមុទ្រអាត្លង់ទិក ដើម្បីប្រមូលកម្ទេចកម្ទីនៃបាល់ឡុងនេះ។
មន្ត្រីជាន់ខ្ពស់នៃក្រសួងការពារជាតិអាមេរិកក៏បានឲ្យដឹងផងដែរថា បាឡុងនេះបានហោះចូលទឹកដីអាមេរិក តាំងពីថ្ងៃទី២៨មករាកន្លងទៅម្ល៉េះ ដោយពីដំបូងហោះចូលតាមរដ្ឋអាឡាស្កា រួចហើយហោះឆ្លងទៅកាណាដា នៅថ្ងៃទី៣០ មុននឹងចូលមកក្នុងទឹកដីអាមេរិកវិញ នៅថ្ងៃអង្គារ ទី៣១មករា ដោយហោះកាត់ពីលើតំបន់ដែលមានទីតាំងមីស៊ីលនុយក្លេអ៊ែរអន្តរទ្វីបរបស់អាមេរិក (រដ្ឋម៉ុងតាណា)។ក្រោយពីបានទម្លាក់បាឡុងនេះ ក្រុមជំនាញមុជទឹករបស់អាមេរិកបានបើកប្រតិបត្តិការភ្លាមៗ ដើម្បីរុករកបំណែករបស់បាឡុង ដោយមន្ត្រីក្រសួងការពារជាតិបានប្រាប់សារព័ត៌មានថា បំណែកនេះធ្លាក់ទៅក្នុងតំបន់ ដែលទឹកសមុទ្រមានជម្រៅត្រឹមប្រមាណជា ១៤ម៉ែត្រតែប៉ុណ្ណោះ ដូច្នេះ ការរុករកបំណែករបស់វាទំនងជាមិនចោទជាបញ្ហាស្មុគស្មាញនោះទេ។
តាមគម្រោង នៅពេលដែលរកឃើញ និងស្រង់ចេញពីទឹក បំណែកបាឡុងនេះនឹងត្រូវគេបញ្ជូនទៅឲ្យទីភ្នាក់ងារ FBI ដែលជាទីភ្នាក់ងារជំនាញខាងប្រឆាំងចារកិច្ច ដើម្បីសិក្សាលម្អិតថា តើនៅលើបាឡុងនេះមានផ្ទុកឧបករណ៍អ្វីខ្លះ ហើយអាចប្រមូលបានទិន្នន័យអ្វីខ្លះ?បាល់ឡុងចិននេះ វាក៏បង្កឱ្យមានភាពតានតឹងជាថ្មី រវាងទីក្រុងវ៉ាស៊ីនតោន នឹងទីក្រុងប៉េកាំង រហូតដល់មានការផ្អាកដំណើរទស្សនកិច្ចរបស់លោករដ្ឋមន្ត្រីការបរទេសអាមេរិក លោក អាន់តូនី ប៊ី្លនខិន ទៅកាន់ទីក្រុងប៉េកាំង ដែលដំបូងឡើយគ្រោងនឹងធ្វើឡើងនៅចុងសប្ដាហ៍នេះ៕
