ទន្ទឹមការបាញ់ផ្លោងសម្លាប់ទាហ៊ានអ៊ុយក្រែនលោក ពូទីន និងប្រធានាធិបតីម៉ុងហ្គោលី ជួបគ្នាបង្កការរិះគន់ពីអ៊ុយក្រែន ជុំវិញដីកាចាប់ខ្លួនរបស់ ICCតែហ្វាំងដាក់ការកៀបសង្គត់
22-August-2024 / ព័ត៌មានអន្តរជាតិ
ម៉ុងហ្គោលី៖ ប្រធានាធិបតីរុស្ស៊ី លោក វ្ល៉ាឌីមៀ ពូទីន បានទៅជួបលោកអ៊ុកខ្នាអាជីនឃឺរីស៊ុក (Ukhnaagiin Khurelsukh) ប្រធានាធិបតីម៉ុងហ្គោលី ក្នុងរដ្ឋធានីអ៊ូឡង់បាទ័រ (Ulaanbaatar) នៅថ្ងៃអង្គារ ទី៣ ខែកញ្ញានេះ ក្នុងដំណើរទស្សនកិច្ចដំបូងរបស់ លោក ពូទីន ទៅកាន់ប្រទេស ដែលជាសមាជិករបស់តុលាការព្រហ្មទណ្ឌអន្តរជាតិ (ICC) ចាប់តាំងពីមានដីកាចាប់ខ្លួនរូបលោក។ នេះបើយោងតាមការចេញផ្សាយដោយទីភ្នាក់ងារសារព័ត៌មាន AFP។
ទន្ទឺមគ្នានោះប្រធានាធិបតីអ៊ុយក្រែន លោក Volodymyr Zelensky បានប្រកាសថា មីស៊ីលរុស្ស៊ីពីរគ្រាប់បានវាយប្រហារវិទ្យាស្ថានយោធាមួយក្នុងទីក្រុង Poltava ភាគកណ្តាលប្រទេសអ៊ុយក្រែន កាលពីថ្ងៃអង្គារ បណ្តាលឱ្យមនុស្សយ៉ាងហោចណាស់ ៤១ នាក់ស្លាប់ និង ១៨០ នាក់រងរបួស។ ការវាយប្រហារនេះត្រូវបានចាត់ទុកថាជាការវាយប្រហារដ៏សាហាវបំផុតមួយក្នុងសង្គ្រាមរហូតមកដល់ពេលនេះ។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃអង្គារ ទី៣ ខែកញ្ញា ឆ្នាំ ២០២៤។លោក Zelensky បានថ្កោលទោសយ៉ាងខ្លាំងចំពោះការវាយប្រហារនេះ ដោយចាត់ទុកថាវាជាអំពើភេរវកម្ម និងបានប្តេជ្ញាចាត់វិធានការឆ្លើយតប។ លោកក៏បានបញ្ជាឲ្យមានការស៊ើបអង្កេតយ៉ាងពេញលេញ និងរហ័សផងដែរ។
នៅទីក្រុង Poltava អាជ្ញាធរមូលដ្ឋានបានប្រកាសកាន់ទុក្ខរយៈពេលបីថ្ងៃ ខណៈដែលប្រជាជនកំពុងបរិច្ចាគឈាមដើម្បីជួយដល់អ្នករងរបួស។ ការវាយប្រហារនេះបានបង្កឱ្យមានការសោកស្តាយ និងការថ្កោលទោសយ៉ាងខ្លាំងពីសហគមន៍អន្តរជាតិ ដោយចាត់ទុកថាវាជាឧក្រិដ្ឋកម្មសង្គ្រាម។សម្រាប់លោក ពូទីន ត្រូវបានទទួលស្វាគមន៍យ៉ាងកក់ក្តៅ នៅពេលចុះចតដល់រដ្ឋធានី Ulaanbaatar កាលពីយប់ថ្ងៃចន្ទ មុនពេលផ្តើមដំណើរទស្សនកិច្ច ដែលត្រូវបានគេមើលឃើញថា ជាការប្រឆាំងនឹងដីកាចាប់ខ្លួនរបស់ ICC ការរិះគន់ពីសំណាក់អ៊ុយក្រែន លោកខាងលិច និងក្រុមសិទ្ធិមនុស្ស ដែលសុទ្ធសឹងតែអំពាវនាវឱ្យមានការឃុំខ្លួនរូបលោក។
លោក ពូទីន ត្រូវតុលាការព្រហ្មទណ្ឌអន្តរជាតិ ចេញដីកាចាប់ខ្លួន ក្នុងខែមីនា ឆ្នាំ ២០២៣ ពីបទជាប់សង្ស័យថា បានចាប់ជម្លៀសកុមារអ៊ុយក្រែន ទៅកាន់ប្រទេសរុស្ស៊ី។ ផ្អែកតាម គោលការណ៍ជាផ្លូវការ ក្នុងនាមជាប្រទេសហត្ថលេខីមួយ នៃតុលាការព្រហ្មទណ្ឌអន្តរជាតិ ម៉ុងហ្គោលី ត្រូវមានកាតព្វកិច្ច ចាប់ខ្លួនលោក ពូទីន។ តែ ទោះយ៉ាងណា នៅក្នុងភាពពិតជាក់ស្តែង តុលាការខាងលើ គ្មានអំណាច បង្ខំប្រទេសជាសមាជិក ឲ្យគោរពតាមកាតព្វកិច្ច ដែលបានចែងនោះឡើយ។ ជាឧទាហរណ៍ កាលពីអតីតកាល មានបុគ្គលផ្សេងទៀត ដែលជាប់ឈ្មោះក្នុងដីកាឃាត់ខ្លួន តួយ៉ាង អតីតប្រធានាធិបតីស៊ូដង់ លោក Omar el-Béchir បានធ្វើដំណើរទៅកាន់ប្រទេសហត្ថលេខីមួយចំនួន នៃតុលាការព្រហ្មទណ្ឌអន្តរជាតិ ដោយឥតភ័យបារម្ភអ្វីទាំងអស់។កាលពីថ្ងៃចន្ទ ទី ២ ខែ កញ្ញា នាយកប្រតិបត្តិអង្គការ Amnesty International ប្រចាំនៅម៉ុងហ្គោលី លោក Altantuya Batdorj បានទាមទារឲ្យអាជ្ញាធរម៉ុងហ្គោលី ចាប់ខ្លួនលោក ពូទីន។ តែការទាមទារនេះ ពុំទទួលបានផ្លែផ្កា ឡើយ។
មុនពេលមានទស្សនកិច្ចនេះ លោក ពូទីន ធ្លាប់ចង្អុលបង្ហាញពីគម្រោងសេដ្ឋកិច្ច និងឧស្សាហកម្ម ដែលជាការសន្យា នៃប្រទេសទាំងពីរ ធ្វើឡើងក្នុងបទសម្ភាសន៍ជាមួយកាសែតម៉ុងហ្គោលី Unuudur។ ក្នុងចំណោមគម្រោងនោះ ក៏មាននូវការសាងសង់បំពង់ឧស្ម័ន តភ្ជាប់ជាមួយចិន និងរុស្ស៉ីផងដែរ។ជាប្រទេសប្រជាធិបតេយ្យ ដែលស្ថិតនៅចន្លោះមហាអំណាចដូចជារុស្ស៊ី និងចិន នាំឱ្យម៉ុងហ្គោលី ទទួលបាន ទំនាក់ទំនងវប្បធម៌ជិតស្និទ្ធជាមួយទីក្រុងមូស្គូ ក៏ដូចជាទំនាក់ទំនងពាណិជ្ជកម្មដ៏សំខាន់ ជាមួយទីក្រុងប៉េកាំង។ ចាប់តាំងពីឆ្នាំ ១៩៩១មក ម៉ុងហ្គោលីព្យាយាមរក្សាទំនាក់ទំនងជិតស្និទ្ធ ជាមួយប្រទេសទាំងពីរ។
សម្រាប់ប្រទេសហ្វាំងឡង់វិញ រដ្ឋមន្ត្រីការពារជាតិនៃប្រទេសហ្វាំងឡង់ លោក Antti Hakkanen បាននិយាយថា រដ្ឋាភិបាលកំពុងរៀបចំដាក់សំណើ ដើម្បីហាមឃាត់ជនជាតិរុស្ស៉ីពីការទិញអចលទ្រព្យ នៅក្នុងប្រទេសរបស់ខ្លួន ដែលជាចំណាត់ការមួយដើម្បីការពារសន្តិសុខជាតិ។ នេះបើតាម ទីភ្នាក់ងារសារព័ត៌មាន Reuters នៅថ្ងៃអង្គារ ទី៣ ខែកញ្ញា ឆ្នាំ ២០២៤។ទំនាក់ទំនងរវាងហ្វាំងឡង់ និងរុស្ស៊ីដែលជាប្រទេសជិតខាង បានធ្លាក់ចុះគួរឱ្យកត់សម្គាល់ ចាប់តាំងពីសង្គ្រាមនៅអ៊ុយក្រែនផ្ទុះឡើង និងដែលបាននាំឱ្យទីក្រុងហែលស៊ិនគី ប្រឹងប្រែងដើម្បីបានក្លាយជាសមាជិក នៃបក្សសម្ព័ន្ធយោធាណាតូ (NATO)។ សំណើហាមឃាត់ផ្នែកអចលនទ្រព្យនាពេលនេះ នឹងត្រូវធ្វើឡើងចំពោះពលរដ្ឋសញ្ជាតិពីរ និងអ្នកស្នាក់នៅអចិន្ត្រៃយ៍រុស្ស៊ី ក្នុងប្រទេសហ្វាំងឡង់ ក៏ដូចជានៅអឺរ៉ុប ហើយត្រូវមានការពិគ្រោះយោបល់ពីអ្នកជំនាញ មុនការបោះឆ្នោតសភា។
លោក Hakkanen បានប្រាប់សន្និសីទសារព័ត៌មានដូច្នេះថា «បទប្បញ្ញត្តិនេះ មានគោលបំណងការពារអរិភាព ដែលអាចកើតមានប្រឆាំងនឹងហ្វាំងឡង់។ ពេលនេះ ហ្វាំងឡង់កំពុងត្រួតពិនិត្យលើអចលនទ្រព្យចំនួន ៣,៥០០នៅក្នុងប្រទេស ដែលមានម្ចាស់ជាជនជាតិរុស្ស៉ី។ហ្វាំងឡង់ មានព្រំដែនគោកប្រវែង ១,៣៤០គីឡូម៉ែត្រជាមួយរុស្ស៉ី ហើយបានបិទច្រកឆ្លងកាត់ទាំងអស់រួចហើយ ដោយចោទប្រកាន់រុស្ស៉ីអំពី ការប្រើប្រាស់ជនចំណាកស្រុកមកពីអាស៉ី អាហ្វ្រិក ធ្វើជាអាវុធ តាមរយៈការជំរុញឱ្យពួកគេ ស្វែងរកសិទ្ធិជ្រកកោន នៅក្នុងប្រទេសរបស់ខ្លួន៕
.jpg&h=97&w=146)
