ក្រោយគណបក្សនាយករដ្ឋមន្ត្រី តាកាអ៊ិឈិ ទទួលជ័យជម្នះ ក្នុងការបោះឆ្នោតសភារពឹងថាជប៉ុននឹងពង្រឹងសមត្ថភាពយោធាកាន់តែខ្លាំង

ជប៉ុន៖ នាយករដ្ឋមន្ត្រីជប៉ុន លោកស្រី សាណែ តាកាអ៊ិឈិ (Sanae Takaichi) បានដឹកនាំសម្ព័ន្ធភាពគណបក្សកាន់អំណាច ទទួលបានជ័យជម្នះយ៉ាងធំធេង នៅក្នុងការបោះឆ្នោតសភាជាន់ទាប កាលពីថ្ងៃអាទិត្យទី៨កុម្ភៈកន្លងទៅ។ ជ័យជម្នះនេះ បានធ្វើឱ្យបក្សរបស់លោកស្រី គ្រប់គ្រងអាសនៈជាង ២ ភាគ ៣ នៃសភាទាំងមូល ដែលគេហៅថាជា «សំឡេងភាគច្រើនដាច់ខាត» ។ 

រូបភាពនៅឯទីស្នាក់ការគណបក្សប្រជាធិបតេយ្យសេរី (LDP) បានបង្ហាញឱ្យឃើញលោកស្រី តាកាអ៊ិឈី កំពុងបិទផ្កាពណ៌ក្រហមនៅលើឈ្មោះបេក្ខជនដែលបានឈ្នះឆ្នោត ខណៈតាមរយៈរបាយការណ៍បឋម បង្ហាញថា សម្ព័ន្ធភាពរបស់លោកស្រីអាចទទួលបានអាសនៈយ៉ាងតិច ៣១០ ក្នុងចំណោម ៤៦៥ អាសនៈ ដែលនេះគឺជាការកើនឡើងយ៉ាងខ្លាំង បើធៀបនឹងចំនួនអាសនៈ ២៣៣ កាលពីមុនបោះឆ្នោត ។

សូមបញ្ជាក់ថាប្រជាជនជប៉ុនចំនួន ជាង២០ លាននាក់បានបោះឆ្នោតមុនកាលកំណត់សម្រាប់ការបោះឆ្នោតសភាតំណាងរាស្ត្រគិតត្រឹមថ្ងៃទី ៦ ខែកុម្ភៈ ដែលជាការកើនឡើងគួរឱ្យកត់សម្គាល់២៦% ពីការបោះឆ្នោតលើកមុន។ ការកើនឡើងនេះតំណាងឱ្យប្រហែល ២០% នៃអ្នកមានសិទ្ធិបោះឆ្នោតទាំងអស់ដែលបានជ្រើសរើសបោះឆ្នោតមុនថ្ងៃបោះឆ្នោតផ្លូវការនៅថ្ងៃទី ៨ខែកុម្ភៈ។ ក្រសួងកិច្ចការផ្ទៃក្នុងបានរាយការណ៍ថា ចំនួនអ្នកចេញទៅបោះឆ្នោតបានកើនឡើងនៅទូទាំងខេត្តទាំងអស់ ដោយខេត្ត Chiba មានកំណើនខ្ពស់បំផុតជាង៤០%។

ជ័យជម្នះនៃការបោះឆ្នោតលើកនេះនេះ បានជួយពង្រឹងអំណាចរបស់លោកស្រី សាណែតាកាអ៊ិឈី យ៉ាងខ្លាំង បន្ទាប់ពីលោកស្រីទើបតែកាន់តំណែងបានត្រឹមតែ ៤ ខែ។ វានឹងផ្តល់លទ្ធភាពឱ្យលោកស្រី អាចបន្តសម្រេចនូវគោលនយោបាយសំខាន់ៗ ដូចជាការបង្កើនសមត្ថភាពយោធារបស់ជប៉ុន ដើម្បីទប់ទល់នឹងភាពតានតឹងជាមួយចិន និងការរឹតចំណងមិត្តភាពឱ្យកាន់តែស៊ីជម្រៅជាមួយសហរដ្ឋអាម៉េរិកជាដើម ។

លោកស្រី តាកាអ៊ិឈី គឺជាស្ត្រីដំបូងគេបង្អស់ដែលបានក្លាយជានាយករដ្ឋមន្ត្រីជប៉ុន កាលពីខែតុលាកន្លងទៅ។ ការសម្រេចចិត្តរំលាយសភា ដើម្បីបោះឆ្នោតមុនអាណត្តិ ចំពេលពាក់កណ្តាលរដូវរងាបែបនេះ គឺជារឿងដែលកម្រកើតមានណាស់ក្នុងប្រវត្តិសាស្ត្រជប៉ុន ប៉ុន្តែវាគឺជាការប្រថុយប្រថានលើរឿងនយោបាយមួយ ដែលចុងក្រោយទទួលបានជោគជ័យបំផុតសម្រាប់លោកស្រី ៕ប្រភព៖ VIORY