ទីតាំងប៊ូមខ្សាច់មួយកន្លែងស្ថិតក្នុងស្ទឹងកំប្រង់ កំពុងធ្វើសកម្មភាពយ៉ាងសកម្ម សង្ស័យគ្មានច្បាប់អនុញ្ញាត?

ខេត្តបាត់ដំបង៖ ប្រជាពលរដ្ឋដែលរស់នៅក្បែរតំបន់ស្ទឹងកំប្រង់ ស្ថិតក្នុងភូមិកំប្រង់ ឃុំកំប្រង់ស្រុកកំរៀង ខេត្តបាត់ដំបង បានសម្តែងការព្រួយបារម្ភយ៉ាងខ្លាំង ខណៈដែលឃើញមានសកម្មភាពប៊ូមខ្សាច់មួយកន្លែង កំពុងធ្វើអាជីវកម្មយ៉ាងគគ្រឹកគគ្រេង ដោយមិនដឹងថាមានច្បាប់អនុញ្ញាតត្រឹមត្រូវ ឬលោតឆត្រ័ទេ។ប្រសិនបើមានច្បាប់តើរដ្ឋបានសួយសាអាករប៉ុន្មានពីអាជិវកម្មមួយនេះ?។ 

ប្រភពពីប្រជាពលរដ្ឋក្នុងមូលដ្ឋានបានឱ្យដឹងថា ទីតាំងប៊ូមខ្សាច់នេះបានធ្វើសកម្មភាព យូរមកហើយ ទាំងយប់ទាំងថ្ងៃ។ សាឡង់ និងម៉ាស៊ីនប៊ូមខ្សាច់ធំៗ កំពុងធ្វើសកម្មភាព រថយន្តដឹកខ្សាច់ធុនធំ ចេញចូលដឹកជញ្ជូន ដែលបង្កឱ្យផ្លូវលំក្នុងភូមិរងការខូចខាត និងហុយធូលីប៉ះពាល់សុខភាពអ្នកភូមិ។ អ្វីដែលជាក្តីបារម្ភធំបំផុតរបស់ប្រជាពលរដ្ឋ គឺខ្លាចក្រែងការប៊ូមខុសបច្ចេកទេសបង្កកាបាក់ច្រាំង។

ប្រជាពលរដ្ឋសូមសំណូមពរដល់ មន្ទីររ៉ែ និងថាមពលខេត្តបាត់ដំបង ក៏ដូចជាឯកឧត្តមសុខ លូអភិបាលខេត្ត មេត្តាចាត់មន្ត្រីជំនាញចុះមកត្រួតពិនិត្យទីតាំងខាងលើនិងពន្យល់ផងថា តើការធ្វើអាជីវកម្មនេះមានច្បាប់អនុញ្ញាតត្រឹមត្រូវដែរឬទេ? និងមានបច្ចេកទេសត្រឹមត្រូវដែលធានាសុវត្ថិភាពបរិស្ថានដែរឬទេ?។ប្រជាពលរដ្ឋឲ្យដឹងថាថាម្ចាស់ទីតាំងឈ្មោះ ធូ ធានទឺ ក្រុមហ៊ុន ឯកជន។