អង់គ្លេសមិនអញ្ជើញរុស្ស៉ី បេឡារុស និងមីយ៉ាន់ម៉ា ឱ្យចូលរួម ពិធីបុណ្យសពម្ចាស់ក្សត្រិយ៍ អេលីហ្សាបេត,
03-April-2024 / ព័ត៌មានជាតិ
ចក្រភពអង់គ្លេស៖ ចក្រភពអង់គ្លេសមិនបានអញ្ជើញ អ្នកតំណាងមកពីប្រទេសរុស្ស៉ី បេឡារុស និងមីយ៉ាន់ម៉ា ឱ្យចូលរួមព្រះរាជពិធីបុណ្យ នៃព្រះសពរបស់ម្ចាស់ក្សត្រិយ៍ អេលីហ្សាបេតទី២ ដែលនឹងត្រូវប្រារព្ធឡើង នៅថ្ងៃចន្ទសប្តាហ៍ក្រោយនោះឡើយ។ នេះបើតាមការចេញផ្សាយដោយ ទីភ្នាក់ងារសារព័ត៌មាន Reuters នៅថ្ងៃអង្គារ ទី១៣ ខែកញ្ញា ឆ្នាំ២០២២។
ចក្រភពអង់គ្លេស រួមជាមួយក្រុមសម្ព័ន្ធមិត្តលោកខាងលិចរបស់ខ្លួន បានព្យាយាមធ្វើឱ្យរុស្ស៉ីនិងបេឡារុស ដែលជាសម្ព័ន្ធមិត្តរបស់ទីក្រុងមូស្គូ ស្ថិតនៅឯកោលើឆាកអន្តរជាតិ តាមរយៈការដាក់ទណ្ឌកម្មសេដ្ឋកិច្ច និងចំណាត់ការជាច្រើនផ្សេងទៀត ដើម្បីឆ្លើយតបនឹងការឈ្លានពានរបស់រុស្ស៉ីលើអ៊ុយក្រែន។ ចំណែកមីយ៉ាន់ម៉ានិងរដ្ឋាភិបាលយោធាវិញ គឺបានស្ថិតក្រោមទណ្ឌកម្មរបស់ចក្រភពអង់គ្លេស ខណៈទីក្រុងឡុងដ៍ប្រឹងប្រែងបង្កើនការគាំទ្រ សម្រាប់សហគមន៍ជនជាតិភាគតិចរ៉ូហ៉ីងយ៉ា នៅក្នុងប្រទេសអាស៊ានមួយនេះ។
គួរបញ្ជាក់ថា ឥស្សរជនបរទេសសរុបប្រហែល៥០០នាក់ ត្រូវគេរំពឹងថា នឹងមកចូលរួមពិធីបុណ្យសពម្ចាស់ក្សត្រិយ៍ អេលីហ្សាបេត នៅទីក្រុងឡុងដ៍ ដោយលិខិតអញ្ជើញផ្លូវការត្រូវបានផ្ញើទៅកាន់ ប្រមុខរដ្ឋនៃប្រទេសជាច្រើន ដែលមានទំនាក់ទំនងការទូតជាមួយចក្រភពអង់គ្លេស។ មេដឹកនាំពិភពលោក មានចាប់តាំងពីប្រធានាធិបតីអាមេរិក លោក ចូ បៃដិន រហូតដល់នាយករដ្ឋមន្ត្រីកាណាដា អូស្ត្រាលី និងនូវែលសេឡង់ សុទ្ធតែបានប្រកាសរួចរាល់ហើយថា ពួកគេនឹងចូលរួមក្នុងព្រឹត្តិការណ៍នោះ។
សម្រាប់ការសោយទីវង្គត់ម្ចាស់ក្សត្រី អេលីហ្សាបេតទី ២ ព្រះអង្គម្ចាស់ឆាលស៍ ភីលីព អាធឺ ចច (Charles Philip Arthur George) គឺជាព្រះអង្គម្ចាស់នៃប្រទេសវេលស៍ (Wales) ដែលត្រូវបានឡើងសោយរាជសម្បត្តិជាផ្លូវការជាស្តេច ឆាលស៍ទី ៣ ក្នុងព្រះជន្ម ៧៤ព្រះវស្សា។ព្រះអង្គប្រសូត្រនៅថ្ងៃទី ១៤ ខែវិច្ឆិកា ឆ្នាំ ១៩៤៨ និងជាបុត្រាដំបូងបង្អស់របស់ម្ចាស់ក្សត្រីអេលីហ្សាបេត (Elizabeth) និងព្រះអង្គម្ចាស់ ភីលីព (Phillip)។ ក្នុងនាមជាព្រះមហាក្សត្រ ព្រះអង្គក្លាយជាស្តេចនៃចក្រភពអង់គ្លេស និងរដ្ឋអធិបតេយ្យចំនួន ១៤ទៀត។
ព្រះអង្គម្ចាស់ ឆាលស៍ បានសិក្សានៅក្នុងប្រទេសអង់គ្លេស និងអូស្ត្រាលីលើមុខវិជ្ជា បុរាណវិទ្យា និងនរវិទ្យា និងប្រវត្តិវិទ្យានៅមហាវិទ្យាល័យ Trinity នៃសកលវិទ្យាល័យ Cambridge នៅចុងទសវត្សរ៍ឆ្នាំ ១៩៦០ មុនពេលព្រះអង្គបានក្លាយជាអ្នកបើយន្តហោះនៃកងទ័ពជើងអាកាសរបស់អង់គ្លេស។ក្នុងព្រះជន្ម ៣១ព្រះវស្សា ព្រះអង្គម្ចាស់ ឆាលស៍ បានរៀបអភិសេកជាមួយនឹងព្រះនាងរបស់ប្រទេសវេលស៍ និងអ្នកគ្រូមត្តេយ្យវ័យ ១៩ឆ្នាំម្នាក់ឈ្មោះ ដាយអាណា ស្ពេនសឺ (Diana Spencer) នៅក្នុងឆ្នាំ ១៩៨១។ ពិធីរៀបអភិសេករបស់ព្រះអង្គមានអ្នកទស្សនាជិត ៨០០លាននាក់ទូទាំងពិភពលោក។ព្រះអង្គមានបុត្រ ២អង្គគឺ ព្រះអង្គម្ចាស់ វីលៀម (Prince William) ប្រសូត្រនៅក្នុងឆ្នាំ ១៩៨២ និងព្រះអង្គម្ចាស់ហារី (Prince Harry) ប្រសូត្រនៅក្នុងឆ្នាំ ១៩៨២។
ប៉ុន្តែជីវិតអាពាហ៍ពិពាហ៍របស់ព្រះអង្គទាំងពីរមានភាពរកាំរកូស និងបរាជ័យ និងធ្វើឲ្យបែកបាក់គ្នា។ ព្រះអង្គម្ចាស់បាននិយាយនៅក្នុងបទសម្ភាសន៍មួយដោយទទួលស្គាល់ថាព្រះអង្គមិនមានភាពស្មោះត្រង់។ ចំណែកព្រះនាង ដាយអាណា ក៏បាននិយាយក្នុងកិច្ចសម្ភាសន៍តាមទូរទស្សន៍ផងដែរថា “មានមនុស្ស ៣នាក់នៅក្នុងអាពាហ៍ពិពាហ៍នេះ ដូច្នេះវាពិតជាចង្អៀតណាស់” ដោយព្រះនាងចង់សំដៅថា ព្រះអង្គម្ចាស់ ឆាលស៍ បន្តមានទំនាក់ទំនងជាមួយនឹងនាង ខាមីឡា ផាឃឺ បូវស៍ (Camila Parker Bowles) ដែលជាអតីតមិត្តស្រីរបស់ព្រះអង្គ មុនពេលព្រះអង្គរៀបអភិសេក។ ព្រះអង្គម្ចាស់ ឆាលស៍ និងព្រះនាង ដាយអាណា បានលែងលះគ្នានៅក្នុងឆ្នាំ ១៩៩៦។
មួយឆ្នាំក្រោយមក សោកនាដកម្មបានកើតឡើង នៅពេលព្រះនាង ដាយអាណា បានសោយទីវង្គត់នៅក្នុងគ្រោះថ្នាក់ចរាចរណ៍នៅក្នុងទីក្រុងបារីស ប្រទេសបារាំង។ ប្រជាជនជុំវិញពិភពលោកបានចូលរួមរំលែកទុក្ខដល់ព្រះនាង។បន្ទាប់ពីការសោយទីវង្គត់របស់ព្រះនាង ដាយណាដា ព្រះអង្គម្ចាស់ ឆាលស៍ និង ខាមីឡា បន្តទំនាក់ទំនងជាមួយគ្នា ហើយទីបំផុត អ្នកទាំងពីរបានរៀបអភិសេកនៅក្នុងឆ្នាំ ២០០៥។
កាលពីឆ្នាំ ២០២១ ព្រះអង្គគឺជាវាគ្មិនដ៏លេចធ្លោម្នាក់នៅក្នុងសន្និសិទស្តីពីការប្រែប្រួលអាកាសធាតុរបស់អង្គការសហប្រជាជាតិនៅទីក្រុង Glasgow ប្រទេសស្កុតឡែន។កាលពីថ្ងៃទី ៩ ខែកញ្ញាកន្លងទៅនេះ ព្រះអង្គត្រូវបានស្វាគមន៍ដោយមនុស្សជាច្រើននៅពេលព្រះអង្គធ្វើដំណើរដល់ព្រះរាជវាំង Buckingham សម្រាប់ចូលកាន់តំណែងជាស្តេច ឆាលស៍ទី ៣នៃចក្រភពអង់គ្លេស៕ ( Washington Post & Aljazeera)
