ព្យុះKalmaegiឆក់យកជីវិតមនុស្សកើនដល់១១៤នាក់នៅហ្វីលីពីន ឡូវកំពុងធ្វើដំណើរឆ្ពោះទៅវៀតណាម

ប្រទេសហ្វីលីពីន៖ទីភ្នាក់ងារគ្រោះមហន្តរាយបាននិយាយថា គិតត្រឹមថ្ងៃព្រហស្បតិ៍នេះ ចំនួនអ្នកស្លាប់នៅក្នុងប្រទេសហ្វីលីពីនដោយសារព្យុះទីហ្វុង Kalmaegi បានកើនឡើងដល់ ១១៤ នាក់ និងមនុស្សចំនួន ១២៧ នាក់ផ្សេងបាត់ខ្លួន ខណៈដែលព្យុះដ៏បំផ្លិចបំផ្លាញនេះ បានធ្វើដំណើរឆ្ពោះទៅវាយប្រហារប្រទេសវៀតណាមវិញម្តង។ បច្ចុប្បន្នមនុស្សប្រហែល ៣៥០,០០០ នាក់ នៅក្នុងខេត្ត Gia Lai របស់ប្រទេសវៀតណាម ត្រូវបានគេរំពឹងថានឹងត្រូវបានជម្លៀសចេញ ខណៈដែលអាជ្ញាធរបានព្រមានអំពីភ្លៀងធ្លាក់ខ្លាំង និងខ្យល់បក់បោកដែលអាចបណ្តាលឱ្យមានទឹកជំនន់នៅតំបន់ទំនាប និងដីចម្ការ។  

នៅប្រទេសហ្វីលីពីន ក្នុងខេត្តCebu បានរងគ្រោះខ្លាំងបំផុតហើយមានទំហំនៃការបំផ្លិចបំផ្លាញកាន់តែខ្លាំងនិងឃើញកាន់តែច្បាស់នៅពេលដែលទឹកចាប់ផ្តើមស្រកចុះ ផ្ទះរាបស្មើដី រថយន្តក្រឡាប់គរគ្នា និងហេដ្ឋារចនាសម្ព័ន្ធផ្លូវថ្នល់ខ្ទេចខ្ទី។ មនុស្សជាង ២០០,០០០ នាក់ត្រូវបានជម្លៀសចេញនៅក្នុងប្រទេសហ្វីលីពីន មុនពេលព្យុះ Kalmaegi ចាប់ផ្តើមវាយប្រហារ។ បើទោះបីជាព្យុះ Kalmaegi បានចាកចេញពីតំបន់ត្រួតពិនិត្យរបស់ហ្វីលីពីនក៏ដោយ ប៉ុន្តែអ្នកព្យាករណ៍អាកាសធាតុកំពុងតាមដានព្យុះដែលកំពុងបក់បោកនៅភាគខាងកើតនៃមីនដាណាវ ដែលអាចពង្រឹងឥទ្ធិពលបន្ថែមទៀតទៅជាព្យុះកំណាចមួយ ដែលបង្កើនការព្រួយបារម្ភអំពីផលប៉ះពាល់ដែលអាចកើតមាននៅដើមសប្តាហ៍ក្រោយ។

ការបំផ្លិចបំផ្លាញដោយសារព្យុះ Kalmaegi ដែលជាព្យុះទី២០ បានវាយប្រហារប្រទេសហ្វីលីពីននៅឆ្នាំនេះ បានកើតឡើងជាងមួយខែបន្ទាប់ពីការរញ្ជួយដីកម្រិត ៦.៩ រ៉ិចទ័របានវាយប្រហារភាគខាងជើងទីក្រុងសេប៊ូ ដោយបានសម្លាប់មនុស្សរាប់សិបនាក់ និងធ្វើឱ្យមនុស្សរាប់ពាន់នាក់ត្រូវផ្លាស់ទីលំនៅ។

ខណៈព្យុះនេះធ្វើដំណើរឆ្ពោះទៅប្រទេសវៀតណាម វាត្រូវបានគេព្យាករណ៍ថានឹងប៉ះពាល់ដល់ខេត្តកណ្តាលជាច្រើន រួមទាំងតំបន់ដាំដុះកាហ្វេសំខាន់ៗ ដែលកំពុងដំណើរការរដូវប្រមូលផល។ មជ្ឈមណ្ឌលជាតិព្យាករណ៍ទឹកនិងឧតុនិយម (NCHMF) បានរាយការណ៍ថា នៅម៉ោង៩ ព្រឹកថ្ងៃព្រហស្បតិ៍ ព្យុះនេះស្ថិតនៅចម្ងាយប្រហែល ២៩០ គីឡូម៉ែត្រពីសង្កាត់ Quy Nhon នៃខេត្ត Gia Lai ដោយមានល្បឿនខ្យល់អតិបរមា ១៦៧-១៨៣ គីឡូម៉ែត្រក្នុងមួយម៉ោង ដោយធ្វើដំណើរពីខាងលិចទៅពាយ័ព្យក្នុងល្បឿន ២០-២៥ គីឡូម៉ែត្រក្នុងមួយម៉ោង។ លោក Mai Van Khiem នាយកមជ្ឈមណ្ឌលជាតិបានព្រមានថា ចលនាលឿនរបស់ខ្យល់ព្យុះ និងបោកបក់ខ្លាំងនឹងប៉ះពាល់ដល់តំបន់ដីគោកយ៉ាងសំខាន់នៅ Gia Lai និង Quang Ngai៕