ប្រទេសផ្សេងៗព្រួយចង់ឲ្យផ្អាកប្រយុទ្ថតែអាមេរិកប្រកាសឈរជួយអ៊ីស្រាអែល
08-July-2026 / ព័ត៌មានអន្តរជាតិ
អ៊ីស្រាអែល៖ ប្រទេសឥណ្ឌូណេស៊ី ជាប្រជាជាតិមួយដែលមានអ្នកកាន់សាសនាឥស្លាមដ៏ច្រើនបំផុតរបស់ពិភពលោក ជាអ្នកគាំទ្រយូរអង្វែងណាស់មកហើយទៅលើបុព្វហេតុជាតិប៉ាឡេស្ទីន ដោយបានលើកឡើងកាលពីថ្ងៃអាទិត្យទី៨តុលាថា អពីក្តីព្រួយបារម្ភ ទៅលើការកើនឡើងនូវជម្លោះរវាងភាគីអ៊ីស្រាអ៊ែល ហើយនិងប៉ាឡេស្ទីននិង បានធ្វើការអំពាវនាវសូមឱ្យបញ្ចប់នូវបញ្ចប់ជាបន្ទាន់នូវអំពើហិង្សាបង្ហូរឈាមគ្នានេះ។
នេះបើតាមសេចក្តីថ្លែងការណ៍របស់ក្រសួងការបរទេសឥណ្ឌូណេស៊ី។ ប្រទេសឥណ្ឌូណេស៊ីបានធ្វើការអំពាវនាវឱ្យបញ្ឈប់ជាបន្ទាន់នូវអំពើហិង្សា ដើម្បីបញ្ជៀសពីការស្លាប់មនុស្សបន្តទៀត។
ប្រទេសឥណ្ឌូណេស៊ីតែងតែបង្ហាញសម្លេងគាំទ្រដល់ប្រជាពលរដ្ឋប៉ាឡេស្ទីន ក្នុងបុព្វហេតុដើម្បីទាមទារឯករាជ្យភាពជាតិប៉ាឡេស្ទីន។ក្រសួងការបរទេសឥណ្ឌូណេស៊ីដបានគូសបញ្ជាក់ថា ឬសគល់នៃបញ្ហាសង្គ្រាម គឺកើតឡើងដោយសារតែការកាន់កាប់មកលើទឹកដីប៉ាឡេស្ទីនពីសំណាក់ប្រទេសអ៊ីស្រាអ៊ែល ហើយរឿងនេះត្រូវតែដោះស្រាយដោយអនុលោមទៅតាមច្បាប់ដែលបានឯកភាពគ្នានៃក្របខណ្ឌអង្គការសហប្រជាជាតិ។ចំណែកក្រសួងការបរទេសចិន និយាយក្នុងសេចក្តីថ្លែងការណ៍ខ្លួនយ៉ាងដូច្នេះថា «ចិនមានក្តីបារម្ភយ៉ាងជ្រាលជ្រៅ អំពីស្ថានការណ៍កើនឡើងនាពេលបច្ចុប្បន្ននេះ នៃភាពតានតឹងនិងអំពើហិង្សារវាងអ៉ីស្រាអែលនិងប៉ាឡេស្ទីន។ ទីក្រុងប៉េកាំងសូមអំពាវនាវឱ្យភាគីពាក់ព័ន្ធទាំងអស់ ព្យាយាមបង្ហាញភាពអត់ធ្មត់និងបញ្ឈប់ការវាយប្រហារដាក់គ្នា ដើម្បីការពារអាយុជីវិតជនស៉ីវិលស្លូតត្រង់ និងទប់ស្កាត់កុំឱ្យស្ថានការណ៍កាន់តែអាក្រក់ជាងនេះទៅទៀត»។
ទីក្រុងប៉េកាំងបានបន្តថា ការប៉ះទង្គិចគ្នាម្តងហើយម្តងទៀតរវាងអ៉ីស្រាអែលនិងប៉ាឡេស្ទីន បានស្តែងឱ្យឃើញយ៉ាងច្បាស់ថា ភាពជាប់គាំងអូសបន្លាយ នៃដំណើរការស្វែងរកសន្តិភាព គឺមិនមាននិរន្តរភាពឡើយ ហើយមធ្យោបាយចម្បងដើម្បីងើបចេញពី បញ្ហវិវាទរវាងអ៉ីស្រាអែលនិងប៉ាឡេស្ទីន គឺស្ថិតទៅលើការអនុវត្ត «ដំណោះស្រាយរដ្ឋពីរ» និងការបង្កើតរដ្ឋប៉ាឡេស្ទីនឯករាជ្យមួយ។នេះបើតាមការចេញផ្សាយដោយ ទីភ្នាក់ងារព័ត៌មាន AFP នៅថ្ងៃអាទិត្យ ទី៨ ខែតុលា ឆ្នាំ២០២៣។
ពាក់ព័ន្ធនឹងស្ថានការណ៍កំពុងតែតានតឹងនេះដែរ ខាងក្រុមប្រទេសលោកខាងលិចឯណោះវិញបានធ្វើការថ្កោលទោសទៅលើរលកនៃការវាយប្រហារដែលបានបង្កឡើងដោយក្រុមហាម៉ាស់ ខណៈដែលប្រទេសអាម៉េរិក និងសហគមន៍អឺរ៉ុបបានចាត់ទុកថា ក្រុមហាម៉ាស់នោះជាក្រុមភេរវករ។ប្រធានាថិបតីរុស្ស៊ីលោកវ្លាឌីមៀពូទីនបានរិះគន់អាមេរិកលើជម្លោះរវាងក្រុមហាម៉ាសនិងអ៊ីស្រាអែលនេះ។ នៅថ្ងៃអាទិត្យសប្តាហ៍នេះ (ពេលវេលានៅទីក្រុងញូវយ៉ក) ក្រុមប្រឹក្សាសន្តិសុខរបស់អង្គការសហប្រជាជាតិ នឹងកោះប្រជុំគ្នាបន្ទាន់ ដើម្បីជជែកអំពីស្ថានការណ៍ខាងលើ។
សម្រាប់ការវាយឆ្មក់លើកនេះភាគីអ៊ីស្រាអ៊ែល បាននិយាយថា មានពលរដ្ឋអ៊ីស្រាអ៊ែលច្រើនជាង២០០នាក់បានស្លាប់ដោយសារតែការវាយប្រហារទ្រង់ទ្រាយធំពីសំណាក់ក្រុមសកម្មជនហាម៉ាស់ប៉ាឡេស្ទីនកាលពីយប់ថ្ងៃសៅរ៍កន្លងទៅ។ លោកនាយករដ្ឋមន្ត្រីអ៊ីស្រាអ៊ែល ប៊ីនចាមីន ណេតតាញ់យ៉ាហ៊ូ(Minister Benjamin Netanyahu) បានលើកឡើងបែបប្តេជ្ញាហិង្សានិយមថា លោកនឹងបោសសម្អាតក្រុមនៅសេសសល់លាក់ខ្លួនពួនអាត្មារបស់ក្រុមសកម្មប្រយុទ្ធនៅតំបន់ហ្គាហ្សា ។
រីឯខាងក្រុមមន្ត្រីប៉ាឡេស្ទីនគាំទ្រដោយក្រុមហាម៉ាសនៅ Gaza វិញ បានអះអាងថា ការវាយប្រហារសងសឹករបស់អ៉ីស្រាអែលទៅលើតំបន់របស់ខ្លួនក៏បានផ្តាច់ជីវិតមនុស្សយ៉ាងតិច២៣២នាក់ផងដែរ ខណៈជិត១,៧០០នាក់ផ្សេងទៀតរងរបួស បន្ទាប់ពីក្រុម Hamas បានបាញ់ស្រោចមីស៉ីលរាប់ពាន់គ្រាប់ ហើយបញ្ជូនជនសកម្មប្រយុទ្ធរបស់ខ្លួនឆ្លងព្រំដែនដើម្បីវាយប្រហារអ៉ីស្រាអែលដោយផ្ទាល់ ព្រមទាំងចាប់មនុស្សជាច្រើនយកធ្វើជាចំណាប់ខ្មាំង។ វាគឺជាការកើនឡើងភាពតានតឹងដ៏បង្អូរឈាមបំផុត នៃបញ្ហាវិវាទរវាងអ៉ីស្រាអែលនឹងប៉ាឡេស្ទីន គិតក្នុងរយៈពេលប៉ុន្មានទសវត្សរ៍មកនេះ។ដើម្បីបង្ហាញការគាំទ្រសហរដ្ឋអាមេរិកបានបញ្ជូននាវាផ្ទុកយន្ដហោះចម្បាំង USS Gerald R. Ford ដែលជានាវាផ្ទុកយន្ដហោះចម្បាំងស៊េរីទំនើបបំផុតមួយរបស់កងទ័ពជើងទឹកអាមេរិក និងដឹកទាហានជាង ៥,០០០នាក់ធ្វើដំណើរទៅកាន់តំបន់សមុទ្រមេឌីទែររ៉ាណេខាងកើត ដើម្បីបង្ហាញ ការគាំទ្រ និងត្រៀមលក្ខណៈផ្ដល់ជំនួយដល់អ៊ីស្រាអែល បន្ទាប់ពីការវាយប្រហាររបស់ក្រុមហាម៉ាស់បានបន្សល់ទុកមនុស្សច្រើនជាង ១,០០០នាក់ នៃភាគីទាំងសងខាងបាត់បង់ជីវិត។
រដ្ឋមន្ត្រីការពារជាតិអាមេរិក លោក Lloyd Austin កាលពីថ្ងៃអាទិត្យចុងសប្ដាហ៍កន្លងទៅនេះ (ម៉ោងក្នុងតំបន់) បាននិយាយថាលោកបានបញ្ជាឱ្យកងនាវាចម្បាំងដឹកនាំដោយនាវាផ្ទុកយន្ដហោះចម្បាំង USS Gerald R. Ford អមដំណើរដោយនាវាចម្បាំងប្រដាប់ដោយមីស៊ីល និងនាវាពិឃាដ ធ្វើដំណើរទៅកាន់តំបន់សមុទ្រមេឌីទែររ៉ាណេខាងកើត ដើម្បីបង្ហាញសាច់ដុំ និង ត្រៀមលក្ខណៈធ្វើការឆ្លើយតប និងដឹកនាំសកម្មភាពឃ្លាំមើល ក៏ដូចជារារាំងរាល់ការបញ្ជូនអាវុធបន្ថែមណាមួយទៅឱ្យក្រុមហាម៉ាស់។ លោក Lloyd Austin ថាមិនតែប៉ុណ្ណោះ សហរដ្ឋអាមេរិក ក៏កំពុងបង្កើនចំនួនយន្ដហោះចម្បាំង F-35, F-15, F-16 និង A-10 នៅក្នុងតំបន់ផងដែរ។
បើតាមលោក Lloyd Austin រដ្ឋបាលលោកប្រធានាធិបតី ចូ បៃដិន នឹងផ្ដល់ឱ្យកងកម្លាំងអ៊ីស្រាអែលនូវបរិក្ខារ និងធនធានបន្ថែម ក្នុងនោះរួមមាន ទាំងមានទាំងអាវុធផងដែរ ហើយកញ្ចប់ជំនួយសន្តិសុខដំបូងអាចនឹងត្រូវបានបញ្ជូនទៅដល់ដៃអ៉ីស្រាអែល ក្នុងពេលប៉ុន្មានថ្ងៃខាងមុខ។សូមជម្រាបថា លោក ចូ បៃឌិនប្រធានាធិបតីអាមេរិក បានដឹកនាំក្រុមសន្តិសុខជាតិសហរដ្ឋអាមេរិក បើកការតាមដានស្ថានការណ៍ នៅក្នុងចំណោមប្រទេសក្នុងតំបន់ ដែលរួមមានដូចជា អេហ្ស៊ីប តួកគី ហ្កាតា អារ៉ាប៊ីសាអ៊ូឌីត ហ្ស៊កដានី អូម៉ង់ អេមីរ៉ាត់អារ៉ាប់រួម ក៏ដូចជាប្រទេសសម្ព័ន្ធមិត្តអឺរ៉ុបផ្សេងទៀត។
កម្មវិធីស្បៀងអាហារពិភពលោករបស់អង្គការសហប្រជាជាតិ កាលពីថ្ងៃអាទិត្យចុងសប្ដាហ៍កន្លងទៅនេះ បានបង្ហាញក្ដីព្រួយបារម្ភពី ផលប៉ះពាល់នៃសង្គ្រាមរវាងអ៉ីស្រាអែល និងក្រុមហាម៉ាស់ ទៅលើជនស៊ីវិល ពិបាកក្នុងការទទួលបានការផ្គត់ផ្គង់ស្បៀងអាហារចាំបាច់។ នេះបើតាមការ ចេញផ្សាយដោយទីភ្នាក់ងារសារព័ត៌មាន AFP នៅថ្ងៃចន្ទ ទី៩ ខែតុលា ឆ្នាំ២០២៣។ក្នុងសេចក្ដីថ្លែងការណ៍មួយ កម្មវិធីស្បៀងអាហារពិភពលោករបស់អង្គការសហប្រជាជាតិ ហៅកាត់ថា WFP បានបង្ហាញក្ដីព្រួយបារម្ភយ៉ាងខ្លាំងពី ការធ្លាក់ចុះស្ថានភាពកាន់ដុនដាបនៅក្នុងទឹកដីអ៉ីស្រាអែល និងប៉ាឡេស្ទីន ព្រមទាំងផលប៉ះពាល់នៃសង្គ្រាមនេះទៅលើប្រជាជនស៊ីវិល។សេចក្ដីថ្លែងការណ៍ដដែល បានបញ្ជាក់ដូច្នេះថា «ខណៈជម្លោះកាន់តែកើនឡើង ជនស៊ីវិល ក្នុងនោះរួមមានទាំងកុមារ និងក្រុមគ្រួសារងាយរងគ្រោះ កំពុងប្រឈមនឹងបញ្ហាប្រឈម នៅក្នុងដំណើរការទទួលបានការផ្គត់ផ្គង់ស្បៀងអាហារចាំបាច់នានា ដោយសារតែបណ្ដាញផ្គត់ផ្គង់ស្បៀងអាហារ ត្រូវបានរំខាន រីឯការផលិតចំណីអាហាររងផលប៉ះពាល់យ៉ាងខ្លាំងពីជម្លោះ»។
