មេដឹកនាំប្រឆាំងវ៉េណេស៊ុយអេឡា ត្រូវបានចាប់ខ្លួន ក្នុងទីក្រុងការ៉ាកាស ក្រោយចូលរួមបាតុកម្មតវ៉ា
16-April-2026 / ព័ត៌មានអន្តរជាតិ
វេណេហ្សុយអេឡា៖ ក្រុមចម្រុះរបស់គណបក្សប្រឆាំងនៅក្នុងប្រទេសវ៉េណេស៊ុយអេឡា កាលពីថ្ងៃពុធ ទី២៨ ខែសីហា បាននិយាយថាមេដឹកនាំរបស់ខ្លួន គឺលោក Biagio Pilieri ត្រូវបាន ចាប់ខ្លួននៅក្នុងទីក្រុងការ៉ាកាស បន្ទាប់ពីរូបលោកបានចូលរួមក្នុងបាតុកម្មតវ៉ាជាមួយមេដឹកនាំក្រុមចម្រុះប្រឆាំង លោកស្រី Maria Corina Machado។ នេះបើតាមការចេញផ្សាយ ដោយទីភ្នាក់ងារសារព័ត៌មាន Reuters។
ក្រុមចម្រុះប្រឆាំងបានឱ្យដឹងទៀតថាទីតាំងស្ថិតនៅចុងក្រោយបំផុតរបស់លោក Pilieri ដែលជាមេដឹកនាំគណបក្ស Convergencia Venezuela គឺរូបលោកស្ថិតនៅខាងក្រៅ ពន្ធនាគារ Helicoide ក្នុងទីក្រុងការ៉ាកាស។ ក្រុមចម្រុះប្រឆាំងអះអាងបែបនេះដោយផ្អែកលើទីតាំងទូរស័ព្ទដៃរបស់លោក Pilieri។ ការប្រមូលផ្ដុំគ្នាធ្វើការតវ៉ាក្នុងទីក្រុងការ៉ាកាស កាលពីថ្ងៃពុធ កើតមានឡើងតែជាងមួយខែប៉ុណ្ណោះ បន្ទាប់ពីការបោះឆ្នោតប្រធានាធិបតីដ៏ចម្រូងចម្រាសកាលពីថ្ងៃទី២៨ ខែកក្កដា ដែលលោកប្រធានាធិបតីវ៉េណេស៊ុយអេឡា លោក Nicolas Maduro និងគណបក្សប្រឆាំងបានប្រកាសពីជ័យជម្នះរៀងៗខ្លួន។
ខណៈក្រុមចម្រុះគណបក្សប្រឆាំងដឹកនាំការតវ៉ា លោក Maduro ក៏បានចូលរួមពិធីជួបជុំជាមួយក្រុមអ្នកគាំទ្រផងដែរ។ លោក Maduro ថែមទាំងព្រលយទៀតផងពីការតាំងចិត្ត ទប់ស្កាត់កុំឱ្យសង្គ្រាមស៊ីវិលផ្ទុះឡើង។គួរបញ្ជាក់ថា ក្រុមប្រឹក្សាបោះឆ្នោតរបស់វ៉េណេស៊ុយអេឡា និងតុលាការកំពូល បានប្រកាសទទួលស្គាល់ថាលោក Nicolas Maduro គឺជាអ្នកឈ្នះនៅក្នុងការបោះឆ្នោតប្រធានាធិបតី កាលពីថ្ងៃទី២៨ ខែកក្កដា តែមិនបានបញ្ចេញលទ្ធផលបោះឆ្នោតទាំងស្រុងនោះទេ ខណៈបណ្ដាប្រទេសលោកខាងលិច តួយ៉ាងសហរដ្ឋអាមេរិក បានរិះគន់ការបោះឆ្នោតនេះថា គ្មានភាពយុត្តិធម៌។ជាក់ស្តែង សហរដ្ឋអាមេរិក កាលពីថ្ងៃព្រហស្បតិ៍ ទី១ ខែសីហា បានប្រកាសទទួលស្គាល់គូប្រជែងរបស់លោកប្រធានាធិបតីវ៉េណេស៊ុយអេឡា លោក Nicolas Maduro និងជាបេក្ខជនប្រធានាធិបតីមកពីគណបក្សប្រឆាំង គឺលោក Edmundo Gonzalez Urrutia ជាអ្នកទទួលបានជ័យជម្នះក្នុងការបោះឆ្នោតប្រធានាធិបតីដ៏ចម្រូងចម្រាសរបស់ វ៉េណេស៊ុយអេឡា ដោយទាត់ចោលការអះអាងជ័យជម្នះរបស់លោក Maduro។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។
រដ្ឋមន្ត្រីការបរទេសអាមេរិក លោក Antony Blinken នៅក្នុងសេចក្ដីថ្លែងការណ៍មួយ បានគូសបញ្ជាក់ដូច្នេះថា «ផ្អែកលើភស្ដុតាងយ៉ាងពេញលេញ វាគឺច្បាស់ណាស់ចំពោះ សហរដ្ឋអាមេរិក និងសំខាន់បំផុតសម្រាប់ប្រជាជនវ៉េណេស៊ុយអេឡាថាលោក Edmundo Gonzalez Urrutia ទទួលបានសំឡេងគាំទ្រភាគច្រើននៅក្នុងការបោះឆ្នោត ប្រធានាធិបតីវ៉េណេស៊ុយអេឡា កាលពីថ្ងៃទី២៨ ខែកក្កដា»។ គណៈកម្មការរៀបចំការបោះឆ្នោតវ៉េណេស៊ុយអេឡា បានប្រកាសថា លោក Maduro ដែលកាន់អំណាចចាប់តាំងពីឆ្នាំ២០១៣មក គឺជាអ្នកឈ្នះ ក្នុងការបោះឆ្នោតប្រធានាធិបតីកាលពីថ្ងៃទី២៨ ខែកក្កដា ដោយទទួលបានសំឡេងគាំទ្រ ៥១ភាគរយនៃសន្លឹកឆ្នោតសរុប។ ក៏ប៉ុន្តែ ខាងគណបក្សប្រឆាំងបានអះអាងថាលទ្ធផលឆ្នោតរាប់បាន ៩០ភាគរយ បានបង្ហាញថាលោក Gonzalez ទទួលបានសំឡេងគាំទ្រ ច្រើនជាង ២ដង លើសលោក Maduro ខណៈប្រទេសមួយចំនួនបានអំពាវនាវឱ្យមានការផ្ទៀងផ្ទាត់លទ្ធផលបោះឆ្នោតឡើងវិញ។
ពលរដ្ឋវេណេហ្ស៊ូអ៊ីឡា បានមកជួបជុំគ្នានៅក្នុងរដ្ឋធានីរបស់ប្រទេសឈីលី កាលពីថ្ងៃសៅរ៍ ដើម្បីតវ៉ាប្រឆាំងនឹងលទ្ធផលបោះឆ្នោតប្រធានាធិបតីនៅក្នុងប្រទេសកំណើតរបស់ពួកគេ ដោយអ្នកតវ៉ាបានចោទប្រកាន់ប្រធានាធិបតី នីកូឡាស ម៉ាឌូរ៉ូ (Nicolas Maduro) ថា "ក្លែងបន្លំសន្លឹកឆ្នោត" ។ពលរដ្ឋជាច្រើន បានបង្ហាញការមិនពេញចិត្ត បន្ទាប់ពីអាជ្ញាធររៀបចំការបោះឆ្នោតវេណេហ្ស៊ូអ៊ីឡា ប្រកាសថា លោក ម៉ាឌូរ៉ូ (Maduro) ជាអ្នកឈ្នះនៅក្នុងការបោះឆ្នោតកាលពីថ្ងៃអាទិត្យ ដោយទទួលបានសំឡេងគាំទ្រ ៥១% ខណៈបេក្ខជនបក្សប្រឆាំងលោក ហ្គន ហ្សាឡេហ្ស ទទួលបានសំឡេងគាំទ្រត្រឹមតែ ៤៦% ប៉ុណ្ណោះ ។ រដ្ឋាភិបាលឈីលី ក៏បានបដិសេធ មិនទទួលយកលទ្ធផលដែលបានចេញផ្សាយអំពីជ័យជម្នះរបស់គណបក្សកាន់អំណាចផងដែរ ដោយជំរុញឱ្យវេណេហ្ស៊ូអ៊ីឡា ផ្តាច់ទំនាក់ទំនងការទូត និងបិទស្ថានទូតនៅក្នុងទីក្រុងសាន់ទីអាហ្គោ (Santiago)។ មាន ប្រទេសមួយចំនួនទៀត រួមមានទាំងរុស្ស៊ី ចិន និងគុយបា បានអបអរសាទរចំពោះជ័យជម្នះរបស់លោក ម៉ាឌូរ៉ូ (Maduro) ។
ពាក់ព័ន្ធនឹងស្ថានការណ៍នយោបាយក្នុងប្រទេសវេណេហ្ស៊ួអ៊ីឡា ត្រូវបានប្រមុខការបរទេសសហភាពអឺរ៉ុប លោក Josep Borrell ថ្លែងព្រមានកាលពីពេលថ្មីៗនេះថា សហភាពអឺរ៉ុបមិនអាចទទួលស្គាល់លទ្ធផលបោះឆ្នោតក្នុងប្រទេសវេណេហ្ស៊ួអ៊ីឡា បានឡើយ លុះត្រាតែមានការបង្ហាញនូវរបាយការណ៍រាប់សន្លឹកឆ្នោតដែលបានផ្ទៀងផ្ទាត់ច្បាស់លាស់ពីគ្រប់ភាគីពាក់ព័ន្ធ ដើម្បីធានាដល់តម្លាភាពនិងសុក្រឹតភាពនៃការបោះឆ្នោត។
ប្រទេសប្រេស៊ីល ក៏ទាមទារឲ្យវ៉េណេស៊ុយអេឡា បង្ហាញរបាយការណ៍លម្អិតស្តីពីការរាប់សន្លឹកឆ្នោតដែរ។ ប្រេស៊ីលជាបងធំដ៏សំខាន់១នៅតំបន់អាមេរិកឡាទីន។ ប្រធានាធិបតីប្រេស៊ីល លោក លូឡា បានជជែកតាមទូរសព្ទជាមួយប្រធានាធិបតីអាមេរិក ចូ បៃដិន ហើយប្រមុខដឹកនាំប្រទេសប្រជាធិបតេយ្យទាំងពីរ សុទ្ធតែមានជំហរដូចគ្នា គឺជំរុញឲ្យវ៉េណេស៊ុយអេឡា បង្ហាញសុក្រិតភាពនៃលទ្ធផលបោះឆ្នោត។ ប្រទេសមានសេដ្ឋកិច្ចជឿនលឿន ហ្សេ៧ (កាណាដា បារាំង អាល្លឺម៉ង់ អ៊ីតាលី ជប៉ុន អង់គ្លេស និងសហរដ្ឋអាមេរិក) ក៏ទាមទារក្នុងជំហរដូច្នេះដែរ។
ទន្ទឹមនឹងគ្នានេះ ប្រទេសក្នុងតំបន់អាមេរិកឡាទីន ៩ ទាមទារឲ្យរាប់សន្លឹកឆ្នោតឡើងវិញ នៅចំពោះមុខអ្នកសង្កេតការណ៍ឯករាជ្យ។ ប្រទេសម៉ិកស៊ិក បើទោះបីជាប្រកាសថាកុំឲ្យគេលូកដៃក្នុងកិច្ចការផ្ទៃក្នងុវ៉េណេស៊ុយអេឡា តែក៏បានទាមទារឲ្យបង្ហាញតម្លាភាពនៅក្នុងការរាប់សន្លឹកឆ្នោតដែរ។ ចំណែក ប៉ាណាម៉ា ប្រកាសផ្អាកជើងហោះហើរ ទៅវ៉េណេស៊ុយអេឡា តែម្តង។
ជាការសងសឹក ថ្នាក់ដឹកនាំវ៉េណេស៊ុយអេឡា បានប្រកាសដកមន្ត្រីទូតចេញពីប្រទេស ៧ នៅតំបន់អាមេរិកឡាទីន និងបានប្រកាសផ្តាច់ទូតតែម្តង ជាមួយប្រទេសប៉េរូ ពីព្រោះតែ ប៉េរូ បានទទួលស្គាល់ថា គណបក្សប្រឆាំងឈ្នះឆ្នោត។
គណបក្សប្រឆាំងដឹកនាំដោយលោកស្រី Maria Corina Machado និងអ្នកការទូតជើងចាស់ Edmundo Gonzalez Urrutia។ នៅពេលស្ទង់មតិ បេក្ខភាពគណបក្សប្រឆាំង អាចឈ្នះសំឡេងដាច់ឆ្ងាយណាស់ និងទទួលសំឡេងគាំទ្រច្រើនជាងបេក្ខភាពលោក នីកូឡា ម៉ាឌុយរ៉ូ។ ផ្ទុយទៅវិញ គណៈកម្មាធិការជាតិរៀបចំការបោះឆ្នោត បានប្រកាសថា ប្រធានាធិបតីផុតអាណត្តិ នីកូឡា ម៉ាឌុយរ៉ូ បានឈ្នះឆ្នោតដឹកនាំប្រទេស អាណត្តិថ្មី អាចកាន់អំណាចរហូតដល់ឆ្នាំ២០៣១។អគ្គមេធាវីនិយាយថា វ៉េណេស៊ុយអេឡាកំពុងបើកការស៊ើបអង្កេតឧក្រិដ្ឋកម្ម ប្រឆាំងនឹងក្រុមមេដឹកនាំ នៃគណបក្សប្រឆាំង ដែលបានចូលរួមប្រកួតប្រជែងការបោះឆ្នោតកាលពីខែមុន ពីបទញុះញង់ឱ្យមន្ត្រីប៉ូលិស និងយោធាបំពានច្បាប់ ខណៈដែលកម្លាំងសន្តិសុខរបស់ប្រទេស កំណត់គោលដៅលើអ្នកដែលនិយាយថា បានប្រព្រឹត្តអំពើហិង្សាក្នុងពេលតវ៉ា ជុំវិញការបោះឆ្នោត។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃអង្គារ ទី៦ ខែសីហា ឆ្នាំ ២០២៤។
ការប្រកាសបើកការស៊ើបអង្កេតដោយ លោក Tarek Saab អគ្គមេធាវីរបស់ប្រទេសវ៉េណេស៊ុយអេឡា ធ្វើឡើងបន្ទាប់ពីមាន ការបង្ហោះលិខិតមួយច្បាប់លើបណ្តាញសង្គម X របស់បេក្ខជនប្រធានាធិបតី នៃគណបក្សប្រឆាំង លោក Edmundo Gonzalez និងមេដឹកនាំរបស់បក្ស លោកស្រី Maria Corina Machado ដែលអំពាវនាវឱ្យកងកម្លាំងសន្តិសុខ ងាកមកគាំទ្រប្រជាជន ហើយគោរពលទ្ធផលបោះឆ្នោត ដែលពួកគេនិយាយថាពួកគេបានឈ្នះ។
ស្របពេលជាមួយគ្នានេះ កងកម្លាំងសន្តិសុខវ៉េណេស៊ុយអេឡា ចាប់ផ្តើមកំណត់គោលដៅអ្នកប្រព្រឹត្តអំពើហិង្សា អំឡុងពេលធ្វើបាតុកម្ម នៅក្នុងប្រតិបត្តិការមួយដែលក្រុមតស៊ូមតិនិយាយថា បានធ្វើឱ្យក្រុមអ្នកតវ៉ាមានការភ័យខ្លាច។ អ្នកតស៊ូមតិ ៣ក្រុមបានប្រាប់ Reuters ថាកងកម្លាំងសន្តិសុខកំពុងធ្វើការយ៉ាងខ្លាំង ដើម្បីចាប់ខ្លួនអ្នកតវ៉ា រួមទាំងអនីតិជនផងដែរ។
ប្រធានាធិបតី លោក Nicolas Maduro និងក្រុមមន្ត្រីផ្សេងទៀតនិយាយថា ប្រតិបត្តិការនោះគឺកំណត់គោលដៅ ទៅលើអ្នកនៅពីក្រោយអំពើហិង្សា នៅឯការតវ៉ា ដែលពួកគេចាត់ទុកថាជា «ឧក្រិដ្ឋជនហ្វាស៊ីសនិយម»។
លោក Vladimir Padrino មេបញ្ជាការយោធា និងជារដ្ឋមន្ត្រីក្រសួងការពារជាតិ ប្រកាសភក្តីភាពស្មោះស្មគ្រឥតងាករេចំពោះបុរសខ្លាំង លោក ម៉ាឌុយរ៉ូ។ ស្របគ្នានេះ ប្រធានរដ្ឋសភា លោក Jorge Rodriguez ក៏បានអំពាវនាវឲ្យចាប់ខ្លួនមេៗបក្សប្រឆាំងដាក់ពន្ធនាគារ។ គិតត្រឹមថ្ងៃពុធដើមខែសីហា រដ្ឋអាជ្ញាប្រទេសនេះ ដែលឋិតក្រោមឥទ្ធិពលរបស់ប្រធានាធិបតី ម៉ាឌុយរ៉ូ បានចាប់ឃាត់ខ្លួនបាតុករ ចំនួន ៧៤៩ នាក់ ដោយចាត់ទុកពួកគេថាជា ឧក្រិដ្ឋជន និងជា ភេរវជន ទៀតផង៕ប្រភព៖ Reuters Conect
