ពលករប្រមាណ ២៧ ម៉ឺននាក់ក្នុងចំណោមជិត១លាននាក់មកពីថៃ ទទួលបានការងារធ្វើ​ អ្នកនាំពាក្យសុំឲ្យទាក់ទងលេខ១២៩៧រក

ភ្នំពេញ៖ក្រសួងការងារ និងបណ្តុះបណ្តាលវិជ្ជាជីវ: បាន​សហការសម្របសម្រួលរកការងារជូនប្រជាពលរដ្ឋ ជាពិសេសពលករដែលវិលត្រឡប់ពីប្រទេសថៃ ដោយគិតមកត្រឹមខែតុលានេះ សរុបប្រមាណ ៤៦ ម៉ឺនកន្លែង និងមានអ្នកទទួលបានការងារ​ធ្វើ​សរុបជាង ២៧ ម៉ឺននាក់។ នេះបើតាមលោក ហេង សួរ រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ ថ្លែង​នៅ​ក្នុងពិព័រណ៍ការងារ និងផលិតភាពជាតិឆ្នាំ ២០២៥ ដែល​រៀបចំឡើង​រយៈពេល ២ ថ្ងៃ​នៅ​កោះពេជ្រ។ 

 លោករដ្ឋមន្រ្តី​បានជំរុញ​ឲ្យ​លើកកម្ពស់ផលិតភាព តាម​រយៈការពង្រឹងជំនាញបច្ចេកទេស និងវិជ្ជាជីវៈ (TVET) និង​អំពាវនាវឱ្យគ្រប់ភាគីពាក់ព័ន្ធចូលរួមឱ្យទូលំទូលាយ ទាំងកម្រិតជាតិ កម្រិតវិស័យឯកជន កម្រិតសហគ្រាស គ្រឹះស្ថាន និងកម្រិតកម្មករនិយោជិតម្នាក់ៗ​។

ពាក់ព័ន្ធ​ព្រឹត្តិការណ៍ពិព័រណ៍ការងារ និងផលិតភាពជាតិឆ្នាំ២០២៥ លោក ហេង សួរ​ យល់ឃើញ​ថា​ វេទិកានេះបានផ្តល់ឱកាសឱ្យអ្នកស្វែងរកការងារ អាចជួបដោយផ្ទាល់ និងសម្ភាសន៍ភ្លាមៗជាមួយនិយោជក ដែលកំពុងមានតម្រូវការជ្រើសរើសកម្លាំង​ពលកម្មជាក់ស្តែងចំនួនជាង ៣ ម៉ឺនកន្លែង។ ទន្ទឹមនេះ វាគ្មិនជាច្រើនរូបក៏បាន​ចែក​រំលែក​បទពិសោធន៍ក្នុងការចាប់យកអាជីព ចំណេះដឹង ចំណេះធ្វើ សំដៅបណ្តុះផ្នត់គំនិត កែប្រែឥរិយាបថ និងបង្កើនការយល់ដឹងអំពីផលិតភាព និងការប្រកួតប្រជែង។

ពិព័រណ៍ការងារ និងផលិតភាពជាតិឆ្នាំ ២០២៥ ដែល​រៀបចំ​ឡើង​នៅសាលពិពណ៍កោះពេជ្រក្រោម​ប្រធានបទ: “វិថីឆ្ពោះទៅរកផលិតភាព៖ ផ្សារភ្ជាប់ជំនាញ បច្ចេកវិទ្យា និងឱកាសការងារ” ត្រូវបានសាទរពីគ្រប់ភាគីពាក់ព័ន្ធ។ព្រឹត្តិការណ៍រយ:ពេលពីរថ្ងៃនេះ សហការរៀបចំដោយទីភ្នាក់ងារជាតិមុខរបរ និងការងារ (NEA), សហភាពសហព័ន្ធយុវជនកម្ពុជា (ស.ស.យ.ក.) រាជធានីភ្នំពេញ, សមាគមវាយនភណ្ឌ សម្លៀកបំពាក់ ស្បែកជើង និងផលិតផលធ្វើដំណើរនៅកម្ពុជា (TAFTAC), មូលនិធិអភិវឌ្ឍន៍ជំនាញ (SDF), ទីភ្នាក់ងារសហប្រតិបត្តិការអន្តរជាតិកូរ៉េ (KOICA), និងដៃគូដែលមិនអាចខ្វះបាន គឺអង្គការអន្តរជាតិខាងការងារ (ILO) ដែលមានការជួយឧបត្ថម្ភគាំទ្រដោយក្រុមហ៊ុន សហគ្រាស ក្រសួង ស្ថាប័ន និងគ្រឹះស្ថានអប់រំបណ្តុះបណ្តាលចំនួនប្រមាណ ១៥០ និងមានស្តង់ចំនួន ១៨៧។

ទាក់ទងនិងការស្វែងរកការងាធ្វើនេះដែរអ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ បានអំពាវនាវដល់ប្រជាពលរដ្ឋដែលមិនបានអញ្ជើញចូលរួមក្នុងកម្មវិធីពិព័រណ៍ការងារ សន្ដិសុខសង្គម និងបណ្ដុះបណ្ដុះវិជ្ជាជីវៈ ដែលត្រូវបានរៀបចំឡើងក្នុងខែតុលាកន្លងទៅ ហើយមិនទាន់មានការងារធ្វើ នៅតែអាចទាក់ទងមកលេខ ១២៩៧ ដើម្បីទទួលបានការងារធ្វើ និងការរៀនជំនាញវិជ្ជាជីវៈ និងបច្ចេកទេស។ 

លោក ស៊ុន មេសា អ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ មានប្រសាសន៍នៅថ្ងៃទី៣១ ខែតុលានេះថា សម្រាប់ពលករខ្មែរត្រឡប់មកពីថៃ ពិសេសពលរដ្ឋ មានទីលំនៅ ក្នុងខេត្តជាប់ព្រំដែនកម្ពុជា-ថៃ ដែលមានធុរៈមិនបានចូលរួមក្នុងពិព័រណ៍កន្លងទៅ ហើយកំពុងស្វែងរកការងារធ្វើ ឬការសិក្សាជំនាញវិជ្ជាជីវៈ និងបច្ចេកទេសផ្សេងៗ នៅតែអាចទាក់ទងមកលេខ ១២៩៧។ លោកបន្ថែមថា ការទាក់ទងមកលេខ ១២៩៧ នេះ គឺដើម្បីឱ្យក្រសួងការងារ និងបណ្ដុះបណ្ដាលវិជ្ជាជីវៈ ជួយស្វែងការងារឱ្យបងប្អូនធ្វើ ឬចូលរៀនជំនាញវិជ្ជាជីវៈ និងបច្ចេកទេស ដោយឥតគិតថ្លៃ។ 

អ្នកនាំពាក្យក្រសួងការងារ បានបន្ថែមទៀតថា “ខ្ញុំសូមអំពាវនាវឱ្យបងប្អូនពលករខ្មែរត្រឡប់មកពីថៃ ពិសេសបងប្អូននៅខេត្តជាប់ព្រំដែនកម្ពុជា-ថៃ ដែលមិនទាន់ទទួលបានការងារធ្វើ សូមបងប្អូនទាក់ទងមកក្រសួងការងារ និងបណ្ដុះបណ្ដាលវិជ្ជាជីវៈ តាមរយៈលេខ ១២៩៧ ដើម្បីទទួលបានឱកាសការងារធ្វើ ឬក៏ឱកាសរៀនជំនាញវិជ្ជាជីវៈ និងបច្ចេកទេស ដោយឥតគិតថ្លៃ ក៏ដូចជាព័ត៌មានអំពីអត្ថប្រយោជន៍ ប.ស.ស.។”