យោធាថៃស្នើឲ្យកម្ពុជាដោះមីនរួមគ្នានៅតំបន់ជម្លោះនាថ្ងៃទី១០ ខែតុលាក្នុងពេលក្រុមការងារសម្របសម្រួលដោះមីនJCTFប្រជុំអ្នកនាំពាក្យថាកម្ពុជាប្រកាន់ភាពថ្លៃថ្នូតាមច្បាប់ដដែល
21-September-2026 / ផ្សេងៗ
ភ្នំពេញ៖នៅថ្ងៃទី៩ ខែតុលានេះ មេទ័ពទាហ៊ានភូមិភាគទី១របស់ថៃបានផ្ញើលិខិតបន្ទាន់មួយទៅកាន់មេបញ្ជាការកងពលតូចថ្មើរជើងលេខ៥១ របស់កម្ពុជា។ នៅក្នុងលិខិតនោះ យោធាថៃស្នើឲ្យកម្ពុជាចូលរួមដោះគ្រាប់យុទ្ធភ័ណ្ឌមិនទាន់ផ្ទុះនៅតាមបណ្តោយព្រំដែនកម្ពុជា- ថៃក្នុងខេត្តស្រះកែវ និងខេត្តបន្ទាយមានជ័យ។ សំណើរបស់យោធាថៃនេះធ្វើឡើង ចំពេលដែលក្រុមការងារសម្របសម្រួលចម្រុះ (JCTF) កម្ពុជា-ថៃ លើកិច្ចការងារដោះមីនមនុស្សធម៌នៃប្រទេសទាំងពីរបានជួបប្រជុំលើកទី២ តាមប្រព័ន្ធវីដេអូនាថ្ងៃទី៩ ខែតុលានេះ។
បើតាមលិខិតរបស់មេទ័ពភូមិភាគទី១ ថៃ ការដាក់សំណើជាបន្ទាន់មួយទៅកាន់យោធាកម្ពុជាដើម្បីដោះមីនមនុស្សធម៌នៅថ្ងៃទី១០ ខែតុលា គឺដោយយោងតាមកិច្ចព្រមព្រៀងដែលបានឯកភាពក្នុងកិច្ចប្រជុំគណៈកម្មាធិការព្រំដែនទូទៅ (GBC) រវាងកម្ពុជា និងថៃ កាលពីថ្ងៃទី១០ ខែកញ្ញា ឆ្នាំ២០២៥ នៅខេត្តកោះកុង។
ក្រុមការងារ ប៊ូរ៉ាផា របស់ថៃបានបញ្ជាក់នៅក្នុងលិខិតដដែលថា ប្រតិបត្តិការបោសសំអាតគ្រាប់មីននឹងធ្វើឡើងនៅភូមិណងចាន់ និងភូមិបានណងយ៉ាកែវ ក្នុងខេត្តស្រះកែវ ដែលនៅជាប់នឹងភូមិព្រៃចាន់ និងភូមិជោគជ័យរបស់កម្ពុជាក្នុងខេត្តបន្ទាយមានជ័យ។
សូមបញ្ជាក់ថា នៅព្រឹកថ្ងៃទី៩ ខែតុលា ឆ្នាំ២០២៥ ក្រុមការងារសម្របសម្រួលចម្រុះ (JCTF) កម្ពុជា-ថៃលើកិច្ចការងារដោះមីនមនុស្សធម៌នៃប្រទេសទាំងពីរបានជួបប្រជុំលើកទី២ តាមប្រព័ន្ធវីដេអូដើម្បីបន្តពិភាក្សារៀបចំបង្កើតនិយាមនីតិវិធីប្រតិបត្តិ (SOP) របស់ក្រុមការងារនេះ។
ក្រសួងការពារជាតិកម្ពុជាថា ការរៀបចំឲ្យមាននិយាមនីតិវិធីប្រតិបត្តិ (SOP) នេះ គឺដើម្បីធានាឲ្យបាននូវបែបបទការងារមួយដែលមានស្តង់ដារ ព្រមទាំងធានាឲ្យបាននូវអធិបតេយ្យ និងបូរណភាពទឹកដី ដោយឈរលើគោលការណ៍គោរពគ្នាទៅវិញទៅមក។ ម្យ៉ាងទៀត កិច្ចការងារនេះក៏នឹងចូលរួមចំណែកដល់ការអភិវឌ្ឍសេដ្ឋកិច្ច-សង្គម និងការពារអាយុជីវិតរបស់ប្រជាពលរដ្ឋនៅតំបន់ដែលទទួលរងផលប៉ះពាល់ដោយសារគ្រាប់មីនដែលបន្សល់ទុកពី សង្គ្រាមដែរ។
គួររំលឹកផងដែរថា ក្រុមការងារសម្របសម្រួលចម្រុះ (JCTF) កម្ពុជា-ថៃ ត្រូវបានបង្កើតឡើងស្របតាមលទ្ធផលនៃកិច្ចប្រជុំពិសេសលើកទី១ នៃគណៈកម្មាធិការព្រំដែនទូទៅ (GBC) កាលពីថ្ងៃទី១០ ខែកញ្ញា ឆ្នាំ២០២៥ នៅខេត្តកោះកុង ព្រះរាជាណាចក្រកម្ពុជា។ នៅក្នុងកិច្ចប្រជុំកាលនោះ កម្ពុជា និងថៃបានឯកភាពគ្នាលើការងារ «ដោះមីនមនុស្សធម៌»នៅតាមបណ្តោយព្រំដែននៃប្រទេសទាំងពីរ ក្រោយពីសង្គ្រាម៥ថ្ងៃ។
សូមបញ្ជាក់ដែរថាលោកអភិបាលខេត្តបន្ទាយមានជ័យអ៊ុំរាត្រីនៅថ្ងៃទី៩តុលាក៏បានចេញលិខិតផ្ញើទៅអភិបាលខេត្តស្រះកែវឲ្យនិយាយគ្នាសិនដេនមុននឹងធ្វើសកម្មភាពអ្វី។បន្ទាប់មកនៅរាត្រីថ្ងៃទី៩ ខែតុលា ឆ្នាំ២០២៥ លោក ប៉ែន បូណា រដ្ឋមន្ត្រីប្រតិភូអមនាយករដ្ឋមន្ត្រី និងជាប្រធានអង្គភាពអ្នកនាំពាក្យរាជរដ្ឋាភិបាល បានចេញសេចក្តីថ្លែងការណ៍មួយលើកឡើងថា៖ ដោយបានសង្កេតឃើញថា ម្តងហើយម្តងទៀត ថ្នាក់ដឹកនាំ និងមន្ត្រីថៃគ្រប់ លំដាប់ថ្នាក់តែងតែនិយាយបំផ្លើសបំភ្លៃកាឡៃការពិតអំពី បញ្ហាព្រំដែនរវាងប្រទេសទាំងពីរកម្ពុជា-ថៃ ដោយបាន ចោទកម្ពុជាថា ជាអ្នកបាញ់មុន ជាអ្នករំលោភបទឈប់បាញ់ ជាអ្នកឈ្លានពានទឹកដីថៃ ជាអ្នកគំរាមកំហែងដល់ សន្តិសុខជាតិថៃ ជាអាទិ៍ ហើយបានដើរតួជាជនរងគ្រោះទៅវិញ ខណៈដែលកម្ពុជាទៅវិញទេដែលជាអ្នករងគ្រោះ ពិតប្រាកដ។
ជាក់ស្តែង នៅថ្ងៃទី៩ ខែតុលា ឆ្នាំ២០២៥ នេះ ប្រមុខរាជរដ្ឋាភិបាលថៃ បានថ្លែងប្រាប់បណ្តាញសារព័ត៌មាន ជាច្រើនក្នុងប្រទេសថៃថា «ថៃជាភាគីដែលរងការរំលោភបំពាននិងរងគ្រោះ» ហើយបានដាក់លក្ខខណ្ឌឱ្យកម្ពុជា ជម្លៀសប្រជាពលរដ្ឋរបស់ខ្លួនចេញពីភូមិឋាន ដែលពួកគេបានរស់នៅកាន់កាប់ និងអាស្រ័យផលជាយូរមកហើយ ដើម្បីជាថ្នូរនឹងកិច្ចព្រមព្រៀងសន្តិភាព។
អ្នកនាំពាក្យរាជរដ្ឋាភិបាលកម្ពុជា បានបញ្ជាក់ជូនសាធារណជនជាតិនិងអន្តរជាតិ មេត្តាជ្រាបថា ក្នុងនាមជា ប្រទេសដែលស្រឡាញ់សន្តិភាព និងចង់បានព្រំដែនមិត្តភាព កិច្ចសហប្រតិបត្តិការ និងការអភិវឌ្ឍជាមួយប្រទេស ជិតខាង រាជរដ្ឋាភិបាលកម្ពុជាតែងតែប្រកាន់ខ្ជាប់នូវគោលការណ៍មិនឈ្លានពានទឹកដីប្រទេសជិតខាង សូម្បីត មួយមីល្លីម៉ែត្រឡើយ និងរក្សាសិទ្ធិត្រឹមតែការពារអធិបតេយ្យភាព និងបូរណភាពទឹកដីរបស់ខ្លួនស្របតាមច្បាប់ជាតិ និងអន្តរជាតិតែប៉ុណ្ណោះ។
ឯកឧត្ដម ប៉ែន បូណា បានបញ្ជាក់ជូនសារជាថ្មីថា រាជរដ្ឋាភិបាលកម្ពុជានៅតែរក្សាជំហរ ដោះស្រាយបញ្ហាព្រំដែនដោយសន្តិវិធី ដោយឈរលើយន្តការបច្ចេកទេសនិងច្បាប់អន្តរជាតិ ហើយចាត់ទុកថា ការប្រើប្រាស់កម្លាំងយោធាមិនអាចដោះស្រាយបញ្ហាព្រំដែនបានឡើយ។ ក្នុងន័យនេះហើយ ដែលរាជរដ្ឋាភិបាល កម្ពុជាតែងតែប្រកាន់យកនូវការអត់ធ្មត់កម្រិតខ្ពស់បំផុតនៅចំពោះមុខសកម្មភាពរំលោភបំពាននានា ដែលភាគីថ បាន និងកំពុងបង្កឡើងនៅក្នុងអំឡុងពេលនៃការអនុវត្តបទឈប់បាញ់។
អ្នកនាំពាក្យរាជរដ្ឋាភិបាលកម្ពុជា សូមអំពាវនាវសារជាថ្មីដល់ភាគីថៃ សូមបង្ហាញសុឆន្ទៈក្នុងការដោះស្រាយ បញ្ហាព្រំដែនដោយសន្តិវិធីប្រកបដោយការអត់ធ្មត់ ដោយប្រើយន្តការទ្វេភាគីដែលមានស្រាប់ រួមមាន JBC-GBC-RBC និងអនុលោមតាមអនុសញ្ញ សន្ធិសញ្ញា និងច្បាប់អន្តរជាតិជាធរមាន។ មានតែវិធីនេះតែមួយគត់ដែលអាច ឈានទៅដោះស្រាយបញ្ហាព្រំដែនដោយសន្តិវិធី និងប្រកបដោយនិរន្តរភាព និងភាពសុខសាន្ដយូរអង្វែង៕
