ខេត្តបាត់ដំបងនិងប៉ៃលិនត្រូវគ្នាហើយរឿងកាត់ដីបន្ទាប់ពីនាយករដ្ឋមន្ត្រីគម្រាម
16-November-2025 / ផ្សេងៗ
បាត់ដំបង៖ រដ្ឋបាលខេត្តបាត់ដំបង បានសម្រេចធ្វើការកែសម្រួលផ្ទៃដី ដែលមានទំហំជាង១ម៉ឺនហិកតា ក្នុងការផ្ទេរទៅឱ្យរដ្ឋបាលខេត្តប៉ៃលិន កាន់កាប់គ្រប់គ្រង បន្ទាប់ពីមានកិច្ចប្រជុំកិច្ចពិភាក្សាគ្នាមួយ លើសំណើសុំកែសម្រួលព្រំប្រទល់រដ្ឋបាលរវាងខេត្តបាត់ដំបង និងខេត្តប៉ៃលិន នៅសាលាខេត្តបាត់ដំបង នាថ្ងៃទី១៩ ខែតុលា ឆ្នាំ២០២២នេះ។កិច្ចប្រជុំវត្តមានចូលរួមពី លោក សក់ សេដ្ឋា រដ្ឋលេខាធិការប្រចាំការក្រសួងមហាផ្ទៃ ព្រមទាំងថ្នាក់ដឹកនាំខេត្តបាត់ដំបង មានលោក សុខ លូ អភិបាលខេត្តនិងមន្ត្រីជំនាញតាមស្ថាប័នមន្ទីរនានាក្នុងខេត្ត ព្រមទាំងប្រតិភូមកពីខេត្តប៉ៃលិន ដឹកនាំដោយលោកស្រី បាន ស្រីមុំ អភិបាលខេត្ត និងមន្ត្រីសំខាន់ៗមួយចំនួនទៀតនៃខេត្តប៉ៃលិន។
លោក សក់ សេដ្ឋា បានបញ្ជាក់ថា ការកែសម្រួលព្រំប្រទល់រដ្ឋបាលខេត្តបាត់ដំបង និងប៉ៃលិននាពេលនេះធ្វើឡើងតាមការណែនាំនិងបញ្ជាដោយផ្ទាល់ពីប្រមុខដឹកនាំរាជរដ្ឋាភិបាលកម្ពុជា គឺសម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដោយឱ្យអភិបាលខេត្តបាត់ដំបង និងខេត្តប៉ៃលិន ត្រូវធ្វើការដោះស្រាយរឿង បញ្ហាព្រំប្រទល់តំបន់រដ្ឋបាលមួយឱ្យបានច្បាស់លាស់ រវាងខេត្តទាំង២នេះ ក្នុងរយៈពេល២សប្តាហ៍ឱ្យចប់រួចរាល់។
លោក បានបញ្ជាក់ថា កិច្ចការសំខាន់ចំនួន៣ ដែលអាជ្ញាធរពាក់ព័ន្ធនៃខេត្តទាំងពីរ ត្រូវធ្វើនោះគឺការខិតខំចូលរួមផ្សព្វផ្សាយនិង អប់រំដល់ប្រជាជន នៅចំណុចគោលដៅទាំងនោះឱ្យមានការយល់ដឹងច្បាស់លាស់ ក្នុងការទទួលយកការស្រុះស្រួលគ្នានេះ បើទោះបីជាការកាត់ផ្ទៃដីនេះទៅឱ្យខេត្តប៉ៃលិន ក៏ដោយ ក៏ស្ថិតនៅក្នុងការគ្រប់គ្រងរបស់រដ្ឋអំណាច ក្រោមច្បាប់ ក្រោមរដ្ឋធម្មនុញ្ញ និងក្រោមការដឹកនាំរបស់រដ្ឋាភិបាលតែមួយ ដូច្នេះសូមអាជ្ញាធរទទួលយកការឯកភាពគ្នានេះ ព្រោះនេះជាចំណុចពិសេសមួយរបស់យើងក្នុងផែនការអភិវឌ្ឍន៍ និងការផ្តល់សេវារដ្ឋបាល ការរក្សាសណ្តាប់ធ្នាប់សាធារណៈ គឺជាកិច្ចការចាំបាច់បំផុត។
លោក សក់ សេដ្ឋា បានបញ្ជាក់ទៀតថា បន្ទាប់ពីព្រះរាជក្រិត្យចូលជាធរមាន អាជ្ញាធរខេត្តទាំងពីរ ឬក៏ស្រុក ឃុំ ភូមិ អាចជួបគ្នាផ្ទេរផ្ទូរឯកសារផ្សេងៗពាក់ព័ន្ធនឹងប្រជាជន ដូចជាឯកសារដីធ្លីជាដើម និងផ្ទេរការគ្រប់គ្រងជាក់ស្តែងទាំងប្រជាជន ទាំងភូមិ ឃុំ ដែលត្រូវបញ្ចូលទៅក្នុងស្រុក ឃុំ ភូមិណាពិតប្រាកដរបស់ខេត្តប៉ៃលិន។លោក រដ្ឋលេខាធិការប្រចាំការក្រសួងមហាផ្ទៃ បានរម្លឹកថា នៅក្នុងដំណាក់កាលនេះ ជាពិសេសរដ្ឋបាលខេត្តបាត់ដំបងការគ្រប់គ្រងនៅតែបន្ត ក្នុងនោះត្រូវចូលរួមសហការគ្នាជាមួយរដ្ឋបាលខេត្តប៉ៃលិន ដោយមិនត្រូវលែងដៃឡើយ ដើម្បីថែរក្សាសុវត្ថិភាពសន្តិសុខឱ្យបានល្អប្រសើរជូនប្រជាជន។
តាមមន្ត្រីជំនាញរបស់មន្ទីររៀបចំដែនដីនគរូបនីយកម្មសំណង់ និងសុរិយោដីខេត្តបាត់ដំបង បានបញ្ជាក់ថា ផ្ទៃដីដែលត្រូវបានកាត់តាមសំណើររបស់រដ្ឋបាលខេត្តប៉ៃលិន សរុបទាំងអស់មានចំនួន ១១.៦៧៩ ហ.ត ក្នុងនោះមាននៅក្នុងភូមិឡាក់ហុក២ និងភូមិបឹងអូរជាង មានទំហំ ១.៣៧៦ ហ.តស្ថិតនៅត្រង់ចំណុចកំពង់ចម្លងក្រោម មានទំហំ ៣.៦១៨ ហ.ត និងនៅព្រំប្រទល់ ដែលខេត្តប៉ៃលិនស្នើសុំកែសម្រួលតាមគោលធម្មជាតិស្ទឹង គឺត្រង់ចំណុចភ្នំដំបង និងស្លេវ ចូលព្រំដីនៅក្នុងខេត្តបាត់ដំបង មានទំហំ ៦.៦៨៥ ហ.ត ។
បន្ទាប់ពីការពិភាក្សា លោករដ្ឋលេខាធិការប្រចាំការក្រសួងមហាផ្ទៃ បានដឹកនាំប្រតិភូនៃរដ្ឋបាលខេត្តបាត់ដំបង និងខេត្តប៉ៃលិន ចុះពិនិត្យផ្ទៀងផ្ទាត់បន្ថែមទៀត ដែលរដ្ឋបាលខេត្តទាំង២ បានឯកភាពគ្នាជាគោលការណ៍ជាក់លាក់លើប្លង់ផែនទី ដោយកំណត់កែសម្រួលយកស្ទឹងចំនួន២ជាព្រំប្រទល់នៃរដ្ឋបាលខេត្តទាំង២ ក្នុងនោះ នៅក្នុងស្រុកសំឡូត កំណត់យកស្ទឹងបរឡាង ដែលស្ថិតក្នុងភូមិសាស្ត្រនៃឃុំមានជ័យ និងផ្នែកខ្លះទៀតក្នុងឃុំសំឡូត ធ្វើជាព្រំប្រទល់ខេត្ត ដោយឡែកនៅក្នុងស្រុកកំរៀង កំណត់យកស្ទឹងមង្គលបុរី ដែលស្ថិតក្នុងភូមិសាស្ត្រនៃឃុំកំរៀង និងផ្នែកខ្លះទៀត ក្នុងឃុំតាក្រី ដើម្បីធ្វើជាព្រំប្រទល់ខេត្ត៕(ប្រភពCNC)
