យោធាអ៊ីស្រាអែល ប្រកាសត្រៀមវាយលុកលើទីក្រុងហ្កាហ្សាដើម្បីបោសំអាតប្រជាជនប៉ាឡេស្ទីនឯអសបបានត្រឹមអំពាវនាវ
11-February-2026 / ព័ត៌មានអន្តរជាតិ
អ៊ីស្រាអែល៖នៅថ្ងៃព្រហស្បតិ៍ ទី២១ ខែសីហា អគ្គលេខាធិការនៃអង្គការសហប្រជាជាតិ (UN) លោក Antonio Guterres បានអំពាវនាវរកបទឈប់បាញ់បន្ទាន់ បន្ទាប់ពីអ៉ីស្រាអែល ប្រកាសផែនការចង់កាន់កាប់ទីក្រុងហ្កាហ្សា (Gaza City)។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters។
នៅពេលចូលរួមសន្និសីទអន្តរជាតិស្តីពីការអភិវឌ្ឍអាហ្វ្រិក ក្នុងទីក្រុងតូក្យូ ប្រទេសជប៉ុន លោក Guterres ថ្លែងថា «វាមានសារៈសំខាន់ណាស់ ក្នុងការឈានដល់បទឈប់បាញ់ហ្កាហ្សាភ្លាមៗ ដែលចាំបាច់ដើម្បីបញ្ចៀសការស្លាប់ និងការបំផ្លិចបំផ្លាញដោយប្រតិបត្តិការយោធាប្រឆាំងនឹងទីក្រុងហ្កាហ្សា»។ លោក Guterres ក៏បានអំពាវនាវឱ្យមាន ការដោះលែងចំណាប់ខ្មាំង ដោយឥតលក្ខខណ្ឌពីក្រុមហាម៉ាសផងដែរ ខណៈជំរុញឱ្យអ៉ីស្រាអែល ប្តូរចិត្តឈប់ពង្រីកការសាងសង់ លំនៅដ្ឋានខុសច្បាប់ ក្នុងតំបន់ West Bank។
សូមបញ្ជាក់ថាអ្នកនាំពាក្យយោធាអ៊ីស្រាអែលបាននិយាយថា កងទ័ពកំពុងប្រតិបត្តិការរួចហើយនៅក្នុងតំបន់ Zeitoun និង Jabalia ដើម្បីដាក់មូលដ្ឋានគ្រឹះសម្រាប់ការវាយលុក ដែលរដ្ឋមន្ត្រីការពារជាតិអ៊ីស្រាអែល លោក Katz បានអនុម័តកាលពីថ្ងៃអង្គារ ហើយដែលនឹងត្រូវបានដាក់ទៅកាន់គណៈរដ្ឋមន្ត្រីសន្តិសុខនៅចុងសប្តាហ៍នេះ។កងកម្លាំងបម្រុងប្រហែល៦០.០០០នាក់ កំពុងត្រូវបានកោះហៅសម្រាប់ដើមខែកញ្ញា ដើម្បីចាប់ផ្ដើមត្រៀមកម្លាំងជាបុគ្គលិកដែលមានកាតព្វកិច្ចសកម្មសម្រាប់ប្រតិបត្តិការនេះ។
ទីភ្នាក់ងារសារព័ត៌មាន Reuters បានរាយការណ៍ថា ក្រុមហាម៉ាស បានចោទប្រកាន់អ៊ីស្រាអែលថាបានរារាំងកិច្ចព្រមព្រៀងបទឈប់បាញ់ ដើម្បីបន្តសង្គ្រាមដ៏ព្រៃផ្សៃប្រឆាំងនឹងជនស៊ីវិលស្លូតត្រង់។ប្រជាជនប៉ាឡេស្ទីនរាប់រយពាន់នាក់នៅក្នុងទីក្រុង ហ្កាហ្សា ត្រូវគេរំពឹងថា នឹងត្រូវបានបញ្ជាឱ្យជម្លៀសចេញ ហើយឆ្ពោះទៅកាន់ទីជម្រកនៅភាគខាងត្បូងហ្កាហ្សា ខណៈការត្រៀមរៀបចំសម្រាប់ផែនការដណ្តើមកាន់កាប់របស់អ៊ីស្រាអែល កំពុងដំណើរការ។ យោងតាមសេចក្តីថ្លែងការណ៍របស់រដ្ឋមន្ត្រីហិរញ្ញវត្ថុអ៊ីស្រាអែល លោក Bezalel Smotrich បានឱ្យដឹងថា ផែនការតាំងទីលំនៅរបស់អ៊ីស្រាអែល ឈ្មោះថាគម្រោងអភិវឌ្ឈ E1 ដែលត្រូវថ្កោលទោសយ៉ាងទូលំទូលាយ បានទទួលការអនុម័តផ្លូវការចុងក្រោយហើយកាលពីថ្ងៃពុធ (២០ សីហា) ដោយគម្រោងនេះនឹងកាត់ផ្តាច់ទឹកដីដែលប៉ាឡេស្ទីន ស្វះស្វែងបង្កើតជារដ្ឋមួយ ក្នុងអ្វីដែលលោកនិយាយថាដើម្បីកប់គំនិតនៃរដ្ឋប៉ាឡេស្ទីន។
ក្នុងសេចក្តីថ្លែងការណ៍នោះ លោក Smotrich បាននិយាយថា ការអនុម័តនៃគម្រោង E1 ដែលនឹងពុះបំបែកតំបន់កាន់កាប់ West Bank ហើយកាត់ទឹកដីនេះចេញពីក្រុងយេរូសាឡិមខាងកើត ត្រូវបានប្រកាសតាំងតែពីសប្តាហ៍មុនមក និងបានទទួលការសម្រេចចុងក្រោយរួចហើយពីគណៈកម្មការរៀបចំផែនការរបស់ក្រសួងការពារជាតិអ៊ីស្រាអែល កាលពីថ្ងៃពុធ។ប្រមុខហិរញ្ញវត្ថុរូបនេះបន្ថែមថា «រដ្ឋប៉ាឡេស្ទីនកំពុងត្រូវបានលុបបំបាត់ចេញពីតុចរចា មិនមែនដោយពាក្យស្លោកអ្វីនោះទេ ប៉ុន្តែជាមួយនឹងសកម្មភាពជាក់ស្ដែង»។
ការចាប់ផ្តើមគម្រោងដ៏ចម្រូងចម្រាសនេះឡើងវិញ អាចធ្វើឱ្យអ៊ីស្រាអែលកាន់តែឯកោថែមទៀត ខណៈសម្ព័ន្ធមិត្តលោកខាងលិចមួយចំនួនរបស់ខ្លួន ដែលខកចិត្តខ្លាំងដោយសារការបន្តកាប់សម្លាប់ និងភាពតក់ស្លុតនៃសង្គ្រាមហ្កាហ្សា បានប្រកាសថា ពួកគេអាចទទួលស្គាល់រដ្ឋប៉ាឡេស្ទីន នៅឯមហាសន្និបាតអង្គការសហប្រជាជាតិក្នុងខែកញ្ញា ខាងមុខនេះ៕សម្ព័ន្ធមិត្តជាច្រើនរបស់អ៊ីស្រាអែលបានថ្កោលទោសផែនការរបស់ខ្លួន ដោយប្រធានាធិបតីបារាំងលោក Emmanuel Macron បានព្រមានកាលពីថ្ងៃពុធថា សកម្មភាពយោធានេះ អាចនាំទៅរកគ្រោះមហន្តរាយសម្រាប់ប្រជាជនទាំងពីរ និងហានិភ័យដែលធ្វើឲ្យតំបន់ទាំងមូលធ្លាក់ចូលទៅក្នុងវដ្តនៃសង្គ្រាមអចិន្ត្រៃយ៍៕
