វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 4234 នាក់
ម្សិលមិញ 5020 នាក់
សរុប 14119681 នាក់
ឥណ្ឌា៖នេះជាការបដិសេធជាលើកទី២ហើយរបស់ឥណ្ឌាក្នុងការមិនចូលរួមវេទិកាខ្សែក្រវ៉ាត់ និងផ្លូវ ដែលរៀបចំឡើងដោយរដ្ឋាភិបាលក្រុងប៉េកាំង។
សារព័ត៌មាន The Times of India បានឲ្យដឹងថា៖មូលហេតុដែលប្រទេសឥណ្ឌាច្រានចោលការអញ្ជើញរបស់ចិន ដោយសារតែគំនិតផ្ដួចផ្ដើមខ្សែក្រវ៉ាត់ និងផ្លូវរបស់ចិនបានធ្វើឲ្យប៉ះពាល់អធិបតេយ្យភាពរបស់ប្រទេសខ្លួនតាមរយៈច្រកសេដ្ឋកិច្ចចិន-ប៉ាគីស្ថាន ឬហៅជាភាសាអង់គ្លេសថា China-Pakistan Economic Corridor (CPEC)។
ច្រកសេដ្ឋកិច្ចចិន-ប៉ាគីស្ថាន គឺដំណើរការឡើងក្នុងគោលបំណងធ្វើទំនើបកម្មនូវហេដ្ឋារចនាសម្ព័ន្ធ និងពង្រឹងនូវសេដ្ឋកិច្ចរបស់ប៉ាគីស្ថាន តាមរយៈការសាងសង់បណ្ដាញដឹកជញ្ជូនទំនើបៗ គម្រោងថាមពលអគ្គិសនី ក៏ដូចជា ការបង្កើតតំបន់សេដ្ឋកិច្ចពិសេសនៅក្នុងប្រទេសនេះជាដើម។ គម្រោងនេះមិនត្រឹមតែផ្តល់អត្ថប្រយោជន៍ដល់ប្រទេសចិន និងប៉ាគីស្ថានប៉ុណ្ណោះទេ ប៉ុន្តែ វានឹងផ្ដល់ផលវិជ្ជមានទៅដល់ប្រទេសដទៃដូចជា អ៊ីរ៉ង អាហ្វហ្គានីស្ថាន ឥណ្ឌា ប្រទេសនៅអាស៊ីកណ្តាល និងប្រទេសក្នុងតំបន់ផ្សេងទៀតជាដើម។
ភាគីឥណ្ឌា ថាច្រកសេដ្ឋកិច្ចចិន-ប៉ាគីស្ថានដែលជាគម្រោងមួយក្នុងគំនិតផ្ដួចផ្តើមខ្សែក្រវ៉ាត់ និងផ្លូវរបស់ចិន បានសាងសង់ហេដ្ឋារចនាសម្ព័ន្ធឆ្លងកាត់តំបន់ Gilgit-Baltistan ដែលជាតំបន់ប្រទាញប្រទង់រវាងឥណ្ឌា និងប៉ាគីស្ថាន។ឥណ្ឌាមិនដែលជំទាស់ក្នុងការធ្វើការជាមួយសមភាគីចិនលើគម្រោងសាងសង់ហេដ្ឋារចនាសម្ព័ន្ធនានាម្តងណាឡើយ ប្រសិនបើភាគីចិនគោរពតាមអ្វីដែលឥណ្ឌាហៅថាជាបទដ្ឋានអន្តរជាតិ។ បទដ្ឋានអន្តរជាតិទាំងនោះរួមមាន តម្លាភាព និងការគោរពគ្នាទៅវិញទៅមកលើអធិបតេយ្យភាព និងបូរណភាពដែនដី ជាដើម។
សូមបញ្ជាក់ថា៖ទោះបីជាមានការបដិសេធមិនចូលរួមក្នុងវេទិកា «ខ្សែក្រវ៉ាត់ និងផ្លូវ» ម្តងរួចមកហើយកាលពីឆ្នាំ២០១៧ តែចិននៅតែបន្តផ្ញើលិខិតអញ្ជើញឲ្យឥណ្ឌា ដោយសារតែប្រទេសកុម្មុយនីស្តមួយនេះ នៅតែមានសុទិដ្ឋិនិយមថា ឥណ្ឌានឹងពិចារណាឡើងវិញក្នុងការចូលរួមវេទិកានេះ។
ការរៀបចំវេទិកា«ខ្សែក្រវ៉ាត់ និងផ្លូវ» របស់ក្រុងប៉េកាំងនាពេលនេះ ធ្វើឡើងស្របពេលដែលគម្រោងសាងសង់ហេដ្ឋរចនាសម្ព័ន្ធនៅប្រទេសមួយចំនួនដែលនៅភូមិផងរបងជាមួយឥណ្ឌា ដូចជាស្រីលង្កា ម៉ាល់ឌីវ និងប៉ាគីស្ថាន ជាដើម កំពុងមានភាពចម្រូងចម្រាស។
ខ្សែក្រវ៉ាត់ និងផ្លូវ ជាគំនិតផ្ដួចផ្ដើមរបស់ប្រធានាធិបតីចិន ស៊ី ជិនពីង ក្នុងឆ្នាំ២០១៣។ គម្រោងនេះ មានប្រទេសជាដៃគូជាង ១០០ ដែលមកពីទ្វីបអាស៊ី អាហ្វ្រិក អាមេរិកឡាទីន រួមទាំងប្រទេសរុស្ស៊ី ព័រទុយហ្គាល់ និងក្រិច ក៏ចូលរួមផងដែរ។ តាមរយៈគំនិតផ្ដួចផ្ដើម ខ្សែក្រវ៉ាត់ និងផ្លូវ ចិនបានផ្ដល់ជាកម្ចីដល់ប្រទេសទាំងនោះក្នុងការអភិវឌ្ឍហេដ្ឋារចនាសម្ព័ន្ធនានា ដូចជា ផ្លូវដែកកំពង់ផែ ផ្លូវល្បឿនលឿន និងបង្កើតច្រកសេដ្ឋកិច្ចសម្រាប់តភ្ជាប់ប្រទេសចិនជាមួយពិភពលោកទាំងមូលទៀតផង។
សូមបញ្ជាក់ថា ប្រជាជនរាប់លាននាក់ទូទាំង ២០រដ្ឋក្នុងប្រទេសឥណ្ឌា និងតំបន់ដែលត្រួតត្រាដោយឥណ្ឌាផ្សេងៗទៀត នឹងធ្វើការបោះឆ្នោតនៅក្នុងមណ្ឌលចំនួន ៩១។ដែលជាការបោះឆ្នោតក្នុងដំណាក់កាលដំបូង ដើម្បីជ្រើរើសសមាជិករដ្ឋសភា។
ការបោះឆ្នោតនោះមានចំនួន ៧ដំណាក់កាល ហើយនឹងធ្វើរហូតដល់ថ្ងៃទី ១៩ ខែឧសភា ចំណែកថ្ងៃរាប់សន្លឹកឆ្នោតវិញគឺនៅថ្ងៃទី ២៣ ខែឧសភាដដែល។
វាគឺជាការបោះឆ្នោតដ៏ធំបំផុតក្នុងពិភពលោកដែលមិនធ្លាប់មាន ដោយសារមានប្រជាជនចំនួន ៩០០លាននាក់ទូទាំងប្រទេសមានសិទ្ធិបោះឆ្នោត។
សូមបញ្ជាក់ថា ការបោះឆ្នោតនេះគឺជាការបោះឆ្នោតស្ទង់មតិលើប្រជាប្រិយភាពរបស់លោកនាយករដ្ឋមន្ត្រីឥណ្ឌា Narendra Modi ក្រោយពេលលោកបានដឹកនាំគណបក្ស Bharatiya Janata Party ឲ្យទទួលបានជ័យជម្នះដ៏លើសលុបកាលពីឆ្នាំ ២០១៤។ក្នុងពេលដំណើការបោះឆ្នោតនេះលោកនាយករដ្ឋមន្ត្រីប្រទេសឥណ្ឌាណារីនដ្រាមូឌីបានប្រកាសពីការត្រៀមធ្វើសង្ក្រាមជាមួយប្រទេសប៉ាគិស្ថានផងដែរដែលការប្រកាសនេះត្រូវបានអ្នកវិភាគវាយតម្លៃថាជាំយុទ្ធនាការជាតិនិយមដើម្បីរកការគាំទ្រពីប្រជាពលរដ្ឋម្រាប់ការបោះឆ្នោត៕