បន្ទាប់ពីរារាំងអ៊ីស្រាអែលបានចាប់រឹបអូសទូកដឹកជំនួយមនុស្សធម៌និងនាង Greta Thunberg មិនឲ្យចូលឆ្នេរហ្កាហ្សា
07-June-2025 / ព័ត៌មានអន្តរជាតិ
ប៉ាឡេស្ទីន៖កងទ័ពជើងទឹកអ៊ីស្រាអែល នៅថ្ងៃចន្ទនេះបានឡើងត្រួតត្រា និងរឹបអូសទូកសប្បុរសធម៌មួយគ្រឿង ដែលដឹកសកម្មជនអាកាសធាតុ នាង Greta Thunberg ខណៈទូកនេះព្យាយាមជម្នះការបិទផ្លូវសមុទ្រទៅតំបន់ហ្គាហ្សា។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន Reuters នៅថ្ងៃចន្ទ ទី៩ ខែមិថុនា ឆ្នាំ២០២៥។
សម្ព័ន្ធ Freedom Flotilla Coalition ដែលរៀបចំការធ្វើដំណើរនេះ បាននិយាយថា គោលបំណងគឺដើម្បីផ្តល់ជំនួយជានិមិត្តរូប និងទាញចំណាប់អារម្មណ៍អន្តរជាតិមកលើវិបត្តិមនុស្សធម៌នៅហ្គាហ្សា។ នៅក្នុងវីដេអូដែលបានថតទុកជាមុន នាង Thunberg បានថ្លែងថា ប្រសិនបើវីដេអូនេះចេញផ្សាយ គឺមានន័យថាពួកគេ «ត្រូវបានស្ទាក់ចាប់ និងចាប់ពង្រត់»។ ទោះជាយ៉ាងណា ក្រសួងការបរទេសអ៊ីស្រាអែលបានហៅបេសកកម្មនេះថាជា «ការសម្តែង» និង «ទូក selfie របស់ពួកតារាល្បី»។ភាគីអ៊ីស្រាអែលបានបញ្ជាក់ថា អ្នកដំណើរទាំង ១២នាក់ (ដែលរួមមានទាំងសមាជិកសភាអឺរ៉ុបបារាំង Rima Hassan) មានសុវត្ថិភាព ហើយកំពុងត្រូវបាននាំទៅកាន់កំពង់ផែអ៊ីស្រាអែល ដើម្បីត្រៀមបញ្ជូនត្រឡប់ទៅប្រទេសកំណើតវិញ។
គួរបញ្ជាក់ថា ទូកដឹកជំនួយមនុស្សធម៌មួយ បានធ្វើដំណើរតាមសមុទ្រជាច្រើនថ្ងៃ និងបានទៅជិតដល់ឆ្នេរតំបន់ហ្កាហ្សាហើយ តែត្រូវទាហានជើងទឹកអ៊ីស្រាអែល ហាមឃាត់ជាដាច់ខាត មិនឲ្យទូកនោះចុះចតនៅគោលដៅឡើយ និងបង្ខំឲ្យត្រឡប់ទៅកន្លែងដើមវិញ។ មានប្រវែង១៨ម៉ែត្រ ទូកមនុស្សធម៌នេះក៏មានសកម្មជនបរិស្ថាន កញ្ញា Greta Thunberg និងតំណាងរាស្ត្រអឺរ៉ុប រួមដំណើរផង។ទូកដឹកជំនួយមនុស្សធម៌ ទៅឲ្យពលរដ្ឋហ្កាហ្សា ឈ្មោះថា Madleen បានចេញដំណើរពីកោះ Sicile របស់អ៊ីតាលី កាលពីចុងខែមេសា និងបានធ្វើដំណើរដល់ឆកសមុទ្រអេហ្ស៊ីប នៅថ្ងៃអាទិត្យ ទី៨មិថុនា។ ក្រៅពីដឹកជំនួយមនុស្សធម៌ ទូកនេះក៏មានបុគ្គលសំខាន់ៗនិងល្បីឈ្មោះរួមដំណើរផង តួយ៉ាង សកម្មជនការពារបរិស្ថានអាកាសធាតុ នាង Greta Thunberg ជនជាតិស៊ុយអែត និងមានអ្នកតំណាងរាស្ត្រសភាអឺរ៉ុប សញ្ជាតិបារាំងឈ្មោះ Rima Hassan ព្រមទាំង ក្រុមជនជាតិផ្សេងៗទៀត ដូចជា អាល្លឺម៉ង់ ប្រេស៊ីល តួកគី អេស្ប៉ាញ និងហូឡង់ ក៏បានរួមដំណើរដែរ។
អ្នកតំណាងរាស្ត្រអឺរ៉ុប សញ្ជាតិបារាំង Rima Hassan បាននាំយកលិខិតចំហមួយដែលក្រុមសមាជិកសភាអឺរ៉ុប ជាង ២០០ នាក់ បានចុះហត្ថលេខា ដើម្បីស្នើសុំឲ្យអ៊ីស្រាអែល បើកផ្លូវច្រកផ្លូវសមុទ្រ យល់ព្រមឲ្យទូក Madleen អាចចូលចុះចត និងបែងចែកជំនួយមនុស្សធម៌ នៅតំបន់ហ្កាហ្សា។ ក៏ប៉ុន្តែ ខ្លឹមសារសំបុត្រនេះ ទំនងត្រូវរលាយដូចអំបិលត្រូវទឹក ដ្បិតថា ពេលទូក Madleen កាន់តែចូលកៀកក្បែរឆ្នេរតំបន់ហ្កាហ្សា តែទាហានអ៊ីស្រាអែលបានត្រៀមកម្លាំងរារាំងទុកមុនជាស្រេច។ នៅថ្ងៃអាទិត្យ ទី៨មិថុនា រដ្ឋមន្ត្រីការពារជាតិអ៊ីស្រាអែល Israël Katz ប្រកាសបញ្ជាក់ជាថ្មីថា បានចេញបទបញ្ជាទៅឆ្មាំសមុទ្រនិងយោធាជើងទឹកអ៊ីស្រាអែល ឲ្យបញ្ជៀសទូកដឹកជំនួយមនុស្សធម៌នោះ កុំឲ្យចូលចតឆ្នេរតំបន់ហ្កាហ្សា ជាដាច់ខាត។
រដ្ឋមន្ត្រីការពារជាតិអ៊ីស្រាអែល Israël Katz បាននិយាយថា លោកពោលត្រង់ៗថានាង Greta Thunberg ដែលស្អប់ខ្ពើមជនជាតិជ្វីហ្វ និងក្រុមបក្សពួកដែលសុទ្ធសឹងតែជាអ្នកនាំពាក្យឲ្យក្រុមប្រដាប់អាវុធហាម៉ាស ត្រូវស្តាប់ឲ្យច្បាស់ថា ត្រូវតែធ្វើដំណើរត្រឡប់ថយក្រោយវិញជាប្រញាប់ ព្រោះពួកអ្នកឯងគ្មានផ្លូវចូលហ្កាហ្សា បានសោះឡើយ។ នេះបើតាមសម្តីលោក Israël Katz ដោយបញ្ជាក់ថា ពួកគេនៅលើទូកនោះនឹងមិនអាចទម្លុះរនាំងហាមឃាត់របស់ទ័ពអ៊ីស្រាអែល បានទេ។
ដោយមិនខ្វល់ពីការត្រួតពិនិត្យឥវ៉ាន់របស់របរ ឬស្បៀងចំណីអាហារនៅលើទូកជាមុន រដ្ឋមន្ត្រីការពារជាតិអ៊ីស្រាអែល Israël Katz បាននិយាយប៉ាន់ស្មានទុកជាមុនតែម្តង ថាការហាមឃាត់របស់អ៊ីស្រាអែលក្នុងការរារាំងទូកនេះ មានវត្ថុបំណងធំតែមួយគត់ គឺជៀសវាងកុំឲ្យពួកគេផ្តល់សព្វាវុធទៅក្រុមប្រដាប់អាវុធហាម៉ាស ជាអង្គការភេរវកម្ម ដែលចាប់ចំណាប់ខ្មាំងបង្ខាំងទុក និងប្រព្រឹត្តឧក្រិដ្ឋកម្មសង្គ្រាម។
នេះជាសម្តីចោទប្រកាន់របស់លោករដ្ឋមន្ត្រី Israël Katz។
ផ្ទុយទៅវិញ ភ្នាក់ងារអង្គការសហប្រជាជាតិ ដែលទទួលបន្ទុកកិច្ចការប៉ាឡេស្ទីន បានវាយតម្លៃខ្ពស់ចំពោះកាយវិការដ៏សប្បុរសរបស់ក្រុមសកម្មជននានា និងអ្នកតំណាងរាស្ត្រអឺរ៉ុប ដែលខំប្រឹងជិះទូកឆ្លងសមុទ្រ ដឹកជំនួយមនុស្សធម៌ ទៅជួយពលរដ្ឋប៉ាឡេស្ទីន នៅតំបន់ហ្កាហ្សា។ ក្រោយទ័ពអ៊ីស្រាអែលធ្វើប្រតិបត្តិការយោធាវាយប្រហារនិងសម្រុកបិទខ្ទប់តំបន់ហ្កាហ្សា ជាច្រើនខែមក នៅពេលនេះ ពលរដ្ឋប៉ាឡេស្ទីននៅហ្កាហ្សា កំពុងខ្វះជំនួយស្បៀងអាហារ ជាខ្លាំង៕
.jpg&h=97&w=146)
