សង្គ្រាមឥណ្ឌាប៉ាគិស្ថានមានជនស៉ីវិល៣១នាក់ស្លាប់ នៅខាងប៉ាគីស្ថាន រីឯ៧នាក់ស្លាប់ នៅខាងឥណ្ឌា
21-September-2026 / ព័ត៌មានអន្តរជាតិ
ប្រទេសប៉ាគិស្ថាន៖ អ្នកនាំពាក្យយោធាប៉ាគីស្ថាន បានឱ្យដឹងថា ការវាយប្រហារដោយមីស៉ីលនិងកាំភ្លើងធំរបស់ឥណ្ឌា បានផ្តាច់ជីវិតជនស៉ីវិល កើនដល់យ៉ាងហោច៣១នាក់ និងរាប់សិបនាក់ទៀតរងរបួស ។រីឯឥណ្ឌាវិញបានអះអាងថា នៅខាងខ្លួន មានជនស៉ីវិលយ៉ាងហោច៧នាក់ បានស្លាប់ ក្នុងការវាយប្រហារដោយកាំភ្លើងធំរបស់ប៉ាគីស្ថាន នៅតាមបណ្តោយខ្សែបន្ទាត់ព្រំប្រទល់ Line of Control ដែលខណ្ឌចែកតំបន់ជម្លោះ Kashmir រវាងភាគីទាំងពីរ។ នេះបើតាមការចេញផ្សាយដោយ សារព័ត៌មាន AP នាថ្ងៃពុធ ទី៧ ខែឧសភា ឆ្នាំ២០២៥។
អ្នកនាំពាក្យយោធាប៉ាគីស្ថាន បាននិយាយថា មនុស្ស២៦នាក់ បានស្លាប់ ដោយសារការវាយប្រហារមីស៉ីលបាញ់ចេញពីយន្តហោះចម្បាំងឥណ្ឌា ហើយ៥នាក់ទៀតបានស្លាប់ នៅក្បែរខ្សែបន្ទាត់ Line of Control ដោយសារការបាញ់កាំភ្លើងធំ។ អាជ្ញាធរឥណ្ឌា បានឱ្យដឹងថា ជនស៉ីវិលយ៉ាងហោច៧នាក់ បានស្លាប់ និង៣០នាក់ទៀត បានរងរបួស ក្នុងការបាញ់កាំភ្លើងធំរបស់ឥណ្ឌា។
សូមបញ្ជាក់ថាប្រយុទ្ធគ្នាដ៏ក្តៅគគុកខាងលើ កើតមានឡើងបន្ទាប់ពីយោធាឥណ្ឌា បានបើកការវាយប្រហារតាមផ្លូវអាកាស ចូលក្នុងទឹកដីរបស់ប៉ាគីស្ថាន ក្នុងសកម្មភាពដែលប៉ាគីស្ថាន ចាត់ទុកជាការប្រកាសសង្គ្រាម ហើយប្តេជ្ញាតបតយ៉ាងម៉ឺងម៉ាត់ត្រឡប់ទៅវិញ។ យោធាប៉ាគីស្ថាន អះអាងថា បានបាញ់ទម្លាក់យន្តហោះចម្បាំង៥របស់ឥណ្ឌា ខណៈឥណ្ឌា បាននិយាយថា យន្តហោះចម្បាំងខ្លួន៣គ្រឿង បានធ្លាក់នៅក្នុងទឹកដីរបស់ឥណ្ឌា ប៉ុន្តែមិនបានបញ្ជាក់មូលហេតុទេ។
ប៉ុន្មានថ្ងៃមកហើយ ទីក្រុងអ៉ីស្លាម៉ាបាដ បានព្រមានថា ឥណ្ឌានឹងធ្វើសកម្មភាពយោធាប្រឆាំងមកលើខ្លួន ដើម្បីជាការសងសឹក បន្ទាប់ពីករណីបាញ់រះដ៏ប្រល័យរបស់ក្រុមសកម្មប្រយុទ្ធ លើភ្ញៀវទេសចរនៅតំបន់ Kashimir ប៉ែកគ្រប់គ្រងដោយឥណ្ឌា កាលពីថ្ងៃទី២២ ខែមេសា ដែលបានសម្លាប់មនុស្ស២៦នាក់។ ឥណ្ឌាបានចោទប្រកាន់ថា ប៉ាគីស្ថានមានជាប់ពាក់ព័ន្ធក្នុងករណីនោះ បើទោះបីជាទីក្រុងអ៉ីស្លាម៉ាបាដ បដិសេធយ៉ាងណាក៏ដោយ។
ឥណ្ឌា នៅថ្ងៃពុធ ទី៧ ខែឧសភា បានបើកការវាយប្រហារតាមផ្លូវអាកាសលើទីតាំង៩កន្លែងនៅក្នុងទឹកដីប៉ាគីស្ថាន និងតំបន់កាស្មៀរប៉ែកខាងគ្រប់គ្រងដោយប៉ាគីស្ថាន ខណៈទីក្រុងអ៉ីស្លាម៉ាបាដ បានចាត់ទុកថាការវាយប្រហារនេះជាសកម្មភាពសង្គ្រាម ហើយប្រកាសថានឹងសងសឹកវិញ ចំពោះមុខការព្រួចាយបារម្ភពីហានិភ័យផ្ទុះសង្គ្រាមរវាងប្រទេសទាំង២ដែលសុទ្ធតែមានអាវុធនុយក្លេអ៊ែរ។ នេះបើតាម ការចេញផ្សាយដោយទីភ្នាក់ងារសារព័ត៌មាន Reuters។
ខាងក្រោមនេះជាព័ត៌មានសំខាន់ៗពីភាពតានតឹងរវាងឥណ្ឌា និងប៉ាគីស្ថាន៖
ឥណ្ឌាបានឱ្យដឹងថានៅក្នុងប្រតិបត្តិការឈ្មោះ «Operation Sindoor» យោធារបស់ខ្លួនបានវាយប្រហារលើគោលដៅទាំងនៅក្នុងប្រទេសប៉ាគីស្ថាន និងតំបន់កាស្មៀរប៉ែកគ្រប់គ្រងដោយប៉ាគីស្ថាន។ តាម យោធាឥណ្ឌា ការវាយប្រហារនេះមានគោលដៅលើទីស្នាក់ការរបស់ក្រុមសកម្មប្រយុទ្ធ Jaish-e-Mohammed និង Lashkar-e-Taiba។ ប៉ាគីស្ថានវិញបានអះអាងថាមនុស្សយ៉ាងហោច ៨នាក់បានស្លាប់ និង៣៨នាក់ផ្សេងទៀតរងរបួសនៅក្នុងការវាយប្រហាររបស់ឥណ្ឌា។* ឥណ្ឌាបាននិយាយយោធារបស់ខ្លួនបានវាយប្រហារលើគោលដៅសរុបចំនួន៩កន្លែង ទាំងនៅក្នុងប្រទេសប៉ាគីស្ថាន និងតំបន់កាស្មៀរប៉ែកគ្រប់គ្រងដោយប៉ាគីស្ថាន។ រីឯប៉ាគីស្ថានថាគោលដៅចំនួន៥ ត្រូវបាន វាយប្រហារដោយយោធាឥណ្ឌា ក្នុងនោះមាន៣ទីតាំងនៅក្នុងតំបន់កាស្មៀរប៉ែកខាងគ្រប់គ្រងដោយប៉ាគីស្ថាន និង២ទីតាំងនៅក្នុងខេត្ត Punjab របស់ប៉ាគីស្ថាន។ គោលដៅដែលរងការវាយប្រហារនៅក្នុងខេត្ត Punjab ទៀតសោត គឺស្ថិតនៅក្នុងទីក្រុង Ahmedpur East និងទីក្រុង Muridke។
ឥណ្ឌាបាត់បង់យន្ដហោះចម្បាំង៥គ្រឿង៖ មន្ត្រីយោធាប៉ាគីស្ថានម្នាក់បានប្រាប់ទីភ្នាក់ងារព័ត៌មាន Reuters ថាយោធាប៉ាគីស្ថានបានបាញ់ទម្លាក់យន្ដហោះចម្បាំងឥណ្ឌា ៥គ្រឿង ក្នុងនោះរួមមានយន្ដហោះ Rafale ៣គ្រឿង Su-30 មួយគ្រឿង និង MiG-29 មួយគ្រឿង។ Rafale ជាយន្ដហោះចម្បាំងដែលឥណ្ឌាទិញពីបារាំង រីឯ Su-30 និង MiG-29 ជាយន្ដហោះចម្បាំងសល់ពីសម័យអតីតសហភាពសូវៀត។ រដ្ឋមន្ត្រីការពារជាតិប៉ាគីស្ថាន លោក Khawaja Muhammad Asif បានកែតម្រូវព័ត៌មានឡើងវិញថាមិនមានទាហានឥណ្ឌាណាម្នាក់ត្រូវបានចាប់ខ្លួនជាឈ្លើយសឹកនោះទេ។
ប្រតិកម្មពីអន្តរជាតិ៖ UN និងបណ្ដាប្រទេសជាច្រើនបានអំពាវនាវឱ្យឥណ្ឌា និងប៉ាគីស្ថានរក្សាការអត់ធ្មត់ជាអតិបរមា និងបញ្ចៀសកុំឱ្យជម្លោះរាលដាលកាន់តែធំដែលអាចនឹងគំរាមកំហែងដល់សន្តិភាពតំបន់ និងអន្តរជាតិ។
គួរបញ្ជាក់ថា ការវាយប្រហាររបស់ឥណ្ឌាលើប៉ាគីស្ថាន កើតមានឡើងបន្ទាប់ពីទីក្រុងញូវដែលីបានចោទថាទីក្រុងអ៉ីស្លាម៉ាបាដថាជាអ្នកគាំទ្រការវាយប្រហារសម្លាប់មនុស្ស ២៦នាក់ ដែលភាគច្រើន លើសលុបជាភ្ញៀវទេសចរឥណ្ឌា នៅក្នុងតំបន់កាស្មៀរប៉ែកគ្រប់គ្រងដោយឥណ្ឌា កាលពីថ្ងៃទី២២ ខែមេសា។ ប៉ុន្តែប៉ាគីស្ថានបានច្រានចោលការចោទប្រកាន់នេះ៕
