តៃវ៉ាន់ និងអាមេរិកប្រកាសផ្តល់ជំនួយនិងគាំទ្រប្រជាជនហុងកុង ក្រោយចិន ស្នើដាក់ច្បាប់សន្តិសុខជាតិ
21-May-2026 / ព័ត៌មានអន្តរជាតិ
ចិនហុងកុង៖ប្រធានាធិបតីតៃវ៉ាន់ អ្នកស្រី Tsai Ing-wen បាននិយាយថា កោះតៃវ៉ាន់នឹងផ្តល់ជំនួយចាំបាច់ ដល់ប្រជាជនហុងកុងក្រោយពេលមានការផ្ទុះការតវ៉ាថ្មីទៀត នៅក្នុងទីក្រុងហុងកុង ប្រឆាំងនឹងច្បាប់សន្តិសុខជាតិ ដែលស្នើដាក់ដោយរដ្ឋាភិបាលទីក្រុងប៉េកាំង។“តៃវ៉ាន់នឹងកាន់តែសកម្មខ្លាំងទៀត និងឆ្ពោះទៅមុខជាមួយនឹងកិច្ចការគាំទ្រ និងផ្តល់ជំនួយចាំបាច់ដល់ប្រជាជនហុងកុង”។
សរសេរនៅលើហ្វេសប៊ុក នៅថ្ងៃអាទិត្យទី២៤ឧសភាអ្នកស្រី Tsai Ing-wen ថា សំណើរច្បាប់នោះ មានការគំរាមកំហែងយ៉ាងធ្ងន់ធ្ងរ ដល់សេវីភាព និងភាពឯករាជ្យរបស់តុលាការនៅហុងកុង។ អ្នកស្រីនិយាយថា “ក្នុងពេលកំពុងប្រឈមនឹងស្ថានភាពផ្លាស់ប្តូរ សហគមន៍អន្តរជាតិ បានជួយយ៉ាងសកម្មដល់ប្រជាជនហុងកុង”។
តៃវ៉ាន់ បានក្លាយជាជម្រកភៀសខ្លួន សម្រាប់ប្រជាជនហុងកុង ប៉ុន្តែចំនួនជនភៀសខ្លួន មកពីហុងកុងកាន់តែកើនឡើង ចាប់តាំងពីមានការតវ៉ា នៅហុងកុងកាលពីឆ្នាំមុនមក។ប្រជាជនហុងកុងរាប់ពាន់នាក់ បានចាប់ផ្តើមធ្វើការតវ៉ានៅថ្ងៃអាទិត្យ ប្រឆាំងនឹងសំណើរច្បាប់សន្តិសុខជាតិរបស់ប៉េកាំង។ ប៉ូលិសបានបាញ់ឧស្ម័នបង្ហូរទឹកភ្នែក និងទឹកដើម្បីបំបែកក្រុមបាតុកររាប់ពាន់នាក់ ដែលប្រឆាំងតវ៉ានឹងសំណើរច្បាប់នោះ។
នៅអាមេរិកវិញកាលពីថ្ងៃទី២៤ឧសភាដែរទីប្រឹក្សាសន្តិសុខជាតិអាមេរិច លោក Robert O’Brien បានធ្វើការព្រមានសារជាថ្មីទៀតថា អាមេរិចអាចនឹងដកសិទ្ធិពាណិជ្ជកម្មពិសេសចេញពីទីក្រុងហុងកុង ប្រសិនជាចិនអនុម័តច្បាប់សន្តិសុខថ្មី ដើម្បីគ្រប់គ្រងហុងកុង។ការព្រមាននេះ ក៏កើតឡើងតែប៉ុន្មានម៉ោងប៉ុណ្ណោះ ក្រោយពេលរដ្ឋមន្ត្រីការបរទេសចិន Wang Yi បានព្រមានថា ចិន និងអាមេរិច ហាក់ស្ថិតនៅមាត់ច្រាំងនៃសង្គ្រាមត្រជាក់។
លោក Robert O’Brien បានថ្លែងប្រាប់សារពត៌មាន CBSថា “វាហាក់ដូចជាពួកគេកំពុងតែរំលោភកិច្ចព្រមព្រៀង” ដោយលោកចង់សំដៅទៅលើកិច្ចព្រមព្រៀងឆ្នាំ ១៩៨៤របស់ទីក្រុងប៉េកាំង ដែលយល់ព្រមផ្តល់ស្វ័យភាព ដល់ទីក្រុងហុងកុងរហូតដល់ឆ្នាំ ២០៤៧។“ខ្ញុំមើលមិនឃើញថា ហុងកុងនៅតែជាមជ្ឈមណ្ឌលហិរញ្ញវត្ថុអាស៊ីនោះទេ ប្រសិនជាបក្សកុម្មុយនិស្តចិន ឆ្លងកាត់ និងអនុម័តច្បាប់សន្តិសុខជាតិ និងគ្រប់គ្រងលើទីក្រុងហុងកុង។” “វានឹងក្លាយជាសោកនាដកម្ម សម្រាប់ប្រជាជនហុងកុង ហើយវាក៏មានផលអាក្រក់ផងដែរ សម្រាប់ចិន”។
ជាការឆ្លើយតបនៅថ្ងៃចន្ទទី២៥ឧសភានេះចិនថា ខ្លួននឹងចាត់វិធានការតបតប្រសិនបើសហរដ្ឋអាម៉េរិកនៅតែទទូចធ្វើឱ្យប៉ះពាល់ដល់ផលប្រយោជន៍របស់ខ្លួនទាក់ទងនឹងហុងកុង។អ្នកនាំពាក្យក្រសួងការបរទេសចិនលោក ចាវ លីចៀន បានប្រាប់ក្រុមអ្នកសារព័ត៌មានក្នុងពេលធ្វើសន្និសីទកាសែតថា សហរដ្ឋអាម៉េរិកកំពុងព្យាយាមធ្វើឱ្យប៉ះពាល់ដល់សន្តិសុខជាតិរបស់ចិនហើយថាប៉េកាំងបានបង្ហាញជំហរតឹងរ៉ឹងជាមួយតំណាងរដ្ឋាភិបាលក្រុងវ៉ាស៊ីនតុនជុំវិញការអត្ថាធិប្បាយរបស់ទីប្រឹក្សាសន្តិសុខជាតិនៃសេតវិមានលោករ៉ូបឺត អូប្រ៊ីនថា ច្បាប់សន្តិសុខសម្រាប់ទីក្រុងហុងកុងអាចនាំឱ្យមានការដាក់ទណ្ឌកម្មពីសហរដ្ឋអាម៉េរិក។
រដ្ឋាភិបាលអាម៉េរិកកាលពីល្ងាចថ្ងៃសុក្រទី២២ឧសភាបានចោទប្រកាន់រដ្ឋាភិបាលចិនថាបានធ្វើឱ្យក្រុមហ៊ុនអាកាសចរណ៍អាម៉េរិកទាំងអស់មិនអាចបន្តសេវាកម្មទៅប្រទេសចិនបាន។តែចិនថាខ្លួនប្រឆាំងរាល់ការរឹតត្បិតរបស់សហរដ្ឋអាម៉េរិកចំពោះបណ្តាក្រុមហ៊ុនអាកាសចរណ៍ចិន ដោយឆ្លើយតបនឹងរបាយការណ៍ថា ក្រសួងដឹកជញ្ជូនអាម៉េរិកបានទាមទារឱ្យក្រុមហ៊ុនអាកាសចរណ៍ចិនទាំងអស់ដាក់ជូនឯកសារស្តីពីកាលវិភាគហោះហើរនិងព័ត៌មានលម្អិតនៃការហោះហើរផ្សេងទៀតនៅថ្ងៃទី ២៧ ខែឧសភា។
អ្នកនាំពាក្យក្រសួងការបរទេសចិនលោកចូ លីចៀននិយាយថាការរឹតបន្តឹងជើងហោះហើរដែលបានដាក់ចេញដោយរបបក្រុងប៉េកាំងគឺអនុវត្តលើក្រុមហ៊ុនអាកាសចរណ៍ទាំងអស់ស្មើគ្នាៗហើយធ្វើឡើងដោយសារតែកិច្ចខិតខំប្រឹងប្រែងដើម្បីទប់ស្កាត់ហានិភ័យទាក់ទងទៅនឹងកូវីដ១៩។សូមបញ្ជាក់ថា ទីក្រុងហុងកុង ត្រូវបានអង់គ្លេស ប្រគល់ទៅឲ្យចិនវិញក្នុងឆ្នាំ ១៩៩៧ ក្រោមកិច្ចព្រមព្រៀងផ្តល់ស្វ័យភាព និងសិទ្ធិសេរីភាព ដល់ទីក្រុងនេះសម្រាប់រយៈពេល ៥០ឆ្នាំ។ ការទទួលបានសិទ្ធិស្វ័យភាពពិសេស របស់ទីក្រុងហុងកុង ក៏មានចែងក្នុងច្បាប់អាមេរិចដែរ៕
