សមាគមឧកញ៉ាកម្ពុជា ស្នើអ្នកមានគោរមងារឧកញ៉ា ប្រកាន់ខ្ជាប់នូវកិត្តិយស សីលធម៌ សុជីវធម៌ បន្ទាប់ពីឿកញ៉ាជាមន្ត្រីយោធាម្នាក់បង្កើតរឿង
06-August-2026 / ព័ត៌មានជាតិ
ភ្នំពេញ៖ សមាគមឧកញ៉ាកម្ពុជា អំពាវនាវអ្នកដែលទទួលបានគោរមងារឧកញ៉ាទាំងអស់ ប្រកាន់ខ្ជាប់នូវកិត្តិយស សីលធម៌ សុជីវធម៌ និងសេចក្ដីថ្លៃថ្នូរនៅក្នុងសង្គម ក្នុងការប្រកបមុខរបរនិងវិជ្ជាជីវៈឱ្យបានខ្ជាប់ខ្ជួន និងសូមមេត្តាយកចិត្តទុកដាក់ឱ្យបានខ្ពស់ជាទីបំផុត ចំពោះការប្រើប្រាស់បណ្តាញសង្គម ឬមធ្យោបាយផ្សព្វផ្សាយនានា ជៀសវាងចែកចាយ ឬផ្សព្វផ្សាយនូវសកម្មភាព និង/ឬការប្រើពាក្យសម្ដីទាំងឡាយណា ដែលធ្វើឱ្យប៉ះពាល់ដល់ងារជាកិត្តិយស ដែល អង្គព្រះមហាក្សត្រ បានព្រះរាជទាន។
តាមរយៈ សេចក្តីប្រកាសព័ត៌មានរបស់ សមាគមឧកញ៉ាកម្ពុជាបានបញ្ជាក់ថាសមាគម នឹងចាត់វិធានការតាមនីតិវិធីច្បាប់ជាក់ស្តែង ចំពោះគោរមវន្តណា ដែលបានរកឃើញថាបានប្រព្រឹត្តសកម្មភាព និង/ឬប្រើពាក្យសម្តីទាំងឡាយណា ដែលធ្វើឱ្យប៉ះពាល់ដល់គុណតម្លៃ និងឧត្ដមភាពដ៏ឧត្ដុង្គឧត្ដម នៃគោរមងារឧកញ៉ា ស្របតាមព្រះរាជក្រឹត្យ និងអនុក្រឹត្យខាងលើ។តាមសេចក្តីប្រកាសព័ត៌មានក៏បានបញ្ជាក់ផងដែរថា សមាគមឧកញ៉ាកម្ពុជា គឺជាស្ថាប័នតែមួយគត់ ដែលតំណាងឱ្យគោរមវន្តទាំងអស់នៅក្នុងព្រះរាជាណាចក្រកម្ពុជា និងបានចែងអំពីតួនាទី ភារកិច្ច ព្រមទាំងសិទ្ធិនិងកាតព្វកិច្ចរបស់សមាគមដើម្បីរក្សានិងលើកកម្ពស់គុណតម្លៃ និងឧត្ដមភាពដ៏ឧត្ដុង្គឧត្ដម នៃគោរមងារឧកញ៉ា ដែលជាព្រះរាជទានដ៏ខ្ពង់ខ្ពស់បំផុតរបស់ ព្រះមហាក្សត្រ នៃព្រះរាជាណាចក្រកម្ពុជា ។
សូមបញ្ជាក់ថានៅរាត្រីថ្ងៃទី០១ ខែមេសា ឆ្នាំ២០២៥នេះ ក្រសួងការពារជាតិ ចេញសេចក្តីជូនដំណឹងមួយ ពាក់ព័ន្ធបុគ្គលឈ្មោះ ឈាវ មុន្និន មានឋានន្តរស័ក្តិថ្នាក់ឧត្តមសេនីយ៍ត្រី នៃក្រសួងការពារជាតិ បន្ទាប់ពីនាយទាហ៊ានវ័យក្មេងរូបបង្ហោះវិដេអូលើបណ្តាញ TikTok ធ្វើឲ្យប៉ះពាល់កិត្តិយស សេចក្តីថ្លៃថ្នូរ របស់ក្រសួងការពារជាតិ និងកងយោធពលខេមរភូមិន្ទទាំងមូល។តាមសេចក្តីប្រកាសពត៍មានលោកនាយឧត្ដមសេនីយ៍ ទៀ សីហា ឧបនាយករដ្ឋមន្តី រដ្ឋមន្តីក្រសួងការពារជាតិ បានសម្រេចចាត់តាំងឱ្យអង្គភាពជំនាញរៀបចំបង្កើតក្រុមប្រឹក្សាវិន័យ ក្នុងគោលបំណងធ្វើការពិនិត្យ និងវាយតម្លៃនូវរាល់ទង្វើទាំងឡាយដែលបុគ្គលខាងលើនេះបានប្រព្រឹត្តខុសឆ្គង ដើម្បីដាក់ទណ្ឌកម្មឱ្យស្របទៅនឹងច្បាប់ ស្តីពីលក្ខន្តិកៈទូទៅចំពោះយោធិន នៃកងយោធពលខេមរភូមិន្ទ។
ឈ្មោះ ឈាវ មុន្និនដែលមានឋានន្តរស័ក្តិថ្នាក់ឧត្តមសេនីយ៍ត្រី និងមានតួនាទីជានាយករងនៃនាយកដ្ឋានបច្ចេកទេសកងទ័ពជើងអាកាសនៃអគ្គនាយកដ្ឋានសម្ភារៈបច្ចេកទេស។ ត្រូវបានគេនិយាយថាមានគោរម្យងារជាឧកញ៉ាផងដែរដែលប្រកានេះគឺជាការរំលោភច្បាប់។ព្រះរាជក្រឹតចុះថ្ងៃទី២៣ តុលា ឆ្នាំ២០២៤ បានកំណត់ថា មន្ត្រីនគរបាល និងយោធិននៅតាមក្រសួង ស្ថាប័ននានារបស់រដ្ឋត្រូវស្នើសុំលាឈប់ប្រើប្រាស់គោរមងារឧកញ៉ា ឬ លាឈប់ពីក្របខណ្ឌរដ្ឋដោយមិនអាចមានតួនាទីពីរក្នុងពេលតែមួយឡើយ។ តែព្រះរាជក្រឹត្យបានលើកលែងតែបុគ្គលណាដែលមានចំណេះជំនាញពិសេសលើវិស័យណាមួយ និងមានការទទួលស្គាល់ជាផ្លូវការពីស្ថាប័នមានសមត្ថកិច្ចជាតិ ឬអន្តរជាតិ។
បុគ្គល ឈាវ មុន្និនដែលមានឋានន្តរស័ក្តថ្នាក់ឧត្តមសេនីយ៍ត្រី និងពាក់ផ្កាយ១ ក៏មានងារជាឧកញ៉ាដែរនោះ បានបង្ហោះវីដេអូលើបណ្តាញសង្គម Tik Tok ដោយអង្គុយក្នុងការិយាល័យរាប់លុយ និងច្រៀងរាំយ៉ាងសប្បាយ។ ទង្វើនេះត្រូវបានបណ្តាអ្នកប្រើប្រាស់បណ្តាញសង្គមយកទៅចែកចាយ និងរិះគន់ដោយមិនសំចៃមាត់។ គឺវីដេអូលើបណ្តាញសង្គមនេះហើយដែលត្រូវបានអ្នកប្រើប្រាស់បណ្តាញសង្គមរិះគន់ថា ជាការធ្វើតាមទំនើងចិត្ត ប្រមាថដល់ក្រមវិន័យរដ្ឋបាលក្នុងនាមជាខ្លួនជាយោធាការពារជាតិ។តាមរដ្ឋមន្ត្រីការពារជាតិ បុគ្គលខាងលើនឹងប្រឈមទណ្ឌកម្មទៅតាមច្បាប់លក្ខន្តិកៈទូទៅចំពោះយោធិននៃកងយោធពលខេមរភូមិន្ទ។ ចាំមើលមើលតើគេដោះស្រាយរបៀបម៉េច?។
