ការទន្ទ្រានដីព្រៃលិចទឹកទន្លេសាបក្នុងខេត្តបាត់ដំបងចាប់មនុស្សបាន៨នាក់
11-February-2026 / ព័ត៌មានជាតិ
បាត់ដំបង៖ក្រោយពីមានបទបញ្ជារបស់សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជានៅថ្ងៃទី២៩វិច្ឆិកាកម្លាំងគណៈបញ្ជាការឯកភាពខេត្តបាត់ដំបង បានឃាត់ខ្លួនមនុស្សចំនួន៨នាក់ ដើម្បីយកមកធ្វើការសួរនាំ ពាក់ព័ន្ធបទល្មើសកាប់ទន្ទ្រានដី ព្រៃលិចទឹក នៅខេត្តបាត់ដំបង។បើតាមរូបភាពអ្នកដែលត្រូវឃាត់ខ្លួនដូចសុទ្ធតែជាមនុស្សកំប៉ិចកំប៉ុក។
ដោយឡែកខេត្តផ្សេងៗមិនទាន់ឃើញធ្វើរាប់ទាំងអតីតអភិបាលខេត្តតំពុងឆ្នាំងផងដែរ។នៅព្រឹកថ្ងៃទី៣០ ខែវិច្ឆិកា ឆ្នាំ២០២១នេះ លោក ប៉ែន សុផល រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ ជាប្រធានក្រុមការងារចម្រុះ ទទួលបន្ទុកខេត្តបាត់ដំបង បានដឹកនាំបើកកិច្ចប្រជុំក្រុមការងារ ត្រួតពិនិត្យ និងស្រាវជ្រាវការទន្ទ្រានដីព្រៃលិចទឹកនៅតំបន់ខេត្តទាំង៦ ជាប់បឹងទន្លេសាប ពិសេសខេត្តបាត់ដំបង ជាមួយរដ្ឋបាលខេត្ត ដឹកនាំដោយលោក សុខ លូ នៅសាលាខេត្តបាត់ដំបង ។
លោក តេង គឹមស៊ាន នាយករងរដ្ឋបាលខេត្តបាត់ដំបង បានរាយការណ៍ថា តំបន់១: ជាតំបន់រស់នៅរបស់ប្រជាពលរដ្ឋ បានចុះបញ្ជីដីធ្លី និងបានផ្តល់ប័ណ្ណកម្មសិទ្ធិ ក្នុងចន្លោះពី៥ ទៅ៩គម គិតចេញពីផ្លូវជាតិលេខ៥ ។ តំបន់២: ជាតំបន់ដែលនៅចន្លោះរវាងតំបន់ ១និងតំបន់៣ បច្ចុប្បន្នប្រជាពលរដ្ឋបានចូលអាស្រ័យផលអស់ហើយ និងតំបន់៣ ជាតំបន់ព្រៃលិចទឹក និងហាមឃាត់ដាច់ខាត ប៉ុន្តែមានការចូលទន្ទ្រានជាបន្តបន្ទាប់ ទោះបីអាជ្ញាធរមានសមត្ថកិច្ចខិតខំចុះបង្ក្រាបនិងទប់ស្កាត់យ៉ាងណាក៏ដោយ។
លោកបានបញ្ជាក់ថា ស្រុកចំនួន ៤របស់ខេត្តបាត់ដំបង មានភូមិសាស្ត្រជាប់នឹងតំបន់បឹងទន្លេសាប ដែលបានរងនូវការកាប់ទន្ទ្រានដីព្រៃលិចទឹក មានស្រុកមោងប្ញស្សី ចំនួន ២.២១៤ហ.ត ស្រុកសង្កែ ចំនួន ៦.១១៤ហ.ត ស្រុកឯកភ្នំ ចំនួន ៣.០៥៣ហ.ត និងស្រុកថ្មគោល ចំនួន៨៣៨ហ.ត សរុបទាំងអស់ មានចំនួន ១២.២២១ហ.ត និងមានទីតាំងចំនួន ២៣ទីតាំង ទន្ទឹមនឹងនោះក៏មានការខូចខាតដោយភ្លើងឆេះព្រៃ សរុបចំនួន ២០.៩៤៧ ហ.តផងដែរ។
លោក ប៉ែន សុផល រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ ជាប្រធានក្រុមការងារចម្រុះទទួលបន្ទុកខេត្តបាត់ដំបង បានបញ្ជាក់ថា យោងតាមអនុសាស្ត្ររបស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា និងអនុវត្តតាមសេចក្តីសម្រេចរបស់លោក ជា សុផារ៉ា ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ធ្វើការបែងចែកក្រុមការងារចំនួន៦ក្រុម ចុះត្រួតពិនិត្យការងារនៅលើដីព្រៃលិចទឹកហាមឃាត់ខេត្តជុំវិញបឹងទន្លេសាប ពិសេសខេត្តបាត់ដំបង។
លោក ប៉ែន សុផល បានរំលឹកផងដែរ អំពីការបោះបង្គោលនៅតាមបន្ទាត់គោលដៅកន្លងមក ខាងជលផលបានសំណើរសុំបោះបង្គោលកម្ពស់៨ម៉ែត្រ ចៀសវាងច្រឡំថា ជាបង្គោលប្រជាពលរដ្ខបានបោះ។ លោកបានបន្តថា យោងតាមអនុសាសន៍ ឧបនាយករដ្ឋមន្ដ្រី ជា សុផារ៉ា បានណែនាំធ្វើឲ្យបានច្បាស់គឺ៖
*ទី១៖ ក្រុមការងារចម្រុះត្រូវកំណត់យាមការឲ្យបានច្បាស់លាស់*ទី២៖ រកឲ្យឃើញថា ដីទន្ទ្រានទាំងនេះជារបស់អ្នកណា ឬអ្នកនៅពីក្រោយស្គាល់ឲ្យបានច្បាស់លាស់*ទី៣៖ ក្រសួង មន្ទីរពាក់ព័ន្ឋ សូមធ្វើទិន្ន័យឲ្យមានការឯកភាពគ្នាតែមួយ*ទី៤៖ ត្រូវដាំដើមឈើឡើងវិញតាមចំណុចគោលដៅ ឬព្រំប្រទល់ដីលិចទឹកជាដើម។បន្ទាប់ពីកិច្ចប្រជុំបានបញ្ចប់មក ក្រុមការងារចម្រុះ បានបន្តចុះទៅពិនិត្យកន្លែងគោលដៅជាក់ស្តែង ដើម្បីសិក្សាវាយតម្លៃនិងរាយការណ៍ជូនថ្នាក់លើ សម្រាប់មានវិធានការចាត់ការតាមនីតិវិធីបន្តទៀត៕
