ប្រជាពលរដ្ឋតវ៉ាសុំនាយករដ្ឋមន្ត្រីជួយករណីយ៍ក្រុមហ៊ុនឧកញ៉ាអ៊ឹងប៊ុនហូវរំលោភយកដី!
27-March-2024 / ព័ត៌មានជាតិ
ភ្នំពេញៈ ពលរដ្ឋប្រមាណ ២០០ នាក់តំណាងឱ្យ ៣៥០ គ្រួសាររស់នៅភូមិអូរជ្រៅ សង្កាត់ដើមមៀន ក្រុងតាខ្មៅ ខេត្តកណ្តាលបានស្នើលោកនាយករដ្ឋមន្ត្រី ហ៊ុន សែន ជួយអន្តរាគមន៍ក្នុងជម្លោះដីបឹងសហគមន៍ជាង ៧ ហិកតាជាមួយក្រុមហ៊ុនឧកញ៉ាអ៊ឹងប៊ុនហូវ ដែលពួកគាត់បានចោទថាបានរំលោភដីយកធ្វើជាកម្មសិទ្ធិផ្ទាល់ខ្លួន។
ក្រុមពលរដ្ឋទាំងនោះបានប្រមូលផ្តុំគ្នានៅជិតដីបឹងមានជម្លោះពីថ្ងៃទី ១២ ធ្នូ តាមបណ្តោយមហាវិថីសម្តេចតេជោ ហ៊ុន សែន ឬហៅថាផ្លូវ ៦០ ម៉ែត្រ ដោយបានលើកបដា និងស្នើលោកនាយករដ្ឋមន្ត្រី ហ៊ុន សែន អន្តរាគមន៍ជម្លោះដីធ្លីដែលបានអូសបន្លាយច្រើនឆ្នាំមកនេះ។លោក អឿន សំអូន តំណាងពលរដ្ឋបានថ្លែងថា ដីបឹងជីភោគៈដែលមានទំហំ ៧៤ ១៥៣ ម៉ែត្រការ៉េ ត្រូវបានពលរដ្ឋធ្លាប់គ្រប់គ្រង និងអាស្រ័យផលតាំងពីឆ្នាំ ១៩៧០-១៩៨០ មកម្ល៉េះដោយបានដាំត្រកួន កញ្ឆែត និងដាំដំណាំផ្សេងទៀត ដើម្បីលក់ផ្គត់ផ្គង់ជីវភាពគ្រួសារ។ លោកបន្តថា ក្រោយមកក្រុមហ៊ុន ING Holding បានដើរទិញដីនៅក្បែរបឹងនោះ ប៉ុន្តែបែរជាបោះបង្គោលហ៊ុមព័ទ្ធរំលោភយកដីបឹងជីភោទំហំជាង ៧ ហិកតាប៉ះពាល់ដល់ជីវភាពពលរដ្ឋ។
លោកថា៖ «ក្រុមហ៊ុន ING គាត់រំលោភយកតែម្តងនៅថ្ងៃទី ៩ ខែមករា ឆ្នាំ ២០១៦ ក្រុមហ៊ុននេះបានអះអាងថា ដីនោះគាត់បានទិញហើយ និងហាមពលរដ្ឋមិនឱ្យរកត្រី ដាំដំណាំ ហើយគាត់លួចបន្ដចាក់ដីទាំងយប់»។ក្នុងនាមជាជនរងគ្រោះ លោក សំអូន ស្នើសម្តេចនាយករដ្ឋមន្ត្រី ហ៊ុន សែន ថា៖ «យើងមិនដឹងថា ក្រុមហ៊ុនឃុបឃិតជាមួយមន្ត្រីណាទេ ដូច្នេះយើងមានតែលើកដៃម្រាម ១០ ស្នើសម្តេចតេជោ ហ៊ុន សែន ជួយពលរដ្ឋ ដើម្បីឱ្យបានដីបឹងនេះមកវិញសម្រាប់អាស្រ័យផល។
បើតាម លោក សំអូន ដីបឹងនោះដំបូងឡើយ ស្ថិតនៅក្នុងខេត្តកណ្តាល ប៉ុន្តែក្រោយមកកាត់ចូលដែនដីរដ្ឋបាលរាជធានីភ្នំពេញវិញ។ទាក់ទងបញ្ហានេះលោក ឃួង ស្រេង អភិបាលរាជធានីភ្នំពេញ បានថ្លែងថា ក្នុងករណីពលរដ្ឋមិនសុខចិត្តរឿងអ្វីមួយ គួរដាក់ពាក្យទៅអាជ្ញាធរដែនសមត្ថកិច្ចនោះក្រុមការងារនឹងពិនិត្យលទ្ធភាពដោះស្រាយជូន។ «គាត់ដាក់ទៅខណ្ឌទៅគេនឹងពិនិត្យតាមឋានានុក្រម ព្រោះស្រុកយើងមានអាជ្ញាធរមាននៅគ្រប់កន្លែង បើមិនសុខចិត្តរឿងអីទៅរកអាជ្ញាធរ ប្រសិនបើមានអីដាក់តាមលិខិតស្នាមរដ្ឋបាលយើងមក យើងនឹងពិនិត្យលទ្ធភាពដោះស្រាយជូនគាត់ថា អ្នកណាខុសអ្នកណាត្រូវ ប៉ុន្តែហាមតែមួយទេគឺហាមធ្វើបាតុកម្ម កូដកម្មខុសច្បាប់»។
ប៉ុន្តែតាមលិខិតស្នើអន្តរាគមន៍បានឱ្យដឹងថា ពលរដ្ឋធ្លាប់បានដាក់ពាក្យបណ្តឹងទៅរដ្ឋបាលខេត្តកណ្តាល មន្ទីររៀបចំដែនដី នគរូបនីយកម្ម និងសំណង់ខេត្តកណ្តាល និងខុទ្ធកាល័យនាយករដ្ឋមន្ត្រី ហ៊ុន សែន ប៉ុន្តែមកទល់ពេលនេះមិនទាន់មានដំណោះស្រាយទេ។មន្ត្រីខុទ្ទកាល័យលោកនាយករដ្ឋមន្ត្រី ហ៊ុន សែន លោក គង់ ចំរើន ប្រាប់កាសែតថា លោកធ្លាប់បានបញ្ជូនពាក្យបណ្តឹងពលរដ្ឋទាំងនោះទៅក្រសួងរៀបចំដែនដី នគរូបនីយកម្ម និងសំណង់រួចហើយក្នុងឆ្នាំ ២០២០។ «យើងបានបញ្ជូនឯកសារនោះទៅក្រសួងដែនដី ហើយបណ្តឹងរបស់ប្រជាជនដែលយកមកដាក់យើងមិនហ៊ានទុកទេ យើងបញ្ជូនទៅជំនាញអស់ហើយ»។អង្គភាពយើងមិនអាចសុំការអត្ថាធិប្បាយពីក្រុមហ៊ុន ING Holding និងក្រសួងរៀបចំដែនដី នគរូបនីយកម្ម និងសំណង់បានទេ នៅថ្ងៃប្រជាពលរដ្ឋតវ៉ាបានទេ។
