ឯកអគ្គរដ្ឋទូតកូរ៉េខាងជើងជួបនាយករដ្ឋមន្ត្រី កោតសរសើរពីការរីកចម្រើនរបស់កម្ពុជា
ភ្នំពេញ៖ ព្រឹកថ្ងៃទី២០ ខែសីហា ឆ្នាំ២០២៤នេះលោក Jang Yun Gon ឯកអគ្គរដ្ឋទូតនៃសាធារណរដ្ឋប្រជាមានិតប្រជាធិបតេយ្យកូរ៉េប្រចាំកម្ពុជា បានថ្លែងកោតសរសើរពីការរីកចម្រើនយ៉ាងឆាប់រហ័ស និងសមិទ្ធផលជាច្រើនរបស់កម្ពុជា រួមទាំងការរក្សាបាននូវសុខសន្ដិភាព និងស្ថិរភាព ក្រោមការដឹកនាំរបស់សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា។
នាឱកាសដែលសម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានអនុញ្ញាតឱ្យលោកចូលជួបសម្តែងការគួរសម និងពិភាក្សាការងារនៅវិមានសន្តិភាព លោក Jang Yun Gon ក៏បានរំឮកពីទំនាក់ទំនងដ៏យូរអង្វែងរវាង សាធារណរដ្ឋប្រជាមានិតប្រជាធិបតេយ្យកូរ៉េ និងព្រះរាជាណាចក្រកម្ពុជា ដែលបានពូនជ្រុំដោយ លោក គីម អ៊ីលស៊ុង និង សម្ដេចព្រះបរមរតកោដ្ឋ សម្តេចព្រះនរោត្ដម សីហនុ។
លោក Jang Yun Gon បានបញ្ជាក់ទៀតថា ឆ្នាំនេះគឺជាខួបលើកទី៦០ នៃការបង្កើតទំនាក់ទំនងការទូតរវាងប្រទេសទាំងពីរ ដោយលោកឯកអគ្គរដ្ឋទូត បានប្តេជ្ញាចិត្តក្នុងការពង្រឹង និងពង្រីកកិច្ចសហប្រតិបត្តិការរវាងប្រទេសទាំងពីរបន្ថែមទៀត។
សម្តេចធិបតី ហ៊ុន ម៉ាណែត បានអរគុណ និងវាយតម្លៃខ្ពស់ចំពោះតួនាទីរបស់ លោកឯកអគ្គរដ្ឋទូត ក្នុងការរក្សាទំនាក់ទំនង និងកិច្ចសហប្រតិបត្តិការរវាងប្រទេសទាំងពីរ ព្រមទាំងបានលើកទឹកចិត្តលោកឯកអគ្គរដ្ឋទូត ឱ្យបន្តធ្វើការងារជាមួយនឹងក្រសួង-ស្ថាប័នពាក់ព័ន្ធរបស់កម្ពុជា ជាពិសេសក្រសួងការបរទេស និងសហប្រតិបត្តិការអន្តរជាតិ។សូមបញ្ជាក់ថាកម្ពុជាជាសម្ព័ន្ធមិត្តចំណាស់ជាងគេមួយរបស់កូរ៉េខាងជើងក្នុងចំណោមរដ្ឋនៅតំបន់អាស៊ីអាគ្នេយ៍។ ប្រទេសទាំងពីរមានទំនាក់ទំនងល្អតាំងពីសម័យសង្គមរាស្ត្រនិយមរហូតមកទល់បច្ចុប្បន្ន។ ប៉ុន្តែការបន្តកើនឡើងនៃកិច្ចប្រតិបត្តិការរវាងរដ្ឋាភិបាលកម្ពុជាបច្ចុប្បន្ននិងកូរ៉េខាងត្បូង អាចនឹងធ្វើឲ្យសម្ព័ន្ធមិត្តចាស់កាន់តែឃ្លាតឆ្ងាយគ្នាក៏ថាបាន។
កម្ពុជាចាប់ផ្តើមចងស្ពានការទូតជាមួយរបបដឹកនាំក្រុងព្យុងយ៉ាងចន្លោះឆ្នាំ១៩៦៥ ក្រោយសម្តេចនរោត្តមសីហនុ ស្គាល់លោក គីម អ៊ីលស៊ុង ប្រមុខរដ្ឋកូរ៉េខាងជើង ក្នុងឱកាសកិច្ចប្រជុំប្រទេសមិនចូលបក្សសម្ព័ន្ធ។ ការស្គាល់គ្នានេះផ្តើមចេញពីជួយណែនាំរបស់ប្រធានាធិបតីឥណ្ឌូនេស៊ីលោក ស៊ូ កាណូផងដែរ។
តាំងពីពេលនោះមកមិត្តភាពរវាងប្រទេស និងមេដឹកនាំទាំងពីរកាន់តែប្រសើរឡើងរហូតកា្លយជាសម្ព័ន្ធមិត្ត។ កាលនោះដែរ សម្តេចព្រះបរមរតនកោដ្ឋធ្លាប់សន្យាជាមួយលោក គីម អ៊ីលស៊ុង ដែលជាជីតាលោក គីម ជុងអ៊ុនថា ដរាបណាទ្រង់នៅមានព្រះជន្ម កម្ពុជានឹងមិនទទួលស្គាល់កូរ៉េខាងត្បូងឡើយ។ ប៉ុន្តែក្នុងឆ្នាំ ១៩៧០ ក្រោយមានរដ្ឋប្រហារទម្លាក់សម្តេចសីហនុ របបគាំទ្រដោយអាមេរិក លន់ ណុល បានចាប់ផ្តើមប្រកាសទទួលស្គាល់កូរ៉េខាងត្បូង តែ៥ឆ្នាំក្រោយមកទំនាក់ទំនងនេះក៏ត្រូវកាត់ផ្តាច់ម្តងទៀតដោយសាររបបខ្មែរក្រហមដណ្តើមបានទីក្រុងភ្នំពេញ។ ប៉ុន្តែសម្តេចសីហនុ នៅតែអាចរក្សាចំណងមិត្តភាពជាមួយមេដឹកនាំកូរ៉េខាងជើងបានល្អ ចន្លោះពីឆ្នាំ ១៩៧៩ ដល់ឆ្នាំ ១៩៩១ ដោយទ្រង់ឧស្សាហ៍យាងទៅទស្សនកិច្ចនៅទីក្រុងព្យុងយ៉ាងដោយទ្រង់មានព្រះរាជ្យដំណាក់ដែលសង់ដោយរដ្ឋាភិបាលក្រុងព្យុងយ៉ាងនៅទីនោះស្រាប់។
បើតាមសៀវភៅដែលនិពន្ធដោយជនជាតិអាមេរិកដែលមានចំណងជើងថា « Three Days in the Hermit Kingdom» សម្តេចសីហនុ ទ្រង់គង់នៅព្រះរាជ្យដំណាក់នៅកូរ៉េខាងជើងយ៉ាងហោចណាស់២ខែក្នុងមួយឆ្នាំ។ យ៉ាងណាក៏ដោយចុះ ទំនាក់ទំនងប្រទេសទាំងពីរហាក់មានភាពប្រែប្រួលខ្លាំងក្រោយការស្លាប់របស់លោក គីម អ៊ីលស៊ុង ក្នុងឆ្នាំ ១៩៩៤ និងការដាក់រាជ្យរបស់សម្តេចសីហនុក្នុងឆ្នាំ ២០០៤ ។ ហើយក្នុងឆ្នាំ១៩៩៧ រដ្ឋាភិបាលកម្ពុជាស្ថិតក្រោមការដឹកនាំលោក ហ៊ុនសែន បានសម្រេចស្តារចំណងការទូតជាមួយកូរ៉េខាងត្បូង ខណៈព្រះបាទសម្តេចនរោត្តម សីហនុ យាងចេញទៅក្រៅប្រទេស។ ហើយដូចដែលឃើញស្រាប់ កម្ពុជាស្និទ្ធកូរ៉េខាងត្បូងខ្លាំងនៅពេលបច្ចុប្បន្ន ទាំងវិស័យនយោបាយ សេដ្ឋកិច្ច ពាណិជ្ជកម្ម និងវប្បធម៌ អាចធ្វើឲ្យទំនាក់ទំនងរដ្ឋាភិបាលក្រុងភ្នំពេញនិងក្រុងព្យុងយ៉ាងកាន់តែរសាយ។
ទោះបីជាបច្ចុប្បន្នទំនាក់ទំនងការទូតរវាងកម្ពុជានិងកូរ៉េខាងជើងមិនស្អិតដូចមុនមែន តែអ្នកជំនាញនៅតែយល់ឃើញថា ចំណងមិត្តភាពរដ្ឋទាំងពីរនៅរឹងមាំនិងល្អប្រសើរ។ សាស្ត្រាចារ្យនៃដេប៉ាតឺម៉ងសិក្សាកូរ៉េខាងជើងនៃសកលវិទ្យាល័យកូរ៉េលោក Ho Yeol Yoo បានថ្លែងប្រាប់អ្នកសារព័ត៌មានថ្មីៗថា៖ «ទំនាក់ទំនងប្រទេសទាំងពីរកូរ៉េខាងជើងនិងកម្ពុជានៅតែល្អប្រសើរ និងរឹងមាំមកទល់បច្ចុប្បន្ន។យើងអាចថាចំណងពាណិជ្ជកម្មទ្វេភាគីអាចថាកាន់តែប្រសើរឡើងថែមទៀតនៅពេលខាងមុខ ព្រោះក្រុងព្យុងយ៉ាងកំពុងកំណែទម្រង់សេដ្ឋកិច្ច»។
«យើងឃើញស្រាប់កូរ៉េខាងជើងរកចំណូលបានច្រើនដែរពីការបើកអាជីវកម្មនៅកម្ពុជាដូចជាភោជនីយដ្ឋានជាដើម»។ លោកបានពន្យល់ផងដែរថា កូរ៉េខាងជើងបច្ចុប្បន្នកំពុងតែព្យាយាមអនុវត្តនយោបាយកំណែទម្រង់ និងពង្រីកចំណូលតាមរយៈការបង្កើនពាណិជ្ជកម្មក្រៅប្រទេសនិងបើកផ្លូវឲ្យប្រជាជនខ្លួនទៅធ្វើការក្រៅប្រទេស។ ក្នុងឆ្នាំ ២០១៥នេះ កូរ៉េខាងជើងមានកំណើនសេដ្ឋកិច្ចមធ្យមចន្លោះពី ១ ទៅ ៧ ភាគរយ បើតាមការវាយតម្លៃរបស់ធនាគារជាតិកូរ៉េខាងត្បូង។
ជុំវិញបញ្ហាទំនាក់ទំនងសម្ព័ន្ធមិត្តទាំងពីរ កូរ៉េខាងជើងហាក់ដូចជាប្រឹងប្រែងពង្រីកចំណងពាណិជ្ជកម្ម និងបង្កើនភាពជិតស្និទ្ធជាមួយកម្ពុជាផងដែរក្នុងរយៈពេលប៉ុន្មានឆ្នាំចុងក្រោយ។ ចំណែកកម្ពុជាឯណោះវិញក៏ខិតខំពង្រឹងទំនាក់ទំនងដែលមានស្រាប់នេះដែរ។ដូចក្នុងឆ្នាំ ២០១១ អនុរដ្ឋមន្ត្រីពាណិជ្ជកម្មកូរ៉េខាងជើងលោក Ri Myong San បានដឹកនាំប្រតិភូមួយក្រុមមកទស្សនកិច្ចនៅកម្ពុជា ក្នុងគោលដៅពិភាក្សានិងឈានទៅពង្រីកចំណងសេដ្ឋកិច្ចផង។ ហើយម្យ៉ាងដើមឆ្នាំ ២០១៥ នេះកម្ពុជាបានចាត់វិធានការយ៉ាងប្រញាប់តបតាមការស្នើសុំរបស់កូរ៉េខាងជើងដើម្បីហាមប្រាមការចែកចាយវីដេអូក្រុមហ៊ុនហូលីវូដរឿង « The Interview » ដែលបង្កើតឡើងធ្វើឲ្យប៉ះពាល់កិត្តិនាមនិងប៉ះពាល់ដល់មេដឹកនាំកំពូលកូរ៉េខាងជើង គីម ជុងអ៊ុន។
ទោះបីយ៉ាងណាក្រសួងការបរទេសកម្ពុជាក្នុងនាមប្រធានអាស៊ាន នៅថ្ងៃទី៤ ខែតុលា២០២២បានអំពាវនាវដល់កូរ៉េខាងជើង ដែលបានបាញ់សាកល្បងមីស៊ីលបាលីស្ទិកចម្ងាយមធ្យម ឱ្យអនុវត្តបានពេញលេញនូវរាល់សេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ (UNSC)។
