ចាប់ខ្លួនអភិបាលរដ្ឋធានីអ៊ីស្តាំប៊ុលដែលជាមនុស្សគណបក្សប្រឆាំងបង្កឲ្យមានការតវ៉ា
21-September-2026 / ព័ត៌មានអន្តរជាតិ
ប្រទេសតួគី៖លោក អ៊ីក្រេម អ៊ីម៉ាម៉ូគ្លូ (Ekrem Imamoglu) អភិបាលក្រុងអ៊ីស្តង់ប៊ូល រួមទាំងសហការីលោក សមាជិកសភា និងសមាជិកគណបក្សប្រឆាំងតួកគីសរុបជាង១០០នាក់ទៀត ត្រូវបាននគរបាលតួកគីចុះទៅចាប់ខ្លួន នៅព្រឹកថ្ងៃពុធទី១៩មីនា។ដៃចងក្រវ៉ាត់កបណ្តើរ លោក អ៊ីក្រេម អ៊ីម៉ាម៉ូគ្លូ បានថតវីដេអូ Live ប្រាប់ទៅកាន់ប្រជាជនតួកគី ខណៈពេលដែលសមត្ថកិច្ចកំពុងឡោមព័ទ្ធផ្ទះហើយសំរុកចូលមកចាប់រូបលោកដល់គេហដ្ឋាន។ លោកបានអះអាងថា ក្រុមនគរបានបានចុះមកឆែកឆេ រឹបអូសឯកសារ និងចាប់ខ្លួនលោកដល់ក្នុងផ្ទះ។ ផ្អែកតាមភរិយារបស់លោក អ៊ីក្រេម អ៊ីម៉ាម៉ូគ្លូ គឺនគរបាលបាននាំខ្លួនលោកចេញទៅ នៅម៉ោងប្រមាណ៧និង៣០នាទីព្រឹក។
ផ្អែកតាមលិខិតប្រកាសរបស់ការិយាល័យរដ្ឋអាជ្ញាអ៊ីស្តង់ប៊ូល គឺលោក អ៊ីក្រេម អ៊ីម៉ាម៉ូគ្លូ ត្រូវជាប់ចោទពីបទពុករលួយ និងជំរិតទារប្រាក់ដោយខុសច្បាប់។ រដ្ឋអាជ្ញាអ៊ីស្តង់ប៊ូល អះអាងថា លោកអភិបាលក្រុងអ៊ីស្តង់ប៊ូលរូបនេះ គឺជាមេក្លោងនៃបណ្តាញឧក្រិដ្ឋកម្មរកស៊ីចំណេញប្រាក់។ ទីភ្នាក់ងារព័ត៌មាន Anadolu របស់រដ្ឋតួកគីវិញ បានផ្សាយថា លោក អ៊ីក្រេម អ៊ីម៉ាម៉ូគ្លូ ស្ថិតក្នុងចំណោមមនុស្ស៧នាក់ ដែលជាប់ចោទពីបទ “ភេរវកម្ម” និង ជួយក្រុមក្រុមគណបក្សពលករកួកឌីស្ថាន (PKK) ហើយដែលរដ្ឋតួកគីចាត់ទុកថាជាបណ្តាញភេរវកម្ម។
គណបក្សសាធារណរដ្ឋនៃប្រជាជន ហៅកាត់ថា CHP ដែលជាបក្សប្រឆាំងធំបំផុតនៅតួកគី បានចេញមុខបរិហាភ្លាមៗ ថាការចាប់ខ្លួនលោកអភិបាលក្រុងអ៊ីស្តង់ប៊ូល អ៊ីក្រេម អ៊ីម៉ាម៉ូគ្លូ វាគឺជារឿងនយោបាយសុទ្ធសាធ។
ក្រោយដំណឹងនៃការចាប់ខ្លួនលោក អ៊ីក្រេម អ៊ីម៉ាម៉ូគ្លូ ប្រជាជនតួកគីអ្នកក្រុងអ៊ីស្តង់ប៊ូល បាននាំគ្នាចុះផ្លូវជួបជុំគ្នាធ្វើបាតុកម្ម ដើម្បីបរិហារអំពីទំនោរផ្តាច់ការរបស់លោក អ៊ែរដូហ្កាន់ រួមនឹងបក្សពួកនៅក្នុងគណបក្ស AKP របស់លោក។ បើទោះបីជាមានការយាមសន្តិសុខយ៉ាងរឹងមាំពីកម្លាំងសមត្ថកិច្ច ប្រជាជនតួកគីមានចាស់មានក្មេងបានសំរុកចូលទៅកៀកនឹងខាងមុខអគ្គបញ្ជាការដ្ឋាននគរបាលក្រុងអ៊ីស្តង់ប៊ូល ហើយបាននាំគ្នាស្រែកឲ្យដោះលែងលោក អ៊ីក្រេម អ៊ីម៉ាម៉ូគ្លូ និងទាមទារឲ្យរដ្ឋាភិបាលផ្តាច់ការរបស់លោកអ៊ែរដូហ្កាន់ ត្រូវតែចុះចេញពីអំណាច។
សូមបញ្ជាក់ថា លោកអភិបាលក្រុងអ៊ីស្តង់ប៊ូល អ៊ីក្រេម អ៊ីម៉ាម៉ូគ្លូ វ័យ៥៣ឆ្នាំ គឺជាអ្នកនយោបាយដ៏មានប្រជាប្រិយភាពរបស់គណបក្សប្រឆាំង គឺបក្សសាធារណរដ្ឋនៃប្រជាជន ហៅកាត់ថា CHP។ តាមការគ្រោងទុក នៅថ្ងៃអាទិត្យទី២៣មីនា សមាជិកបក្សនេះនឹងរៀបចំធ្វើសមាជបោះឆ្នោតតែងតាំងលោក ធ្វើជាបេក្ខជនប្រធានាធិបតី សម្រាប់ការបោះឆ្នោតនៅឆ្នាំ២០២៨។ អស់ជាច្រើនសប្តាហ៍មកហើយ ដែលលោក អ៊ីក្រេម អ៊ីម៉ាម៉ូគ្លូ បានបរិហារថាបក្សកាន់អំណាចបានប្រើប្រាស់ប្រព័ន្ធតុលាការ ប្រឌិតបទចោប្រកាន់នានា ដើម្បីរារាំងរូបលោកមិនឲ្យឈរឈ្មោះ។
លោក Berk Esen សាស្ត្រាចារ្យនយោបាយនៅសកលវិទ្យាល័យSabanci ក្រុងអ៊ីស្តង់ប៊ូល បានលើកឡើងថា អ្វីដែលបានកើតឡើងនៅព្រឹកថ្ងៃទី១៩មីនា វាគឺជាការធ្វើរដ្ឋប្រហារនយោបាយយ៉ាងច្បាស់នឹងភ្នែក។ លោកបន្ថែមថា ការចាប់ខ្លួនអ្នកនយោបាយបាយប្រឆាំង និងដែលជាបេក្ខជនឈរឈ្មោះបោះឆ្នោតប្រធានាធិបតី វាគឺជាទង្វើរុញច្រានប្រទេសតួកគី ឲ្យធ្លាក់ចូលទៅក្នុងរណ្តៅនៃរបបផ្តាច់ការ ដូចនៅវ៉េណេស៊ុយអេឡា បេឡារុស និងនៅរុស្ស៊ី៕
គួរបញ្ជាក់ថា លោក Imamoglu គឺជាសមាជិកនៃគណបក្សប្រជាជនសាធារណៈ (CHP) ដែលជាគណបក្សប្រឆាំងដ៏សំខាន់នៅក្នុងប្រទេស។ លោកបានទទួលជ័យជម្នះក្នុងការបោះឆ្នោតជ្រើសរើសជាអភិបាលក្រុងអ៊ីស្តង់ប៊ុលពីរដងគឺនៅឆ្នាំ ២០១៩ ដោយបានបញ្ចប់ការគ្រប់គ្រងជាយូរមកហើយរបស់គណបក្សយុត្តិធម៌ និងអភិវឌ្ឍន៍ (AKP) របស់ប្រធានាធិបតី Erdogan នៅក្នុងទីក្រុងដ៏សំខាន់នេះ។ ជ័យជម្នះរបស់លោកត្រូវបានគេមើលឃើញថា ជាការបរាជ័យដ៏សំខាន់មួយសម្រាប់លោក Erdogan និងគណបក្ស AKP របស់លោក។ ចាប់តាំងពីនោះមក លោក Imamoglu បានក្លាយជាឥស្សរជននយោបាយដ៏លេចធ្លោមួយដែលអាចប្រកួតប្រជែងជាមួយលោក Erdogan ក្នុងការបោះឆ្នោតនាពេលអនាគត។
ករណីយ៍ស្រដៀងគ្នានេះក៏បានកើតឡើងផងដែរកាលពីប៉ុន្មានខែកន្លងមកនេះក៏ ក្រុមបាតុករជាច្រើនបាននាំគ្នាធើ្វការតវ៉ានៅតាមដងផ្លូវក្នុងទីក្រុងភាគអាគ្នេយ៍របស់ប្រទេសតួកគី ដើម្បីប្រឆាំងនឹងការដកតំណែងរបស់អភិបាលក្រុងចំនួន ៣ រូបដែលមានដើមកំណើតឃឺដឌីស្ថាន និងជាអ្នកនយោបាយក្នុងជួរគណបក្សប្រជាធិបតេយ្យនិយម ហៅកាត់ថា DEM។
ការដកតំណែងអភិបាលក្រុងទាំងបីរូបនេះ ត្រូវបានក្រសួងមហាផ្ទៃរបស់ប្រទេសតួកគីបញ្ជាក់ថា ធើ្វឡើងដោយសារតែអ្នកទាំងនេះបានធើ្វសកម្មភាពគាំទ្រដល់ចលនាប្រដាប់អាវុធរបស់គណបក្សពលករឃឺដ PKK ដែលជាអង្គការនយោបាយមួយត្រូវបានរដ្ឋាភិបាលចាត់ទុកជាក្រុមភេរវករ។ តែយ៉ាងណាក្តី ការចោទប្រកាន់នេះត្រូវបានអភិបាលក្រុងទាំងបីធើ្វការបដិសេធ។ប្រភពដដែលបានឱ្យដឹងថា តំបន់ដែលគេបានធើ្វការផ្លាស់ប្តូរអភិបាលក្រុងថ្មី រួមមានទីក្រុង Mardin, Batman និងទីក្រុង Halfeti ដោយត្រូវជំនួសមកវិញដោយរដ្ឋបាលគ្រប់គ្រងថ្មីដែលជ្រើសរើសដោយរដ្ឋាភិបាល។
ចំណាត់ការនេះ ពលរដ្ឋក្នុងតំបន់មួយចំនួនមានការមិនពេញចិត្ត និងបានប្រមូលគ្នាតវ៉ាអស់រយៈពេល ៣ថ្ងៃនៅក្នុងទីក្រុង Batman ដែលជាដែនដីរដ្ឋបាលរបស់អភិបាលក្រុងទើបត្រូវបានដកតំណែង គឺលោកស្រីហ្គូលីស្តង់ សូនុក (Gulistan Sonuk) និងបាននាំគ្នាគប់របស់របរទៅលើរថយន្តនគរបាល រហូតញ៉ាំងឱ្យសមត្ថកិច្ចប្រើប្រាស់ឡានបាញ់ទឹក និងឈានដល់ការប្រតាយប្រតប់ជាមួយក្រុមបាតុករមួយចំនួន ដើម្បីបំបែកការប្រមូលផ្តុំរបស់ពួកគេផងដែរ៕
