វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 4836 នាក់
ម្សិលមិញ 5544 នាក់
សរុប 13945933 នាក់
ប្រទេសបេឡារុស៖ប្រធានាធិបតីប្រទេសបេឡារុស លោក អាឡិចសាន់ឌឺ លូកាសេនកូ (Alexander Lukashenko) ក្នុងឱកាសទៅពិនិត្យមើល ការធ្វើសមយុទ្ធយោធាទ្រង់ទ្រាយធំជាមួយមេដឹកនាំប្រទេសរុស្ស៊ី កាលពីថ្ងៃអាទិត្យទី១២កញ្ញាបាននិយាយថា ប្រទេសរបស់លោកមានគម្រោងទិញអាវុធមានតម្លៃសរុបជាង ១ពាន់លានដុល្លាររួមទាំងប្រព័ន្ធការពារមីស៊ីល ពីទីក្រុងម៉ូស្គូ។
សមយុទ្ធយោធាបាញ់គ្រាប់ពិតរបស់យោធារុស្ស៊ីមានឈ្មោះថា «ហ្សេផេត-២០២១ (Zapad-2021)»ប្រព្រឹត្តទៅរហូតដល់ថ្ងៃព្រហស្បតិ៍សប្តាហ៍ក្រោយនៅលើទឹកដីរុស្ស៊ី និងនៅតំបន់ភាគខាងលិចប្រទេសបេឡារុស រួមទាំងទីតាំងនៅជិតព្រំដែនសហភាពអឺរ៉ុបផងនោះ ធ្វើឲ្យប្រទេសអ៊ុយក្រែន និងប្រទេសមួយចំនួននៅក្នុងសម្ព័ន្ធណាតូ (NATO) មានការព្រួយបារម្ភ។
មានការកត់សម្គាល់ថាដោយសារទំនាក់ទំនងជិតស្និទ្ធរវាងបេឡារុស និងរុស្ស៊ី បានជួយឲ្យ លោក លូកាសេនកូ ទប់ទល់បាននឹងការធ្វើបាតុកម្មទ្រង់ទ្រាយធំកាលពីឆ្នាំមុនប្រឆាំងនឹងការកាន់អំណាចរបស់ប្រធានាធិបតីរូបនេះអស់រយៈពេល ២៧ឆ្នាំក្នុងប្រទេសបេឡារុស។
ប្រទេសរុស្ស៊ីដែលបានគាំទ្រលោកលូកាសេនកូនៅពេលប្រទេសនេះប្រឈមមុខនឹងការដាក់ទណ្ឌកម្មជាបន្តបន្ទាប់ពីមហាអំណាចលោកខាងលិចដែលចោទប្រកាន់គាត់ថាបានលួចបន្លំក្នុងការបោះឆ្នោតកាលខែសីហាឆ្នាំ២០២០ និងការបង្ក្រាបក្រុមប្រឆាំង។
បណ្ដាប្រទេសជិតខាងរុស្ស៊ីដូចជាអ៊ុយក្រែន និងប្រទេសជាសមាជិកសម្ព័ន្ធណាតូ (NATO) រួមមានប៉ូឡូញ និងលីទុយអានីបានលើកឡើងថា សមយុទ្ធយោធា ដែលមានការចូលរួមពីកងទ័ព ២០ម៉ឺននាក់នៅជិតព្រំដែនរបស់ពួកគេនោះ អាចមានហានិភ័យក្លាយជាសកម្មភាពបង្កហេតុ។
ប្រធានាធិបតីរុស្ស៊ី លោក វ្ល៉ាឌីមៀ ពូទីន (Vladimir Putin) បានដិសេធថា សមយុទ្ធយោធានេះមិនសំដៅប្រឆាំងនឹងមហាអំណាចបរទេសណាមួយឡើយ និងបាននិយាយថា សមយុទ្ធនេះត្រូវបានធ្វើឡើងដោយសារមានការកើនឡើងនៃសកម្មភាពយោធារបស់សម្ព័ន្ធណាតូ (NATO) នៅជិតព្រំដែនរុស្ស៊ី និងព្រំដែនសម្ព័ន្ធមិត្តរបស់ខ្លួន៕