លោក ហ្សេលេនស្គី ថាត្រៀមខ្លួនជាស្រេច ដើម្បីដោះដូរទឹកដីគ្នា ក្នុងកិច្ចចរចាស្វែងរកសន្តិភាពរុស្ស៊ីបដិសេធ?
06-June-2026 / ព័ត៌មានអន្តរជាតិ
អ៊ុយក្រែន៖ ក្នុងកិច្ចសម្ភាសមួយ ដែលចេញផ្សាយកាលពីថ្ងៃអង្គារ ទី១១ ខែកុម្ភៈ ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី បាននិយាយថា អ៊ុយក្រែននឹងយល់ព្រម ដោះដូរទឹកដីគ្នាជាមួយរុស្ស៉ី ប្រសិនបើមានកិច្ចចរចាស្វែងរកសន្តិភាព ហើយរូបលោក បានបន្តបញ្ជាក់ថា អឺរ៉ុបតែឯងនឹងមិនអាចមានលទ្ធភាព គាំទ្រកិច្ចប្រឹងប្រែងសង្គ្រាម របស់ទីក្រុងកៀវបានទេ។
ទីភ្នាក់ងារព័ត៌មាន AFPបានឲ្យដឹងថាលោក ហ្សេលេនស្គីនិយាយថា «មានមតិលើកឡើងថា អឺរ៉ុបអាចផ្តល់ការធានាសន្តិសុខ ដោយពុំចាំបាច់មានសហរដ្ឋអាមេរិក ប៉ុន្តែខ្ញុំបដិសេធជានិច្ច ចំពោះការលើកឡើងបែបនេះ ដ្បិតការធានាសន្តិសុខដោយគ្មានអាមេរិក មិនមែនជាការធានាសន្តិសុខពិតប្រាកដនោះទេ»។លោក ហ្សេលេនស្គី បានបន្តថា រូបលោកនឹងស្នើប្រធានាធិបតីរុស្ស៉ី លោក វ្ល៉ាឌីមៀ ពូទីន ដោះដូរទឹកដី ដែលអ៊ុយក្រែនដណ្តើមកាន់កាប់បាន នៅតំបន់ Kursk ភាគខាងលិចប្រទេសរុស្ស៉ី កាលពី៦ខែមុន ប៉ុន្តែលោកមិនទាន់ច្បាស់ថា ទឹកដីអ៊ុយក្រែនមួយណា ដែលលោកនឹងស្នើជាថ្នូរត្រឡប់មកវិញ នោះឡើយ ដោយសារទឹកដីទាំងអស់សុទ្ធតែសំខាន់។
បន្ទាប់ពីមានបទសម្ភាសន៍វិមានក្រឹមឡាំង នៅថ្ងៃពុធនេះ បានចេញមកច្រានចោលយ៉ាងដាច់អហង្ការ នូវលទ្ធភាពណាមួយក្នុងការដោះដូរទឹកដីដែលខ្លួនកាន់កាប់នៅក្នុងប្រទេសអ៊ុយក្រែន សម្រាប់ផ្នែកខ្លះនៃតំបន់ Kursk របស់រុស្ស៊ី ដែលបច្ចុប្បន្នកំពុងកាន់កាប់ដោយកងកម្លាំងអ៊ុយក្រែន។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters។អ្នកនាំពាក្យវិមានក្រឹមឡាំង លោក Dmitry Peskov បានច្រានចោលសំណើនេះយ៉ាងដាច់ខាត
ដោយថ្លែងនៅក្នុងសន្និសីទសារព័ត៌មានថា «នេះមិនអាចទៅរួចទេ។ រុស្ស៊ីមិនដែលពិភាក្សាទេ ហើយនឹងមិនពិភាក្សាអំពីការដោះដូរទឹកដីរបស់ខ្លួនឡើយ»។លោក Peskov បានបញ្ជាក់បន្ថែមថា កងកម្លាំងរុស្ស៊ីនឹងបណ្តេញកងកម្លាំងអ៊ុយក្រែនចេញពីតំបន់ Kursk។គួរបញ្ជាក់ថា សព្វថ្ងៃ រុស្ស៉ីកំពុងគ្រប់គ្រងតំបន់ចំនួន៥របស់អ៊ុយក្រែន ក្នុងនោះតំបន់ឧបទ្វីបគ្រីមៀ កាលពីឆ្នាំ២០១៤ និងបន្ទាប់មក តំបន់ Donetsk, Kherson, Lugansk និង Zaporizhzhia កាលពីឆ្នាំ២០២២ ប៉ុន្តែរុស្ស៉ីមិនមានការគ្រប់គ្រងទាំងស្រុងតែម្តង លើតំបន់ទាំង៤ក្រោយនេះឡើយ។
ទាក់ទងនិងចម្លោះនេះរដ្ឋមន្ត្រីការពារជាតិអាមេរិក លោក Pete Hegseth បាននិយាយកាលពីថ្ងៃអង្គារសប្តាហ៍នេះថា រដ្ឋបាលលោកប្រធានាធិបតី ដូណាល់ ត្រាំ នឹងមិនបញ្ជូនកងទ័ពអាមេរិក ទៅកាន់អ៊ុយក្រែនឡើយ។ ទីភ្នាក់ងារសារព័ត៌មាន Reuters នៅថ្ងៃពុធ ទី១២ ខែកុម្ភៈ ឆ្នាំ ២០២៥បានឲ្យដឹងថា៖ថ្លែងទៅកាន់ក្រុមអ្នកសារព័ត៌មាន នៅក្នុងប្រទេសអាល្លឺម៉ង់ លោក Hegseth ក៏បានឱ្យដឹងដែរថា លោកនឹងជំរុញឱ្យសម្ព័ន្ធមិត្តអឺរ៉ុប បង្កើនការចំណាយលើវិស័យការពារជាតិ នៅពេលដែលលោកជួបពួកគេក្នុងសប្តាហ៍នេះ។ លោក Hegseth គូសបញ្ជាក់ថា «តំបន់អ៊ឺរ៉ុប មិនសមនឹងមានការឈ្លានពានណាមួយកើតឡើងទេ ប៉ុន្តែការវិនិយោគ ក៏គួរតែចំណាយលើវិស័យការពារជាតិឱ្យបានច្រើន ទាំងនៅក្នុងប្រទេសមួយ និងជាសមូហភាព»។
ការចេញមកបញ្ជាក់របស់លោក Hegseth បានកើតឡើង ចំពេលមានពិភាក្សាក្នុងចំណោមប្រទេសលោកខាងលិច អំពីលទ្ធភាពដាក់ពង្រាយកងកម្លាំងរក្សាសន្តិភាព ប្រសិនបើបទឈប់បាញ់មួយត្រូវបានលើកយកមកចរចា ជុំវិញសង្គ្រាមរុស្ស៉ី-អ៊ុយក្រែន៕
