រុស្ស៊ីបញ្ជុនកប៉ាល់យោធាធ្វើសមយុទ្ធជាមួយទព័ភូមាក្នុងពេលចិនក្តៅអ្នកគប់គ្រាប់បែកចូលកុងស៊ុល
22-January-2026 / ព័ត៌មានអន្តរជាតិ
ប្រទេសមីយ៉ាន់ម៉ា៖ប្រទេសចិនបានសម្តែងការថ្កោលទោសយ៉ាងខ្លាំង ចំពោះការវាយប្រហារដោយគ្រាប់បែកលើស្ថានកុងស៊ុលរបស់ខ្លួននៅទីក្រុង Mandalay ប្រទេសមីយ៉ាន់ម៉ា កាលពីថ្ងៃសុក្រទី១៨តុលាសប្តាហ៍មុន និងបានជំរុញឱ្យអាជ្ញាធរមីយ៉ាន់ម៉ាខិតខំប្រឹងប្រែងដើម្បីចាប់ខ្លួនជនល្មើស។ ទីភ្នាក់ងារសារព័ត៌មាន Reuters នៅថ្ងៃចន្ទ ទី២១ ខែតុលា ឆ្នាំ ២០២៤បានឲ្យដឹងថា៖ការវាយប្រហារនេះបានកើតឡើងក្នុងពេលដែលមានការកើនឡើង នៃអារម្មណ៍ប្រឆាំងចិននៅលើប្រព័ន្ធផ្សព្វផ្សាយសង្គមក្នុងប្រទេសមីយ៉ាន់ម៉ា បន្ទាប់ពីចិនបានដាក់សម្ពាធលើក្រុមឧទ្ទាមឱ្យបញ្ឈប់ការប្រយុទ្ធប្រឆាំងនឹងរបបយោធា។
អ្នកនាំពាក្យក្រសួងការបរទេសចិន លោក Lin Jian បានថ្លែងថា ការវាយប្រហារនេះមិនបានបណ្តាលឱ្យមានអ្នកស្លាប់ទេ ប៉ុន្តែបានបំផ្លាញផ្នែកខ្លះនៃស្ថានកុងស៊ុល។ លោក Lin បានបន្តថា ចិនបានសម្តែងការតវ៉ាយ៉ាងខ្លាំងទៅកាន់អាជ្ញាធរមីយ៉ាន់ម៉ា និងទាមទារឱ្យមានការស៊ើបអង្កេតយ៉ាងហ្មត់ចត់ និងការដាក់ទណ្ឌកម្មយ៉ាងធ្ងន់ធ្ងរទៅលើជនល្មើស។ស្ថានកុងស៊ុលចិនបានចេញការព្រមានដល់ពលរដ្ឋ អាជីវកម្ម និងក្រុមទាំងអស់របស់ខ្លួនក្នុងប្រទេសមីយ៉ាន់ម៉ា ឱ្យបង្កើនការប្រុងប្រយ័ត្នចំពោះស្ថានភាពសន្តិសុខ។
មានការកត់សម្គាល់ថាសម្ពាធរបស់ចិនលើក្រុមឧទ្ទាម និងដំណើរទស្សនកិច្ចកាលពីខែសីហារបស់រដ្ឋមន្ត្រីការបរទេសចិន លោក Wang Yi ទៅកាន់ប្រទេសមីយ៉ាន់ម៉ា ត្រូវបានគេមើលឃើញថាជាការគាំទ្រដល់របបយោធា។ នេះបានធ្វើឱ្យមានការរិះគន់ពីសំណាក់សកម្មជន និងប្រជាជនមួយចំនួននៅក្នុងប្រទេសមីយ៉ាន់ម៉ា ដែលយល់ថាចិនកំពុងរារាំងដល់ការតស៊ូដើម្បីលទ្ធិប្រជាធិបតេយ្យនៅក្នុងប្រទេស។
ជាមួយគ្នានោះដែរ នាវាយោធារុស្ស៉ីមួយក្រុម បានធ្វើដំណើរមកដល់ប្រទេសអាស៊ានមួយនេះ ដើម្បីចូលរួមការធ្វើសមយុទ្ធយោធាដែនសមុទ្រ ជាមួយកងទ័ពជើងទឹកនៃរបបសឹកមីយ៉ាន់ម៉ា។ ទីភ្នាក់ងារព័ត៌មាន AFP នាថ្ងៃចន្ទ ទី២១ ខែតុលា ឆ្នាំ២០២៤បានផ្សាយថាសារព័ត៌មាន Global New Light of Myanmar បាននិយាយថា នាវាយោធារុស្ស៉ីសរុបចំនួន៥គ្រឿង មកពីកងកម្លាំងជើងទឹករុស្ស៉ីប្រចាំតំបន់ប៉ាស៉ីហ្វិក បានធ្វើដំណើរមកដល់កំពង់ផែ Thilawa នៃទីក្រុង Yangon កាលពីថ្ងៃអាទិត្យ ទី២០ ខែតុលា ដើម្បីចូលរួមការធ្វើសមយុទ្ធសន្តិសុខដែនសមុទ្ររួមគ្នាជាលើកទី២ រវាងមីយ៉ាន់ម៉ានិងរុស្ស៉ី។សមយុទ្ធយោធា រួមមានការបាញ់គ្រាប់ពិត នៅដែនទឹក ក្នុងភាគខាងជើងសមុទ្រ Andaman ចាប់ពីថ្ងៃទី២០ ដល់ទី២៤ ខែតុលា។ កងទ័ពជើងទឹកមីយ៉ាន់ម៉ានិងរុស្ស៉ី ធ្លាប់បានរួមគ្នាធ្វើសមយុទ្ធយោធា នៅសមុទ្រ Andaman កាលពីខែវិច្ឆិកា ឆ្នាំ២០២៣។
គួរបញ្ជាក់ថា រួមជាមួយចិន រុស្ស៉ីគឺជាសម្ព័ន្ធមិត្តជិតស្និទ្ធរបស់ របបសឹកមីយ៉ាន់ម៉ា ដោយបានផ្តល់សព្វាវុធ និងការគាំទ្រផ្នែកការទូត ស្របពេលដែលយោធា ជួបការលំបាកក្នុងការបង្ក្រាប ចលនាបះបោរប្រដាប់អាវុធ ដែលប្រឆាំងនឹងការធ្វើរដ្ឋប្រហារដណ្តើមអំណាចរបស់ខ្លួន កាលពីខែកុម្ភៈ ឆ្នាំ២០២១។ ប្រមុខរដ្ឋាភិបាលយោធាមីយ៉ាន់ម៉ា លោក Min Aung Hlaing ធ្លាប់បានធ្វើដំណើរទៅប្រទេសរុស្ស៉ីប៉ុន្មានលើក ក្នុងនោះរួមមានទាំងជំនួបជាមួយ ប្រធានាធិបតីរុស្ស៉ី លោក វ្ល៉ាឌីមៀ ពូទីន កាលពីឆ្នាំ២០២២ ផងដែរ។
ក្រៅពីចិន រុស្ស៊ីជាសម្ព័ន្ធមិត្តមួយទៀត ដែលបានគាំទ្រទាំងផ្នែកកាទូត និង ផ្នែកយោធា ដល់របបសឹកភូមា។ រុស្ស៊ីបានផ្គត់ផ្គង់សព្វាវុធដល់កងទ័ពជើងអាកាសភូមា រួមមានយន្តហោះចម្បាំង ប្រភេទ Sukhoi Su-30, MiG-29 និង Yak។ រុស្ស៊ីក៏ធ្លាប់ចេញមុខគាំទ្ររបបសឹកភូមាក្នុងការរៀបចំការបោះឆ្នោតរបស់ភូមា ដែលត្រូវប្រព្រឹត្តទៅ នៅឆ្នាំ២០២៥។ ជាការតបស្នងសងគុណចំពោះរុស្ស៊ី ភូមាបានប្រកាសគាំទ្រការឈ្លានពានរបស់រុស្ស៊ី នៅអ៊ុយក្រែន។
លោក មីន អ៊ុងឡាំង បានធ្វើរដ្ឋប្រហារយោធា ឡើងកាន់អំណាចដឹកនាំប្រទេសភូមា នៅខែកុម្ភៈ ឆ្នាំ២០២១ រហូតមកពេលបច្ចុប្បន្ននេះ។ នៅដើមខែតុលានេះ ប្រភពស្និទ្ធនឹងយោធាភូមា បានប្រាប់ទីភ្នាក់ងារព័ត៌មានបារាំង AFP ថា លោក មីន អ៊ុងឡាំងគ្រោងនឹងធ្វើដំណើរទៅចិន នៅខែវិច្ឆិកា ឆ្នាំ២០២៤ ខាងមុខនេះ ដែលជាដំណើរទស្សនកិច្ចលើកទី១របស់លោកនៅប្រទេសចិន គិតចាប់តាំងពី រដ្ឋប្រហារនៅភូមា។
ទន្ទឹមនិងការធ្វើសមយុទ្ធក្រុមអ្នកជួយសង្គ្រោះបានរកឃើញសាកសពចំនួន១១នាក់ បន្ទាប់ពីទូកផ្ទុកលើសទម្ងន់ផ្ទុកមនុស្សប្រហែល៣០នាក់បានលិចនៅក្នុងសមុទ្រ Andaman ឆ្នេរសមុទ្រភាគខាងត្បូងនៃប្រទេសមីយ៉ាន់ម៉ា។ នេះបើយោងតាមការចេញការចេញផ្សាយរបស់សារព័ត៌មានក្នុងស្រុករបស់មីយ៉ាន់ម៉ាដែលដកស្រង់សម្ដីប្រជាពលរដ្ឋ។យោងតាមសង្ឃដីការបស់ព្រះសង្ឃមួយអង្គមកពីភូមិ Kyauk Kar ភាគខាងត្បូងនៃតំបន់ Tanintharyi បានមានសង្ឃដីកាថា៖ «យើងបានរកឃើញសាកសព ១០ នាក់កាលពីយប់មិញ និងមួយនៅព្រឹកនេះ»។
ទូកនេះបានដឹកមនុស្សដែលភាគច្រើនជាសិស្សកំពុងត្រឡប់មកទីក្រុង Myeik នេះបើយោងតាមព្រះសង្ឃដែលបានសុំមិនបញ្ចេញឈ្មោះ។ គាត់បានឲ្យដឹងថា «ទូកនេះបានចាកចេញពីភូមិនៅម៉ោង៩យប់ និងបានផ្ទុកលើសទម្ងន់ដែលបណ្ដាលឲ្យលិច»។ បន្ទាប់ពីការរកឃើញនេះអ្នកភូមិបានបូជាសពទាំង ១១ នាក់ ហើយក្រុមជួយសង្គ្រោះក្នុងតំបន់កំពុងស្វែងរកអ្នកបាត់ខ្លួនបន្តទៀត។ ព្រះសង្ឃអង្គនេះបានបញ្ជាក់ថា សាកសពដែលបានរកឃើញនោះមិនមែនជាសិស្សទេ។
