វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 4346 នាក់
ម្សិលមិញ 10264 នាក់
សរុប 14143528 នាក់
ជប៉ុន៖ រដ្ឋាភិបាលជប៉ុនបានប្រកាសនៅថ្ងៃចន្ទនេះ ថា នាយករដ្ឋមន្ត្រីជប៉ុន លោក ស៊ីនហ្សូ អាបេ ((Shinzo Abe) បានប្រាប់ប្រធានាធិបតីអាមេរិក លោក ដូណាល់ ត្រាំ (Donald Trump) ថា ការពង្រឹងសម្ព័ន្ធភាពរវាងប្រទេសទាំងពីរនឹងត្រូវរក្សាតទៅមុខទៀត បន្ទាប់ពី លោក អាបេ ឈប់កាន់តំណែងជានាយករដ្ឋមន្ត្រីក៏ដោយ។
រដ្ឋមន្ត្រីទីស្ដីការគណៈរដ្ឋមន្ត្រីជប៉ុន លោក យ៉ូស៊ីហ៊ីដេ ស៊ូហ្គា (Yoshihide Suga) បាននិយាយថា «លោកនាយករដ្ឋមន្ត្រី អាបេ បាននិយាយទូរស័ព្ទជាមួយប្រធានាធិបតីអាមេរិក លោក ត្រាំ នាព្រឹកថ្ងៃចន្ទនេះអស់រយៈពេលប្រហែលជា៣០នាទី ទៅលើបញ្ហានៃការចាប់ពង្រត់មនុស្សដែលធ្វើឡើងដោយកូរ៉េខាងជើង និងបញ្ហានៃការឆ្លងរាតត្បាតរបស់វីរុសកូវីដ១៩»។
ប្រទេសជប៉ុនកាលពីខែកក្កដាបានបោះជំហានឆ្ពោះទៅរកការទិញអាវុធដែលអាចវាយប្រហារប្រទេសកូរ៉េខាងជើងបន្ទាប់ពីគណៈកម្មាធិការគណបក្សកាន់អំណាចបានអនុម័តលើសំណើក្នុងការពិចារណាពីការទិញអាវុធដែលមានសមត្ថភាពវាយប្រហារបញ្ឈប់ការវាយប្រហារដែលប្រើមីស៊ីលផ្លោង។
សូមបញ្ជាក់ថាកាលពីថ្ងៃសុក្រសប្ដាហ៍មុនលោក អាបេ បានប្រកាសថា លោកបានលាលែងពីតំណែងនាយករដ្ឋមន្ត្រីដោយសារបញ្ហាសុខភាព។ លោក អាបេ មានបញ្ហាសុខភាពទាក់ទងនឹងជំងឺរលាកពោះវៀនអស់រយៈពេលជាច្រើនឆ្នាំមកហើយ ។
តាមទីភ្នាក់ងារព័ត៌មានជប៉ុន Kyodo ចេញផ្សាយថ្ងៃសៅរ៍ ទី២៩ សីហា គណបក្សសេរី ប្រជាធិបតេយ្យគ្រោងនឹងជ្រើសរើសអ្នកស្នងតំណែងពីលោកអាបេនៅរង្វង់ថ្ងៃទី១៥ កញ្ញា។ឥស្សរជនដែលចង់ឈរឈ្មោះជាបេក្ខជននាយករដ្ឋមន្ត្រីមានច្រើន ដូចជាលោកស្ហ៊ីហ្កឺរូ អ៊ីស្ហ៊ីបាមានអាយុ ៦៣ឆ្នាំដែលជាអតីតរដ្ឋមន្ត្រីការពារជាតិ លោកតារ៉ូ កូណូមានអាយុ ៥៧ឆ្នាំដែលបច្ចុប្បន្នជារដ្ឋមន្ត្រីការពារជាតិ លោកយ៉ូស្ហ៊ីហ៊ីដេ ស៊ូហ្កាមានអាយុ ៧១ឆ្នាំដែលធ្លាប់ធ្វើនាយករដ្ឋមន្ត្រីពីឆ្នាំ ២០០៦ ដល់ឆ្នាំ ២០០៧ និងលោកហ្វ៊ូមីញ៉ូ គីស្ហ៊ីដាដែលសព្វថ្ងៃជារដ្ឋមន្ត្រីក្រសួងការបរទេស។
ដោយឡែក លោកតារ៉ូ អាសូមានអាយុ ៧៩ឆ្នាំដែលបច្ចុប្បន្នជាឧបនាយករដ្ឋមន្ត្រី រដ្ឋមន្ត្រីហិរញ្ញវត្ថុ និងជាអតីតនាយករដ្ឋមន្ត្រីពីឆ្នាំ ២០០៨ ដល់ឆ្នាំ ២០០៩ បានប្រកាសថា លោកនឹងមិនឈរឈ្មោះទេ។ គួរបញ្ជាក់បន្តិចថានៅជប៉ុន បេក្ខជនដែលគណបក្សជ្រើសរើសឲ្យធ្វើជានាយរដក្ឋមន្ត្រីគឺជាប្រធានគណបក្ស។ ដូច្នេះនៅក្នុងជំហានដំបូង គឺការបោះឆ្នោតជ្រើសរើសប្រធានបក្ស ហើយបន្ទាប់មក គឺបោះឆ្នោតតែងតាំងប្រធានបក្សរូបនោះរូបឲ្យធ្វើជានាយករដ្ឋមន្ត្រីដោយផ្អែកលើសំឡេងភាគច្រើនដែលគណបក្សមាននៅក្នុងសភា។