នាយករដ្ឋមន្ត្រីរុស្ស៊ីហោះមកវៀតណាមចុះកិច្ចសហប្រតិបត្តិការនុយក្លែអែជាមួយគ្នា
21-September-2026 / ព័ត៌មានអន្តរជាតិ
ប្រទេសវៀតណម៖រដ្ឋាភិបាលវៀតណាម និងរុស្ស៊ី បានចុះអនុស្សារណៈយោគយល់គ្នា ចំនួន ៧ ផ្តោតសហការទៅលើវិស័យថាមពលនុយក្លេអ៊ែរ បច្ចេកវិទ្យា និងស្រាវជ្រាវ។ នេះបើតាមទីភ្នាក់ងារព័ត៌មានបារាំងអាអែហ្វប៉េ (AFP) ។ រីឯ ប្រព័ន្ធឃោសនារដ្ឋវៀតណាម (Bao Dien Tu Chinh Phu) ទៀតសោត គ្រាន់តែបង្ហាញថា នាយករដ្ឋមន្ត្រីរុស្ស៊ី មីខាអ៊ីល មីឈូស្ទីន និងនាយករដ្ឋមន្ត្រីវៀតណាម ហ្វាម មីញ ជីញ បានពិភាក្សាអំពីគម្រោងថាមពល និងឧស្សាហកម្ម ដែលជំរុញសន្ទុះទំនាក់ទំនងទ្វេភាគីឲ្យកាន់តែស្អិតរមួត។តែគេពុំបានទម្លាយសេចក្តីលម្អិតពីកិច្ចព្រមព្រៀងទាំងនោះឲ្យដឹងច្រើនឡើយ។
អគ្គនាយកក្រុមហ៊ុនថាមពលរុស្ស៊ី Rosatom លោក Alexeï Likhatchev បានសម្តែងចំណាប់អារម្មណ៍យ៉ាងខ្លាំងចំពោះវិស័យថាមពលបរមាណូ នៅខេត្ត និញ ថន់ (Ninh Thuận)។ និញ ថន់ ជាខេត្តភាគកណ្តាលវៀតណាម មានគម្រោងមជ្ឈមណ្ឌលថាមពលនុយក្លេអ៊ែរ និងក្បាលរ៉េអាក់ទ័រចំនួន ២ ដែលអាចផលិតអគ្គិសនីប្រមាណ ៤ ០០០ មេហ្កាវ៉ាត់។ នោះជាគម្រោងរួមគ្នារវាងក្រុមហ៊ុនរុស្ស៊ី Rosatom និងសម្ព័ន្ធក្រុមហ៊ុនជប៉ុន JINED ដែលបានផ្អាកដំណើរការ ក្នុងឆ្នាំ២០១៦ ព្រោះតែថ្លៃចំណាយខ្ពស់ពេករហូតដល់ ១៨ ពាន់លានដុល្លារឯណោះ។
អាជ្ញាធរវៀតណាមបញ្ជាក់កាលពីឆ្នាំ២០១៦ ថា«ការផ្អាកដំណើរ មិនមែនព្រោះខ្វះបច្ចេកវិទ្យាទេ តែមកពីស្ថានភាពសេដ្ឋកិច្ច»។ ក៏ប៉ុន្តែ នៅចុងឆ្នាំ២០២៤ រដ្ឋាភិបាលវៀតណាមប្រកាសបើកដំណើរការសាងសង់មជ្ឈមណ្ដលនុយក្លេអ៊ែរនោះវិញ ព្រោះតែតម្រូវការថាមពលអគ្គិសនីកើនឡើងខ្លាំង។អគ្គលេខាធិការបក្សកុម្មុយនិស្តសង្គមនិយមវៀតណាម លោក តូ ឡិមកាលពីខែវិច្ឆិកា ឆ្នាំ២០២៤ ធ្លាប់បានគូសបង្ហាញក្នុងសមាជគណមជ្ឈិមបក្ស លើក១៣ ថាថាមពលបរមាណូ ជាតម្រូវការអាទិភាព និងជះឥទ្ធិពលត្រង់ផ្ទាល់ចំពោះការអភិវឌ្ឍប្រទេសជាតិ។
តាមរយៈសេចក្តីថ្លែងការណ៍ ភាគីទាំងពីរបានពិភាក្សានិងឯកភាពលើវិធានការបង្កើនកិច្ចសហប្រតិបត្តិការពាណិជ្ជកម្មទ្វេភាគី; ចាំបាច់ត្រូវអភិវឌ្ឍប្រព័ន្ធដឹកជញ្ជូនផ្លូវដែក និងផ្លូវសមុទ្រ និងការដឹកជញ្ជូនពហុមធ្យោបាយ។ភាគីទាំងពីរបានឯកភាពបន្តសុក្រិតនូវមូលដ្ឋានច្បាប់ទ្វេភាគី ដើម្បីជំរុញកិច្ចសហប្រតិបត្តិការលើគ្រប់វិស័យ។ ភាគីទាំងពីរបានឯកភាពបន្តបង្កលក្ខណៈងាយស្រួលសម្រាប់ការអនុវត្តគម្រោងប្រេងនិងឧស្ម័នរួមនៅតំបន់ខ្ពង់រាបបាតសមុទ្រវៀតណាមនិងនៅលើទឹកដីនៃសហព័ន្ធរុស្ស៊ី ស្របតាមច្បាប់នៃប្រទេសទាំងពីរនិងច្បាប់អន្តរជាតិ ក្នុងនោះមាន៖ អនុសញ្ញាអង្គការសហប្រជាជាតិស្តីពីច្បាប់សមុទ្រឆ្នាំ១៩៨២។
ភាគីទាំងពីរនឹងបន្តសហការអនុវត្តគម្រោងសាងសង់មជ្ឈមណ្ឌលស្រាវជ្រាវវិទ្យាសាស្ត្រ និងបច្ចេកវិទ្យានុយក្លេអ៊ែរនៅវៀតណាម។ រុស្ស៊ីត្រៀមខ្លួនជាស្រេចដើម្បីចូលរួមកសាងឧស្សាហកម្មថាមពលនុយក្លេអ៊ែរជាតិរបស់វៀតណាម។ភាគីទាំងពីរបានទទួលស្គាល់សារៈសំខាន់នៃការបន្តកិច្ចសហប្រតិបត្តិការលើវិស័យអប់រំ និងបណ្តុះបណ្តាល; ឯកភាពបន្តគាំទ្រការស្រាវជ្រាវ និងបង្រៀនភាសារុស្សីនៅវៀតណាម; ទទួលស្គាល់តួនាទីនៃការផ្លាស់ប្តូរប្រជាជន និងប្រជាជនក្នុងការអភិវឌ្ឍទំនាក់ទំនងមិត្តភាពជាប្រពៃណីរវាងវៀតណា និងរុស្ស៊ី។ភាគីទាំងពីរស្វាគមន៍ការបង្កើនការផ្លាស់ប្តូរ កិច្ចសហប្រតិបត្តិការ និងការគាំទ្រគ្នាទៅវិញទៅមកនៅវេទិកាពហុភាគី។
ទីភ្នាក់ងារថាមពលអន្តរជាតិ (AIE) ធ្លាប់បញ្ជាក់ថា តម្រូវការថាមពលកើនខ្លាំងនៅតំបន់អាស៊ីអាគ្នេយ៍។ តំបន់នេះត្រូវការថាមពលអគ្គិសនីកើនឡើង៨០% នៅឆ្នាំ២០០០ និងបន្តកើនជាង ៦០% បន្ថែមទៀត ចាប់ពីពេលនេះ ដល់២០៤០។ ប្រទេសឥណ្ឌូណេស៊ី វៀតណាម ហ្វីលីពីន ថៃ និងសិង្ហបុរី បានខំប្រឹងប្រែងគិតគូរខ្លាំងក្នុងបញ្ហាថាមពលនេះ។ ខែមិថុនា ឆ្នាំ២០២២ សភាឥណ្ឌូណេស៊ី អនុម័តច្បាប់បើកផ្លូវឲ្យសាងសង់មជ្ឈមណ្ឌលថាមពលនុយក្លេអ៊ែរ មួយយ៉ាងតិច ពីពេលនេះ ដល់ឆ្នាំ២០៤៥។
នៅហ្វីលីពីន ប្រធានាធិបតី ហ្វ៊ែរឌីណង់ ម៉ាកូស ជូញ៉រ ក៏បានជំរុញឲ្យបើកដំណើរការឡើងវិញ នូវមជ្ឈមណ្ឌលថាមពលនុយក្លេអ៊ែរ Bataan ដែលឋិតនៅចម្ងាយ៨០គីឡូម៉ែត្រ ភាគខាងលិចរដ្ឋធានីម៉ានីល។ នាពេលកន្លងទៅ រដ្ឋាភិបាលថៃ ក៏បានចេញវិធានការជាបន្តបន្ទាប់ និងជំរុញការសិក្សាច្រើនដែរ ក្នុងវិស័យនេះ។ ចំណែក នៅសិង្ហបុរី កាលពីឆ្នាំទៅមិញ រដ្ឋាភិបាលបានចុះកិច្ចព្រមព្រៀងជាមួយសហរដ្ឋអាមេរិក ដើម្បីបណ្តុះបណ្តាលអ្នកជំនាញនុយក្លេអ៊ែរ ជាង១០០នាក់ និងសិក្សាពីលទ្ធភាពបង្កើតមជ្ឈមណ្ឌលថាមពលនុយក្លេអ៊ែរ នៅសិង្ហបុរី៕.
