វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 1728 នាក់
ម្សិលមិញ 8227 នាក់
សរុប 14128609 នាក់
ប្រទេសឥណ្ឌា៖គណបក្សកាន់អំណាចរបស់លោកនាយករដ្ឋមន្ត្រីឥណ្ឌាណារិនដ្រា ម៉ូឌី បានជួបបរាជ័យយ៉ាងខ្លាំង ក្នុងការបោះឆ្នោតសភានៅរដ្ឋធានីញូវដែលី។ គណបក្សដែលអាចដណ្តើមយកជ័យជម្នះ ពីបក្សកាន់អំណាចឥណ្ឌា ក្នុងការបោះឆ្នោតជ្រើសតំណាងរាស្ត្រនៅរដ្ឋធានីញូវដេលីឈ្មោះថាអាំ អាត់មី (Aam Aadmi)ដែលទើបបង្កើតកាលពីឆ្នាំ២០១២។
លទ្ធផលបឋម គណបក្សអាំ អាត់មី បានយកឈ្នះចំនួន ៣៦ អាសនៈ ដើម្បីទទួលបានសំឡេងភាគច្រើននៅក្នុងសភាញូវដែលី ដែលមានអាសនៈសរុបទាំងអស់ចំនួន ៧០។នាយករដ្ឋមន្ត្រីហិណ្ឌូនិយមឥណ្ឌាលោកណារិនដ្រា ម៉ូឌី បានចេញមុខអបអរសាទរចំពោះ ជ័យជម្នះរបស់បក្សអាំ អាត់មី ។ នៅលើបណ្តាញសង្គមធ្វីតទឺ លោកម៉ូឌីសសេរ បានលើកទឹកចិត្តពួកគេ ឲ្យធ្វើការឲ្យអស់ពីសមត្ថភាព ដើម្បីបម្រើប្រជាពលរដ្ឋឥណ្ឌា ដែលរស់នៅក្នុងទីក្រុងញូវដែលី។
គួរកត់សម្គាល់ថា មុនការបោះឆ្នោតសភា គណបក្សស្តាំនិយមរបស់លោកណារិនដ្រា ម៉ូឌី បានខិតខំធ្វើយុទ្ធនាការបោះឆ្នោតយ៉ាងខ្លាំង ដើម្បីយកឈ្នះលើគណបក្សអាំ អាត់មី ដែលមានលោក អាកវីន គេជ្រីវ៉ាល់ ជាប្រធាន។ យុទ្ធនាការនេះ ធ្វើឡើង តាមរយៈការបង្កើតច្បាប់សញ្ជាតិថ្មី ដែលជាច្បាប់អនុញ្ញាតឲ្យជនជាតិភាគតិច មិនមែនជាអ្នកកាន់សាសនាអ៊ីស្លាម មកពីប្រទេសប៉ាគីស្ថាន អាហ្វហ្គានីស្ថាន និងបង់ក្លាដែស មានលទ្ធភាពទទួលបានសញ្ជាតិឥណ្ឌាស្រួលជាងមុន។
តែ ការដាក់ចេញនូវច្បាប់សញ្ជាតិថ្មី មិនបានជួយឲ្យបក្សកាន់អំណាចរបស់លោកនាយករដ្ឋមន្ត្រីណារិនដ្រា ម៉ូឌី ឈ្នះការបោះឆ្នោតសភានៅញូវដេលីឡើយ។ បរាជ័យក្នុងការបោះឆ្នោតលើកនេះ ក៏ជាតឹកតាងមួយបង្ហាញពីការមិនពេញចិត្ត របស់ប្រជាពលរដ្ឋឥណ្ឌាអ្នកកាន់សាសនាអ៊ីស្លាម ចំពោះច្បាប់សញ្ជាតិថ្មីដ៏ចម្រូងចម្រាសនេះដែរ។
គួររំឭកជូនថា ច្បាប់សញ្ជាតិថ្មី ត្រូវបានអនុម័តដោយសភាឥណ្ឌា កាលពីខែធ្នូ ឆ្នាំមុន។ បើតាមរដ្ឋាភិបាលឥណ្ឌា ច្បាប់សញ្ជាតិថ្មីនេះ ជួយការពារជនអន្តោប្រវេសន៍ដែលជាជនជាតិភាគតិច ឲ្យរួចផុតពីការធ្វើទុក្ខបុកម្នេញផ្នែកសាសនា។ ក៏ប៉ុន្តែ សម្រាប់ក្រុមអ្នកប្រឆាំងវិញយលថា ច្បាប់ថ្មីនេះមានភាពលម្អៀង និងរើសអើងផ្នែកសាសនា សម្រាប់ក្រុមអ្នកកាន់សាសនាអ៊ីស្លាម។