អាម៉េរិកចោទប្រកាន់រុស្ស៊ីជាអ្នកធើ្វឱ្យធ្លាក់យន្តហោះដឹកអ្នកដំណើររបស់ប្រទេសអាស៊ែបៃហ្សង់
21-May-2025 / ព័ត៌មានអន្តរជាតិ
សហរដ្ឋអាម៉េរិក៖ កាលពីថ្ងៃសុក្រម្សិលមិញ អ្នកនាំពាក្យសេតវិមានអាម៉េរិក លោក John Kirby បាននិយាយថា សហរដ្ឋអាម៉េរិកបានឃើញ "ការចង្អុលបង្ហាញបឋមមួយចំនួន" ដែលដាក់បន្ទុកលើប្រទេសរុស្ស៊ី ថាជាអ្នកបង្កឱ្យមានឧប្បត្តិហេតុធ្លាក់យន្តហោះដឹកអ្នកដំណើររបស់ក្រុមហ៊ុនអាកាសចរណ៍ Azerbaijan Airlines កាលពីថ្ងៃទី ២៥ ខែធ្នូដែលជាថ្នៃបុណ្យគ្រិស្តម៉ាស់ សម្លាប់មនុស្សអស់ ៣៨នាក់ ។ យន្តហោះមួយគ្រឿងរបស់ក្រុមហ៊ុនអាកាសចរណ៍ Azerbaijan Airlines ផ្ទុកមនុស្ស៦៧នាក់ បានធ្លាក់នៅឆ្នេរសមុទ្រ កាព្យែន នៃប្រទេសកាហ្សាក់ស្ថាន សម្លាប់មនុស្ស៣៨នាក់ដែលដំបូងឡើយមានសេចក្តីរាយការណ៍ថា យន្តហោះនេះ បុកជាមួយហ្វូងបក្សីបណ្តាលឲ្យឆេះម៉ាស៊ីន ។
មន្ត្រីសេតវិមានរូបនេះមិនបានបញ្ជាក់លម្អិតបន្ថែមអំពីភស្តុតាងទាំងនោះឡើយ ប៉ុន្តែលោកបានប្រាប់អ្នកសារព័ត៌មានថា សហរដ្ឋអាមេរិកបានបង្ហាញបំណងចង់ផ្តល់ជំនួយផ្នែកបច្ចេកទេសសម្រាប់ដំណើរការស៊ើបអង្កេតករណីធ្លាក់យន្តហោះនេះទៅឱ្យប្រទេសអាស៊ែបៃហ្សង់ តែនៅមិនទាន់ទទួលបានឆ្លើយតបយ៉ាងណានៅឡើយទេ។
បើតាមប្រភពមន្ត្រីអាម៉េរិកដដែលបានអះអាងថា យន្តហោះអាកាសចរណ៍ Azerbaijan Airlines ខាងលើ បានស្ថិតក្រោមការបាញ់ប្រហារពីប្រព័ន្ធការពារដែនអាកាសរបស់រុស្ស៊ី នៅពេលប៉ុនប៉ងធើ្វការចុះចតនៅលើទឹកដីរបស់សាធារណរដ្ឋឆេចយ៉ា (Chechnya) របស់រុស្សី មុននឹងបានបង្ខំចិត្តប្តូរទិសដៅហោះហើរទៅកាន់តំបន់សមុទ្រ Caspian ចូលទៅក្នុងដែនអាកាសរបស់ប្រទេសកាហ្សាក់ស្ថាន ដែលជាកន្លែងយន្តហោះមួយនេះបានបាត់បង់លំហ្នឹង ហើយនិងបានធ្លាក់ចុះទៅលើទឹកដី។
ជុំវិញការចោទប្រកាន់របស់អាម៉េរិកនេះ ភាគីអ្នកនាំពាក្យវិមានក្រឹមឡាំងរបស់រុស្ស៊ីបានបដិសេធមិនធ្វើអត្ថាធិប្បាយទេ ប៉ុន្តែបើយោងតាមប្រធានទីភ្នាក់ងារអាកាសចរណ៍ស៊ីវិលរបស់រុស្ស៊ីបាននិយាយថា ស្ថានភាពសន្តិសុខដែនអាកាសនៅសាធារណរដ្ឋឆេចយ៉ាគឺ "មានភាពស្មុគស្មាញខ្លាំង" ដោយសារតែការវាយប្រហារដោយយន្តហោះដ្រូនគ្មានមនុស្សបើករបស់អ៊ុយក្រែនជារើយៗ ដែលញាំងឱ្យមានមតិមួយចំនួនយល់ឃើញថា យោធារុស្ស៊ីទំនងជាបានភ័នច្រឡំថា យន្តហោះដឹកអ្នកជំណើរខាងលើ គឺជាយន្តហោះដ្រូនរបស់អ៊ុយក្រែន។
សូមបញ្ជាក់ថាបន្ទាប់ពី យន្តហោះមួយគ្រឿងរបស់ក្រុមហ៊ុនបានធ្លាក់ នៅក្នុងសេចក្តីប្រកាសចុះផ្សាយនៅថ្ងៃសុក្រទី ២៧ធ្នូ ក្រុមហ៊ុនហោះហើរ អាស៊ែបៃហ្សង់បានបញ្ជាក់ថា ក្រុមហ៊ុនផ្អាកការហោះហើរទៅកាន់ទីក្រុងចំនួន៧របស់រុស្ស៊ី ក្នុងនោះមានកូកាស Caucase ។ ក្រុមហ៊ុនអាស៊ែបៃហ្សង់បានពន្យល់ការសម្រេចចិត្តរបស់ខ្លួនថា ធ្វើឡើងដោយយោងទៅលើលទ្ធផលបឋម នៃការស៊ើបអង្កេតដែលបង្ហាញថា យន្តហោះEmbraer 190 របស់ក្រុមហ៊ុនអាស៊ៃបៃហ្សង់បានរងប៉ះ និងមានការរំខានពីខាងក្រៅ យន្តហោះ។ “ដោយសារតែហានិភ័យ និងដើម្បីសន្តិសុខក្នុងពេលហោះហើរ ក្រុមហ៊ុនសម្រេចផ្អាកការហោះហើរទៅកាន់អាកាសយានដ្ឋានចំនួន១០របស់រុស្ស៊ី”។ នេះបើតាមសេចក្តីប្រកាសរបស់ក្រុមហ៊ុនអាស៊ែបៃហ្សង់។
នៅថ្ងៃពុធទី ២៥ធ្នូ យន្តហោះរបស់ក្រុមហ៊ុនអាស៊ែបៃហ្សង់ ដឹកអ្នកដំណើរ ចំនួន៦២នាក់ និងបុគ្គលិកធ្វើការនៅលើយន្តហោះ ៥នាក់ បានហោះចេញពីទីក្រុងបាគូរបស់អាស៊ែបៃហ្សង់ សំដៅទីក្រុងGrozy របស់សាធារណរដ្ឋ ឆេឆេនី របស់រុស្ស៊ី។ ប៉ុន្តែ នៅពេលជិតទៅដល់គោលដៅ យន្តហោះស្រាប់តែបែរក្បាល ហោះបកមកវិញ មុននឹងទៅធ្លាក់នៅប្រទេសកាហ្សាក់ស្ថាន ជិតខាងរុស្ស៊ី។
ក្រុមហ៊ុនហោះហើរអាស៊ែបៃហ្សង់លើកឡើងពីការរំខាន និងប៉ះទង្គិចពីប្រភពខាងក្រៅយន្តហោះ នៅបន្ទាប់ពី កាសែតស្និទ្ធនឹងរដ្ឋាភិបាលអាស៊ែបៃហ្សង់ ព្រមទាំងអ្នកជំនាញខាងអាកាសចរណ៍ និងអ្នកជំនាញយោធា ជាបន្តបន្ទាប់គ្នាបានវាយតម្លៃថា យន្តហោះដឹកអ្នកដំណើររបស់អាស៊ែបៃហ្សង់ ធា្លក់ដោយសារមីស៊ីលការពារដែនអាកាសរបស់រុស្ស៊ី។
គេហ៊ានអះអាងដូច្នេះ ដោយមើលទៅលើស្លាកស្នាមធ្លុះ ប្រហោង នៅលើបំណែកកន្ទុយយន្តហោះ ដែលហាក់ដូចជាត្រូវប៉ះនឹងវត្ថុរឹង ពោលគឺមិនមែនដោយសារហ្វូងសត្វស្លាបហើរបុក ដូចការលើកឡើងដំបូងរបស់ទីភ្នាក់ងារអាកាសចរណ៍រុស្ស៊ីទេ។នៅថ្ងៃព្រហស្បតិ៍ ប្រភពចំនួន៤ពីខាងអាស៊ៃបៃហ្សង់បាននិយាយប្រាប់កាសែតក្នុងស្រុកថា យន្តហោះធ្លាក់ ដោយសារត្រូវគ្រាប់មីស៊ីលរុស្ស៊ីដោយចៃដន្យ។ បើតាមប្រភពខាងលើ យន្តហោះទំនងរងមីស៊ីលការពារដែនអាកាសរបស់រុស្ស៊ី ឈ្មោះ Pantsir-S ចំណែកបណ្តាញទាក់ទងរបស់យន្តហោះត្រូវប្រព័ន្ធអេឡិចត្រូនិករុស្ស៊ីរំខាន មិនឲ្យដំណើរការ ដែលជាហេតុធ្វើឲ្យយន្តហោះបាត់ពីរ៉ាដា នៅពេលហោះជិតដល់អាកាសយានដ្ឋាននៅ Grozy ទឹកដីរុស្ស៊ីតាមដានការហោះហើរលើអាកាស។BBC News
