ក្រុមបាតុករកូរ៉េខាងត្បូង សម្រុកចូលតុលាការ ក្រោយការសម្រេចចិត្តពន្យាររយៈពេលឃុំខ្លួន ប្រធានាធិបតី លោក Yoon Suk Yeol
21-September-2026 / ព័ត៌មានអន្តរជាតិ
កូរ៉េ៖ នៅថ្ងៃអាទិត្យទី១៩មករានេះ តុលាការនៅប្រទេសកូរ៉េខាងត្បូង បានសម្រេចពន្យារបន្ថែមទៀត នូវរយៈពេលឃុំខ្លួនប្រធានាធិបតី លោកយូនសឹកយ៉ឹល( Yoon Suk Yeol )រហូតដល់២០ថ្ងៃ ។ការពន្យាពេលឃុំខ្លួននេះបង្កឱ្យមានការតវ៉ាដោយហិង្សា ពីសំណាក់ក្រុមអ្នកគាំទ្ររបស់លោកចំនួនរាប់រយនាក់ ដែលបាននាំគ្នាសម្រុកចូលអគារតុលាការ និងបង្កការបំផ្លិចបំផ្លាញទ្រព្យសម្បត្តិក្នុងនោះ មុនប៉ូលិសអាចស្តារសណ្តាប់ធ្នាប់ បានឡើងវិញ។
ទីភ្នាក់ងារព័ត៌មាន Reuters នាថ្ងៃអាទិត្យ ទី១៩ ខែមករា ឆ្នាំ២០២៥បានឲ្យដឹងថា៖កាលពីសប្តាហ៍មុន លោក Yoon បានក្លាយជាប្រធានាធិបតីកូរ៉េខាងត្បូងដំបូងគេ ដែលត្រូវបានចាប់ខ្លួន ខណៈប្រឈមមុខនឹងការចោទប្រកាន់ពីបទបះបោរ ពាក់ព័ន្ធការប្រកាសច្បាប់អាជ្ញាសឹកដ៏ចម្រូងចម្រាសរបស់លោក កាលពីថ្ងៃទី៣ ខែធ្នូ ឆ្នាំ២០២៤ ដែលបានរុញច្រានប្រទេសឱ្យធ្លាក់ក្នុងវិបត្តិនយោបាយ។
កាលពីថ្ងៃសុក្រសប្តាហ៍នេះ ក្រុមអ្នកស៉ើបអង្កេតបានស្នើសុំតុលាការ ពន្យាររយៈពេលនៃការឃុំខ្លួន លោក Yoon បន្ទាប់រូបលោក មិនព្រមនិយាយជាមួយអ្នកសួចម្លើយ។ តុលាការបានយល់ព្រមតាមសំណើរបស់ក្រុមអ្នកស៉ើបអង្កេត ក្រោមហេតុផលថា លោក Yoon អាចនឹងបំផ្លាញភស្តុតាងផ្សេងៗ។
ក្រោយសេចក្តីសម្រេចរបស់តុលាការ ត្រូវបានប្រកាសនៅម៉ោងប្រមាណជា ៣ទាបភ្លឺថ្ងៃអាទិត្យនេះ ក្រុមអ្នកគាំទ្រលោក Yoon រាប់រយនាក់ ក៏បាននាំគ្នា សម្រុកចូលអគារតុលាការ។ ពួកគេបានទម្លុះខ្សែការពាររបស់ប៉ូលិស ហើយចូលទៅបំផ្លាញសម្ភារការិយាល័យ និងគ្រឿងសង្ហារិមផ្សេងៗ នៅក្នុងនោះ។ ប៉ុន្មានម៉ោងក្រោយមក ប៉ូលិសក៏ស្តារសណ្តាប់ធ្នាប់បានឡើងវិញ ហើយបានឱ្យដឹងថា មកទល់ពេលនេះ បាតុករ៤៦នាក់ ត្រូវបានចាប់ខ្លួន។ច្បាប់កូរ៉េខាងត្បូង តម្រូវឱ្យជនសង្ស័យ ដែលជាប់ឃុំក្រោមដីកាតុលាការ ត្រូវឆ្លងកាត់ការត្រួតពិនិត្យរូបរាងកាយ ថតរូប mugshot ដែលគេនិយមហៅថា ការថតរូបវាស់កម្ពស់ ហើយស្លៀកឯកសណ្ឋានអ្នកជាប់ពន្ធនាគារ។
អ្នកឆ្លើយឆ្លងព័ត៌មានវិទ្យុបារាំង RFI ប្រចាំនៅទីក្រុងសេអ៊ូល បាននិយាយថាក្រុមបាតុករមិនចង់ប្រើអំពើហិង្សាឡើយ ហើយការសម្រុកចូលតុលាការទៀតសោត ដើម្បីបង្ហាញពីសិទ្ធិរបស់ប្រជាជនកូរ៉េខាងត្បូង ប្រឆាំងអំពើពុករលួយក្នុងប្រព័ន្ធតុលាការ។ នគរបាលកូរ៉េខាងត្បូងបញ្ជាក់ថា ក្រុមបាតុករប្រមាណជាង ៤ម៉ឺននាក់ នាំគ្នាប្រមូលផ្តុំតវ៉ានៅពីមុខតុលាការទីក្រុងសេអ៊ូល ដោយលើកបដា «គាំទ្រ» និង «ដោះលែង» លោក យូន ស៊ុកយោល ។
ក្រុមភ្នាក់ងារអង្កេតប្រឆាំងនឹងអំពើពុករលួយ ត្រូវផ្ទេរការស៊ើបអង្កេតនេះទៅអយ្យការ ក្នុងអំឡុងពេលដប់ថ្ងៃខាងមុខ ដើម្បីចោទប្រកាន់លោក យូន ស៊ុកយោល ឬ ក៏យ៉ាងណា ឲ្យបានមុនកំណត់ ២០ថ្ងៃ។ លោក យូន ស៊ុកយោល អាចត្រូវប្រឈមមុខនឹងការចោទប្រកាន់ ពីបទបះបោរក្បត់ជាតិ ដែលជាអំពើឧក្រិដ្ឋកម្ម ហើយបទល្មើសនេះអាចប្រឈមទោសប្រហារជីវិត។
មេធាវីម្នាក់របស់លោក យូន ស៊ុកយោល បានប្រាប់ទីភ្នាក់ព័ត៌មានបារាំង AFP ថា ការសម្រេចចិត្តបន្តឃុំខ្លួនកូនក្តីរបស់លោក បង្កឲ្យមានភាពចលាចល និង អំពើហិង្សា ដែលកូនក្តីរបស់លោក មិនចង់ឲ្យកើតមានឡើយ។ មេធាវីរូបនេះបានបន្តទៀតថា លោក យូន ស៊ុកយោល ព្រមចូលខ្លួនឆ្លើយបំភ្លឺ នៅតុលាការ ដើម្បីស្តារកិត្តិយសរបស់លោក ហើយលោកបានឆ្លើយរាល់សំណួរ និង បង្ហាញភ័ស្តុតាង នៅក្នុងសវនាការជំនុំជម្រះ រយៈពេលជិត ៥ម៉ោង។ លោកប្រធានាធិបតីព្យួរតំណែងរូបនេះ បានផ្ញើសារថ្លែងអំណរគុណដល់អ្នកគាំទ្ររូបលោក តាមរយៈមេធាវីការពារក្តីរបស់លោក។
សូមបញ្ជាក់ថា ក្រុមភ្នាក់ងារអង្កេតប្រឆាំងនឹងអំពើពុករលួយកូរ៉េខាងត្បូង បានចាប់ខ្លួនលោក យូន ស៊ុកយោល កាលពីថ្ងៃពុធ ទី១៥ មករា ហើយឃុំខ្លួនលោកជាបណ្តោះអាសន្នរយៈពេល៤៨ម៉ោង មុនបញ្ជូនទៅមន្ទីរឃុំឃាំង។ ការឈានដល់ការចាប់ខ្លួនរូបលោក ដោយហេតុតែលោកបានប្រកាសចេញច្បាប់អាជ្ញាសឹក កាលពីថ្ងៃទី៣ធ្នូ២០២៤ ហើយត្រូវសភាបោះឆ្នោតដកសេចក្តីទុកចិត្ត និងសម្រេចព្យួរពីតំណែងនៅថ្ងៃទី១៤ធ្នូ ២០២៤៕
