ផេកឈ្មោះ Vuthy furniture បាននឹងកំពុងផ្សព្វផ្សាយ ពាណិជ្ជកម្មលក់តុសិស្សសាលាបឋមសិក្សា ប្រើឈ្មោះថា អំណោយដ៏ថ្លៃថ្លាសម្តេចមហាបវរធិបតី ហ៊ុន ម៉ាណែត និង លោកជំទាវបណ្ឌិត ពេជ ចន្ទមុន្នី?
30-May-2025 / ព័ត៌មានជាតិ
រាជធានីភ្នំពេញ : ថ្មីៗនេះ នៅលើបណ្តាញសង្គម facebook មហាជន និងប្រជាពលរដ្ឋបានឃើញ ផេកឈ្មោះ Vuthy furniture បាននឹងកំពុងបង្ហោះព័ត៌មានផ្សព្វផ្សាយពាណិជ្ជកម្មលក់តុសិស្សសាលាបឋមសិក្សា ដែលផលិតឡើង ពីឈើកៅស៊ូ និងជើងក្រោមធ្វើពីដែក ដោយរចនាយ៉ាងស្អាតប្រណីត អមដោយសរសេរអក្សរឆ្លាក់ដាក់ ពីមុខតុថា : អំណោយដ៏ថ្លៃថ្លា សម្តេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី។
តាមរូបភាពនិងឈ្មោះតុថាជាអំណោយវាគួរជាទីទាក់ ទាញការចាប់អារម្មណ៍ យ៉ាងខ្លាំងពីមហាជនទូទៅ ជាពិសេសពីលោកគ្រូ អ្នកគ្រូនៅតាមបណ្តាសាលារៀននានាមួយចំនួន ព្រមទាំងមាតា បិតាសិស្សមួយចំនួនផងដែរ ។ ម្ចាស់ផេកឈ្មោះ Vuthy furniture បានផ្សព្វផ្សាយ អូសទាញអតិថិជន ទាំងសាលារដ្ឋ ទាំងសាលាឯកជន ពិសេសលោក គ្រូ អ្នកគ្រូ នៅតាមសាលារៀន អាចទំនាក់ទំនងកុំម៉ង់ទិញបាន ឬចង់ សរសេរដាក់ឈ្មោះ ស្ថាប័ន ឬអង្គការផ្សេងៗបាន ហើយមានតម្លៃសមរម្យ ។
ករណីយ៍នេះលោកគ្រូបង្រៀនម្នាក់នៅសាលាបឋមទួលស្វាយព្រៃ ( សុំលាក់ឈ្មោះ ) បានប្រាប់មក គេហទំព័រ មាតុភូមិ www.meatophoum.com តាមទូរស័ព្ទថា : មានអី តុ សំរាប់អោយសិស្សសាលាបឋមសិក្សាអង្គុយរៀនដែលផេកVuthy furniture ផ្សាយពាណិជ្ជកម្មលក់តាម feacebook នេះល្អ ស្អាតគួរអោយចង់បានយកមកដាក់ក្នុងសាលារៀនអោយសិស្ស អង្គុយរៀនដែរ តែខាងថ្នាក់ដឹកនាំសាលារបស់ខ្ញុំគ្មានថវិកាទិញទេ ។ លោកគ្រូបង្រៀនរូបនេះបានបន្តថា: តែបើជាអំណោយរបស់សម្តេច មហាបវរធិបតី ហ៊ុន ម៉ាណែត និង លោកជំទាវបណ្ឌិត ពេជ ចន្ទមុនី ផ្តល់អោយវិញ សាលាទទួលស្វាគមន៍គ្រប់ពេល ។
ដោយឡែក សំរាប់ការចាប់អារម្មណ៍ពីមាតា បិតាសិស្សវិញ លោកអ៊ុំប្រុសម្នាក់ ជាមន្ត្រីរាជការចូលនិវត្តន៍ម្នាក់ បាននិយាយប្រាប់ថានិពន្ធនាយក គេហទំព័រ មាតុភូមិ តាមទូរស័ព្ទអោយដឹងថា : តុសំរាប់សិស្សសាលាបឋមសិក្សាអង្គុយរៀន ដែលគេផុសក្នុង facebook ដាក់លក់នេះវាពិតជាល្អស្អាតផស់គេ តែឆ្ងល់ថា : បើតុទាំងនេះ ជាអំណោយដ៏ថ្លៃថ្លារបស់សម្តេចមហាបវរធិបតី ហ៊ុន ម៉ាណែត និង លោកជំទាវបណ្ឌិត ពេជ ចន្ទមុន្នី សំរាប់ផ្តល់ជូនតាមសាលាបឋមសិក្សានានា ទុក អោយសិស្សអង្គុយរៀន ហេតុម៉េចបានជាចាំបាច់អោយគេ កុំ ម្មង់ទិញ ? ។ លោកអ៊ុំបន្តថា : ឬ ក៏ម្ចាស់ផេក Vuthy furniture ឆ្លៀតឱកាសធ្វើអាជីវកម្មលក់តុ ដោយប្រើស្លាកឈ្មោះ សម្តេចធិបតី និង លោកជំទាវ ដើម្បី ទាក់ទាញបានអតិថិជនអោយចូលទិញតុរបស់ខ្លួន ? ។ នេះជាចម្ងល់របស់ប្រជាជន តែប៉ុណ្ណោះ ? ។
ដូច្នេះសូមថ្នាក់ដឹកនាំគ្រប់ជាន់ថ្នាក់ របស់ក្រសួងអប់រំយុវជន និង កីឡា ព្រមទាំងថ្នាក់ដឹកនាំខុទ្ទកាល័យសម្តេចនាយករដ្ឋមន្ត្រី មេត្តាពិនិត្យមើល អំពីករណីនេះផងទាន ! ហើយជួយបកស្រាយបំភ្លឺជូនមហាជនផង កុំអោយមានការយល់ច្រឡំ ។ ជុំវិញការលើកឡើងនូវចម្ងល់ខាងលើនេះ ការិយាល័យនិពន្ធ គេហទំព័រ មាតុភូមិ បានព្យាយាមទាក់ទង តាមលេខទូរស័ព្ទ 011 98 92 80 ដែលសរសេរដាក់លើផេកនេះ ដើម្បីសុំការបកស្រាយបំភ្លឺ បញ្ជាក់អំពីការសរសេរស្លាកឈ្មោះដាក់ថាជា អំណោយដ៏ថ្លៃថ្លា របស់សម្តេចមហាបវរធិបតី ហ៊ុន ម៉ាណែត និង លោក ជំទាវបណ្ឌិត ពេជ ចន្ទមុន្នី ដាក់នៅខាងមុខតុសិស្សសាលា ហើយធ្វើអាជីវកម្មផ្សព្វផ្សាយ ពាណិជ្ជកម្មលក់យ៉ាងរំភើយ ដោយមិនខ្លាចប៉ះពាល់ដល់កិត្តិយសប្រមុខដឹកនាំកំពូលរបស់ប្រទេសកម្ពុជាអ្វីបន្តិចសោះ ? ប៉ុន្តែពុំអាចទំនាក់ទំនងបានទេ ព្រោះប្រព័ន្ធទូរស័ព្ទ ឆ្លើយថា ពុំអាចទាក់ទងបានទេនៅពេលនេះ ។ អង្គភាពសារព័ត៌មាន គេហទំព័រ មាតុភូមិ រង់ចាំ ទទួល ស្វាគមន៍ជានិច្ចនូវការបកស្រាយបំភ្លឺ ពីគ្រប់ភាគីពាក់ព័ន្ធទាំងអស់ តាមច្បាប់ស្តីពី របបសារព័ត៌មាន រៀងរាល់ម៉ោងធ្វើការងារ ឬ តាមរយ: លេខទូរស័ព្ទ :012 953 824 / 016 953 222 / 088 55 34 100
