អ្នកកាសែត៦នាក់អត់បានលុយ១ដុល្លារពីថៅកែហាងកាហ្វេផងត្រូវនគរបាលចាប់ខ្លួនបាត់!
07-June-2025 / ព័ត៌មានជាតិ
បណ្តាញព័ត៌មានក្នុងស្រុកបានក្រុមអ្នកសារព័ត៌មានចំនួន៦នាក់ត្រូវបានសមត្ថកិច្ចនគរបាលស្រុកមុខកំពូលឃាត់ខ្លួនតាមបណ្តឹងរឿងគំរាមកំហែងទារប្រាក់ពីពលរដ្ឋលក់កាហ្វេមួយកន្លែងដែលបង្កប់ល្បែងស៊ីសងស្ថិតនៅភូមិក្រោម ឃុំព្រែកអញ្ចាញ ស្រុកមុខកំពូល ខេត្តកណ្ដាលកាលពីថ្ងៃទី១៩ ខែមិថុនាឆ្នាំ២០២១ វេលាម៉ោង១៥និង៣០នាទី ។
អ្នកកាសែតទាំងនោះរួមមាន៖១-ឈ្មោះ ស៊ូ ស្រីលាភ ភេទស្រី អាយុ២៩ឆ្នាំ ជនជាតិខ្មែរ មុខរបរអ្នកសារព័ត៌មាន(ម្ចាស់អាជ្ញាប័ណ្ណសារព័ត៌មាន BATI TV NEWS),២-ឈ្មោះ ចាន់ ឫទ្ធី ភេទប្រុស អាយុ៣៩ឆ្នាំជនជាតិខ្មែរ មុខរបរអ្នកសារព័ត៌មាន មានទីលំនៅបច្ចុប្បន្ន ភូមិដើមចាន់ សង្កាត់ច្បារអំពៅទី២ ខណ្ឌច្បារអំពៅ រាជធានីភ្នំពេញ(ជាសមាជិក),៣-ឈ្មោះ ផន ថា ភេទប្រុស អាយុ៤៣ឆ្នាំ ជនជាតិខ្មែរមុខរបរអ្នកសារព័ត៌មាន មានទីលំនៅបច្ចុប្បន្ន ភូមិដើមចាន់ សង្កាត់ច្បារអំពៅទី២ ខណ្ឌច្បារអំពៅ រាជធានីភ្នំពេញ(ជាសមាជិក),
៤-ឈ្មោះ ច្រុង សុខនី ភេទប្រុស អាយុ២៤ឆ្នាំ ជនជាតិខ្មែរ មុខរបរអ្នកសារព័ត៌មាន មានទីលំនៅបច្ចុប្បន្ន ភូមិព្រៃធំ ឃុំរស្មីសាមគ្គី ស្រុកឱរ៉ាល់ ខេត្តកំពង់ស្ពឺ(ជាសមាជិក),៥-ឈ្មោះ ប្រាក់ បេន ភេទប្រុស អាយុ៤២ឆ្នាំជនជាតិខ្មែរ មុខរបរអ្នកសារព័ត៌មានមានទីលំនៅបច្ចុប្បន្ន ភូមិកណ្ដាល សង្កាត់ច្បារអំពៅ ខណ្ឌច្បារអំពៅ រាជធានីភ្នំពេញ(ជាសមាជិក),៦-ឈ្មោះ អ៊ុក ឡា ភេទប្រុស អាយុ៥១ឆ្នាំ ជនជាតិខ្មែរ មុខរបររត់ម៉ូតូឌុបមានទីលំនៅបច្ចុប្បន្ន ភូមិត្នោតជ្រៃ សង្កាត់បឹងទំពុន ខណ្ឌចំការមន រាជធានីភ្នំពេញ(ជាសមាជិក)។
វត្ថុតាងចាប់យកម៉ូតូ៣គ្រឿង,ទូរស័ព្ទ៥គ្រឿង,បណ្ណសម្គាល់ខ្លួនសារពត៌មានចំនួន៦សន្លឹក, លិខិតបំពេញបេសកកម្មចំនួន៤ច្បាប់,ជើងដែកសម្រាប់ដាក់ទូរស័ព្ទឡាយចំនួន២, ម៉ៃក្រូហ្វូនចំនួន២,វ៉ាលិសយួរពណ៌ខ្មៅចំនួន១។លោកវរសេនីយ៍ឯកឯកលន់អធិការនគរបាលស្រុកមុខកំពូលដែលបានដឹកនាំកម្លាំងអន្តរាគមន៍សហការជាមួយកម្លាំងប៉ុស្តិ៍នគរបាលរដ្ឋបាលព្រែកអញ្ចាញចុះទៅកន្លែងកើតហេតុឃើញទាំង៦នាក់ខាងលើឡាយវីដេអូនៅមុខប៉ុស្តិ៍នគរបាលរដ្ឋបាលព្រែកអញ្ចាញក៏បាននាំខ្លួនជនសង្ស័យទាំង៦នាក់និងវត្ថុតាងខាងលើយកទៅធ្វើការសាកសួរនៅអធិការដ្ឋាននគរបាលស្រុក។
បើតាមសមត្តកិច្ចអ្នកាសែតបានឆ្លើយសារភាពថានៅថ្ងៃទី១៩ខែមិថុនា២០២១ថា៖វេលាម៉ោង១២៖០០នាទីខ្លួនទាំង០៦នាក់បានជិះម៉ូតូចំនួន០៣គ្រឿងខាងលើ ចេញពីសង្កាត់ច្បារអំពៅទី២ ខណ្ឌច្បារអំពៅ រាជធានីភ្នំពេញ ក្នុងគោលបំណងមកផ្ទះឈ្មោះ បារាំង នៅភូមិក្រោម ឃុំព្រែកអញ្ចាញ ស្រុកមុខកំពូល ខេត្តកណ្ដាល ដោយកម្លាំងផ្ដល់ព័ត៌មានរបស់ខ្លួនប្រាប់ថា នៅផ្ទះនេះមានលេងល្បែងស៊ីសងបញ្ជល់មាន់តាមអនឡាញ ។
មកដល់ក្នុងវត្តបុប្ផារាមហៅវត្តព្រែកអញ្ចាញក៏នាំគ្នាឈប់ម៉ូតូនៅក្នុងវត្តនោះ ហើយជនសង្ស័យឈ្មោះ ចាន់ ឫទ្ធី បានប្រាប់ទៅជនសង្ស័យឈ្មោះ អ៊ុក ឡា ថា ពេលទៅដល់ផ្ទះឈ្មោះ បារាំង ត្រូវទារប្រាក់ពីឈ្មោះបារាំងចំនួន១០០ដុល្លារ បើមិនបានប្រាក់ចំនួន១០០ដុល្លារទេ គឺមិនព្រមឡើយ? ។និយាយគ្នាហើយជនសង្ស័យទាំង០៦នាក់ ក៏នាំគ្នាជិះម៉ូតូទៅផ្ទះរបស់ឈ្មោះ បារាំង។ ពេលទៅដល់ក៏នាំគ្នាឈប់នៅក្រោមដើមខ្វិតក្បែរផ្ទះនោះ ហើយក៏នាំគ្នាដើរចុះដើរឡើង ពេលនោះឈ្មោះបារាំង ក៏ចេញមកសួរថា បងឯងជាអ្នកសារព័ត៌មានឬ? ហើយឈ្មោះ អ៊ុក ឡា ក៏ឆ្លើយទៅវិញថា ខ្ញុំជាអ្នកសារព័ត៌មាន។
ពេលនោះឈ្មោះបារាំងក៏ប្រាប់ថា អ៊ីចឹងបងឯងយកប្រាក់២០ដុល្លារទៅដើម្បីចាក់សាំងខ្ញុំអត់មានលេងអីទេខ្ញុំលក់តែកាហ្វេ តែជនសង្ស័យមិនយកហើយក៏ប្រាប់ទៅឈ្មោះបារាំងវិញថាទាល់តែ១០០ដុល្លារបានយក បើមិនបាន១០០ដុល្លារអត់យកទេ។បន្ទាប់មកជនសង្ស័យទាំង០៦នាក់ក៏នាំគ្នាជិះម៉ូតូចេញទៅបាត់ បាន៣០នាទីក្រោយមកជនសង្ស័យទាំង០៦នាក់ក៏នាំគ្នាជិះម៉ូតូទៅទីនោះម្ដងទៀតដើម្បីទារប្រាក់ពីឈ្មោះបារាំងពេលទារប្រាក់មិនបានក៏នាំគ្នាមកឈរឡាយវីដេអូនៅមុខប៉ុស្តិ៍នគរបាលរដ្ឋបាលព្រែកអញ្ចាញតែម្ដង។ចំពោះជនសង្ស័យទាំង០៦នាក់ត្រូវបានឃាត់ខ្លួនបណ្ដោះអាសន្ននៅអធិការដ្ឋានគរបាលស្រុកមុខកំពូល។សូមបញ្ជាកថាតាមច្បាប់
អំពើកំហែងយកគឺជាអំពើដែលប្រព្រឹត្តដោយប្រើហិង្សាការគំរាមកំហែងថានឹងប្រើហិង្សា ឬដោយការបង្ខិតបង្ខំដើម្បីទទួលបាននូវ ហត្ថលេខា ឬស្នាមមេដៃ ការសន្យាឬការបោះបង់ចោលអ្វីមួយ ការបង្ហាញអាថ៌កំបាំងណាមួយការប្រគល់មូលនិធិ តម្លៃ ឬទ្រព្យសម្បត្តិអ្វីមួយ(មាត្រា៣៦៣ ក្រមព្រហ្មទណ្ឌ)។អំពើកំហែងយក ត្រូវផ្ដន្ទាទោសដាក់ពន្ធនាគារពី ២ ឆ្នាំ ដល់ ៥ ឆ្នាំនិងពិន័យជាប្រាក់ពី ៤ លានរៀលទៅ១០លានរៀល (មាត្រា៣៦៤ ក្រមព្រហ្មទណ្ឌ) ។អំពើកំហែងយកដោយមានប្រើប្រាស់អាវុធ ត្រូវជាប់ពន្ធនាគារពី៧ ឆ្នាំ ទៅ១៥ ឆ្នាំ(មាត្រា៣៦៦) ។អំពើកំហែងយកដោយមានការកាត់អវយវ:ឬធ្វើឱ្យជនរងគ្រោះពិការ ត្រូវផ្ដន្ទាទោសដាក់ពន្ធនាគារ ពី ១០ ឆ្នាំ ទៅ ២០ ឆ្នាំ (មាត្រា ៣៦៧) ។អំពើកំហែងយកដោយប្រើទារុណកម្មអំពើឃោរឃៅ ឬធ្វើឱ្យជនរងគ្រោះស្លាប់ ត្រូវផ្ដន្ទាទោសដាក់ពន្ធនាគារពី ១៥ ឆ្នាំ ទៅ ៣០ ឆ្នាំ (មាត្រា៣៦៨និងមាត្រា៣៦៩)៕ 
