វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 1397 នាក់
ម្សិលមិញ 3717 នាក់
សរុប 14149730 នាក់
ភ្នំពេញ៖ថ្ងៃទី១៨ដល់២០កុម្ភៈមានការផ្ទុះជាថ្មីនៅព្រឹត្តិការណ៍កូវីតសហគមន៍តាមរយៈការរកឃើញករណីកូវីដ១៩រហូតដល់ទៅ៣២ករណីថ្មី។ដោយដាក់ឈ្មោះថា «ព្រឹត្តិការណ៍សហគមន៍២០កុម្ភៈ»សម្តេចនាយករដ្ឋមន្ដ្រីតេជោ ហ៊ុន សែនបានបញ្ជាក់ថាសម្តេចមិនចេញបញ្ជាឲ្យបិទសាលារៀនឬរៀបចំពិធីមង្គលការនិងការជួបជុំផ្សេងៗទេគ្រាន់តែត្រូវប្រកាន់វិន័យការពារ៣។
សម្តេចហ៊ុន សែនបញ្ជាក់ថាប្រជាពលរដ្ឋខ្មែរទាំងអស់ត្រូវចូលរួមអនុវត្តវិធានការ «៣ការពារ» រួមមានពាក់ម៉ាសលាងដៃនិងរក្សាគម្លាតសុវត្ថិភាព។ក្នុងនោះផងដែរសម្តេចហ៊ុនសែនព្រមានថាប្រសិនបើពលរដ្ឋមិនចូលរួមអនុវត្តវិធានការ «៣ការពារ» ទេសម្តេចគ្មានជំរើសអ្វីផ្សេងក្រៅតែពីរឹតបន្តឹងបន្ថែមតាមរយៈការហាមឃាត់មិនឲ្យមានការជួបជុំ និងមិនឲ្យរៀបចំពិធីអាពាហ៍ពិពាហ៍ដែលដាក់ចេញនាពេលកន្លងមក។ក្នុងការថ្លែងតាមបណ្តាញសង្គមហ្វេសប៊ុក សម្តេចបានបញ្ជាឲ្យបិទអគារស្នាក់នៅដូចជាខុនដូរនៅតំបន់កោះពេជ្រ ក្លិបកម្សាន្ត N8 នៅតាមផ្លូវមុនីរ៉េត ជិតស្តាតអូឡាំពិក និងតំបន់ខ្លះទៀតដែលមានហានិភ័យខ្ពស់ដោយហាមមិនឲ្យមនុស្សពីខាងក្រៅចូល។
ម្ចាស់ផ្ទះនៅតំបន់នោះអាចចូលបាន តែហាមមិនឲ្យចាកចេញវិញទេ។ក្រៅពីវិធានការបិទតំបន់មួយចំនួននេះសម្តេចនាយករដ្ឋមន្ត្រី ហ៊ុន សែន ក៏បានបញ្ជាឲ្យបន្តស្រាវជ្រាវរកមនុស្សដែលពាក់ព័ន្ធនឹងក្លិប N8ហើយអ្នកពាក់ព័ន្ធត្រូវតែយកសំណាកទៅធ្វើតេស្តបន្តទៀត។ដោយឡែកសម្រាប់កម្មវិធីប្រដាល់ និងកម្មវិធីប្រគុំតន្ត្រីតាមទូរទស្សន៍អាចបន្តបាន តែមិនឲ្យមនុស្សចូលមើលផ្ទាល់។ ចំណែកការដើរកម្សាន្ត និងការហាត់ប្រាណនៅអាចធ្វើបានជាធម្មតា តែត្រូវបង្កើនការការពារកុំឲ្យឆ្លងកូវីដ១៩ ដោយពាក់ម៉ាសនៅកន្លែងសាធារណៈការលាងដៃ ការរក្សាគម្លាតសុវត្ថិយ៉ាងតិច១ម៉ែត្រកន្លះ និងផ្អាកការចាប់ដៃគ្នា។
សម្តេច បានប៉ាន់ស្មានថា«ព្រឹត្តិការណ៍សហគមន៍២០កុម្ភៈ» អាចនឹងត្រូវបិទបញ្ចប់ដោយប្រើពេលប្រមាណ១ខែ។ទោះជាយ៉ាងណាមស្តេចតេជោបានប្រកាសហាមមិនឲ្យប្រជាជនកម្ពុជាចេញទៅប្រទេសវៀតណាមនិងថៃឡើយ។សម្រាប់ការចូលមកវិញគឺត្រូវតែអនុវត្តន៍ចត្តាឡីសក័ឲ្យបានត្រឹមត្រូវនៅព្រុំដែន។សូមបញ្ជាក់ថាតាមរយៈ «ព្រឹត្តិការណ៍សហគមន៍២០កុម្ភៈ» កម្ពុជារកឃើញអ្នកឆ្លងកូវីដ១៩ ឆ្លងទៅក្នុងសហគមន៍យ៉ាងតិច៣២ករណីតែក្នុងរយៈជាង១០ម៉ោងប៉ុណ្ណោះ ដែលករណីទាំងអស់រកឃើញនៅទីក្រុងភ្នំពេញ។ អ្នកឆ្លងកូវីដ១៩ ទាំង៣២នាក់គឺសុទ្ធសឹងជាជនជាតិចិន ហើយតំបន់មួយចំនួនដែលពួកគេពាក់ព័ន្ធត្រូវបិទជាបណ្តោះអាសន្ន។ករណីកូវីដ១៩ឆ្លងចូលសហគមន៍នៅពេលនេះ រកឃើញតាមរយៈជនជាតិចិនដែលទៅសុំបណ្ណបញ្ជាក់សុខភាពពីក្រសួងសុខាភិបាលដើម្បីធ្វើដំណើរទៅក្រៅប្រទេស។ បន្ទាប់ពីរកឃើញលទ្ធផលវិជ្ជមានកូវីដ១៩ស្ថាប័នមានសមត្ថកិច្ចបានចុះស្រាវជ្រាវបន្ទាន់ដើម្បីស្វែងរកមនុស្សពាក់ព័ន្ធនិងបានរកឃើញទៀតថាជនជាតិចិនដែលមានលទ្ធផលតេស្តវិជ្ជមានកូវីដ១៩នេះបានទៅកម្សាន្តនៅក្លិបមួយឈ្មោះ N8។ នេះបើតាមការបញ្ជាក់របស់ សម្តេចហ៊ុន សែន ក្នុងកិច្ចប្រជុំជាបន្ទាន់មួយ នៅគេហដ្ឋានរបស់បស់សម្តេច នាព្រឹកថ្ងៃទី២០កុម្ភៈ។
សម្រាប់វិធានការណ៍ការពារកម្លាំងសមត្ថកិច្ចចម្រុះកំពុងចុះបិទផ្លូវចេញចូលជុំវិញបរិវេណមជ្ឈមណ្ឌលពាណិជ្ជកម្ម Golden Street ទល់មុខអាគារ The Bridge ផ្លូវលេខ៧៨ ភូមិ១៤ សង្កាត់ទន្លេបាសាក់ ខណ្ឌចំការមន និងផ្លូវឡេីងទៅកោះពេជ្រ ស្ពានហង្ស ស្ពានឥន្ធូរ និងស្ពាននាគភ្លោះ ដោយដាក់រនាំងដែកបិទមិនអនុញាតិឱ្យមានការចេញចូលជាបណ្ដោះអាសន្ន ចាប់ពីព្រឹកថ្ងៃទី២០ កុម្ភៈ ២០២១។
ក្រសួងសុខាភិបាល នៅរសៀលថ្ងៃទី២០ ខែកុម្ភៈ ឆ្នាំ២០២១នេះ បានចេញសេចក្តីប្រកាសព័ត៌មានផ្លូវការ បញ្ជាក់ពីការរកឃើញអ្នកឆ្លងជំងឺកូវីដ១៩ ថ្មីចំនួន៣២នាក់ ដែលជាករណីឆ្លងចូលសហគមន៍ ក្នុង «ព្រឹត្តិការណ៍សហគមន៍២០កុម្ភៈ»។បើ គិតពីឆ្នាំ២០២០មកត្រឹមម៉ោង៧៖០០នាទីព្រឹកថ្ងៃទី២០ ខែកុម្ភៈ ឆ្នាំ២០២១នេះ កម្ពុជាបានរកឃើញអ្នកឆ្លងកូវីដ១៩ សរុបចំនួន ៥១៦នាក់ ក្នុងនោះអ្នកជាសះស្បើយចំនួន ៤៧០នាក់ និងអ្នកជំងឺសម្រាកនៅមន្ទីរពេទ្យចំនួន ៤៦នាក់៕