សភាកូរ៉េខាងត្បូងជោគជ័យក្នុង បោះឆ្នោតអនុម័តសំណើដកតំណែងលោកប្រធានាធិបតីយូនសុកយ៉ឹល
21-September-2026 / ព័ត៌មានអន្តរជាតិ
កូរ៉េ៖ នៅថ្ងៃសៅរ៍ ទី១៤ ខែធ្នូនេះសភាកូរ៉េខាងត្បូង បានបោះឆ្នោតអនុម័តហើយលើសំណើដកតំណែងរបស់លោកប្រធានាធិបតីយូនសុកយ៉ឺល( Yoon Suk Yeol )ជុំវិញការប្រកាសដាក់ឱ្យប្រើ ច្បាប់អាជ្ញាសឹក។
ដោយទីភ្នាក់ងារសារព័ត៌មាន AFPបានឲ្យដឹងថាលោកយូន បានប្រកាសប្រើច្បាប់អាជ្ញាសឹក កាលពីថ្ងៃទី៣ ខែធ្នូកន្លងទៅ តែច្បាប់នេះត្រូវបានលុបចោលវិញក្រោយពីសភាអាចប្រជុំបាននិងបានបោះឆ្នោតជំទាស់។ ច្បាប់អាជ្ញាសឹកត្រូវបានលោក Yoon ប្រកាសដាក់ឱ្យប្រើបាន ត្រឹមរយៈពេលជាង ៦ម៉ោងប៉ុណ្ណោះ។ ប៉ុន្តែវាបានបង្កភាពចលាចលនៅក្នុងនយោបាយកូរ៉េខាងត្បូង និងជំរុញឱ្យមានការអំពាវនាវឱ្យរូបលោកចុះចេញពីតំណែង។
សំណើដកតំណែងលោកយូន( Yoon) ត្រូវបានបោះឆ្នោតអនុម័តដោយសមាជិសភាក្នុងសំឡេងភាគច្រើន។ ពោលគឺសមាជិកសភាចំនួន ២០៤រូប(មានសមាជិកសភាគណបក្សកាន់អំណាចចំនួន១២រូបចូលរួមផងដែរព្រោះគណបក្សប្រឆាំងមានតំណាងតែ១៩២ប៉ុណ្ណោះ) បានបោះឆ្នោតគាំទ្រ និង៨៥រូបជំទាស់ ខណៈ៣រូបអនុបវាទ និងសន្លឹកឆ្នោតចំនួន៨ ជាសន្លឹកឆ្នោតមិនបានការ។ សន្លឹកឆ្នោត ២០៤សំឡេងនេះ គឺលើសពីសំឡេង ២ភាគ៣ ឬ២០០សំឡេង នៅក្នុងចំណោមសមាជិកសភាសរុប៣០០រូប ដែលចាំបាច់ដើម្បីអនុម័ត សំណើដកតំណែងលោក Yoon ក្រោមបទចោទបះបោរ។
គួរបញ្ជាក់ថា សំណើដកតំណែងដែលត្រូវបានសភាអនុម័ត នឹងត្រូវបញ្ជូនបន្តទៅកាន់តុលាការធម្មនុញ្ញដែលជាអ្នកសម្រេចចិត្តចុងក្រោយថាតើត្រូវតែដកលោក Yoon ចេញពីតំណែងដែរឬក៏យ៉ាង។ ប្រសិនបើ តុលាការទទួលស្គាល់សំណើដកតំណែងនេះដែរ នោះលោក Yoon នឹងក្លាយជាប្រធានាធិបតីទី២ របស់កូរ៉េខាងត្បូងដែលត្រូវបានទម្លាក់ចេញពីអំណាចបន្ទាប់ពីអតីតប្រធានាធិបតីលោកស្រីប៉ាកហ្គឹនហេ( Park Geun-hye) កាលពីឆ្នាំ២០១៧ហើយត្រូវបានកាត់ទោសឲ្យជាប់គុកពីបទពណ្តោយឲ្យមិត្តភក្តិយកឈ្មោះទៅយកលុយពីក្រុមហ៊ុនឯកជន។តែក៏មានដែរករណី សភាបោះឆ្នោតទម្លាក់ប្រធានាធិបតីហើយតែតុលាការធម្មនុញ្ញមិនអនុម័តនៅពីរខែក្រោយនោះ។ នោះគឺករណីប្រធានាធិបតី រ៉ូ ម៉ូយុន កាលពីឆ្នាំ២០០៤។
ចាប់ពីនាទីនេះទៅ តំណែងប្រធានាធិបតីរបស់លោកយូនសុកយោលត្រូវព្យួរ។ ក្នុងពេលរង់ចាំការអនុម័តសម្រេចពីតុលាការធម្មនុញ្ញដែលអាចប្រើពេលដល់ទៅ១៨០ថ្ងៃ នាយករដ្ឋមន្ត្រី ជាអ្នកទទួលបន្ទុកដឹកនាំប្រទេសជំនួសក្នុងនាមជាប្រធានាធិបតីស្តីទី។ លោកប្រមុខរដ្ឋាភិបាល ហាន ដុកសូ បានប្រកាសសន្យាភ្លាមថានឹងគ្រប់គ្រងប្រទេសឱ្យលំនឹងស្ថិរភាព។ ចំណែកបក្សប្រឆាំង និងបាតុករដែលមកប្រមូលផ្តុំគ្នាយ៉ាងកកកុញនៅមុខសភាវិញបានអបអរជ័យជំនះ ដោយចាត់ទុកសេចក្តីសម្រេចរបស់សភាថាជាជោគជ័យរបស់ប្រជាពលរដ្ឋ របស់លទ្ធិប្រជាធិបតេយ្យ។
លោកយូនសុកយ៉ឺលមានអាយុ៦៣ឆ្នាំ ឡើងតំណែងយ៉ាងលឿនពីរដ្ឋអាជ្ញាទៅជាប្រមុខរដ្ឋក្នុងរយៈពេលតែប៉ុន្មានឆ្នាំ ប៉ុណ្ណោះ។លោកប្រធានាធិបតី យូនសុកយ៉ឺល បានរបូតអំណាចពីដៃ ដោយហេតុតែរួមគ្នាជាមួយរដ្ឋមន្ត្រីក្រសួងការពារជាតិប្រកាសប្រើច្បាប់អាជ្ញាសឹកកាលពីយប់ថ្ងៃទី៣ឆ្លងចូលថ្ងៃទី៤ធ្នូ ដោយបានបញ្ជូនកម្លាំងយោធាពិសេសទៅកាន់សភា ដើម្បីរារាំងមិនឱ្យតំណាងរាស្ត្រអាចជួបប្រជុំគ្នាបោះឆ្នោតប្រឆាំងលោកបាន។ តែមិនបានសម្រេច។
មូលហេតុនៃការប្រកាសច្បាប់អាជ្ញាសឹករបស់លោក Yoon Suk Yeol បានកើតឡើងភ្លាមៗ ក្រោយរដ្ឋសភាបានច្រានចោលសំណើរច្បាប់ថវិកាជាតិសម្រាប់ការចំណាយនៅឆ្នាំ២០២៥ ដោយកាត់បន្ថយការចំណាយពីផែនការរបស់រដ្ឋរហូតដល់ទៅជិត៣ពាន់លានដុល្លារ ដែលធ្វើឲ្យ លោក Yoon ខឹងសម្បារចោទសភាមើលងាយសំណើរខ្លួន។សម្រាប់ករណីយ៍នេះដែរ លោកយូនសុកយ៉ឺល ក៏កំពុងជាប់អង្កេតព្រហ្មទណ្ឌពីបទបះបោរ និងជាប់បម្រាមមិនឱ្យធ្វើដំណើរចាកចេញពីប្រទេសទៀតក្នុងពេលរដ្ឋមន្ត្រីក្រសួងការពារជាតិនិងមេប៉ូលិសត្រូវបានចាប់ឃុំខ្លួន។
ប្រធានាធិបតីកូរ៉េខាងត្បូង Yoon Suk Yeol ប្រកាសភ្លាមៗតាមកញ្ចក់ទូរទស្សន៍ថា លោកនឹងចាកចេញពីអំណាច បន្ទាប់ពីសភាបានបោះឆ្នោតដករូបលោកចេញពីអំណាច ប៉ុន្តែលោក បានជំរុញឱ្យបញ្ចប់ «នយោបាយជ្រុលហួសហេតុនិងការប្រឈមមុខគ្នា»។លោកបាននិយាយក្នុងសុន្ទរកថាតាមទូរទស្សន៍ថា៖«ទោះបីពេលនេះខ្ញុំត្រូវដើរចេញមួយរយៈក៏ដោយ ប៉ុន្តែដំណើរឆ្ពោះទៅអនាគត»។
កាលថ្ងៃព្រហស្បតិ៍ ពេលចេញថ្លែងតាមទូរទស្សន៍ជាលើកទី២ លោក Yoon Suk Yeol បានប្តេជ្ញាប្រយុទ្ធដល់ទីបញ្ចប់ និងបានចោទប្រកាន់សភាដែលដឹកនាំដោយបក្សប្រជាធិបតេយ្យធ្វើឲ្យកូរ៉េខាងត្បូងធ្លាក់ចូលទៅក្នុងវិបត្តិជាតិ។
សភាកូរ៉េខាងត្បូងដែលដឹកនាំដោយគណបក្សប្រឆាំង បានគ្រប់ដណ្តប់សភាស្ទើរទាំងស្រុងក្រោយឈ្នះឆ្នោតយ៉ាងច្រើនលើសលប់រហូតដល់ទៅ១៩២ ទល់នឹងបក្សកាន់អំណាចដែលទទួលបានសំឡេងត្រឹមតែ១០៨ប៉ុណ្ណោះ។
