កូនប្រុសប្រធានាធិបតីឥណ្ឌូណេស៊ីចូលខ្លួនទៅទីភ្នាក់ងារប្រឆាំងអំពើពុករលួយ រឿងប្រើប្រាស់យន្តហោះឯកជន
17-December-2025 / ព័ត៌មានអន្តរជាតិ
ឥណ្ឌូណេស៊ី៖ លោក កែសាងប៉ាហ្ការីប(Kaesang Pangarep) កូនប្រុសពៅរបស់ប្រធានាធិបតីឥណ្ឌូណេស៊ីលោកចូកូវីដូដូ( Joko Widodo) បានចូលមកជួបជាមួយទីភ្នាក់ងារប្រឆាំងអំពើពុករលួយ (KPK) ឥណ្ឌូណេស៊ីកាលពីថ្ងៃអង្គារទី១៧កញ្ញា ដើម្បីបកស្រាយពីការប្រើប្រាស់យន្តហោះឯកជននាពេលថ្មីៗនេះ។តែ លោក កែសាងប៉ាហ្ការីប(Kaesang Pangarep) បានបដិសេធការចោទប្រកាន់ពីបទប្រព្រឹត្តខុស និងបញ្ជាក់ថាយន្តហោះនោះជារបស់មិត្តភក្តិ។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃអង្គារ ទី១៧ ខែកញ្ញា ឆ្នាំ ២០២៤។
សូមបញ្ជាក់ថារបៀបរស់នៅដ៏ប្រណីតរបស់ លោក កែសាង(Kaesang) ដែលត្រូវបានបង្ហាញនៅលើបណ្តាញសង្គមដោយភរិយារបស់គាត់ បានបង្កឱ្យមានការរិះគន់ជាសាធារណៈនៅក្នុងប្រទេស។ ការធ្វើដំណើរតាមយន្តហោះឯកជនរបស់ លោកកែសាង( Kaesang) និងភរិយាទៅកាន់សហរដ្ឋអាមេរិកកាលពីខែមុន ក៏បានកើតឡើងបន្ទាប់ពីមានការតវ៉ាទូទាំងប្រទេសប្រឆាំងនឹងសេចក្តីព្រាងច្បាប់មួយដែលកែសម្រួលអាយុដែលអនុញ្ញាតឱ្យរូបលោក ឈរឈ្មោះក្នុងការបោះឆ្នោតថ្នាក់តំបន់នាពេលខាងមុខ។ ទោះជាយ៉ាងណាក្រោយពីមានប្រតិកម្មពីប្រជាពលរដ្ឋ រដ្ឋសភាឥណ្ឌូណេដស៊ីបានដកសេចក្តីព្រាងច្បាប់នេះចេញវិញបន្ទាប់ពីមានការរិះគន់។
លោកប្រធានាធិបតីចូកូវី( Jokowi )កំពុងប្រឈមមុខនឹងការរិះគន់កាន់តែខ្លាំងឡើងនៅក្នុងស្រុកពីការចោទប្រកាន់ថា លោកកំពុងបង្កើតរាជវង្សនយោបាយមុនពេលចាកចេញពីតំណែងនៅខែក្រោយ។ កូនប្រុសច្បងរបស់គាត់គឺ លោកហ្គីប្រានរ៉ាកាប៊ូមីងរ៉ាកា( Gibran Rakabuming Raka) បានជាប់ឆ្នោតជាអនុប្រធានក្រុងកាលពីខែកុម្ភៈ ហើយនឹងចូលកាន់តំណែងនៅខែតុលាខាងមុខ។
ទីភ្នាក់ងារ KPK នឹងសម្រេចក្នុងសប្តាហ៍ក្រោយថាតើ លោកកែសាង( Kaesang) បានរំលោភលើបទប្បញ្ញត្តិណាមួយឬអត់។ ប្រសិនបើត្រូវបានគេរកឃើញថាបានទទួលអំណោយមិនស្របច្បាប់ គាត់អាចនឹងត្រូវបង្ខំឱ្យសងថ្លៃដើមនៃការធ្វើដំណើរតាមយន្តហោះឯកជន។
អ្នកនាំពាក្យរបស់ លោកកែសាង( Kaesang) បានបញ្ជាក់ថា ដំបូងឡើយគាត់មានគម្រោងធ្វើដំណើរតាមជើងហោះហើរពាណិជ្ជកម្មទេ ប៉ុន្តែបានប្តូរទៅជិះយន្តហោះឯកជនរបស់មិត្តភ័ក្តិវិញ ដែលកំពុងធ្វើដំណើរទៅកាន់គោលដៅដូចគ្នា។យោងសារព័ត៌មាន The Straits Times លោក Kaesang គាត់បាននិយាយនៅក្នុងសេចក្តីថ្លែងការណ៍មួយថា៖«ការធ្វើដំណើររបស់ខ្ញុំទៅកាន់សហរដ្ឋអាមេរិកគឺតាមយន្តហោះរបស់មិត្តខ្ញុំ (យន្តហោះឯកជន)»។ លោកមិនបានផ្តល់ព័ត៌មានលម្អិតបន្ថែមអំពីអត្តសញ្ញាណម្ចាស់យន្តហោះដែលជាមិត្តរបស់លោកនោះទេ។
តាមការចុះផ្សាយដដែល អ្នកនយោបាយវ័យក្មេងរូបនេះបានធ្វើដំណើរជាមួយប្រពន្ធរបស់គាត់កាលពីខែសីហា ខណៈដែលការប្រមូលផ្តុំតវ៉ាដ៏ខ្លាំងក្លាបានផ្ទុះឡើងនៅក្នុងប្រទេសឥណ្ឌូណេស៊ី ដោយបានរារាំងដោយជោគជ័យនូវការផ្លាស់ប្តូរច្បាប់បោះឆ្នោតដែលនឹងអនុញ្ញាតឱ្យលោក Kaesang ចូលរួមក្នុងការប្រកួតប្រជែងតំណែងអភិបាលក្រុង។ភ្នាក់ងារប្រឆាំងពុករលួយ KPK បានកោះហៅ លោក Kaesang នៅចុងខែសីហា ជុំវិញការប្រើប្រាស់យន្តហោះឯកជនរបស់គាត់ ដែលក្រោយមកលុបចោលការបញ្ជាទិញ បន្ទាប់ពីពីរបីថ្ងៃ។ នេះបើយោងតាមរបាយការណ៍ប្រព័ន្ធផ្សព្វផ្សាយក្នុងស្រុកដែលនិយាយថា ការពិនិត្យស្រដៀងគ្នានេះកំពុងដំណើរការនៅក្នុងផ្នែកមួយផ្សេងទៀតនៃទីភ្នាក់ងារនេះ។
លោក Kaesang បាននិយាយនៅថ្ងៃទី១៧ខែកញ្ញាថា ដំណើររបស់លោកទៅកាន់ KPK គឺមានបំណងបង្ហាញជាទង្វើនៃតម្លាភាពនិងសុជីវធម៌ដែលជា «គំនិតផ្តួចផ្តើមផ្ទាល់ខ្លួនក្នុងនាមជាពលរដ្ឋល្អហើយមិនមែនដោយសារតែដីកាការកោះហៅជាលាយលក្ខណ៍អក្សរទេ»។លោក Gibran បានបដិសេធរបាយការណ៍ប្រព័ន្ធផ្សព្វផ្សាយដែលថាយន្តហោះឯកជននេះត្រូវបានខ្ចីដោយក្រុមហ៊ុន e-commerce របស់ Sea Ltd Shopee ដែលបានបណ្តាក់ទុននៅក្នុងទីក្រុង Solo ជាកន្លែងដែលគាត់ធ្លាប់ជាអភិបាលក្រុងពីមុន។
