ពលរដ្ឋប៉ាណាម៉ា ធើ្វការតវ៉ាប្រឆាំងវត្តមានរដ្ឋមន្ត្រីការបរទេសអាម៉េរិក លើបញ្ហាតំបន់ព្រែកជីក Panama
21-September-2026 / ព័ត៌មានអន្តរជាតិ
ប៉ាណាម៉ា៖ប្រមុខការទូតអាម៉េរិក លោក ម៉ាខូ រូប៊ីអូ (Marco Rubio) នៅថ្ងៃទី២ ខែកុម្ភៈ បានព្រមានមេដឹកនាំប៉ាណាម៉ាឱ្យទប់ស្កាត់ឥទ្ធិពលចិនលើព្រែកជីក បើមិនចង់រងការឆ្លើយតបធ្ងន់ធ្ងរ។ក្នុងដំណើរទស្សនកិច្ចដំបូងនៅបរទេស ចាប់តាំងពីឡើងកាន់តំណែង លោក ម៉ាខូ រូប៊ីអូ រដ្ឋមន្ត្រីការបរទេសអាម៉េរិក បានជ្រើសយកប៉ាណាម៉ា ស្របពេលលោកប្រធានាធិបតី ដូណាល់ ត្រាំ ចង់យកព្រែកជីកទៅគ្រប់គ្រងវិញ ដោយសារបារម្ភពីឥទ្ធិពលចិន។
ប្រមុខការទូតអាម៉េរិក បានប្រាប់ប្រធានាធិបតីប៉ាណាម៉ា លោក José Raúl Mulino ថា លោក ត្រាំ ចាត់ទុកវត្តមានចិន នៅព្រែកជីកប៉ាណាម៉ា ជាការបំពានសន្ធិសញ្ញារវាងអាម៉េរិក និងប៉ាណាម៉ា ពាក់ព័ន្ធនឹងព្រែកជីក។«លោក រូប៊ីអូ បានបញ្ជាក់យ៉ាងច្បាស់ពីស្ថានភាពបច្ចុប្បន្ន គឺមិនអាចទទួលយកបាន ហើយប្រសិនគ្មានការផ្លាស់ប្តូរទេ អាម៉េរិក នឹងចាត់វិធានការចាំបាច់ ក្នុងការការពារសិទ្ធិរបស់ខ្លួន ដែលមានចែងក្នុងសន្ធិសញ្ញា»។ ក្រសួងការបរទេសអាម៉េរិក បានបញ្ជាក់បែបនេះ នៅក្នុងសេចក្តីសង្ខេបនៃកិច្ចប្រជុំរវាងភាគីទាំងពីរ ចេញនៅថ្ងៃទី២ ខែកុម្ភៈ។
ក្រុមហ៊ុនរបស់ហុងកុង CK Hutchison Holdings កំពុងប្រតិបត្តិនៅកំពង់ផែចំនួន ២ នៃច្រកចូលព្រែកជីកប៉ាណាម៉ា។ ពាក់ព័ន្ធនឹងបញ្ហានេះ អាម៉េរិក បារម្ភថា ចិនអាចប្រើប្រាស់កំពង់ផែនោះ ដើម្បីបិទព្រែកជីក ក្នុងករណីជម្លោះរវាងក្រុងវ៉ាស៊ីនតោន និងប៉េកាំងផ្ទុះឡើងក្រោយជំនួបជាមួយប្រមុខការទូតអាម៉េរិក ដែលមានលក្ខណៈវិជ្ជមាន និងដោយក្តីគោរព ប្រធានាធិបតីប៉ាណាម៉ា បានសន្យានឹងមិនបន្តកុងត្រា ជាមួយគំនិតផ្តួចផ្តើមផ្លូវ និងខ្សែក្រវាត់របស់ចិនឡើយ ពេលវាផុតកំណត់។ នេះបើតាមការចុះផ្សាយរបស់ទីភ្នាក់ងារព័ត៌មាន AP។
សូមបញ្ជាក់ថា ព្រែកជីកប៉ាណាម៉ា ជាផ្លូវដឹកជញ្ជូនដ៏សំខាន់មួយដែលជួយសន្សំពេលវេលាធ្វើដំណើរវាងមហាសមុទ្រប៉ាស៊ីហ្វិក និងអាត្លង់ទិក។ ព្រែកជីកនេះ ត្រូវបានសាងសង់ដោយអាមេរិកក្នុងឆ្នាំ១៩១៤ ហើយប្រគល់ឱ្យប៉ាណាម៉ាគ្រប់គ្រងក្រោមកិច្ចព្រមព្រៀងឆ្នាំ១៩៧៧ ហើយប៉ាណាម៉ាបានគ្រប់គ្រងទាំងស្រុងនៅឆ្នាំ១៩៩៩។សុមបញ្ជាក់ថា កាលពីថ្ងៃអាទិត្យ ពលរដ្ឋប៉ាណាម៉ា បាននាំគ្នាតវ៉ាប្រឆាំងនឹងវត្តមានប្រមុខការបរទេសអាម៉េរិក លោក Marco Rubio ដែលបានបំពេញទស្សនកិច្ចមកកាន់ទីក្រុង Panama ជុំវិញបញ្ហា។
ពាក់ព័ន្ធនឹងបញ្ហាទំនាក់ទំនងអាម៉េរិកនិងប៉ាណាម៉ានេះ ភាគីរដ្ឋាភិបាលទាំងពីរ បានឯកភាពគ្នាចូលរួមដោះស្រាយបញ្ហាប្រឈមរួម ដូចជាអន្តោប្រវេសន៍និងពាណិជ្ជកម្មនៅអំឡុងដំណើរទស្សនកិច្ចរបស់លោក Rubio ប៉ុន្តែនៅតែមិនអាចស្វែងរកដំណោះស្រាយច្បាស់លាស់លើបញ្ហាព្រែកជីក Panama ដែលជាតំបន់ច្រកពាណិជ្ជកម្មផ្លូវសមុទ្រធំលំដាប់ទី២ របស់ពិភពលោក និងត្រូវបានប្រទេសប៉ាណាម៉ាចាត់ទុកជាដែនអធិបតេយ្យភាពមួយរបស់ខ្លួនដោយមិនអាចប្រកែកបាន។
កាលពីសប្តាហ៍មុខ នៅអំឡុងកិច្ចប្រជុំព្រឹទ្ធសមាជិកសភាអាម៉េរិក មន្ត្រីរដ្ឋាភិបាលរបស់លោកដូណាល់ ត្រាំ បានលើកឡើងថា អាម៉េរិកអាចប្រើប្រាស់វិធានការផាកពិន័យ ឬក៏រឹតបន្តឹងលើនាវាដឹកជញ្ជូនទំនិញរបស់ប្រទេសប៉ាណាម៉ា ដែលធើ្វដំណើរចូលទៅកាន់កំពង់ផែរបស់អាម៉េរិក ដើម្បីជាការដាក់សម្ពាធផ្នែកសេដ្ឋកិច្ចលើប្រទេសមួយនេះ ជុំវិញបញ្ហាជម្លោះតំបន់ព្រែកជីកខាងលើ។
ដោយឡែក ងាកមកក្រុមបាតុករប៉ាណាម៉ាឯណោះវិញ បានរិះគន់លោកដូណាល់ ត្រាំ ថាកំពុងព្យាយាមបង្កឱ្យមានសង្គ្រាមលោកលើកទី៣ ជាមួយបណ្តាប្រទេសជិតខាង ដោយសារតែលោកហាក់មានមហិច្ឆតាមិនចេះស្កប់ស្កល់ និងបានប្រកាសចង់បានតំបន់នេះតំបន់នោះស្រេចតែចិត្តនឹកឃើញ តួយ៉ាងមានដូចជា ទឹកដីប្រទេសកាណាដា និងតំបន់ Greedland ជាដើម ហើយថែមទាំងបានបង្ហាញបំណងចង់ឈ្លានពានប្រទេសម៉ិកស៊ិកកូ ដើម្បីបញ្ចប់បញ្ហាអន្តោប្រវេសន៍មកកាន់ទឹកដីសហរដ្ឋអាម៉េរិកទៀតផង។
ក្រុមបាតុករទាំងនេះ បានប្តេជ្ញាចិត្តត្រៀមខ្លួន ដើម្បីតតាំងជាមួយមហិច្ឆតារបស់លោកដូណាល់ត្រាំ និងមិនព្រមបោះបង់តំបន់ព្រែកជីក Panama ដែលជាដែនអធិបតេយ្យភាពរបស់ខ្លួនទៅឱ្យសហរដ្ឋអាម៉េរិកនោះឡើយ។ប្រភព៖ Reuters Connect
