រុស្ស៊ី ប្រាប់ហុងគ្រី ថា ខ្លួនត្រៀមលក្ខណៈរួចជាស្រេច ដើម្បីពិភាក្សាអំពីសំណើសន្តិភាពជុំវិញជម្លោះតែអ៊ុយក្រែនថាទៅមិនបានប្រាប់មុន!
21-September-2026 / ព័ត៌មានអន្តរជាតិ
រុស្ស៊ី៖ នាយករដ្ឋមន្ត្រីហុងគ្រី Viktor Orban បានជួបជាមួយប្រធានាធិបតីរុស្ស៊ី Vladimir Putin កាលពីថ្ងៃសុក្រសប្តាហ៍មុននេះ ដើម្បីពិភាក្សាគ្នាអំពីសន្តិភាពក្នុងប្រទេសអ៊ុយក្រែន ។តែអ៊ុយក្រែនថាពេលជាខ្លួនកាលពីថ្ងៃទី២កក្កដានាយករដ្ឋមន្ត្រីហុងគ្រី Viktor Orbanមិនបានប្រាប់ខ្លួនពីបញ្ហាទៅកាន់ប្រទេសេរុស្ស៊ីឡើយ។
ប្រទេសហុងគ្រីបានចូលកាន់តំណែងជាប្រធានប្តូរវេនរយៈពេល ៦ ខែនៃប្លុកសហភាពអឺរ៉ុប កាលពីថ្ងៃចន្ទសប្តាហ៍មុន។ នៅក្នុងរយៈពេល ៥ ថ្ងៃក្នុងនាមជាប្រធានប្តូរវេន លោក Orban បានធ្វើដំណើរទៅសួរសុខទុក្ខប្រធានាធិបតីអ៊ុយក្រែន Volodymyr Zelenskiy ក្នុងរដ្ឋធានី Kyiv ហើយបានបង្កើតសម្ព័ន្ធភាព "អ្នកស្នេហាជាតិសម្រាប់អឺរ៉ុប" ជាមួយនឹងក្រុមអ្នកជាតិនិយមស្តាំនិយមផ្សេងៗទៀត។
បន្ទាបមក លោកក៏បានបន្តជ្រើសរើសដំណើរទស្សនកិច្ចទៅកាន់ទីក្រុងម៉ូស្គូ នៅក្នុង "បេសកកម្មសន្តិភាព" (តែប៉ុន្មានថ្ងៃមុនពេលរៀបចំកិច្ចប្រជុំកំពូលរបស់ណាតូ ដែលនឹងពិភាក្សាអំពីជំនួយយោធាបន្ថែមទៀតសម្រាប់អ៊ុយក្រែន ដើម្បីប្រឆាំងនឹង "សង្គ្រាមឈ្លានពាន" របស់រុស្ស៊ី) ។
សម្រាប់ ប្រធានគណៈកម្មការអឺរ៉ុប លោកស្រី Ursula von der Leyen វិញមានប្រសាសន៍ក្នុងន័យបន្ទោសថា មានតែការរួបរួម និងការប្តេជ្ញាចិត្តនៅក្នុងបណ្តារដ្ឋទាំង ២៧ របស់សហភាពអឺរ៉ុបតែប៉ុណ្ណោះ ដែលនឹងជួយត្រួសត្រាយផ្លូវ ទៅកាន់សន្តិភាពដ៏ពិតប្រាកដ និងយូរអង្វែងនៅក្នុងប្រទេសអ៊ុយក្រែន” ។ លោកស្រី បានបញ្ជាក់បន្ថែមនៅលើបណ្តាញសង្គម X ថា ការដែលគ្រាន់តែធ្វើឱ្យស្ងប់ចិត្ត «នឹងមិនអាចបញ្ឈប់សកម្មភាពរបស់លោក ពុទីន បានឡើយ» ។
លោក ពុទីន ដែលបានទទួលស្វាគមន៍លោក Orban នៅក្នុងវិមានក្រឹមឡាំង បានប្រាប់ថា លោកបានត្រៀមខ្លួនរួចជាស្រេច ដើម្បីពិភាក្សាអំពី "ចំណុចសំខាន់ៗទាំងអស់" នៃសំណើសន្តិភាព ដើម្បីបញ្ចប់ជម្លោះដែលមានរយៈពេលពីរឆ្នាំកន្លះ ។ទោះបីយ៉ាងណាក្រសួងការបរទេសហុងគ្រី បានឱ្យដឹងនៅថ្ងៃសៅរ៍ថា ហុងគ្រី បានលុបចោលកិច្ចប្រជុំនៃរដ្ឋមន្ត្រីការបរទេសជាមួយអាល្លឺម៉ង់ ដែលគ្រោងរៀបចំនៅថ្ងៃចន្ទ ក្នុងទីក្រុង Budapest ដោយសារតែហេតុផលបច្ចេកទេស មិនមែនជារឿងនយោបាយទេ។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃសៅរ៍ ទី៦ ខែកក្កដា ឆ្នាំ ២០២៤។
សេចក្តីថ្លែងការណ៍របស់ក្រសួងបញ្ជាក់ថា ដោយសារតែការផ្លាស់ប្តូរមិនបានព្រៀងទុកក្នុងប្រតិទិនការងាររបស់រដ្ឋមន្ត្រី ក្រសួងស្នើសុំលើកពេលប្រជុំ ដោយសង្ឃឹមអាចនឹងធ្វើឡើងនៅពេលដ៏ខ្លីខាងមុខ។ ហេតុផលគឺបញ្ហាបច្ចេកទេសសុទ្ធសាធ មិនមែនជារឿងនយោបាយឡើយ»។ទាក់ទងបញ្ហាល់កពេលនេះ ក្រសួងការបរទសអាល្លឺម៉ង់ បានសម្តែងការភ្ញាក់ផ្អើលខ្លាំងចំពោះការលុបចោលនូវជំនួបនេះព្រោះថាវាជាការងារចាំបាច់ បន្ទាប់ពីនាយករដ្ឋមន្ត្រីហុងគ្រី លោក Viktor Orban បានជួបប្រធានាធិបតីរុស្ស៉ី លោក Vladimir Putin កាលពីថ្ងៃសុក្រសប្តាហ៍នេះ។
គួររំឭកដែរថា កាលពីខែ កញ្ញា ឆ្នាំ ២០២២ លោក Viktor Orban គឺជាមេដឹកនាំប្រទេសក្នុង សហភាពអឺរ៉ុបតែម្នាក់គត់ ដែលបានធ្វើដំណើរទៅរុស្ស៊ី ដើម្បីចូលរួមក្នុងពិធីបញ្ចុះសព អតីតមេដឹកនាំសូវៀត លោក Mikhail Gorbatchev។ថ្វីបើ សហភាពអឺរ៉ុបតែងប្រកាន់ជំហរ ថ្កោលទោសយ៉ាងដាច់អហង្ការលើរុស្ស៊ី ដែលបានឈ្លានពានចូលអ៊ុយក្រែន តែលោក Viktor Orban ហាក់សម្តែងទំនាក់ទំនងស្និទ្ធស្នាល និង ប្រក្រតី ជាមួយលោក ពូទីន។ ជាក់ស្តែង ប្រមុខរដ្ឋទាំងពីរ បានជួបចាប់ដៃគ្នាយ៉ាងរាក់ទាក់ នៅទីក្រុងប៉េកាំង កាលពីខែតុលា ឆ្នាំ ២០២៣ ក្នុងពិធីប្រារព្ធខួបពីរឆ្នាំ នៃការស្ថាបនាគម្រោងផ្លូវសូត្រថ្មីរបស់ចិន បើទោះបី តុលាការព្រហ្មទណ្ឌអន្តរជាតិ បានចេញដីកា ចាប់ខ្លួនលោកវ្ល៉ាឌីមៀរ ពូទីន បីបទឧក្រិដ្ឋកម្មសង្គ្រាម យ៉ាងណាក្តី។ក្រៅពីប្រធានាធិបតីរុស្ស៊ីលោក ពូទីន លោក Viktor Orban ក៏តែងបង្ហាញការគាំទ្រយ៉ាងក្លៀវក្លាចំពោះ លោក ដូណាល់ ត្រាំ។ ដូចលោក ដូណាល់ ត្រាំ ដែរ នាយករដ្ឋមន្ត្រីហុងគ្រី រក្សាទំនាក់ទំនងជិតស្និទ្ធ ជាមួយវិមានក្រេមឡាំង ដោយបានប្រឆាំងការផ្គត់ផ្គង់អាវុធទៅឲ្យអ៊ុយក្រែន ព្រមទាំងទិតៀនខ្លាំងៗ ចំពោះទណ្ឌកម្មសេដ្ឋកិច្ច ដែលបស្ចិមលោកបានដាក់លើរុស្ស៊ី។
ឆ្លើយតបនឹងសំនួរ ជុំវិញទស្សនកិច្ចរបស់លោក នៅទីក្រុងកៀវ លោក Viktor Orban បានបញ្ជាក់អំពីគោលជំហររបស់ហុងគ្រី ដែលចង់ដើរតួជាអន្តរការី ក្នុងដំណើរស្វែងរក ផ្លូវចរចាសន្តិភាពណាមួយ ដែលអាចឈានទៅដល់ការបិទបញ្ចប់សង្គ្រាមនៅអ៊ុយក្រែន។ នៅថ្ងៃទី ៨ និង ទី ៩ កក្កដា ខាងមុខនេះ រុស្សីនឹងទទួលស្វាគម នាយករដ្ឋមន្ត្រីឥណ្ឌា លោក Narendra Modi ដែលធ្វើដំណើរមកកាន់រដ្ឋធានីរុស្ស៊ី ជាលើកដំបូង គិតតាំងពីសង្គ្រាមនៅអ៊ុយក្រែន ផ្ទុះឡើង ជាង ២ ឆ្នាំមុនមកផងដែរ។បើគេមិនភ្លេចទេកាលពីខែមុន លោក ពុទីន បាននិយាយថា រុស្ស៊ីនឹងបញ្ចប់សង្គ្រាមនៅអ៊ុយក្រែន លុះត្រាតែទីក្រុងគីវ យល់ព្រមទម្លាក់មហច្ឆតារបស់ណាតូ ព្រមទាំងប្រគល់ខេត្តចំនួន ៤ ដែលទាមទារដោយទីក្រុងមូស្គូមកឱ្យរុស្ស៊ី ។ ការទាមទារទាំងអស់ខាងលើ ត្រូវក្រុងគីវ របស់អ៊ុយក្រែន ធ្វើការបដិសេធភ្លាមៗផងដែរ។
សារព័ត៌មាន AP នាថ្ងៃសៅរ៍ ទី៦ ខែកក្កដា ឆ្នាំ២០២៤ បានផ្សាយថា ក្រុមមេដឹកនាំនៃបណ្តាប្រទេសជាសមាជិកអង្គការ NATO គ្រោងនឹងសន្យានៅសប្តាហ៍ក្រោយស្តីពីការបន្តរក្សារំហូរអាវុធនិងគ្រាប់ទៅកាន់អ៊ុយក្រែនក្នុងកម្រិតដូចសព្វថ្ងៃ សម្រាប់រយៈពេលយ៉ាងហោចណាស់១ឆ្នាំទៀត ក្រោមក្តីសង្ឃឹមថា វានឹងជួយផ្តល់ការធានាទុកចិត្តដល់អ៊ុយក្រែន អំពីការបន្តគាំទ្ររបស់ពួកគេ ហើយទន្ទឹមគ្នាបង្ហាញឱ្យប្រធានាធីបតីរុស្ស៉ី លោក វ្ល៉ាឌីមៀរ ពូទីន មើលឃើញថា ពួកគេនឹងមិនចាកចោលអ៊ុយក្រែនឡើយ។
ប្រាប់ក្រុមអ្នកសារព័ត៌មាន កាលពីថ្ងៃសុក្រសប្តាហ៍ អគ្គលេខាធិការអង្គការ NATO លោក Jens Stoltenberg បាននិយាយថា ប្រទេសទាំង៣២ ដែលជាសមាជិករបស់បក្សសម្ព័ន្ធយោធាលោកខាងលិចមួយនេះ បានចំណាយថវិកាសរុបប្រហែល៤០ពាន់លានអឺរ៉ូ (៤៣ពាន់លានដុល្លារអាមេរិក) ក្នុងមួយឆ្នាំ ទៅលើសព្វាវុធនិងសម្ភារយោធាសម្រាប់អ៊ុយក្រែន គិតចាប់តាំងពីសង្គ្រាមបានផ្ទុះឡើងដំបូង កាលពីខែកុម្ភៈ ឆ្នាំ២០២២មក ហើយនេះគួរតែជាខ្សែបន្ទាត់គោលអប្បបរមា ចាប់ពីឥឡូវតទៅខាងមុខ។លោក Stoltenberg បាននិយាយដូច្នេះថា «ខ្ញុំរំពឹងថា ក្រុមសម្ព័ន្ធមិត្ត NATO នឹងសម្រេចចិត្តនៅឯកិច្ចប្រជុំកំពូលសប្តាហ៍ក្រោយ ដើម្បីបន្តរក្សាការផ្គត់ផ្គង់សព្វាវុធក្នុងកម្រិតបច្ចុប្បន្ន សម្រាប់រយៈពេលយ៉ាងហោច១ឆ្នាំបន្ទាប់ទៀត»។
បើតាមប្រមុខ NATO រូបនេះ បរិមាណនៃការផ្តល់នឹងត្រូវបែងចែកក្នុងចំណោមសមាជិក NATO ដោយផ្អែកលើកំណើនសេដ្ឋកិច្ចរបស់ប្រទេសនីមួយៗ ហើយក្រុមមេដឹកនាំ NATO នឹងពិនិត្យមើលតួលេខទាំងនោះឡើងវិញ នៅពេលពួកគេជួបគ្នាជាថ្មី នៅឆ្នាំ២០២៥។ក្រុមមេដឹកនាំ NATO នឹងត្រូវបើកកិច្ចប្រជុំកំពូលនៅរដ្ឋធានីវ៉ាស៉ីនតោនរបស់សហរដ្ឋអាមេរិក រយៈពេលសរុប៣ថ្ងៃ ដោយចាប់ផ្តើមពីថ្ងៃអង្គារសប្តាហ៍ក្រោយ នាឱកាសខួបទី៧៥ នៃការបង្កើតបក្សសម្ព័ន្ធយោធានេះឡើង និងស្របពេលដែលកងកម្លាំងរបស់រុស្ស៉ី កំពុងតែបន្តព្យាយាមវាយលុករុលទៅមុខ នៅតាមខ្សែបន្ទាត់សមរភូមិមុខនៃតំបន់ភាគខាងកើតអ៊ុយក្រែនក្នុងឆ្នាំទី៣ នៃសង្គ្រាម៕
