រដ្ឋមន្ត្រីការបរទេសជប៉ុនសង្ឃឹមថា នៅឆ្នាំ២០២៧ និងឆ្នាំ២០២៨ ដែលជាឆ្នាំបោះឆ្នោតសកល គ.ជ.ប ពិតជារៀបចំការបោះឆ្នោតប្រកបដោយសេរី និងយុត្តិធម៌ ជាបន្តទៀត
21-September-2026 / ផ្សេងៗ
ភ្នំពេញ៖ លោកស្រី កាមិកាវ៉ា យ៉ូកុរដ្ឋមន្ត្រីការបរទេសជប៉ុន ដែលជាប្រទេសផ្តល់ជំនួយដ៏សំខាន់មួយសង្ឃឹមថា នៅឆ្នាំ២០២៧ និងឆ្នាំ២០២៨ ដែលជាឆ្នាំបោះឆ្នោតសកល គ.ជ.ប ពិតជារៀបចំការបោះឆ្នោតប្រកបដោយសេរី និងយុត្តិធម៌ជាបន្តទៀត។
ប្រសាសន៍លោកស្រីកាមិកាវ៉ារួមជាមួយលោក អ៊ូអិណុ អាតស៊ូហ្ស៊ី ឯកអគ្គរាជទូតវិសាមញ្ញ និងពេញសមត្ថភាពនៃប្រទេសជប៉ុន ប្រចាំនៅកម្ពុជា រួមជាមួយសហការីជា ច្រើនរូប ធ្វើឡើងក្នុងជំនួបជាមួយលោកប្រាជ្ញ ចន្ទ ប្រធាន គ.ជ.ប កាលពីរសៀលថ្ងៃទី៦ ខែ កក្កដា ឆ្នាំ ២០២៤ នៅទីស្តីការ គ.ជ.ប។ លោក ប្រាជ្ញ ចន្ទ បានរាយការណ៍ថា ក្នុងរយៈពេល ៣ឆ្នាំ ចាប់ពីឆ្នាំ២០២២ រហូតដល់ឆ្នាំ ២០២៤ គ.ជ.ប បានចាត់ចែងគ្រប់គ្រង និងរៀបចំការបោះឆ្នោតចំនួន ៤ នៅកម្ពុជា ទាំងការបោះឆ្នោតជាសកល ទាំងការបោះឆ្នោតជាអសកល ដែលត្រូវបានរួមបញ្ចូលបច្ចេកវិទ្យា ដើម្បីជាជំនួយដល់ការអនុវត្តដោយដៃរបស់មន្ត្រីបោះឆ្នោតមាន ដូចជា ការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៥ ការបោះឆ្នោតជ្រើសបតាំងតំណាងរាស្ត្រ នីតិកាលទី៧ ការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ និងការបោះឆ្នោតជ្រើសរើសក្រុមប្រឹក្សា អាណត្តិទី៤។
ក្នុងក្របខណ្ឌនៃការធ្វើទំនើបកម្មការងារបោះឆ្នោតនេះ ម៉ាស៊ីនមេ (Servers) បានដើរតួនាទីយ៉ាងសំខាន់ក្នុងការងារគ្រប់គ្រង ចាត់ចែង និងរៀបចំកិច្ចការបច្ចេកទេសបោះឆ្នោត នៅដំណាក់កាលសំខាន់ៗ រួមមាន៖ ទី១. គឺការពិនិត្យបញ្ជីឈ្មោះ និងចុះឈ្មោះបោះឆ្នោតប្រចាំឆ្នាំ ដែលបញ្ជីបោះឆ្នោត គឺជាផ្នែកមួយដ៏មានសារៈសំខាន់ សម្រាប់ការបោះឆ្នោតដោយ សេរី ត្រឹមត្រូវ និងយុត្តិធម៌។ ទី២. គឺការចុះបញ្ជីគណបក្សនយោបាយឈរឈ្មោះបោះឆ្នោត និងបញ្ជីបេក្ខជនឈរឈ្មោះ ដែលម៉ាស៊ីនមេ (Servers) បានដើរតួនាទីក្នុងប្រតិបត្តិការគ្រប់គ្រងការងាររៀប ចំបញ្ជីបេក្ខជនឈរឈ្មោះដោយគណបក្ស នយោបាយ ការផ្ទៀងផ្ទាត់លក្ខខណ្ឌឈរ ឈ្មោះបោះឆ្នោតនានារបស់បេក្ខជន និងបញ្ជីគណបក្សនយោបាយដោយមន្ត្រីបោះឆ្នោត នៅក្នុងប្រព័ន្ធកម្មវិធីគ្រប់គ្រងការចុះបញ្ជីគណបក្សនយោបាយឈរ ឈ្មោះបោះឆ្នោត និងបញ្ជីបេក្ខជនឈរឈ្មោះ ដែលនឹងចូលរួមដោះស្រាយ និងកាត់បន្ថយបញ្ហាប្រឈមនានាដូចជាលក្ខ ខណ្ឌអាយុ លក្ខខណ្ឌមានឈ្មោះក្នុងបញ្ជីបោះឆ្នោត ការឈរឈ្មោះស្ទួន លើសពីមួយមណ្ឌល ឬលើសពីមួយគណបក្សរបស់បេក្ខជន ជាដើម។ ទី៣. គឺការបោះឆ្នោត ការរាប់សន្លឹកឆ្នោត និងការប្រកាស ផ្សាយលទ្ធផលនៃការបោះឆ្នោត។
លោក ប្រាជ្ញ ចន្ទ ប្រធាន គជប មានប្រសាសន៍បន្តថា ប្រទេសជប៉ុន ក៏ដូចជាស្ថានទូតជប៉ុនប្រចាំកម្ពុជា ជាពិសេសប្រជាជនជប៉ុន ដែលបានជួយប្រទេសកម្ពុជាពាក់ព័ន្ធនឹងកិច្ចការបោះឆ្នោតកន្លងមក តាមរយៈការផ្តល់ជំនួយផ្នែកបច្ចេកទេស សម្ភារបរិក្ខារ ហិរញ្ញវត្ថុ និងអ្នកជំនាញការសម្រាប់ការបោះឆ្នោតតាំងពីឆ្នាំ១៩៩៨ ឆ្នាំ២០០២ ឆ្នាំ២០០៣ ឆ្នាំ ២០០៧ និងនៅឆ្នាំ២០០៨ ដែលជំនួយទាំងនោះសរុបជាទឹកប្រាក់ជាង ១៣លានដុល្លារ។
លោកស្រីកាមិកាវ៉ា យ៉ូកុ បានថ្លែងអំណរគុណដល់ លោក ប្រាជ្ញ ចន្ទ ដែលបានលើកឡើងយ៉ាងក្បោះក្បាយអំពីការបោះឆ្នោតនៅកម្ពុជា ជាពិសេសអំពីសារៈសំខាន់នៃម៉ាស៊ីនមេ (Servers) ហើយ លោកស្រី បានចាប់ អារម្មណ៍បីចំណុច រួមមាន៖•ទំនើបកម្មរបស់ គ.ជ.ប ក្នុងដំណើរការចុះឈ្មោះបោះឆ្នោត។•ការចុះបញ្ជីគណបក្សនយោបាយ•ការផ្សព្វផ្សាយលទ្ធផលបោះឆ្នោត។
ទន្ទឹមនឹងនោះលោកស្រីមានចម្ងល់ថា តើមានឈ្មោះស្ទួនក្នុងបញ្ជីបោះឆ្នោតដែរឬទេ? តើ គ.ជ.ប មានធ្វើជំរឿនដែរឬទេ?លោក ប្រាជ្ញ ចន្ទ បានបញ្ជាក់ជូនថា បញ្ជីបោះឆ្នោតបច្ចុប្បន្នមានគុណភាព ៩៩,៩៩% គឺមិនមានឈ្មោះស្ទួនទេ។ ហើយ គ.ជ.ប បានធ្វើបច្ចុប្បន្នភាពបញ្ជីបោះឆ្នោតជារៀងរាល់ឆ្នាំ។ ចំពោះការធ្វើជំរឿន គឺស្ថាប័នរាជរដ្ឋាភិបាលជាអ្នកធ្វើ ហើយ គ.ជ.ប យកទិន្នន័យនោះមកផ្ទៀងផ្ទាត់ជាមួយទិន្នន័យក្នុងបញ្ជីបោះឆ្នោត គ.ជ.ប។
