វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 1860 នាក់
ម្សិលមិញ 6501 នាក់
សរុប 13950415 នាក់
ភ្នំពេញ៖ន្ត្រីជាន់ខ្ពស់គណបក្សយុវជនកម្ពុជា ១៨នាក់ និងថ្នាក់ដឹកនាំថ្នាក់ក្រោមជាតិ នៅតាមមូលដ្ឋានជាច្រើននាក់ទៀត បានលាលែងពីតំណែង។បើតាមលិខិតសុំលាលែងពីតំណែងនៅថ្ងៃទី៣ កុម្ភៈ ដែលកាសែតទទួលបាននោះ រួមមាន អនុប្រធានគណៈកម្មាធិការអចិន្ត្រៃយ៍ និងជាអនុប្រធានគណបក្ស លោក នៅ បូរ៉ា អនុប្រធានគណៈកម្មាធិការអចិន្ត្រៃយ៍ និងជាអនុប្រធានគណបក្ស លោក ហួន ធារិទ្ធ សមាជិកគណៈកម្មាធិការអចិន្ត្រៃយ៍ និងជាអគ្គលេខាធិការគណបក្សលោក ឆុម ចាន់ថន រួមជាមួយថ្នាក់ដឹកនាំជាន់ខ្ពស់ ថ្នាក់ក្រោមជាតិ នៅមូលដ្ឋាន និងសមាជិកជាច្រើននាក់ទៀត។
ពួកគេបញ្ជាក់ពីមូលហេតុដូចគ្នាថា ដោយសារគ្មានសមត្ថភាព លទ្ធភាព និងពេលវេលាគ្រប់គ្រាន់ ដើម្បីបម្រើការងារជូនគណបក្ស។ មូលហេតុត្រូវបានពួកគេបង្ហើបថាមកពី ប្រធានគណបក្សយុវជនកម្ពុជា លោក ពេជ្រ ស្រស់ បានយកលុយហើយស៊ីដាច់ ។ ពួកគេអះអាងថា មួយរយៈចុងក្រោយនេះ លោក ពេជ្រ ស្រស់ បានទទួលលុយជាច្រើនដោយគ្មានប្រភពច្បាស់លាស់ និងទិញដីឡូត៍ពុះលក់ជាច្រើនកន្លែង?។
ប្រធានគណបក្សយុវជនកម្ពុជា លោក ពេជ្រ ស្រស់ ទទួលស្គាល់ថា ពិតជាមានមន្ត្រីក្នុងគណបក្សបានលាឈប់ពីតួនាទី ក្រោមហេតុផលគ្មានពេលវេលាសម្រាប់ការងារ។ លោកថា ការលាលែងរបស់មន្ត្រីទាំងនោះមិនបានធ្វើឱ្យរង្គោះរង្គើដល់គណបក្សនោះឡើយ និងបានចោទមន្ត្រីទាំងនោះថា បាននាំគ្នារៀបគម្រោងលាឈប់ ដែលលោកចាត់ទុកបញ្ហានេះថា ជាទង្វើក្បត់។ លោកថា លោកនឹងចាត់វិធានការតាមផ្លូវច្បាប់ ប្ដឹងមន្ត្រីទាំងនោះឡើងតុលាការ ប្រសិនបើពួកគេផ្សព្វផ្សាយពីគោលបំណងនៃការលាឈប់ខុសពីក្នុងលិខិត ដែលធ្វើឱ្យប៉ះពាល់ដល់កិត្តិយសរបស់លោក។
តែក្រោយមកប្រធានគណបក្សយុវជនកម្ពុជា អះអាងថា នឹងមិនប្ដឹងមន្ត្រីថ្នាក់ក្រោមរបស់ខ្លួនដែលបានលាឈប់ពីគណបក្សនេះ បន្ទាប់ពីលោកថា មន្ត្រីទាំងនោះបានបដិសេធចំពោះការចុះផ្សាយថា លោក ពេជ្រ ស្រស់ ទទួលលុយពីលោក ហ៊ុន សែន ដើម្បីយកមកបង្កើតគណបក្សបច្ចុប្បន្ន។លោកពេជ្រស្រស់បានចាត់ទុកការចុះព័ត៌មាននោះថា ជាការបំផ្លើស ខុសពីការពិត។លោក៖ «ខ្ញុំស្គាល់មនុស្សយ៉ាងច្រើន១០នាក់ ហើយមិនមានសកម្មភាពអីណាស់ណាទេ។ អ៊ីចឹងខ្ញុំដឹងកម្លាំងរបស់ខ្ញុំថា មួយណាជាកម្លាំងពិត ហើយមួយណាគ្រាន់តែជាកម្លាំងលម្អ នយោបាយណាវាមានកម្លាំងពិត កម្លាំងសកម្ម និងកម្លាំងគាំទ្រធម្មតា។ អ៊ីចឹងអ្នកឈប់ មិនប៉ះពាល់កម្លាំងពិតទេ។ ខ្ញុំមិនបានឈ្លោះជាមួយគាត់ទេ ហើយគាត់ក៏បានសារភាព ប្រកាសបដិសេធដែរ»។
គណបក្សយុវជនកម្ពុជា បានបង្កើតឡើងកាលពីឆ្នាំ២០១៥ ដែលដឹកនាំដោយលោក ពេជ្រ ស្រស់។ គណបក្សនេះទទួលបានសំឡេងឆ្នោតចំនួន ១៣ ៨៨១ សំឡេង ឬស្មើនឹង ១,១៩ភាគរយនៃសំឡេងឆ្នោតសរុប ក្នុងអំឡុងពេលនៃការបោះឆ្នោតជ្រើសរើសក្រុមប្រឹក្សាឃុំសង្កាត់ កាលពីឆ្នាំ២០២២។មុនឈានចូលប្រឡូកក្នុងឆាកនយោបាយ ហើយក្លាយជាប្រធានគណបក្សនេះ លោក ពេជ្រ ស្រស់ គ្រាន់តែជាកម្មករ និងជាជាងជួសជុលម៉ាស៊ីននៅក្នុងរោងចក្រកាត់ដេរមួយតែប៉ុណ្ណោះ។ ប៉ុន្តែ ដោយការអភិវឌ្ឍខ្លួនជាបន្តបន្ទាប់ លោក ពេជ្រ ស្រស់ ក៏បានចាប់ផ្ដើមចូលបម្រើការងារជាមន្ត្រីស្ម័គ្រចិត្តនៅអង្គការមួយផ្នែកសុខភាព និងសិល្បៈ ធ្លាប់ធ្វើជាបុគ្គលិកនៅក្រុមហ៊ុនឯកជន រហូតដល់ឆ្នាំ២០០៩ លោកក៏បានបើកអង្គការមួយដែលមានឈ្មោះថា «អង្គការរួមគ្នាដើម្បីភាពរីកចម្រើន» ជាដើម.។
ទោះបីជាគណបក្សយុវជនទើបនឹងចាប់កំណើតមួយនេះ មិនទាន់មានសំឡេងគាំទ្រច្រើនពីប្រជាពលរដ្ឋ ហើយមិនមានអាសនៈនៅក្នុងរដ្ឋសភាក្ដី ក៏ប្រធានគណបក្សលោក ពេជ្រ ស្រស់ រួមជាមួយប្រធានគណបក្សជាង១០ ផ្សេងទៀត មានឱកាសទទួលបានលាភសក្ការៈជាមួយនឹងគណបក្សផ្សេងតាមរយៈតំណែងជាសមាំជិកឧត្ដមក្រុមប្រឹក្សាពិគ្រោះ និងផ្ដល់យោបល់ ដែលបង្កើតឡើង កាលពីឆ្នាំ២០១៨។តួនាទីជាសមាជិកឧត្ដមក្រុមប្រឹក្សាពិគ្រោះយោបល់ដែលមានឋានៈស្មើទេសរដ្ឋមន្ត្រី ។បើតាមកាសង្កេតស្នាដៃសំខាន់របស់លោក ពេជ្រ ស្រស់ ប្រធានគណបក្សយុវជនកម្ពុជា រួមមាន ការចាប់ដៃគ្នាជាមួយគណបក្សហ្វ៊ុនស៊ិនប៉ិច ដើម្បីប្ដឹងរំលាយគណបក្សសង្គ្រោះជាតិ និងប្ដឹងគណៈកម្មការរៀបចំបុណ្យសពបណ្ឌិត កែម ឡី រួមមាន ព្រះតេជព្រះគុណ គុណ ប៊ុត ប៊ុនតិញ លោក ប៉ា ងួនទៀង និងលោក មឿន តុលា ពីបទរំលោភលើសេចក្ដីទុកចិត្តករណីបច្ច័យបុណ្យសព កាលពីឆ្នាំ២០១៧ ។