សម្តេចធិបតីចង់ឲ្យលោក ថូម៉ាស អេនឌ្រូ សរសេររបាយការណ៍អំពីស្ថានភាពសិទ្ធិមនុស្សនៅកម្ពុជាឱ្យបានគ្រប់ជ្រុងជ្រោយ

ភ្នំពេញ៖សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានលើកទឹកចិត្តឱ្យអ្នករាយការណ៍ពិសេសរូបនេះ សរសេររបាយការណ៍ដោយផ្អែកលើព័ត៌មានគ្រប់ជ្រុងជ្រោយពីគ្រប់ភាគីពាក់ព័ន្ធទាំងអស់ និងបន្តធ្វើការយ៉ាងជិតស្និទ្ធជាមួយក្រសួងស្ថាប័នពាក់ព័ន្ធ សំដៅរួមចំណែកដល់ការអនុវត្ត និងលើកកម្ពស់សិទ្ធិមនុស្សនៅកម្ពុជាឱ្យកាន់តែប្រសើរ។ 

នៅក្នុងជំនួបជាមួយសម្តេចធិបតី នាថ្ងៃទី៣០ ខែកក្កដាលោក ថូម៉ាស អេនឌ្រូ (Thomas Andrews) អ្នករាយការណ៍ពិសេសទទួលបន្ទុកស្ថានភាពសិទ្ធិមនុស្សនៅកម្ពុជា បានថ្លែងថា រដ្ឋាភិបាលនិងក្រសួងស្ថាប័នពាក់ពាក់ព័ន្ធ បានផ្តល់ការសហការជាមួយលោកយ៉ាងបើកចំហនិងប្រកបដោយការយោគយល់គ្នា។ ក្នុងបេសសកម្មរយៈពេល១២ថ្ងៃ លោកបានជួបពិភាក្សាការងារជាមួយឥស្សរជនជាន់ខ្ពស់ តំណាងក្រសួងស្ថាប័ន អង្គការសង្គមស៊ីវិល និងបានបំពេញទស្សនកិច្ចនៅជំរុំជនភៀសសឹក ដោយសារជម្លោះព្រំដែនកម្ពុជា- ថៃផងដែរ។

ពោលបន្ទាប់ពីត្រឡប់មកពីពិនិត្យស្ថានភាពនៅតំបន់បឹងត្រកួន តាមបណ្តោយព្រំដែនកម្ពុជា-ថៃ លោក ថូម៉ាស អេនឌ្រូ បានវាយតម្លៃខ្ពស់ចំពោះការយកចិត្តទុកដាក់របស់រដ្ឋាភិបាល ក្នុងការជួយសង្គ្រោះ និងគាំទ្រជនភៀសសឹកដោយសារជម្លោះព្រំដែនកម្ពុជា-ថៃ ដែលមិនទាន់អាចវិលត្រឡប់ទៅលំនៅឋានវិញបាន។ បន្ថែមលើនេះ លោកក៏បានកោតសរសើរចំពោះកម្ពុជា ដែលបានទទួលយកលិខិតូបករណ៍ពាក់ព័ន្ធនឹងសិទ្ធិមនុស្សចំនួន ៨ លើ ៩ ព្រមទាំងបានបញ្ជាក់ពីការប្តេជ្ញាចិត្ត និងត្រៀមខ្លួនរួចជាស្រេចក្នុងការសហការជាមួយកម្ពុជាក្នុងស្មារតីស្ថាបនា ដោយផ្អែកលើច្បាប់ជាតិ និងអន្តរជាតិ។

សម្តេចធិបតី បានថ្លែងប្រាប់អ្នករាយការណ៍ពិសេសផ្នែកសិទ្ធិមនុស្សថា កម្ពុជាយកចិត្តទុកដាក់ការលើកកម្ពស់សិទ្ធិមនុស្ស និងសិទ្ធិសេរីភាពជាមូលដ្ឋាន ដោយផ្អែកលើច្បាប់ជាតិ និងលិខិតូបករណ៍អន្តរជាតិនានា ជាពិសេសការលើកកម្ពស់សិទ្ធិទទួលបានសេវាថែទាំសុខភាព និងការអប់រំជាដើម។ សម្តេចធិបតីបានសង្កត់ធ្ងន់ថា ការប្រើប្រាស់សិទ្ធិ និងសេរីភាព ត្រូវធ្វើឡើងប្រកបដោយការទទួលខុសត្រូវ និងស្របតាមដែនកំណត់នៃច្បាប់។ ទោះជាប្រទេសតូចឬធំក្តី ការអនុវត្តច្បាប់ និងការលើកកម្ពស់សិទ្ធិមនុស្ស គឺត្រូវស្ថិតនៅក្រោមច្បាប់ ហើយប្រទេសនីមួយៗសុទ្ធតែមានលក្ខណៈពិសេសផ្សេងៗពីគ្នា។

សម្តេចក៏បានប្រាប់លោក ថូម៉ាស អេនឌ្រូ អំពីការវិវត្តនៃស្ថានភាពព្រំដែនកម្ពុជា-ថៃ និងគូសបញ្ជាក់អំពីការប្តេជ្ញាចិត្ត ជំហររបស់កម្ពុជាក្នុងការដោះស្រាយបញ្ហាព្រំដែននេះដោយសន្តិវិធី ផ្អែកលើច្បាប់អន្តរជាតិ និងអនុលោមតាមអនុសញ្ញា សន្ធិសញ្ញា និងកិច្ចព្រមព្រៀងដែលមានស្រាប់រវាងកម្ពុជា និងថៃ។

លោក ថូម៉ាស អេនឌ្រូ អ្នករាយការណ៍ពិសេសទទួលបន្ទុកស្ថានភាពសិទ្ធិមនុស្សនៅកម្ពុជាបានចាប់ផ្តើមបំពេញបេសសកម្មផ្លូវការរបស់ខ្លួនចាប់ពីថ្ងៃទី២០ដល់ថ្ងៃទី៣១ ខែកក្កដា ឆ្នាំ២០២៦។ បេសសកម្មរបស់លោកនៅកម្ពុជា មានគោលបំណងវាយតម្លៃស្ថានភាពសិទ្ធិមនុស្សនៅកម្ពុជា រួមទាំងបញ្ហាជួញដូរមនុស្ស ជម្លោះព្រំដែនកម្ពុជា-ថៃ សេរីភាពបញ្ចេញមតិ សេរីភាពសមាគម និងការប្រមូលផ្តុំ ជាដើម៕